Kumikumi ke he Aolagi mo e Fakataulatua​—Puhala Kia ke iloa Anoiha?

KUMIKUMI KE HE AOLAGI

Ko e kumikumi ke he aolagi (astrology) kua fakavē ke he taofiaga na omoomoi lahi e tau fetū, mahina, mo e tau palaneta ke he tau momoui he tau tagata he lalolagi. Ne talahau he tau tagata kumikumi ke he aolagi ko e tutūaga he tau mena nei he lagi he mogo ne fanau e tagata kua matutaki ke he mahani mo e vahā anoiha he tagata ia.

Pete kua kamata mai i Papelonia i tuai e kumikumi ke he aolagi, kua mahuiga agaia. Hagaao ke he kumikumiaga he 2012 i United States, taha mai he tolu e tagata ne hūhū tala ki ai ne manatu ko e kumikumi ke he aolagi kua “tuga e mena fakasaiene,” mo e 10 e pasene ne pehē “ko e mena fakasaiene moolioli.” Pihia nakai? Nakai. Hanei e kakano.

• Ko e tau palaneta mo e tau fetū ne nakai fakatoka mai ha malolō ke lauia e tau tagata ke tuga he talahau he tau tagata kumikumi ke he aolagi.

• Fa hagaao e tau fuafuaaga ke he tau mena loga ti maeke ke putoia ha tagata.

• Ko e tau fuafuaaga he kumikumi ke he aolagi mogonei ne fakavē ke he taofiaga tuai na holo viko e tau palaneta he fua lalolagi. Ka ko e tala mooli, na holo viko e tau palaneta he laā.

• Ko e tau fuafuaaga ne taute he tau tagata kehekehe ne kumikumi ke he aolagi hagaao ke he taha e tagata kua nakai tatai.

• Ko e kumikumi ke he tau aolagi ne tuku e tau tagata ke he 12 e vahega, po ke tau fakamailoga zodiac he fakatatau ke he tau aho fanau ha lautolu. Ha kua hikihiki e tuaga he fua lalolagi ke he loga e tau senetenari, ti ko e tau aho ne matutaki ke he tau fakamailoga zodiac kua nakai tatai ke he magaaho ne holo e laā he tau putuputu fetū ne fakahigoa aki e tau fakamailoga.

Kua pehē ko e tau fakamailoga zodiac ati maeke ke iloa tuai e mahani he tagata. Ka ko e tala mooli, ko e tau tagata ne tatai e aho fanau ne nakai tatai e tau mahani; ko e aho fanau he tagata kua nakai fakakite ha mena ke he mahani haana. Nakai kitia he tau tagata kumikumi ke he aolagi e tuaga mooli he tau tagata, ka kua fakafili e lautolu e aga mo e mahani he tagata he fakavē ke he tau manatu fakataitai. Nakai kia ko e fili tagata anei?

FAKATAULATUA

He vahā fakamua ne o atu e tau tagata ke he tau taulatua. Falu taulatua ne onoono ke he tau fakamailoga tuga e tau vala i loto he tino he tau manu mo e tau tagata po ke puhala ne tuotuo he moa taane e tau mena kai. Falu ne fuafua he fakavē ke he puhala ne pili e tau vala lau tī po ke tau vala kofe ke he kapiniu. He vahā nei kua fakaaoga e lautolu e tau pelē pepa fakataulatua, tau fua polo kerutali (crystal ball), dice, mo e falu mena ke “totou” e vahā anoiha he tagata. Ko e fakataulatua kia e puhala mauokafua ke iloa aki e vahā anoiha? Nakai. To moua e tautolu e fakamaamaaga.

Manamanatu ke he matakupu he tatai tumau. Ko e tau puhala fakataulatua kua nakai fetataiaki. Pete foki ka taha e puhala ne fakaaoga, kua kehekehe e tau fuafuaaga. Ma e fakatai, ka hūhū he tagata e hūhū ne tatai ke he tokoua e taulatua hagaao ke he vahā anoiha he fakavē ke he “totouaga” he tau lau pelē ne tatai, kua lata ke tatai e tau tali. Ka e nakai fa pihia.

Ko e tau lagatau po ke tau foliaga he tau taulatua kua tuahā ki ai. Ko e tau tagata kitekite ne pehē ko e tau pelē pepa fakataulatua po ke tau fua polo kerutali ko e tau koloa fakaaoga noa ni mo e kua onoono e taulatua ke he tau puhala he tagata ka e nakai ke he tau koloa ne fakaaoga. Ma e fakatai, ko e taulatua ne makaka to hūhū e tau hūhū fakalapalapa ti onoono fakamitaki ke he tau puhala tali mo e foliga he tagata ke iloa a ia. Kua nava mogoia ke he taulatua he iloa e tau tala mo e tau tuaga mooli, ka ko e mena tala age laia he tagata. Ha kua falanaki ai ke he taulatua, ne maeke falu taulatua ke moua e tau tupe loga mai he tau tagata ha lautolu.

TALAHAUAGA HE TOHI TAPU KI A TAUTOLU

Ko e kumikumi ke he aolagi mo e fakataulatua kua fakakite ne liga kua fitā e iloa tuai e vahā anoiha ha tautolu. Ka e pihia nakai? Tala mai he Tohi Tapu kua maeke a tautolu ke fifili e tau mena ke talitonu ki ai po ke manako ke taute, ti ko e tau fifiliaga ia kua lauia e vahā anoiha ha tautolu.​—Iosua 24:15.

Fai kakano foki e tau tagata ne tapuaki ke he Atua ke tiaki e kumikumi ke he aolagi mo e fakataulatua, ha kua nakai talia he Atua e tau mena fakataulatua oti. Moua e tautolu he Tohi Tapu e tau kupu nei: “Aua neke kitia ia koe taha . . . kua talahau mena he kitekite ke he tau aolagi, po ke taha kua kumi ke he tau fakamailoga, po ke taha taulatua, Po ke tagata fakavai gata, po ke taha kua kumi ke he tau atua, po ke taha ne ha i ai e tau agaga talahau tuai, po ke taha kua kumi atu kia lautolu ne mamate. Ha kua vihiatia e Iehovaa a lautolu oti kua eke e tau mena ia.”​—Teutaronome 18:10-12.