Ko e Heigoa e Kakano ma Haau ke Iloa e Atua?
Hoko ke he vala tala nei, kua iloa e tautolu e tau puhala ke moua e tali ke he hūhū, Ko hai e Atua? Kamata e tautolu he fakaako mai he Tohi Tapu ko e higoa haana ko Iehova mo e fakaalofa e aga mua ue atu haana. Fakatutala foki a tautolu ke he tau mena ne kua taute mo e tau mena ka taute e ia ke aoga e tau tagata haana. Pete kua loga lahi e tau mena ke fakaako hagaao ke he Atua, liga manamanatu a koe ko e heigoa e kakano he taute pihia e koe.
Mavehe mai a Iehova “kaeke ke kumi e koe a ia, ti moua e koe a ia.” (1 Nofoaga he Tau Patuiki 28:9) Manamanatu ke he mena fakaalofa ne mua atu ka kumi mo e iloa e koe e Atua—to “fakafetui a Iehova” mo koe! (Salamo 25:14) Ko e heigoa e kakano he fakafetuiaga kapitiga pihia ma haau?
Fiafia mooli. Fakamaama ai ko Iehova ko e “Atua monuina [fiafia].” (1 Timoteo 1:11) He fakatata ki a ia mo e fifitaki e tau puhala haana ka moua e koe e fiafia mooli, ti aoga ke he logonaaga, manamanatuaga, mo e malolō tino haau. (Salamo 33:12) Maeke foki a koe ke atihake e moui fiafia he kalo mai he puhala moui fakahanoa, feaki e tau aga ke malolō e tino, mo e mitaki tumau e tau fakafetuiaga mo e falu. To talia e koe e talahauaga he salamo ne pehē: “Ko e mitaki kia au ke fakatata ke he Atua.”—Salamo 73:28.
Leveki mo e mailoga takitokotaha. Mavehe a Iehova ke he tau fekafekau haana: “To fakatonu e au kia koe, mo e kitekite au kia koe.” (Salamo 32:8) Kakano e mena ia kua leveki e Iehova e tau fekafekau haana mo e foaki e lagomatai kua felauaki ke he tau tuaga ha lautolu takitaha. (Salamo 139:1, 2) Ka moua e koe e fakafetuiaga mitaki mo Iehova, to iloa e koe kua fakalataha tumau a ia mo koe.
Vahā mua ue atu anoiha. Lafi ke he foaki ki a koe e fakavēaga ke moua e moui fiafia mo e mitaki mogonei, hafagi foki e Iehova ko e Atua ki a koe e vahā mitaki ue atu anoiha. (Isaia 48:17, 18) Pehē e Tohi Tapu: “Ko e moui tukulagi foki hanai, kia iloa e lautolu a koe, ko e Atua moli tokotaha ni, katoa mo ia ne fakafano mai e koe, ko Iesu Keriso haia.” (Ioane 17:3) He tau magaaho vihi nei, ko e amaamanakiaga ne foaki he Atua kua tuga e taula ka fakatumau aki a tautolu ke “nakai matoho mo e mauokafua.”—Heperu 6:19.
Ko e falu ni anei he tau kakano aoga he iloa mitaki e Atua mo e feaki e fakafetuiaga tata mo ia. Fakamafana ki a koe ke tutala ke he Tau Fakamoli a Iehova po ke fakakia e jw.org ma e falu vala tala aoga foki.