‘Kia Fakamatala Tolomaki e Kupu he Atua’
1 Ka loto fakaaue moli a koe he moua taha mena mitaki, nakai kia fakakite e koe ke he aga mo e tau gahua hau? Moli to taute pihia e koe! Hagaao ke he mitaki mo e fakaalofa-totonu kua foaki e Iehova ke he tau tagata, mailoga e puhala ne tali atu e aposetolo ko Paulo. Ne fakapuloa e ia: “Fakaaue ke he Atua he hana mena kua foaki noa nakai maeke ke fakamatala”! Ko e heigoa kua putoia ai he ‘mena foaki noa’ ia? “Ko e fakaalofa noa [oti kana] he Atua” ne kua fakakite ki a tautolu, ko e fakakiteaga mua ue atu he mena fakaalofa noa he hana Tama ko e lukutoto ma e tau agahala ha tautolu.—2 Kori. 9:14, 15; Ioane 3:16.
2 Ko e tau kupu fakakite noa ni kia e tau talahauaga ha Paulo ke he fakaaue? Nakai pihia! Ne fakakite e ia hana loto fakaaue hokulo ke he tau puhala loga. Ne tupetupe lahi mahaki a ia ke he tuaga fakaagaga he hana tau matakainaga Kerisiano mo e manako ke taute e mena kua maeke ia ia ke lagomatai a lautolu ke aoga katoatoa mai he fakaalofa-totonu. Hagaao ki a lautolu ia, ne pehe a Paulo: “Ne hofihofi pihia ha mautolu a fakaalofa kia mutolu, ne fiafia a mautolu ke ta atu kia mutolu, nakai kuenaia e vagahau mitaki he Atua, ka e katoa foki mo e moui ha mautolu ha kua ofania e mautolu a mutolu.” (1 Tesa. 2:8) He lafi ke he lagomataiaga ki a lautolu kua fita he fai vala he fakapotopotoaga ke fakahaohao mitaki ha lautolu a fakamouiaga, ne fakamatala fakamanava lahi e Paulo e tala mitaki, he totou afe e tau maila he fenoga ai ke he fuga kelekele mo e tahi ke kumi a lautolu “ne kotofa ke he moui tukulagi.” (Gahua 13:48) Ko e loto fakaaue hokulo ha Paulo ma e tau mena oti ne taute e Iehova ma hana kua omoi a ia ke ‘fakamatala tolomaki e kupu he Atua.’—Kolo. 1:25.
3 Nakai kia omoi he loto fakaaue ha tautolu ma e tau mena oti kua taute e Iehova ma tautolu ke foaki e lagomataiaga fakaaagaga ki a lautolu kua lata mo e lagomatai he fakapotopotoaga ha tautolu? (Kala. 6:10) Nakai kia omoi a tautolu ke fai vala katoatoa he fakamatala e tala mitaki he Kautu he tau fahi fonua ha tautolu?—Mata. 24:14.
4 Ko e Magaaho ke Fakakite e Loto Fakaaue: He tau tau takitaha he Fakamanatuaga he mate he Keriso kua foaki ki a tautolu e magaaho pauaki ke fakakite e loto fakaaue ma e mena kua taute e Iehova mo Iesu ma tautolu. Nakai ko e taha feleveiaaga noa anei po ke magahala fakamanatu teao. Ne pehe a Iesu: “Kia eke e mutolu e mena nai mo fakamanatuaga kia au.” (Luka 22:19) Ko e Fakamanatuaga he mate ha Keriso e magaaho ke manamanatu ko e faga tagata fefe a Iesu. Ko e magaaho haia ke mailoga kua moui a ia mo e gahuahua he vaha nei, fakalataha mo e lilifu mo e patuiki ne foaki age ki a ia ma e hana moui tua fakamoli mo e poa. Ko e fakamanatuaga nei ko e magaaho foki ke fakakite e omaoma ha tautolu ke he takitakiaga ha Keriso he hataki e ia e tau puhala mo e tau gahua he fakapotopotoaga Kerisiano. (Kolo. 1:17-20) Ko e tau tagata oti he Atua kua lata ke fakalataha fakalilifu ma e Fakamanatuaga he mate ha Keriso. He tau nei to taute ka mole e toaga la he Aho Tuloto, Mati 28, 2002.
5 Mo e laliaga fakamakai nukua taute ato hoko e fakalatahaaga he Fakamanatuaga he tau kua mole, 25,639 e katoatoa ne fakalataha auloa he la matakavi ha Niu Silani. Toko fiha la ka fakalataha mai he tau nei? Falanaki ni e lahi ke he ‘gahua malolo mo e fakamakutu ha tautolu,’ he lagomatai e tokologa ke hohoko mai.—1 Timo. 4:10.
6 Lafi foki ke he fakalataha atu ke he Kaiaga Afiafi he Iki, liga maeke ia tautolu ke fakatupu ki mua e gahua ha tautolu ke he fonua. Nakai fakauaua ai, totou afe e tau matakainaga tane mo e fifine ka paionia fakaku ke taha po ke fai mahina. He tau tau takitaha ke he lima tau kua mole, ha ha ia tautolu e avelesi he 3,226 e tau paionia fakaku he magahala Fakamanatuaga ia Mati ke hoko ki a Me. Maeke nakai ia koe ke fakatoka e tau matagahua hau ke olioli e kotofaaga he paionia fakaku he tau nei? Ko e puhala mitaki ke fakakite hau a loto fakaaue moli ma e foakiaga fakaalofa he Atua he poa ha Keriso. Maeke ia koe ke iloa tonu e fakamonuinaaga ha Iehova, ne fakakite mai he tau iloaaga nai.
7 Ko e matakainaga fifine ne gahua tupe tumau ne tohi e mena ne tupu ki a ia he paionia fakaku ia Mati kua mole: “Ne fakamalolo he Ha Tautolu a Fekafekauaga he Kautu ia Fepuari 2001 e tau tagata oti ka maeke he tuaga ha lautolu ke paionia fakaku he magahala Fakamanatuaga. Ha kua lima e Aho Faiumu ia Mati, ne felauaki mitaki e mena nei mo e fakaholoaga hau. Ti fifili ai au ke tuku e laupepa ole haku.” He kamata e ia e mahina, kua fakatoka e ia e foliaga ma hana he lali ke kamata e fakaakoaga Tohi Tapu he kaina. Ne kautu nakai a ia? E, ne 52 e tula hana he fakamatala he mahina ia! Ko e fakahikuaga hana? “Ha ha i ai e tau monuina homo ue atu ka lafilafi fakalahi atu e fakamakamaka ha tautolu.”
8 Ko e heigoa e tau aoga ke he magafaoa ka paionia auloa? Ko e magafaoa ne tokofa ne taute pihia ia Aperila kua mole ne eke ai mo mahina ke manatu tumau. Ne pehe e matua fifine: “Ko e onoonoaga fiafia haia ha mautolu ma e tau aho takitaha, ha kua fakalataha a mautolu ke he feleveiaaga! Ko e tau fakatutalaaga ke he ha mautolu a tau gahua he fonua he aho ne taute e kaiaga afiafi mo mena fiafia lahi.” Ne pehe e tama tane: “Kua fiafia au he gahua he fekafekauaga he fonua mo Dad he vahatapu, ha ko e mena fa gahua tupe a ia.” Ne lafi he matua tane: “Ha ko e ulu he magafaoa, ne makona e logonaaga haku he iloa kua fakalataha auloa a mautolu ke he gahua aoga lahi he magaaho ni ha mautolu.” Maeke nakai e magafaoa hau ke paionia auloa? He ha he fai fakatutalaaga fakamagafaoa mo e kitia ka maeke he magafaoa katoa hau ke paionia fakaku he magahala nei he Fakamanatuaga?
9 Maeke Nakai ia Tautolu ke Taute a Mati mo Mahina Mitaki Lahi? He mataulu he 2000 tau, ne fakatu he Ha Tautolu a Fekafekauaga he Kautu e huhu: “Taute Nakai e Tautolu a Aperila 2000 mo Mahina Mitaki Lahi ha Tautolu?” Ko e heigoa e tali? Ne 1,780 e paionia fakaku ne hu ma e taha e mahina mo e tapunu fou ne moua ke he tau foakiaga mekasini. Manatu nakai e koe e alaala ne ha ha he fakapotopotoaga hau ha ko e matala he gahua fakaagaga ke he mahina pauaki ia? Maeke nakai ia tautolu ke fakatatai po ke fakalaulahi atu foki e tau mouaaga ia he tau nei? Fakalataha mo e laliaga he tau tagata oti, to eke a Mati 2002 mo “Mahina Mitaki Lahi ha Tautolu.” Ko e ha ia Mati?
10 Ko e ua la e kakano kua eke a Mati mo mahina pauaki he gahua. Fakamua, to taute e Fakamanatuaga he matahiku ia Mati, kua foaki mai ki a tautolu e magaaho lahi he mataulu he mahina ke uiina e tokologa ke fakalataha mai. Uaaki, ko e lima la e matahiku vahatapu katoa ia Mati he tau nei, kua taute ai ke mukamuka lahi e paionia fakaku ma lautolu kua gahua tupe po ke o he aoga. He ha he nofo mogonei mo e fakatoka e setulu gahuahua, he fakaaoga e kalena ne foaki atu ke fakamau hifo ai? Liga mukamua lahi e paionia fakaku ke he tuga he manatu hau. Ma e fakatai, he setulu ke valu e tula he gahua he fonua ke he tau fahitapu lima ia, to lata ni a koe ke moua 10 e tula ke lafi ki ai he vala ne toe he mahina ke katoa e 50 he tula.
11 Ko e heigoa he tau motua ka taute ke lagomatai oti a lautolu he fakapotopotoaga ke “fakamatala tolomaki e tau kupu he Atua”? Atihake e alaala he puhala mai he tau vala he feleveiaaga mo e tau fakatutalaaga fakatagata. Ko e tau leveki mo e tau hagai Fakaakoaga Tohi he Fakapotopotoaga ka fakailoilo ai ke tutala mo e tau tagata oti ne kotofa ke he matakau ha lautolu mo e foaki e lagomataiaga fakatagata. Ko e tau kupu totonu gahoa he fakamaloloaga po ke tau talahauaga lagomatai ka liga lata ki ai. (Tau Fakatai 25:11) To tokologa ka kitia ko e falu hikihikiaga ikiiki he tau setulu ha lautolu, kua maeke ia lautolu ke fiafia e kotofaaga he fekafekau ko e tau paionia fakaku. He tau fakapotopotoaga loga, laulahi ai, he tau motua mo e tau fekafekau lagomatai mo e tau hoana ha lautolu kua fakatoka e fakafifitakiaga mitaki he paonia fakaku tokoua ai he magahala Fakamanatuaga. Kua fakamalolo he mena nei e tokologa he tau tagata fakailoa ke fakalataha mo lautolu. Ha ko e tau fatia ke he tau tino ha lautolu po ke falu tutuaga foki, falu he tau tagata fakailoa kua liga nakai ha ha he tuaga ke paionia, ka e maeke ke fakamalolo a lautolu ke fakatata e loto fakaaue ha lautolu he taute fakalahi e mena kua maeke ia lautolu he fekafekauaga fakalataha mo lautolu ne toe he fakapotopotoaga.
12 Kua falanaki e kautuaga ke he fakatokaaga mitaki he vala he tau motua. Ko e tau feleveiaaga ma e gahua he fonua kua lata ke setulu ke he tau magaaho hagahaga mitaki he fahitapu katoa. Ka pihia, to kotofa tuai he leveki fekafekau e tau matakainaga tane kua lata ke taute e tau feleveiaaga oti ma e fekafekauaga. Ko e tauteuteaga mitaki ka lata ke maeke he tau feleveiaaga nei ke nakai molea ke 10 ke he 15 e minuti, putoia ai e fakatokatokaaga he tau matakau, kotofa e matakavi, mo e talahau e liogi. (Kikite e Puha Huhu he Ha Tautolu a Fekafekauaga he Kautu ia Sepetema 2001.) Ko e setulu he gahua ma e mahina kua lata ke fakamaama fakamahino ke he fakapotopotoaga mo e pili hake he lapa vala tala.
13 Kua lata ke fakatoka e matakavi lahi. Kua lata e leveki fekafekau ke matutaki mo e matakainaga ne leveki e tau matakavi ke taute e tau fakatokatokaaga ke gahua ai he tau matakavi ne nakai fa taute tumau. Peehi e lata ke gahua e tau kaina ne fa ai moua ha tagata i ai, fakamatala he tau puhala tu mo e he taha fale koloa ke he taha fale koloa, mo e fakamatala ai ke he tau magaaho afiafi. Ka latatonu, kua liga lata falu tagata fakailoa he lagomatai ke taute e fakamatala he telefoni.
14 Lagomatai a Lautolu ke Liu Fekafekau Foki: Fai nakai he fakapotopotoaga hau kua nakai liu fakalataha ke he fakamatalaaga he tala mitaki? Fai vala agaia ni a lautolu ia he fakapotopotoaga ti kua lata a lautolu ke lagomatai. (Sala. 119:176) Ha kua tata lahi e lalolagi tuai nei ke he fakaotiaga mo e haia ni i mua e lalolagi fou, ha ha ia tautolu e kakano mitaki ke fakamalolo ke lagomatai a lautolu kua nakai gahuahua. (Roma 13:11, 12) He lima e tau kua mole, molea e 26,500 he tau tagata he tau tau takitaha ne kua talia ke lagomatai mo e kua liu gahuahua ai. Ko e heigoa ha tautolu ka taute ke lagomatai e tokologa ke fakamalolo e fakaalofa mo e mauokafua ne moua fakamua e lautolu?—Hepe. 3:12-14.
15 To manako e kau he tau motua ke fakatutala e puhala kua maeke ia lautolu ke lagomatai a lautolu ne kua nakai gahua ai ke he tau tau gahoa kua mole. (Mata. 18:12-14) Kua lata ke fakakiakia he tohikupu e tau laupepa Congregation’s Publisher Record mo e fakamau a lautolu oti kua nakai gahua ai. Ko e laliaga pauaki kua lata ke taute he puhala he fakatokaaga leveki ke foaki e lagomataiaga. Liga manako e motua ke fina atu ke kitia e tagata fakailoa pauaki ha ko e mena mahani mo e feoakiaga fakamua mo ia, po kua ole ke he falu tagata fakailoa ke lagomatai ki ai. Liga ko lautolu ne fakaako mo ia nei kua nakai gahua mogonei mo e ke fakaata e magaaho ke foaki e lagomataiaga pauaki he magaaho tonu nei. Amanaki ai, tokologa ia lautolu ne nakai gahuahua fakamua ka fakalagalaga a lautolu ke liu kamata e fakamatala he kupu he Atua. Ka lata a lautolu, nakai fai magaaho foki ma lautolu ka kia kamata he magahala Fakamanatuaga!—Kikite e Puha Huhu he Ha Tautolu a Fekafekauaga he Kautu ia Novema 2000 ma e falu vala tala foki.
16 Lata Nakai e Falu ke Fakamatala? Kua fakatumau ni a Iehova ke fakamonuina hana tau tagata he ta mai a lautolu ko e “tau mena kua manako ki ai e tau motu oti.” (Hakai 2:7) He tau tau takitaha kua totou afe nukua eke mo tau tagata fakailoa nakai la papatiso? Ko hai a lautolu ia? Ko e tau fanau he Tau Fakamoli a Iehova kua eke mo tau tagata holo ki mua he Tohi Tapu. Iloa fefe e tautolu kua lata a lautolu ke eke mo tau tagata fakailoa he tala mitaki?
17 Tau Fanau he Tau Fakamoli a Iehova: Tokologa e tau fanau ne fakalataha mo e tau mamatua ha lautolu he taha fale ke he taha fale he tau tau, ka e nakai la fekafekau ia lautolu ko e tau tagata fakailoa nakai la papatiso. Liga ko e magaaho mitaki a Mati ke kamata ai a lautolu. Iloa fefe e koe kaeke kua lata e tama hau? Ne talahau he Organized to Accomplish Our Ministry he lau 100 ko e “magaaho ka fakafifitaki mitaki hana mahani mo e maeke ke fakakite e ia e talahauaga fakatagata he tua hana he tutala ke he falu hagaao ke he tala mitaki, ne fakalagalaga mai he loto ke taute pihia.” Ka manatu a koe kua lata e tama hau, tutala mo e taha he tau motua he Komiti Fekafekau he Fakapotopotoaga.
18 Tau Tagata Fakaako Tohi Tapu ne Lata: He mole e uta he tagata fakaako Tohi Tapu e iloilo mo e levaleva e fano he tau feleveiaaga, kua liga manako a ia ke eke mo tagata fakailoa he Kautu. Kaeke ke taute e koe fakaakoaga mo e tagata fakaako pihia, manamanatu ke he tau huhu nei: Kua tolomaki ki mua nakai a ia, felauaki ai ke he hana tau he moui mo e mena iloa? Kua kamata nakai a ia ke talahau noa atu e tua hana ke he ha tagata? Kua “fakatapulu” nakai a ia “ke he tagata fou”? (Kolo. 3:10) Kua hokotia nakai a ia ke he tau lakaaga he tau tagata fakailoa nakai la papatiso, ne fakatoka mai he lau 97-9 he tohi Our Ministry? Ka pihia, kua lata ia koe ke matutaki ke he Komiti Fekafekau he Fakapotopotoaga ke taute ai e tau fakatokatokaaga ma e ua e motua ke feleveia mo koe mo e tagata fakaako hau. Ka lata a ia, to fakailoa atu he tau motua ki a ia ke kamata ke fakalataha ke he fekafekauaga he fonua.
19 Ka e Kua a Aperila mo Me? Ko e tau mahina pauaki foki anei he fakalahi e gahua he fekafekauaga he fonua. Tokologa kua paionia fakaku ia Mati ne liga maeke ke matutaki foki ia Aperila mo/po ko Me. He magahala ia Aperila mo Me, to tuku fakamua e tautolu ke foaki e tau mekasini he Kolo Toko mo e Awake! he fekafekauaga. Ko e tau lauiaaga aoga ha ia i ai ke he tau momoui ha lautolu kua totou ki ai! Kua lahi mahaki e gahua ne taute he tau mekasini nei ne kua ha ha i ai e malikiti homo ue atu ne kua moua ke he lalolagi katoa. Ko e laliaga pauaki ia Aperila mo Me ke foaki e tau mekasini ke he tokologa he tau tagata. Fakatokatoka mogonei ke fakalataha katoatoa i ai.
20 Fakalataha mo e gahua fakamatala tupu ki mua ne fakatoka ki ai, kua lata nakai ia koe ke fakamalikiti e numera he tau mekasini hau mai he fakapotopotoaga? He tau he fekafekauaga katoa, fakakite e tautolu e Watchtower mo e Awake! he tau Aho Faiumu takitaha, ko e Aho Mekasini pauaki. Ha ko e mena to tokologa ka fakalataha ke he fekafekauaga he paionia fakaku mo e to fakakite e tautolu e tau mekasini ma e ua e mahina katoa, ti liga lata ke fakamalikiti e ota mekasini hau he fakapotopotoaga. Ka pihia, fakamolemole fakailoa fakamafiti ke he fekafekau mekasini he fakapotopotoaga hau. He magaaho taha, ko e leveki he tau tohi kua lata ke fakalahi e tuleke Manako Nakai a Koe ke Iloa Lahi e Tohi Tapu? ma e tau tagata oti ke fakaaoga.
21 Tokologa ne fakakite e loto fakaaue ma e vala he Ha Tautolu a Fekafekauaga he Kautu ne mataulu “Talahauaga Hagaao ke he Tau Mekasini.” Kua fakaaoga nakai e koe e fakatokaaga nei he ako e tau fakataitaiaga fakatata he mekasini? He ha he fakaaoga e taha vala he fakaakoaga Tohi Tapu he magafaoa hau he tau fahitapu takitaha ke fakagahuahua e tau fakataitaiaga nei?
22 Fakaaoga Katoatoa e Magahala Fakamanatuaga Nei: Tuga ni e aposetolo ko Paulo, kia fakakite e tautolu ki a Iehova e loto fakaaue lahi ha tautolu ke he “hana mena kua foaki noa nakai maeke ke fakamatala” ha ko e ha tautolu a fakalatahaaga katoatoa ke he tau gahua fakaagaga ne fakatoka ma e magahala Fakamanatuaga nei. Putoia ai e tau mena nei (1) fakalataha ke he magaaho aoga nei he tau, ko e fakamanatu he Kaiaga he Iki he Aho Tuloto, Mati 28, 2002; (2) lagomatai a lautolu kua lolelole ke liu fakamata e “fakaalofa fakamua” ha lautolu (Fakakite. 2:4; Roma 12:11); (3) lagomatai e tau fanau ha tautolu mo e ha tagata fakaako Tohi Tapu kua lata ke eke mo tau tagata fakailoa nakai la papatiso; mo e (4) putoia katoatoa ai ke he gahua fakamatala, pihia ke he paionia fakaku ia Mati mo e molea atu.—2 Timo. 4:5.
23 Ko e liogi fakamakamaka ha tautolu ke igatia a tautolu mo e fakalataha katoatoa ke he fakamatala he tala mitaki he Kautu he magahala Fakamanatuaga nei, he fakakite e hokulo he ha tautolu a loto fakaaue ma e tau mena oti kua taute e Iehova ma tautolu.
[Puha he lau 6]
Setulu Fakatagata he Fekafekauga ke he Fonua ma Mati 2002
Aho Tapu Aho Gofua Aho Ua Aho Lotu Aho Tuloto Aho Faraile Aho Faiumu
1 2
Aho Mekasini
3 4 5 6 7 8 9
Aho Mekasini
10 11 12 13 14 15 16
Aho Mekasini
17 18 19 20 21 22 23
Aho Mekasini
24 25 26 27 28 29 30
FAKAMANATUAGA Aho Mekasini
MOLE
31 TOAGA LA
Maeke nakai a koe ke setulu 50 e tula katoatoa ke paionia fakaku ia Mati?