Puha Huhu

◼ Heigoa kua lata ke tokaloto he totou e tau paratafa he tau feleveiaaga?

Ko e magaaho fakatoka ma e Fakaakoaga he Kolo Toko mo e Fakaakoga Tohi he Fakapotopotoaga kua fakaaoga lahi atu ke he totouaga he tau paratafa. Kakano ia ko e matakainaga tane ne kotofa ke totou ne ha ha i ai e matagahua uka ha ko e faiaoga. Lata ia ia ke totou he puhala ke ‘fakakite atu ai e alito’ he vala tala ati maeke ia lautolu ne fanogonogo ke maama ai ti kua fakaohooho ke fakagahuahua. (Nehe. 8:8) Ati, lata lahi he tagata totou ke tauteute fakamitaki e kotofaaga hana. (1 Timo. 4:13; kikite fakaakoaga 6 he School Guidebook.) Ha ha i lalo e falu fakaakoaga aoga ke fakakakano e totouaga fakapapiliki.

Peehi e Kupu kua Lata: Fifili fakamua e tau kupu po ke tau alaga kupu ne lata ke peehi ke fakakite tonu e manatu.

Fakaleo Fakahako e Tau Kupu: Kia fakaleo mo e vagahau fakamitaki ke maama he tau tagata fanogonogo e tau alaga kupu ne ha ha i ai he tohi. Kumi e tau kupu nakai fa mahani po ke lavea e fakaaoga ke he tohi vagahau, po ke fanogonogo ke he tau kasete he Sosaiete.

Vagahau Fakalahi mo e Fakaalaala: He vagahau fakalahi kua omoomoi ai e fiafia, fakalagalaga e tau logonaaga, mo e kua fakaohooho atu a ia ne fanogonogo.

Kia Mafanatia mo e Gutu Mahifi: Kaeke fakamukamuka to maeke e gutu mahifi. Kaeke tauteute mo e fakagahuahua, to fakatotoka hifo e loto he tagata totou, ati fua mai e totouaga ne fakafiafia ka e nakai ne fakafiufiu mo e fakamohe.​—Hapa. 2:2.

Totou e Mena Tuga he Lomi: Kua mahani e tau matahui tala mo e tau fakailoaaga i loto he tau parenetese po ke tau parakete ke totou fakaleo lahi ke fakakakano ai e manatu ne lomi. Kaeke ko e fakamailoga ke fakailoa e punaaga he vala tala, ti nakai totou. Kia totou e tau matahui tala ne fakamailoga he paratafa, ti kamata ai pehe: “Pehe mai he matahui tala . . . ” Oti he totou, ti liu matutaki atu ke he paratafa.

Kaeke totou fakamitaki atu ke he papiliki, to eke e mena ia mo puhala aoga lahi ma tautolu ke ‘fakaako atu e falu ke omaoma ke he tau mena oti ne tala atu’ he Faiaoga Lahi ha tautolu.​—Mata. 28:20.