Ko e Aoga ke Fakailoilo Aki a Tautolu ma e Tau Mena kua Mua Atu

¹ Na o e tau tagata he aoga ke moua e tau fakaakoaga ke lagomatai aki a lautolu ke moua e tau foliaga ha lautolu he moui. Ko e heigoa e foliaga, mogoia, kua mua he fakaheke e Foaki he moui ke lagomatai e falu ke ako hana tau finagalo mo e hana tau puhala? Nakai fai. Ko e kakano he Aoga Fekafekau Fakateokarasi ke mau tauteute a tautolu ke fakaako e tua ha tautolu ke he falu. Ti, he o mai ke he aoga he tau fahi tapu takitaha, hane moua e tautolu e tau puhala ke fakailoilo aki a tautolu ma e gahua mua atu he moui.

² Kua foaki mai he fufuta he mahina kua mole he Ha Tautolu a Fekafekauaga he Kautu e “Setulu he Aoga Fekafekau Fakateokarasi ma e 2003.” Kua putoia he setulu e tau fakamaamaaga ke he puhala ke fakaholo aki e aoga. Liga to moua e koe kua mitaki ke toka e setulu i loto he tohi Benefit From Theocratic Ministry School Education hau, ti kua lata ke tamai mo koe ke he Aoga Fekafekau Fakateokarasi he tau fahi tapu takitaha. Manamanatu la ke he falu vala he Aoga Fekafekau Fakateokarasi ma e 2003.

³ Alito he Vagahau: Kamata ia Ianuari, to kamata e tau aoga takitaha aki e lauga lima minuti hagaao ke he alito he vagahau po ke puhala totou, kumikumi, po ke fakaako atu. Ko e leveki aoga ka hafagi aki e tau lauga nai, po ke kotofa e ia e taha motua kua lautonu ke taute e lauga nai. To fakamaama he tagata lauga e kakano he matakupu mo e aoga he alito he vagahau. Ti lata mogoia ke fakalaulahi e lauga he fakatutala ke he tau fakatai faka-Tohiaga Tapu mo e fakataitai e puhala ke fakaaoga aki, mataala ke onoono ko e fakaaoga fefe ka o atu ke he fekafekauaga he fonua.

⁴ Kotofaaga Nu. 1: Ko e tau matakainaga tane ka kotofa ke taute e lauga fakaako nai ti mailoga ke “hagaaki e onoonoaga ke he kakano uho he vala tala ne fakatutala ki ai.” Kakano ke fakakite ke he fakapotopotoaga e puhala ke fakaaoga e vala tala ia. Kaeke moua e koe e kotofaaga nai, kikite e lau 48-9 he tohi Ministry School ma e tau lagomataiaga ke he puhala ke tauteute tuai, mo e kumikumi ke he tau tohi lagomatai kua fakakite mai pihia mo e index i lalo hifo he mataulu “Practical application.”

⁵ Setulu Totouaga he Tohi Tapu: Kaeke, ke he tau magahala kua mole, kua nakai matutaki tumau e totouaga hau ke he Tohi Tapu he tau fahi tapu, ko e ha he nakai fifili ke muitua ke he setulu he tau nai? Ko lautolu ne taute pihia to oti e tau Tohiaga Tapu Heleni Kerisiano ka totou he matahiku he tau. Ko e tau fua mitaki he kamata e fakaholoaga totouaga he Tohi Tapu ke he tau Tohiaga Tapu Heleni Kerisiano kua fakakite mai he lau 10, paratafa 4, he tohi Ministry School.

⁶ Tau Fakamaamaaga Mai he Totouaga he Tohi Tapu: Ko e vala nai kua fakaloa ke hogofulu e minuti ke maeke he toloaga ke fakakite e tau manatu ke he totouaga he fahi tapu ia. Ko lautolu ne kotofa ki ai kua lata ke gahua ni ke he matahola kua kotofa. To taute ke he tau fahi tapu takitaha, putoia foki e fakatutala liu fakamanatu. He totou e koe e tau veveheaga katoa kua kotofa, kumi e tau vala ne aoga lahi ki a koe ka taute e fakaakoaga fakamagafaoa hau, ke he hau a fekafekauaga, po ke he puhala moui hau. Ko e tau mahani fe ha Iehova kua kitia he fehagai mo e tau tagata mo e tau motu? Ko e heigoa ne ako e koe kua fakamalolo aki hau a tua mo e ati hake hau a fakaaue ki a Iehova? Ataina ke fakakite e manatu ke he ha vala he tau veveheaga kua kotofa, pihia foki mai he tau kupu ka totou he Kotofaaga Nu. 2, ha kua nakai putoia e tau manatu fakakite he matakainaga ka totou tohi.

⁷ Kotofaaga Nu. 2: Ko e kotofaaga fakamua ke he tagata fakaako he tau fahi tapu takitaha ko e fakaako ke totou ke he toloaga. Ke he tau totouaga oti he tau mahina takitaha, ka e nakai putoia e totouaga he tau fahi tapu fakahiku he mahina, to moua mai ni he fakaholoaga totouaga Tohi Tapu fakafahi tapu. Ko e totouaga he fahi tapu fakahiku he mahina to moua mai he Ko e Kolo Toko. Ko e tagata fakaako ka totou mai e tohi ia to totou katoa mo e nakai fai fakafeleveiaaga po ke fakakatoatoaaga. Ke he puhala nai, kua maeke ia ia ke kikite fakamahao ni ke he hana tau puhala totou.​—1 Timo. 4:13.

⁸ Kotofaaga Nu. 3 mo e Nu. 4: Falu he tau kotofaaga nai kua mua atu e loga e tau vala lagomatai kua moua mai he tohi Reasoning ka fakatatai ke he falu tohi; falu ko e matapatu he lauga ni hokoia. Ko lautolu ka moua e tau kotofaaga ia ne gahoa e tau tohi lagomatai po ke ko e matapatu lauga ni hokoia, nukua moua e magaaho ke fakalaulahi ha lautolu a tau lauga he kumikumi ke he tau tohi faka-Kerisiano ha tautolu. Maeke he mena nai ke fakamukamuka e tau matakainaga fifine ke felauaki e tau tali ha lautolu ke he ha lautolu a tau hoa lauga.

⁹ Tau Fakaveaga: Tuga ne fakakite mai he lau 45 he tohi Ministry School, to kotofa he leveki aoga e fakaveaga. Kaeke nakai taute pihia, ti fifili ni he tau matakainaga fifine e fakaveaga mai he lau 82. Kaeke lauga e matakainaga fifine laga taha he ua e mahina, ko e tau fakaveaga 30 kua kehekehe ka fakaaoga ke liga katoa lima e tau. Ko e tau matakainaga fifine ne fifili e Nu. 30, ne fakahigoa, “Taha fakaveaga kua felauaki mo e matakavi hau,” kua lata ke tohi e fakaveaga i lalo po ke i tua he laupepa kotofaaga (S-89). Ko e leveki aoga ka tohi e aho ne lauga e tagata fakaako he lau 82 i loto he tohi ke he tapa he fakaveaga ne fakaaoga e ia. To taute e ia e mena nai he magaaho taha ka fakamailoga e laupepa fakatonu he tagata fakaako.

¹⁰ Laupepa Fakatonu: Ko e laupepa fakatonu hau haia i loto he tohi hau. Haia ne tu he lau 79-81. Ti, lata a koe ke age tumau e tohi hau ke he leveki aoga ka oti e lauga hau. Ko e leveki aoga kua lata ke toka e tau fakamauaga he tau fakatonuaga kua gahua e tagata fakaako ki ai.

¹¹ Liu Fakamanatu he Fakatutala: Ko e liu fakamanatu he Aoga Fekafekau Fakateokarasi to taute ke he puhala fakatutala. To taute laga taha he ua e mahina ke he 30 e minuti. Ko e tau huhu ke lata mo e liu fakamanatu to matutaki ke tohia ke he Ha Tautolu a Fekafekauaga he Kautu. Kaeke ko e fahi tapu ne setulu ke taute e liu fakamanatu kua felauaki mo e fahi tapu he toloaga he takaiaga po ke ahiahi mai he leveki takaiaga, kua lata e lauga he fahi tapu hake ke taute tuai mo e liu setulu e liu fakamanatu he fakatutala ke he fahi tapu hake.

¹² Tau Aoga Fakaku: I loto he tau fakapotopotoaga ne molea e 50 ha lautolu ne huhu atu ke he aoga, kua lata e tau motua ke manamanatu ke fakatu e tau aoga fakaku. “Liga lata e fakatokaaga nai ma e tau lauga oti he tau tagata fakaako po ke tau lauga ua fakahiku ni.” (Ministry School, lau 285) Ko e manatu ke ua aki kua taute ke lata mo e tau fakapotopotoaga ne tokologa e tau matakainaga fifine ka e gahoa e tau matakainaga tane ke taute e tau kotofaaga totou. Ko e tau motua kua lata ke fifili e matakainaga tane kua lautonu ke fakaholo e tau aoga nei.

¹³ Tagata Fakatonu Fakaku: Ne fakakite mai he setulu he Aoga Fekafekau Fakateokarasi, ko e tagata fakatonu fakaku kua lata ke fifili he kau he tau motua ke foaki e tau fakatonuaga fakatagata ke he tau motua mo e tau fekafekau lagomatai ka taute e tau fakamaamaaga mai he totouaga Tohi Tapu mo e lauga fakaako. Ko e matakainaga tane ka kotofa ke taute e matagahua nai kua lata ke fita e fai iloaaga, ko e taha ne fakalilifu he tau motua hana tau fakatonuaga. Kua lata e hana tau fakatonuaga ke ati hake, navanava ke he tau puhala vagahau mitaki mo e ke he tau puhala fakaako ti talahau taha po ke ua e matakupu ke gahua ki ai ke fakatolomaki ki mua aki ai. Kua nakai lata ke foaki e fakatonuaga ke he tau lauga oti ka taute he matakainaga tane kua lauga tumau. Pete ia, kua lata ke mailoga he matakainaga ne lago ki ai ke foaki e fakatonuaga ke lagomatai mo e fakailoilo ki a lautolu pete kua hokotia ke taute e tau lauga ma e toloaga ha kua lata agaia ke lagomatai ke tupu ki mua.​—1 Timo. 4:15.

¹⁴ Heigoa ka Fanogonogo ki Ai: Ko e heigoa ka lagomatai e tagata fakatonu ke filifilia e lauga? Ko e puha ke tolu aki ke he loga he tau veveheaga 53 ne fakanumera ai he tohi Ministry School kua ha ha e tau matakupu kuku ke fanogonogo a ia ki ai. Lata foki e leveki aoga ke kikite ke he falu kupu fakamanatu po ke tau manatu fakakite mai he tohi ke lagomatai aki a ia ke mafiti ke kitekite ke he matutaki katoa mo e lauia mitaki he lauga. Ma e fakatai, mailoga e tau huhu i luga he lau 55 mo e tau manatu he paratafa fakahiku he lau 163.

¹⁵ Fakapuke e Tau Laini Tokanoa: Ke lafi ke he lalahi he tau fahi laupepa he tohi, ko e tohi Ministry School kua loga foki e tau laini tokanoa ke tohi ai e tau manatu hau he magaaho ka taute e fakaako fakatagata mo e ka fina atu a koe ke he Aoga Fekafekau Fakateokarasi. (Kikite lau 77, 92, 165, 243, 246, mo e 250.) Manatu ke tamai e tohi hau ke he aoga he tau fahi tapu oti. Muitua ke he lauga hafagi. Veveu e tohi hau he aoga katoa. Mailoga e tau manatu fakakite he leveki aoga. Kia fanogonogo ke he tau puhala fakaako, tau huhu, tau fakatai, tau kupu kehekehe, tau fakataitaiaga, tau lagomataiaga kitia mata, mo e tau fakatataiaga ne fakaaoga he tagata lauga. Ka fakamau hifo fakamitaki e tau fakaakoaga, to maeke a koe ke liu fatiaki mo e fakaaoga e tau vala aoga ne moua mai he aoga.

¹⁶ Ne iloa e Iesu Keriso ko e fakamatala he tala mitaki he Kautu he Atua ko e lilifu kua mua atu haia ti kua lata ke fakalaulahi atu ke he falu. Ko e matapatu kotofaaga hana haia. (Mare. 1:38) Ne pehe ai: “Ko e mena lata ke fakamatala e au e vagahau mitaki he kautu he Atua . . . ha ko e mena ia ne fakafano mai ai au.” (Luka 4:43) Ha ko tautolu kua talia e uiina ke mumui ki a ia, kua lavelave foki a tautolu he gahua fakamatala he tala mitaki, ti ukufakina tumau a tautolu ke fakatolomaki ki mua e mitaki he ha tautolu a tau “poa fakaheke.” (Hepe. 13:15) Ke he foliaga ia, kia mauokafua a tautolu ke fakalataha tumau ke he Aoga Fekafekau Fakateokarasi, ko e aoga ke lagomatai a tautolu ke tauteute ma e tau mena kua mua atu he moui.