Kia Eke mo Fekafekau Mooli he Keriso

“[Ko e] tau akau mitaki oti kua takitaha mo e fua mai e tau fua mitaki; ka ko e tau akau kelea kua fua mai e tau fua kelea.”—MATA. 7:17.

1, 2. Kehe fēfē e tau tutaki mooli he Keriso mai he tau tutaki fakavai, mua atu he magaaho nei he fakaotiaga?

PĒHE a Iesu ko lautolu ne totoku fakavai na fekafekau ki a ia to kitia ke he tau tutaki mooli haana ha ko e ha lautolu a tau fua—tau fakaakoaga mo e tau mahani ha lautolu. (Mata. 7:15-17, 20) Kua omoomoi mooli e tau tagata ha ko e tau mena ne uta e lautolu ke he tau manamanatuaga mo e tau loto ha lautolu. (Mata. 15:18, 19) Ko lautolu ne fagai ke he tau tala fakavai ne tupu mai e “tau fua kelea,” ka ko lautolu ne fakaako e kupu mooli fakaagaaga ne tupu mai e “tau fua mitaki.”

² Kua ua e vahega fua ne kitia maaliali ai he magaaho nei he fakaotiaga. (Totou Tanielu 12:3, 10.) Ko e tau Kerisiano fakavai ne fakakeukeu e onoonoaga he Atua ti fa fakatupu e fakamooli mahani Atua ne fakatupua, ka ko lautolu ne iloilo fakaagaaga ne tapuaki ke he Atua “mo e agaga mo e fakamoli.” (Ioane 4:24; 2 Timo. 3:1-5) Ne eketaha a lautolu ke fakatātā e tau mahani tuga he Keriso. Ka e kua a tautolu takitokotaha? He manamanatu a koe ke he tau mahani lima nā ne fakakite e mahani Kerisiano mooli, hūhū hifo ki a koe: ‘Kua lagotatai mooli kia e mahani mo e tau fakaakoaga haaku mo e Kupu he Atua? Kua fakaholo ki mua nakai e au e kupu mooli ke he tau fofoga ha lautolu hane kumi ki ai?’

Moui ke he Kupu he Atua

3. Ko e heigoa ne fakafiafia a Iehova, ti ko e heigoa he mena nei ne putoia ke he tau Kerisiano mooli?

³ “Nakai hohoko ke he kautu he lagi a lautolu oti kua pehe mai kia au, Ko e Iki na e, ko e Iki na e,” he talahau e Iesu, “ka ko ia ni kua eke e finagalo he haku a Matua ha ha he lagi.” (Mata. 7:21) E, nakai ko e talahau he faka-Kerisiano ne fakafiafia a Iehova ka ko e taute ai. Ma e tau tutaki mooli he Keriso, ne putoia he mena ia e moui katoa ha lautolu, putoia e mahani ke he tupe, gahua tupe, fakafiafia, tau aga fakamotu mo e tau fakamanatuaga he lalolagi, mo e fakamauaga mo e falu fakafetuiaga mo e tau tagata. Ka ko e tau Kerisiano fakavai ne moua e manamanatuaga mo e tau puhala he lalolagi, ne kua tupu lahi e nakai mahani Atua he tau aho fakahiku nei.—Sala. 92:7.

4, 5. Maeke fēfē a tautolu ke fakagahua e tau kupu ia Malaki 3:18 he tau momoui ha tautolu?

⁴ Fakatatau ai ke he perofeta ko Malaki ne tohi: “Ti liliu kitia ai e mutolu kua kehe e tagata mahani tututonu, kehe e tagata mahani kelea; kua kehe a ia kua fekafekau ke he Atua, mo ia kua nakai fekafekau kia ia.” (Mala. 3:18) He manamanatu a koe ke he tau kupu nei, hūhū hifo ki a koe: ‘Mahani fakalataha nakai au mo e lalolagi, po kua maaliali e kehe haaku? Eketaha tumau kia a au ke tatai mo e tau kapitiga gahua haaku, ke he aoga po ke gahuaaga, po ke tumauokafua ni au ke he tau matapatu fakaakoaga he Tohi Tapu, mo e vagahau hake kaeke kua latatonu?’ (Totou 1 Peteru 3:16.) Mooli, nakai manako a tautolu ke tuga kua fia tututonu ka e lata ke maaliali e kehe ha tautolu mai ia lautolu ne nakai fakaalofa mo e fekafekau ki a Iehova.

⁵ Ka kitia e koe e lata ke holo ki mua, he ha he liogi hagaao ke he manatu ia mo e kumi e malolō fakaagaaga puhala he tumau e fakaako ke he Tohi Tapu, liogi, mo e fina atu ke he feleveiaaga? Ka lahi e fakaako e koe e Kupu he Atua to lahi e “fua mitaki” ka tupu mai ia koe, putoia e ‘fua he tau laugutu ha lautolu, kua fakaaue atu ke he higoa he Atua.’—Hepe. 13:15.

Fakailoa e Kautu he Atua

6, 7. Hagaao ke he fekau he Kautu, ko e heigoa e kehekehe ka kitia ke he tau Kerisiano mooli mo e tau Kerisiano fakavai?

⁶ Pehē a Iesu: “Ko e mena lata ke fakamatala e au e vagahau mitaki he kautu he Atua ke he falu a māga foki; ha ko e mena ia ne fakafano mai ai au.” (Luka 4:43) Ko e ha ne taute e Iesu e Kautu he Atua ko e matapatu matakupu he fekafekauaga haana? Na iloa e ia ko ia e Patuiki he Kautu na, fakalataha mo e haana tau matakainaga ne fakauku he agaaga ne fakaliu tu mai, ka moumou e punaaga he tau malaia he tau tagata—ko e agahala mo e Tiapolo. (Roma 5:12; Fakakite. 20:10) Ati poaki e ia e tau tutaki haana ke fakapuloa e Kautu ia ato hoko e moumouaga ke he tau mena he fakatokaaga nei. (Mata. 24:14) Ko e tau tagata ne totoku ko e tau tutaki he Keriso ka e nakai taute e gahua nei—ne nakai maeke a lautolu. Ko e ha? Liga tolu e kakano: Fakamua, nakai maeke a lautolu ke fakamatala e mena ne nakai maama e lautolu. Uaaki, laulahi ia lautolu ne nakai moua e fakatokolalo mo e fakamalolō ne lata ke fehagai mo e vaiga mo e totokoaga ka fua mai he tala age e fekau he Kautu ke he tau katofia ha lautolu. (Mata. 24:9; 1 Pete. 2:23) Mo e toluaki, nakai ha ha he tau Kerisiano fakavai e agaaga he Atua.—Ioane 14:16, 17.

⁷ Ka ko e tau tutaki mooli he Keriso, kua maama e Kautu he Atua mo e mena ka taute ai. Mua atu, kua tuku fakamua e lautolu he tau momoui ha lautolu e tau mena he Kautu ia, he fakapuloa ai ke he lalolagi katoa, mo e lagomataiaga he agaaga a Iehova. (Saka. 4:6) Fakalataha tumau nakai a koe he gahua nei? Kua lali kia a koe ke fakaholo ki mua ko e tagata fakapuloa he Kautu, liga he fakaaoga fakalahi e magaaho he gahua he fonua po ke lauia mitaki lahi? Falu ne lali ke fakaholo ki mua e tuaga he gahua he fonua ha lautolu he fakaaoga fakalahi e Tohi Tapu. “Ko e kupu he Atua kua moui ia, mo e gahua malolo,” he tohi he aposetolo ko Paulo, ne eke mo aga haana ke fakamaama mai he tau Tohiaga Tapu.—Hepe. 4:12; Gahua 17:2, 3.

8, 9. (a) Ko e heigoa e tau mena tutupu ne fakamaama e uho lahi he fakaaoga e Tohi Tapu he gahua he fonua ha tautolu? (e) Maeke fēfē a tautolu ke makutu lahi he fakaaoga e Kupu he Atua?

⁸ He taute e gahua he taha gutuhala ke he taha gutuhala, ne totou he matakainaga taane e Tanielu 2:44 ke he tagata taane Katolika mo e fakamaama e puhala ka tamai he Kautu he Atua e mafola mo e haohao mitaki mooli. Ne tali he tagata taane: “Loto fakaaue mooli au he hafagi e koe e Tohi Tapu mo e fakakite ki a au e mena ne talahau he kupu tohi ka e nakai talahau noa ni ki a au.” He mogo ne totou he matakainaga taane e kupu tohi ke he fifine Ofotoko Heleni, ne loga e hūhū mitaki haana. Ke he mena nei foki ne tupu, ko e matakainaga taane mo e hoana haana ne tali atu ai he fakaaoga e Tohi Tapu. Ne talahau he fifine he magaaho fakamui: “Iloa nakai e koe e kakano ne makai au ke tutala ki a koe? Hau a koe ke he gutuhala haaku mo e Tohi Tapu ti totou e koe mai i ai.”

⁹ Mooli, kua aoga e tau tohi ha tautolu ti kua lata ke foaki he fonua. Ka ko e Tohi Tapu e matapatuaga ha tautolu. Ti ka nakai ko e aga haau ke fakaaoga tumau e Tohi Tapu he gahua fakamatala haau, ko e ha he nakai eke mo foliaga haau ke totou? Liga ke fifili e koe e tau matapatu kupu tohi gahoa kua fakamaama e kakano he Kautu he Atua mo e puhala ka fakamafola e tau lekua pauaki ne tupetupe e tau tagata he katofia haau. Ti mautauteute ke totou ai he fakamatala a koe mai he taha gutuhala ke he taha gutuhala.

Matalahi he Fakailoa e Higoa he Atua

10, 11. Hagaao ke he fakaaoga he higoa he Atua, ko e heigoa e kehekehe a Iesu mo e tokologa ne totoku kua mumui ki a ia?

¹⁰ “Ko mutolu foki ko e haku a tau fakamoli, ko au ni ko e Atua, kua pihia mai a Iehova.” (Isaia 43:12) Ko Iesu Keriso e Fakamoli mitaki lahi mahaki a Iehova ne talahau ai ko e lilifu ke uta mau e higoa he Atua mo e fakailoa ai. (Totou Esoto 3:15; Ioane 17:6; Heperu 2:12.) Ha kua fakapuloa e Iesu e higoa he haana Matua, ati fakahigoa a ia ‘ko e Talahau Fakamoli.’—Fakakite. 1:5; Mata. 6:9.

¹¹ Kehe ai, tokologa ne totoku ke hukui e Atua mo e haana Tama ne fakaata e aga fakamā ke he higoa faka-Atua, ti utakehe foki ai he tau tohiaga ha lautolu he Tohi Tapu. He manamanatu ke he aga pihia, ne nakaila leva e poaki he tala age ke he tau pisopo Katolika “ko e higoa he Atua he tetragrammaton YHWH ke nakai fakaaoga po ke fakaleo” ke he tapuakiaga.a Kua hehē lahi mooli e manamanatuaga pihia!

12. Maeke fēfē e tau fekafekau a Iehova ke kitia mitaki lahi foki fakalataha mo Iehova he tau 1931?

¹² He fifitaki ki a Keriso mo e “fakapotopotoaga” ne mumua ia ia, ne matalahi e tau Kerisiano he fakaaoga e higoa he Atua. (Hepe. 12:1) He tau 1931, ko e tau fekafekau he Atua ne kitia lahi mahaki ne fakalataha mo Iehova he talia e higoa Tau Fakamoli a Iehova. (Totou Isaia 43:10-12.) Ke he puhala uho pauaki mogoia, ne eke e tau tutaki mooli he Keriso mo ‘tau tagata ne fakahigoa aki e higoa he Atua.’—Gahua 15:14, 17.

13. Maeke fēfē a tautolu ke momoui fakatatau ke he ha tautolu a higoa ne foaki mai he Atua?

¹³ Maeke fēfē a tautolu takitaha ke momoui fakatatau ke he higoa uho ha tautolu? Taha e mena, kua latatonu ia tautolu ke fakailoa fakamooli e higoa he Atua. “Ko e mena fakamomoui a lautolu oti kana kua ui ke he higoa [ha Iehova],” he tohi e Paulo. “Hanai, po ke tauui fefe a lautolu kia ia kua nakai tua ki ai a lautolu? ka e tua fefe a lautolu kia ia kua nakai fanogonogo atu ki ai a lautolu? ka e fanogonogo atu fefe a lautolu, ka nakai fai tagata ke fakamatala atu? Ka e fakamatala atu fefe e tau tagata, kaeke ke nakai fekau atu a lautolu ki ai?” (Roma 10:13-15) Kua lata foki ia tautolu ke fakakite fakalotomatala e tau hehē fakalotu ne ekefakakelea aki ha tautolu a Tufuga, tuga e fakaakoaga he afi tote, ne lafi mooli ke he Atua fakaalofa e tau aga vale he Tiapolo.—Iere. 7:31; 1 Ioa. 4:8; fakatatai Mareko 9:17-27.

14. He iloa e higoa mooli he Atua, fēfē e tali he falu?

¹⁴ Kua matalahi nakai a koe he fakailoa e higoa he haau a Matua he lagi? Lagomatai nakai e koe e falu ke iloa e higoa tapu ia? Ne logona he fifine i Paris i Falani na iloa he Tau Fakamoli a Iehova e higoa he Atua, ti ole age a ia ke he taha Fakamoli foki ne feleveia e ia ke fakakite age e higoa ia he Tohi Tapu haana. He totou e ia e Salamo 83:18, ne ofoofogia e lauiaaga. Ne kamata a ia ke fakaako e Tohi Tapu ti ko ia mogonei ko e matakainaga fifine fakamooli hane fekafekau ai ke he taha motu. He kitia fakamua he fifine Katolika ne nofo i Ausetalia e higoa he Atua he Tohi Tapu, ne tagi a ia he olioli. Ke he loga e tau mogonei, ne paionia tumau a ia. Nakaila leva lahi, he fakakite he Tau Fakamoli i Jamaica ke he fifine i ai e higoa he Atua i loto he Tohi Tapu ni haana, ne hihina foki e tau mata haana he fiafia. Ti matalahi he fakailoa e higoa he Atua mo e fifitaki a Iesu ke fakakite e higoa uho lahi ia ke he tau tagata oti.

“Aua Neke Fakaalofa . . . ke he Lalolagi”

15, 16. Fēfē e onoonoaga he tau Kerisiano mooli ke he lalolagi, ti ko e heigoa e tau hūhū kua lata ke hūhū hifo ki a tautolu?

¹⁵ “Aua neke fakaalofa a mutolu ke he lalolagi, po ke tau mena ha ha he lalolagi; kaeke kua fakaalofa taha ke he lalolagi, nakai nofo e fakaalofa ke he Matua ke he loto hana.” (1 Ioa. 2:15) Ne totoko tumau e lalolagi mo e agaaga ha ha i ai ki a Iehova mo e Haana agaaga tapu. Ti ko e tau tutaki mooli he Keriso kua nakai fakamamao teao mai he eke mo tau tagata he lalolagi. Ne nakai talia e lautolu ke he tau loto ha lautolu, he iloa na tohi he tutaki ko Iakopo, “ko e kapitiga mo e lalolagi ko e faitaua haia ke he Atua.”—Iako. 4:4.

¹⁶ Eke mo paleko ke muitua ke he tau kupu a Iakopo he lalolagi kua fakatokatoka mai e tau kamatamata loga. (2 Timo. 4:10) Ko e mena ia ne liogi a Iesu ke lata mo e tau tutaki haana: “Nakai liogi au kia uta kehe e koe a lautolu he lalolagi, ka kia leveki atu e koe a lautolu mai ia ia ne mahani kelea. Nakai ko e tau tagata he lalolagi a lautolu, ke tuga foki au, nakai ko e tagata he lalolagi au.” (Ioane 17:15, 16) Hūhū ki a koe ni: ‘Kua eketaha kia a au ke nakai eke mo tagata he lalolagi? Kua iloa nakai he falu e tuaga haaku ke he tau fakamanatuaga mo e tau aga fakamotu nakai mai he Tohi Tapu, ti pihia mo e tau tuaga ne liga nakai mai he taofiaga pouliuli ka kua fakakite fakamaali e agaaga he lalolagi?’—2 Kori. 6:17; 1 Pete. 4:3, 4.

17. Ko e heigoa ka liga fakalagalaga a lautolu ne loto fakamooli ke kau mo Iehova?

¹⁷ Ke mauokafua ha tautolu a tuaga ne fakavē ke he Tohi Tapu, to nakai talia he lalolagi a tautolu ka e liga fakalagā e fia iloa ha lautolu ne loto fakamooli. Ati mailoga he tau tagata loto fakamooli pihia e tua ha tautolu kua vakavaka mauokafua ke he tau Tohiaga Tapu mo e putoia e puhala moui katoa ha tautolu, to liga tali atu e lautolu he tala age ai ki a lautolu ne fakauku: “To o a tautolu mo mutolu; ha kua logona e mautolu ha ha ia mutolu e Atua.”—Saka. 8:23.

Fakakite e Fakaalofa Kerisiano Mooli

18. Ko e heigoa ne putoia he fakakite e fakaalofa ki a Iehova mo e katofia ha tautolu?

¹⁸ Pehē a Iesu: “Kia fakaalofa a koe ke he Iki hau a Atua mo e hau a loto katoa, mo e hau a agaga katoa, mo e hau a manatu katoa. Kua pihia foki mo ia ne ua aki, Kia fakaalofa atu a koe kia ia ne katofia a mua, kia tuga foki na koe kia koe.” (Mata. 22:37, 39) Ko e fakaalofa ia (a·gaʹpe he faka-Heleni) ko e fakaalofa he mahani mitaki ne lauia e matagahua, matapatu fakaakoaga, mo e aga tonu, ka kua mahani ke putoia e logonaaga malolō. Maeke ai ke mafanatia mo e malolō lahi. (1 Pete. 1:22) Kehe mamao mai he lotokai, ha kua fakakite ai ke he tau kupu mo e tau gahua foaki noa.—Totou 1 Korinito 13:4-7.

19, 20. Talahau falu mena tutupu kua fakakite e malolō he fakaalofa faka-Kerisiano.

¹⁹ Ha ko e fakaalofa ko e fua he agaaga tapu he Atua, kua fakamalolō e tau Kerisiano mooli ke taute e tau mena ne nakai maeke he falu ke taute, tuga e kautū mai he tau kaupāaga he lanu, aga fakamotu, mo e fakapolitika. (Totou Ioane 13:34, 35; Kala. 5:22) Ko lautolu ne tuga e tau mamoe ne fakalagalaga lahi he magaaho ne kitia e lautolu e fakaalofa pihia. Ma e fakatai, he fina atu fakapā e fuata taane Iutaia i Isaraela ke he feleveiaaga Kerisiano, ne ofomate a ia ke kitia e tau matakainaga Iutaia mo e Arapi hane tapuaki fakalataha ki a Iehova. Ti ko e fua, ne kamata a ia ke fina atu tumau he tau feleveiaaga mo e talia e fakaako Tohi Tapu. Fakakite nakai e koe e fakaalofa pihia mai he loto ke he tau matakainaga haau? Lali nakai a koe ke fakafeleveia mafanatia ki a lautolu ne o mai foou ke he ha mutolu a Fale he Kautu, pete e motu, lanu he kili, po ke tuaga ha lautolu?

²⁰ Ko e tau Kerisiano mooli, kua eketaha a tautolu ke fakakite e fakaalofa ke he tau tagata oti. I Ele Salavatoa, ko e tagata fakailoa fuata ne fakaako e Tohi Tapu mo e fifine Katolika ne 87 e tau he moui nukua tapiki mau ke he lotu haana. Taha e aho, ne gagao lahi mahaki e fifine, ti uta ai ke he fale gagao. He liu a ia ki kaina, ne aahi atu e Tau Fakamoli mo e fakakia kua fai mena kai a ia. Kavi ke he taha e mahina he tupu e mena nei. Nakai fai he tapu he fifine ne aahi atu. Ko e fua? Ne tiaki e ia e tau tupua tā haana, fakaoti mai he tapu haana, mo e matutaki e fakaako Tohi Tapu haana. E, malolō mooli e fakaalofa Kerisiano! Maeke ai ke hokotia ke he tau loto ka e nakai fakamatala ki ai.

21. Maeke fēfē a tautolu ke mauokafua e vahā anoiha ha tautolu?

²¹ Ti nakai leva to pehē a Iesu ki a lautolu oti ne totoku fakavai ke fekafekau ki a ia: “Nakai iloa ni e au a mutolu, kia o kehe a a mutolu ia au, ko mutolu ne eke e tau mahani kelea.” (Mata. 7:23) Kia tupu mai ia tautolu mogoia e fua ne fakalilifu e Matua mo e Tama. “Ka fanogonogo taha ke he haku a tau kupu nai, mo e eke ai e ia,” he talahau e Iesu, “to fakatai e au a ia ke he tagata loto matala ne fakatu e ia hana fale i luga he mena patu.” (Mata. 7:24) E, ka fakakite a tautolu mo tau tutaki mooli he Keriso, to moua e tautolu e taliaaga he Atua, mo e to mauokafua e vahā anoiha ha tautolu, ne tuga kua fakavē ke he maka!

[Matahui Tala]

Manatu Nakai e Koe?

• Mailoga fēfē e tau tutaki mooli he Keriso mai he tau tutaki fakavai?

• Totoku falu he “tau fua” ne kitia aki e tau Kerisiano mooli.

• Ke tupu e fua faka-Kerisiano, ko e heigoa e tau foliaga ka fakatoka e koe?

[Fakatino he lau 13]

Ko e aga nakai haau ke fakaaoga tumau e Tohi Tapu he gahua he fonua?

[Fakatino he lau 15]

Iloa nakai he falu e tuaga haau ke he tau fakamanatuaga nakai mai he Tohi Tapu?