Maeke e Atua ke Hukia e Logonaaga​​—Puhala Ka Fakafiafia e Tautolu a Ia

Kua fai magaaho nakai ne pakia lahi a koe ti fakahiku ke tagi?​—a Liga pihia a tautolu oti. Ka e he falu magaaho ne liga nakai ko e tino ha tautolu ne mamahi. Liga fai tagata ne talahau falu mena kelea ne nakai mooli hagaao ki a tautolu. Maeke e mena ia ke fakahukia, pihia nakai?​— Maeke foki e Atua ke mamahi po ke hukia ka talahau e tau mena pikopiko hagaao ki a ia. O mai la ke tutala ke he mena nei mo e kitia e puhala ka fakafiafia e tautolu e Atua ka e nakai fakamamahi a ia.

Pehē e Tohi Tapu ne talahau falu tagata kua fakaalofa a lautolu ke he Atua ka e “fakahukia a ia.” E, ne “fakahogohogo e lautolu” e Atua! Ka e nakai fai tagata kua maeke ke fakapakia e tino ha Iehova ko e Atua. Ha ko ia ko e Atua malolō ue atu. O mai la ke kitia e kakano ne hukia e logonaaga ha Iehova ka nakai taute e tautolu e tau mena ne talahau e ia.

Ko e tau tagata tokoua fakamua ne tufuga e Iehova he lalolagi ne fakahukia lahi mahaki a ia. Ne tuku a laua nei he Parataiso he lalolagi ne fakahigoa ko e “kaina ko Etena.” Ko hai a laua nei?​— E, ko Atamu ti fai magaaho he mole, ko Eva. O mai la ke kitekite ke he mena ha laua ne taute ke fakamamahi a Iehova.

He mole e tuku e Iehova a laua he kaina, ne tala age a ia ki a laua ke leveki ai. Ne tala age foki a ia to fai fanau a laua mo e maeke ke nonofo he kaina ia ti nakai mamate. Ka e ato fai fanau a Atamu mo Eva, ne tupu e mena kelea lahi mahaki. Iloa nakai e koe e mena ia?​— Ne fakaohooho he agelu a Eva ti pihia foki ki a Atamu ke totoko ki a Iehova. O mai la ke kitia e mena ne tupu.

Ne omoomoi he agelu e gata ke tuga kua tutala. Ti fiafia a Eva ke he mena ne logona e ia​—pehē e gata to eke a ia ke ‘tuga ne Atua.’ Ti taute e ia e mena ne tala age he gata ki a ia ke taute. Iloa nakai e koe ko e heigoa e mena ia?​—

Ne kai e Eva e fua he akau ne tala age a Iehova ki a Atamu kua nakai lata ia laua ke kai. Ato tufuga he Atua a Eva, ne tala age a ia ki a Atamu: “Ko e tau akau oti kana ha he kaina ke kai ai ni e koe. Ka ko e akau ke iloa ai e mitaki mo e kelea, aua neke kai ai e koe; ha ko e aho ka kai ai e koe to mate ai ni a koe.”

Ne iloa e Eva e fakatufono ia. Ka kua onoono tumau a ia ke he akau ia, ti kitia ai e ia “ko e akau mitaki ni ke kai, mo e fulufuluola mai, . . . ti toto ai e ia ke he fua he akau mo e kai ai.” Ne age foki e ia e fua he akau ki a Atamu, ti “kai ai foki e ia.” Ko e ha ne taute e Atamu e mena ia he manatu e koe?​— Kakano kua mua atu e fakaalofa ha Atamu ki a Eva ke he fakaalofa haana ki a Iehova. Ne fifili a ia ke fakafiafia a Eva ka e nakai fakafiafia e Atua. Ka kua mua e aoga ke omaoma ki a Iehova ke he omaoma ke he ha tagata foki!

Manatu nakai e koe e gata ne tutala ki a Eva? Tatai ni mo e tagata ne maeke ke taute e punua fakatino ke tuga na tutala, ti kua fai mena foki ne taute e gata ke tuga kua tutala. Ha hai e leo ne hau he gata?​— Ko e leo he “gata tuai haia, kua higoa ko e tiapolo, ko Satani.”

Iloa nakai e koe e puhala kua maeke ia koe ke fakafiafia a Iehova?​— Maeke ia koe ke taute pihia he lali tumau ke fakafiafia a ia. Pehē a Satani na maeke a ia ke fakaohooho e tau tagata oti ke taute e tau mena kua manako a ia ke taute e lautolu. Ti fakamalolō e Iehova a tautolu: “Haku tama na e, kia iloilo ai a koe, kia fiafia ai haku loto; kia fai kupu au ke tali age kia ia kua fakafiu mai kia au.” Ne fakafiufiu e Satani a Iehova. Pehē na maeke a ia ke fuluhi kehe e tau tagata oti mai he fekafekau ki a Ia. Ko e mena ia, kia fakafiafia a Iehova he omaoma mo e fekafekau ki a ia! To lali fakalahi nakai a koe ke taute e mena ia?​—