Fai Agelu Kelea Kia?

Fai. Tutupu mai i fe a lautolu? Manatu ko e mena tufugatia he Atua e tau agelu ti tuku age e mena fakaalofa he atāina ke fifili. Nakai leva he tufuga e tagata taane mo e fifine fakamua ko Atamu mo Eva, ne fakaaoga fakahehē he mena moui fakaagaaga e atāina haana ke fifili ti fakaohooho e totokoaga he lalolagi. Ne kautū a ia he fakaohooho a Atamu mo Eva ke totoko e Atua. (Kenese 3:1-7; Fakakiteaga 12:9) Nakai totoku he Tohi Tapu e higoa po ke tuaga he mena fakaagaaga nei i luga he lagi ato totoko a ia. Ka e mole e totoko haana, kua felauaki e higoa ne tuku age he Tohi Tapu ki a ia ko Satani, ne kakano “Totoko,” mo e Tiapolo ne kakano “Pikopiko.”​—Mataio 4:8-11.

Momoko ai, ne nakai oti he mena ia e totokoaga ke he Atua. He vahā ha Noa ne fai agelu “kua toka e lautolu e mena ne nonofo ai a lautolu” ko e magafaoa he Atua he lagi. Ne o hifo mai a lautolu ke he lalolagi ti faliu tino tagata ke taute e tau mahani fakalialia mo e feuaki, nukua nakai lautatai mo e matagahua ne tufuga a lautolu ke taute.​—Iuta 6; Kenese 6:1-4; 1 Peteru 3:19, 20.

Ko e heigoa ne tupu ke he tau agelu kelea ia? Magaaho ne fakahoko he Atua e fakapuke ke he lalolagi katoa ke fakameā ai, ne liu a lautolu fakafaliu ti liliu ke he lagi. Ka kua nakai fakaatā he Atua e tau agelu fakalialia nei ke liliu ke he “ha lautolu a lilifu.” Ne tuku atu e ia a lautolu ke he tuaga tokolalo he “pouli” fakaagaaga ne higoa ko Tartarus. (Iuta 6; 2 Peteru 2:4) Kua tuku he tau temoni nei a lautolu i lalo hifo he takitakiaga ha Satani ko e Tiapolo, ko e “iki he tau temoni,” ne “faliu e ia a ia mo agelu he maama.”​—Mataio 12:24; 2 Korinito 11:14.

Fakaako he Tohi Tapu ko e Kautu faka-Mesia he Atua, ko e fakatufono he lagi ne fakatū ai he 1914.a He mole e mena ofoofogia ia ne tupu, ko Satani mo e haana tau temoni kua tolo hifo mai he lagi ti kua līlī ke he lalolagi. Ko e kelea muitui mo e mahani feuaki ne kua holofa he lalolagi ha tautolu ko e fakamooliaga he aga ke taui atu mo e fakaohooho kelea ha lautolu.​—Fakakiteaga 12:9-12.

Ha kua tupu lahi e aga fakalialia mo e mahani favale ti mailoga ai kua tata lahi e fakaotiaga he pule matakutakuina ha lautolu. Nakai leva, ko e tau mena momoui fakaagaaga nei ne mahani kelea to līlī. Ka mole e pule he Kautu he Atua ke he parataiso he lalolagi ke he 1,000 tau, to fakatoka mai fakakū ti ko e magaaho fakahiku foki ma e tau agaaga kelea ia ke kamatamata e tau tagata. To moumou tukulagi mogoia a lautolu.​—Mataio 25:41; Fakakiteaga 20:1-3, 7-10.