Aoga Fekafekau Fakateokarasi he 2001
1 Ha i ai he Tohi Tapu loga e tau kakano nukua lata ia tautolu oti ke eketaha ke he Aoga Fekafekau Fakateokarasi.—Fakatai 15:23; Mata. 28:19, 20; Gahua 15:32; 1 Timo. 4:12, 13; 2 Timo. 2:2; 1 Pete. 3:15.
2 Ko e totouaga fakafahitapu he Tohi Tapu e taha maga he fakaholoaga he aoga kua leva tigahau. Kua fakatatai e totouaga ke he taha e lau he Tohi Tapu he tau aho takitaha. Ke kamata he tau nei, kua fakatoka foki e totouaga he Tohi Tapu ke he tau fahitapu takitaha he liu fakamanatu. Ko e totouaga he Tohi Tapu lafi ki luga, ne setulu he tau tau tolu e kua mole, kua oti tuai. Kaeke manako agaia a koe ke totou molea atu he vala ne setulu, kia taute ni e koe e fakaholoaga totou hau.
3 Ko e kotofaaga Nu. 2 ne fakamahani e tau matakainaga tane ke “totou tohi” e Kupu he Atua. (1 Timo. 4:13) Kaeke kua kotofa a koe ke totou e tohi, ti fakamahani ke totou fakaleo lahi ti liu foki mo e liu foki. Kia fakaaoga e tau autiokasete Tohi Tapu he Sosaiete ke tolomaki atu e fakaleoaga he kupu, ke fakamatoho e leo, mo e falu vala kehekehe he totou fakamitaki.
4 Ko e kotofaaga Nu. 3 mo e Nu. 4 ne fakave ke he tohi Reasoning, nukua taute tuai ke fakaaoga he fekafekauaga he fonua. Ka loa lahi e vala ne fifili atu ki a koe ke taute he magaaho ne fakatoka, ti fifili fakamahao e mena ne aoga lahi ke he fonua he fakapotopotoaga. Fakaaoga taha fakatokaaga ne kua lata mo e fonua.
5 Kia lali fakalahi ke taute hau a tau kotofaaga mai he aoga. Fakatoka kehe e magaaho ke tauteute fakamitaki, ti vagahau mai he loto hau. To eke a koe mo taha fakamaloloaga ke he fakapotopotoaga, ati moua e koe e aoga he gahua mo e loto katoa he Aoga Fekafekau Fakateokarasi he 2001.