Aoga Mai he Fakaako e Fakatata Atu ki a Iehova
1 He Fonoaga Fahimotu “Tau Tagata Fakapuloa Fakamakai he Kautu,” ne fiafia lahi a tautolu ke moua e tohi Fakatata Atu ki a Iehova. Tokologa ne totou e tohi he tau mogoia ni. Tokologa atu foki ne nakai fakauaua kua omoomoi ke taute pihia foki ha ko e lauga he tau ma e 2003: “Kia fakatata atu a mutolu ke he Atua, ti fakatata mai ai a ia kia mutolu.”—Iako. 4:8.
2 Ia Mati to kamata a tautolu ke fakaako e Fakatata Atu ki a Iehova he Fakaakoaga Tohi he Fakapotopotoaga. Puhala fe ke aoga lahi ki a tautolu e fakaakoaga ha tautolu? Kua aoga lahi e tauteute tuai. Ua e fahitapu ne fakatoka ma e tau veveheaga takitaha, mo e nakai loga e paratafa ne setulu ke fakaako he tau fahitapu takitaha. To lahi e magaaho ka fakaata he mena nei ki a koe ke tali mai he loto he fakave ke he fakaako hau mo e manamanatu fakahokulo ke he vala tala. Lafi ki ai, to gahoa ni e tau paratafa ka fakaako he tau fahitapu ka taute e liu fakamanatu he fakahikuaga he veveheaga, fakaata taha magaaho ke fakaaoga e vala pauaki he tohi.
3 Kamata he veveheaga 2, ko e puha ne mataulu “Tau Huhu ke Manamanatu Fakahokulo Ki Ai” ne tu he matahiku he tau veveheaga takitaha. Ka oti e fakaako he paratafa fakahiku he veveheaga, ko e leveki fakaakoaga tohi ka fakaholo atu e matakau ke fakatutala ke he puha. To taaki mai e ia he tau tagata he matakau, he kumikumi e tau fua mitaki he manamanatu fakahokulo ha lautolu ke he tau Tohiaga Tapu. (Fakatai 20:5) Ke lafi ke he tau huhu he puha, liga talahau e ia e tau huhu ke he taha magaaho mo e taha magaaho tuga a nei: “Ko e heigoa he vala tala nei ne tala atu ki a koe hagaao ki a Iehova? Lauia fefe e moui hau? Maeke fefe ke fakaaoga e koe ke lagomatai e falu?” Ko e foliaga hana ke futia e tau tali mai he tau loto, ka e nakai ke kamatamata e matakau ke he tau mena ikiiki.
4 Kua kehe lahi e Fakatata Atu ki a Iehova. Pete kua fakaheke he tau tohi oti he “fekafekau fakamoli mo e loto matala” a Iehova ko e tohi nei kua fakatoka katoatoa ni ke fakatutala ke he tau aga ha Iehova. (Mata. 24:45-47) Ko e magaaho fiafia ha ia kua fakatoka mai i mua ma tautolu! To monuina lahi a tautolu mai he fakaako fakahokulo ke he mahani ha Iehova. Kia lagomatai he fakaakoaga a tautolu ke fakatata fakalahi ke he ha tautolu a Matua he lagi, mo e kia au atu e lauia mitaki ha tautolu he lagomatai e falu ke taute pihia foki.