Kitia e Lautolu e Kehe ha Tautolu
1 Kua molea e 300,000 ha lautolu ne papatiso fou he tau kua mole ne matutaki mai ki a tautolu. Ka ko e heigoa ne kitia he tau tagata nei ke he Tau Fakamoli a Iehova ati manako ai a lautolu ke fai vala he fakatokatokaaga he Atua? Ko e ha ne tu kehe ai a tautolu mai he falu lotu? Hanei e tau tali maaliali:
—Ne pipiki mau a tautolu ke he Tohi Tapu nakai ke he tau manatu fakatagata: Kua tapuaki a tautolu ki a Iehova ko e Atua ke he “agaga mo e fakamoli,” tuga ni he poaki mai e Iesu Keriso. Ko e kakano ke tiaki e tau fakavaiaaga fakalotu mo e omaoma ke he Kupu tohia he Atua.—Ioane 4:23, 24; 2 Timo. 3:15-17.
—O a tautolu ke he tau tagata nakai leo ke o mai a lautolu ki a tautolu: Kua talia e tautolu e poakiaga he Keriso ke fakamatala mo e ke fakaako atu, mo e fifitaki e tautolu e puhala hana ke kumi e tau tagata loto fakamoli. Kumi e tautolu a lautolu he ha lalu tau kaina, he tau puhala tu, po ke ha mena ka moua ai a lautolu.—Mata. 9:35; 10:11; 28:19, 20; Gahua 10:42.
—Foaki e tautolu e hatakiaga he Tohi Tapu ma e tau tagata oti kana mo e nakai totogi: Foaki e tautolu e tau koloa mo e malolo ha tautolu mo e fakaaoga ke molea e tau piliona tula he tau tau takitaha ke he gahua he Atua. Ne fakaako e tautolu e Tohi Tapu mo e tau tagata kehekehe.—Mata. 10:8; Gahua 10:34, 35; Fakakite. 22:17.
—Kua mitaki lahi e fakamahani ha tautolu ke lagomatai fakaagaga e tau tagata: Ha ko e ha tautolu a fakaako fakatagata ke he Tohi Tapu mo e hatakiaga foaki mai he tau feleveiaaga he fakapotopotoaga, tau toloaga mo e tau fono, kua moua e tautolu e fakaakoaga fakateokarasi uho ne taute a tautolu ke lagomatai fakaagaga ke he falu.—Isa 54:13; 2 Timo. 2:15; 1 Pete. 3:15.
—Kuku mauokafua e tautolu e kupu moli, fakagahuahua ai ke he tau moui ha tautolu he tau aho oti: Ha ko e ha tautolu a fakaalofa ke he Atua, ne taute e tautolu e tau hikihikiaga, ke fakalautatai e tau momoui ha tautolu mo e hana finagalo. Ko e ha tautolu a tagata fou tuga he Keriso ne futiaki e falu ke he kupu moli.—Kolo. 3:9, 10; Iako. 1:22, 25; 1 Ioa. 5:3.
—Kua lali a tautolu ke nonofo mo e gahua mafola mo e falu: Ne lagomatai he mahani Atua a tautolu ke puipui e tau gahua mo e puhala vagahau ha tautolu. Ne “kumi [e tautolu] e mafola mo e tutuli ki ai” mo e tau tagata oti.—1 Pete. 3:10, 11; Efeso 4:1-3.
2 Ko e tau puhala he moui faka-Kerisiano ne kitia he tau tagata he fakatokatokaaga a Iehova, ne omoi e tokologa ke talia e kupu moli. Kia lau mitaki pihia e puhala fakatagata ha tautolu, ki a lautolu ne iloa mo e onoono mai ki a tautolu.