Aoga a Tautolu Mai he Fonoaga he “Puhala Moui he Atua”
1 He tau mahina gahoa kua mole, ne taute pulega a tautolu ke o atu ke he Tau Fonoaga he Lalolagi Katoa mo e Fahi Motu he “Puhala Moui he Atua” he 1998. Kua eke ai mogonei mo tau lakaaga manatu tumau ke he fakamauaga tala tuai he fakatokatokaaga. Ne fiafia lahi mahaki a tautolu ke he tau mena kai fakaagaga loga ne moua e tautolu mai he tau fakalatahaaga mua ue atu ia.
2 Ko e tau fonoaga he lalolagi katoa he tau nei ne omoomoi moli. He fakalataha ai po ke nakai fakalataha e tau misionare mo e tau tagata mai he tau motu kehe he tau fonoaga ia ne o a tautolu ki ai, ne logona e tautolu oti e tau mena tutupu fiafia he afiafi Faraile he vala ne mataulu “Fekafekauaga he Fonua Misionare.” Ko e “Tau Hokotaki he Tupu ki Mua he Gahua Helehele” mai he lalolagi katoa he tau aho takitaha ne kua lahi e fakamalolo.
3 Tau Fakatoka Mai ne Homo Ue Atu: Ko e lauga fakahiku he Aho Faraile ne tali e huhu ne huhu he tau tagata tokologa kua nakai iloa e kupu moli: “Fai Moui Nakai Ka Mole e Mate?” Ne fakahiku e lauga ia aki e fakatoka maiaga he porosua fou, What Happens to Us When We Die? He magaaho nei kua fita a tautolu he totou ai ti maeke ke kitia e uho ka lagomatai aki e tau tagata ke kitia e kupu moli hagaao ke he tuaga he tau tagata mamate mo e fakamafana a lautolu ne mauku aki e amaamanakiaga he liu tu mai.
4 Ko e polokalama he afiafi Faiumu ne fakahiku aki e lauga “Ko e Tufuga—Hana Aga mo e Hana Tau Puhala.” Ne takitaki fakahako a tautolu ke he fakahikuaga kua liga fai Tufuga. Ke lagomatai a tautolu ke lagomatai e falu ke fakaaue ke he mena moli nei, ne fakatoka mai ai e tohi Is There a Creator Who Cares About You? He fakatolomaki aki ni e tua ha tautolu ki a Iehova mo e fakaaue ha tautolu ma e hana aga mo e tau puhala, ne talaga pauaki e tohi ma lautolu, ne lotomatala lahi ke he tau mena fakalalolagi, ka e liga nakai talitonu ke he Atua.
5 Ko e Fifiliaga Mai he Loto: Ko e lauga fakahiku he fonoaga ne peehi e lata ma tautolu oti ke “Fakatumau ke O he Puhala a Iehova.” Kua lata tonu ha ia ke tumau e fakamoliaga ke he fifiliaga ke he malolo takitokotaha ha tautolu ke pipiki mau ki ai, lagomatai, mo e fakatolomaki e tokoluga he puhala moui he Atua! (Isa 30:21) Kua lata ia tautolu mogonei ke fifili ke momoui ke he tau fifiliaga nei. Ko e ati hake fakaagaga mitaki ha ia ne moua e tautolu he o atu ke he Fonoaga he “Puhala Moui he Atua”!