Tau Leveki ne Takitaki—Ko e Leveki he Aoga Fekafekau Fakateokarasi
1 Ko e leveki he Aoga Fekafekau Fakateokarasi ko e tagata tane motua fakaagaga ne gahua fakamalolo ke fakatonutonu mo e fakaako ti kua lata ia tautolu ke fakalilifu mo e kaufakalataha ki a ia. (1 Timo. 5:17) Ko e heigoa hana tau matagahua?
2 Kua leveki e ia e poko toka tohi he Aoga Fekafekau Fakateokarasi he Fale he Kautu. Lahi foki e fiafia hana ke fakamafana oti a lautolu kua lata ke matutaki atu ke he aoga. Mataala lahi foki a ia kua hako e tau fakamauaga ne toka, ke maeke he tau kotofaaga ke maopoopo ke he tolu e fahi tapu ato hoko e fakaholoaga he tau aoga takitaha. Lata ia ia ke iloa mitaki e fakapotopotoaga, he tokaloto e lotomatala he tau tagata fakaako takitokotaha. Pete ni he lagomatai he taha matakainaga tane a ia ke tauteute e setulu he aoga, kua lata he leveki ke mamata atu ni e ia ke he kotofaaga ka foaki.
3 Ke lauia mitaki e fakaako he aoga, kua lata he leveki ke tauteute fakalotomatala he tau fahi tapu takitaha, he kumikumi fakahokulo atu ke he lauga ne kotofa. Ati maeke ai ia ia ke fakaalaala e fakapotopotoaga ke he ha kotofaaga, ke mailoga kua hako e manatu he lauga, mo e ke fakamaama e tau manatu aoga lahi ka putoia ke he liu fakamanatuaga.
4 He oti e lauga he tagata, to fakaaue e leveki ki a ia mo e fakamaama ko e ha ne mitaki ai e puhala lauga po ke ko e ha ne lata ke gahua ki ai. Ka fai tagata ne lata lagomatai foki ke he tau kotofaaga hana, kua lata he leveki po ko ia ne kotofa e ia ke foaki e lagomatai.
5 Ke aoga katoatoa mai he gahua fakamalolo he leveki he Aoga Fekafekau Fakateokarasi mo e he falu foki ne gahua i lalo he takitakiaga hana, kua lata ia tautolu ke fakatumau ke o atu he aoga. Lata foki ia tautolu ke fakamoli e tau kotofaaga oti ha tautolu mo e fakaaoga e tau fakatonuaga ne moua e tautolu ti pihia foki e tau fakatonuaga ne foaki ke he falu tagata lauga. He puhala nei, to holo ki mua e iloilo ha tautolu ke foaki e fekau he Kautu ke he tau tagata mo e ke he taha fale ke he taha fale.—Gahua 20:20; 1 Timo. 4:13, 15.