Aoga Mai he Polokalama he Aoga Fekafekau Fakateokarasi he 1999
1 Ko e Ulu Faiaoga a Iesu. Ne “ofomate foki a lautolu he hana tau kupu.” (Mare. 1:22) Pete ni kua nakai fakai he taha ia tautolu ke vagahau mo e fakaako ke tuga ne taute e Iesu, maeke agaia ia tautolu ke lali ke fifitaki a ia. (Gahua 4:13) Ke hokotia ki ai, to lagomatai he polokalama he Aoga Fekafekau Fakateokarasi a tautolu ke fakatolomaki ha tautolu a puhala vagahau mo e fakaako.
2 He 1999, to matapatu e fakaveaga he Kotofaaga Nu. 1 ke he tau vala tala mai he tau mekasini Kolo Toko mo e Awake! he 1997. To holo ki mua e maama ha tautolu ke he tau mena fakaagaga kaeke ke totou tuai e tautolu e fakailoaaga nei ti logona foki he polokalama he aoga. Ko lautolu ne kotofa ki ai e tau lauga fakaako nei kua lata ke taute e fakagahuahuaaga kua lata ke he lauga, he foaki ai he puhala fiafia mo e alaala. Ko e Kotofaaga Nu. 3 to fakave ke he tohi Fiafia he Magafaoa, mo e Kotofaaga Nu. 4, ke he tagata he Tohi Tapu, ka e liga to hikihiki e maiaga he lauga he tau kotofaaga nei. Kua lata he leveki aoga ke manamanatu fakaeneene ke he lauga ato kotofa ke he taha tagata. Kua lata ia lautolu oti ne kotofa ke lauga mai he tohi Fiafia he Magafaoa ke mitaki ha lalu a moui fakamagafaoa.
3 Fakagahuahua e Tau Fakatonuaga, mo e Tauteute Tuai: Maeke he tau tagata oti ke holo ki mua he puhala vagahau mo e fakaako. (1 Timo. 4:13) Ko e naia kua lata ai ia tautolu ke kumi e fakatonuaga mo e nakai ke fakateaga ki ai mo mena ke fehola kehe mai ai. (Fakatai 12:15; 19:20) Ke foaki fakamitaki e kupu moli he tau feleveiaaga mo e he fekafekauaga he fonua kua nakai lata ke talahau teao e tau mena moli ne tutupu po ke totou noa e tau kupu Tohi Tapu. Kua lata ia tautolu ke hokotia ke he tau loto mo e omoomoi a lautolu ne fanogonogo ki a tautolu. Maeke ia tautolu ke taute e mena nei he vagahau fakamoli e kupu moli mai he ha tautolu a tau loto. (Fakatatai Gahua 2:37.) To lagomatai he fakatonuaga ne moua mai he aoga a tautolu ke taute e mena nei.
4 He moua e koe e kotofaaga, fakamafiti ke manamanatu hagaao ke he puhala lauga ka gahua a koe ki ai tuga ne fakamaama he School Guidebook. Manamanatu ke he mena kua lata ia koe ke taute ke fakagahuahua e fakatonuaga fakamua ne moua e koe. Kia manamanatu fakahokulo ke he mataulu lauga hau, ke he fakatokaaga ka fakaaoga e koe ka lata ai, mo e puhala ka fakaaoga e koe e tau kupu Tohi Tapu i loto he kotofaaga hau. Manamanatu ke he puhala mitaki lahi ke fakaaoga e manatu i ai ke fakaako mo e ke fakalagalaga.—1 Timo. 4:15, 16.
5 Ka hopoate a koe ke hu he aoga, ki a liogi mo e tutala ke he leveki aoga hagaao ke he tau logonaaga hau. Maeke he tau tagata oti ke moua e aoga he fakaaoga e polokalama ka foaki he Aoga Fekafekau Fakateokarasi he 1999.