O Fakalataha e Matagahua mo e Iloa e Lotu Hako

“Mua e monuina he tau tagata ka fanogonogo ke he kupu he Atua mo e omaoma ki ai.”​—LUKA 11:28.

1. He magaaho ne kitia e lautolu e lotu hako, ko e tau faga tagata fefe kua ati hake e tau momoui takai i ai?

KUA nakai lahi ke kitia ni e lotu hako. Kaeke ko e tau tagata fakaalofa a tautolu ke he mena kua hako mo e moli, ko e magaaho ka moua e tautolu e mena ia, to ati hake e tautolu e tau momoui ha tautolu takai ai ke he mena ia. Ko e lotu moli nakai ko e pulotu he manamanatu noa; ka ko e puhala he moui.​—Salamo 119:105; Isaia 2:3; fakatatai Gahua 9:2.

2, 3. (a) Pehi fefe e Iesu e aoga he taute e finagalo he Atua? (e) Ko e heigoa e matagahua kua fakalago ke he tau tagata oti ne iloa e lotu hako?

² Kua pehi e Iesu Keriso e aoga he taute e mena ne fakakite he Atua ke eke mo finagalo Hana. Ke he fakahikuaga he mena ne iloa ko e Lauga he Mouga, kua fakailoa e Iesu, nakai ko lautolu oti ne talahau a ia ko e Iki (ne talahau ko e tau Kerisiano) to huhu atu ke he Kautu; ka e ko lautolu ni ne taute e finagalo he hana a Matua. Ko e falu, he talahau e ia, ka tiaki ha ko “lautolu ne eke e tau mahani kelea.” Ko e ha e tau mahani kelea? Kakano kua fakakite mai he Tohi Tapu, ko e kaumahala ke taute e finagalo he Atua ko e agahala, mo e tau agahala oti ko e mahani kelea. (Mataio 7:21-23; 1 Ioane 3:4; fakatatai Roma 10:2, 3.) Ko e tagata liga iloa e lotu hako, kua talahau fakamitaki ki a lautolu ne fakaako ai, mo e kua vagahau fakamitaki a ia ki a lautolu ne fakagahua ai, ka kua ha ha ia ia foki e matagahua ke fakagahua ai ke he hana ni a moui. (Iakopo 4:17) Kaeke ke talia e ia e matagahua ia, to moua e ia e monuina ke he hana a moui, mo e to kitia e ia e olioli ka hau nakai ke he ha puhala foki.

³ Ke he vala tala fakamua, kua manamanatu a tautolu ke he ono he tau fakamailoga kua kitia aki e lotu moli. Ko lautolu takitaha ia kua nakai ni lagomatai a tautolu ke kitia e lotu moli ka e tuku mai ki a tautolu fakatagata e tau paleko mo e tau kotofaaga. Ke he puhala fe?

Fanogonogo Fefe a Koe ke he Kupu he Atua?

4. (a) Ke he kau fou ne kamata ke fakalataha mo e Tau Fakamoli a Iehova, ko e heigoa ha lautolu ne nakai leva ti kitia ke he Tau Fakamoli ne fakaaoga e Tohi Tapu? (e) Lauia fefe e fagai fakaagaga mitaki ke he tau fekafekau ha Iehova?

⁴ Ha kua fakaako he Tau Fakamoli a Iehova e Tohi Tapu mo lautolu fou kua fiafia, kua tokologa ia lautolu nei ne fou kua mafiti e lotomatala ke he mena ia ne fakaako kua mai he Tohi Tapu. He tali ke he tau huhu ha lautolu, kua nakai hagaao ni a lautolu ke he tau fakaakoaga he lotu, ke he tau aga fakamotu he tagata, po ke ke he tau manatu he tau tagata talahaua. Ko e Kupu ni he Atua e pule. Ka o a lautolu ke he Fale he Kautu, kua kitekite a lautolu kua ha ha i ai foki e Tohi Tapu ko e tohi lahi kua mua atu. Kua nakai leva ke he tau tagata ne kumi fakamoli ke he kupu moli ke mailoga ko e mena lahi ke he olioli kua kitia e lautolu ke he Tau Fakamoli a Iehova ko e moli kua fagai fakaagaga fakamitaki a lautolu mai he Kupu he Atua.​—Isaia 65:13, 14.

5. (a) Ko e heigoa e paleko kua tuku atu ki a lautolu kua onoono ke he Tau Fakamoli a Iehova? (e) Lagomatai fefe a lautolu ke he fiafia he Tau Fakamoli?

⁵ Kaeke ke mailoga e koe e mena nei, fefe hau a aga ki ai? Kaeke ke iloa e koe e manatu ki ai, kua nakai ni ko koe ko e tagata kitekite hokoia, po ke kua manako a koe ke eke mo taha. Kua fakakite mai he Tohi Tapu ko lautolu ne “fanogonogo hokoia” ka e nakai “omaoma ke he kupu” kua ‘fakahehe a lautolu.’ (Iakopo 1:22) Kua fakavaia a lautolu kakano kua kaumahala a lautolu ke mailoga ko e pete ni e mena ne vagahau e lautolu, ko e ha lautolu a kaumahala ke omaoma ke he Atua kua fakakite kua nakai fakaalofa moli a lautolu ki a ia. Ko e talahauaga he tua kua nakai lagomatai he tau gahua ko e tua mate. (Iakopo 2:18-26; 1 Ioane 5:3) He kehekehe, ko e taha kua omoi ha ko e fakaalofa ki a Iehova ke “eke e ia e gahua” to “fiafia ke he hana a taute.” E, tuga kua fakamaama e Iesu Keriso, “mua e monuina he tau tagata ka fakanogonogo ke he kupu he Atua mo e omaoma ki ai.”​—Iakopo 1:25; Luka 11:28; Ioane 13:17.

6. Kaeke ke fakaaue a tautolu ke he Kupu he Atua, ke he tau mena fefe ka fakamakamaka fakatagata a tautolu ke moua?

⁶ Ko e olioli ia kua hokulo he tupu a koe ke he lotomatala he finagalo he Atua mo e fakagahua e tau mena atu kua fakaako e koe. Lahi fefe e laliaga ke tuku e koe ke fakaako e Kupu he Atua? Hogofulu e tau afe he tau tagata takitokotaha ne nakai iloa ke totou ne gahua fakamalolo ke fakaako ke totou, taute pauaki e mena nei ti ke maeke ia lautolu ke totou e tau Tohiaga Tapu mo e fakaako a lautolu ke he falu tagata. Ko e falu ne ala tuai ke he tau pogipogi takitaha ke maeke ia lautolu ke fakamole falu magaaho he tau aho oti ke totou e Tohi Tapu mo e kua lagomatai he fakaakoaga Tohi Tapu, tuga e Ko e Kolo Toko. Ha ko e totou mau hau fakatagata he Tohi Tapu po ke kumi e tau tohiaga tapu ne tohi ke he falu a vala tala ka fakaako, fakamaumau fakamitaki e tau matafakatufono ha Iehova mo e tau poakiaga, mo e kumi ke kitia e tau matapatu fakaakoaga loga ne ha ha i ai ma e takitakiaga ha tautolu. Manamanatu ai ke he vala takitaha kua fakakite mai hagaao ke he Atua, hana a finagalo, mo e hana a tau fakafehagaiaga mo e tau tagata oti. Fakaata taha magaaho ma e mena nei ke fakamolu e loto hau. Manamanatu ko e ha ha i ai nakai e tau puhala ne kua maeke ia koe ke fakagahua e fakatonuaga he Tohi Tapu ke he moui katoa hau.​—Salamo 1:1, 2; 19:7-11; 1 Tesalonia 4:1.

Katoatoa Nakai Hau a Fakamoli ki a Iehova?

7. (a) Fakaohooho fefe he taofiaga ke he Tolu Taha e tau laliaga he tagata ke tapuaki e Atua? (e) Ko e heigoa e mena ka tupu ke he tagata ka fakaako ke he kupu moli hagaao ki a Iehova?

⁷ Ke he tau miliona he tau tagata, kua ha ha i ai e fakatotoka ke fakaako ko e Atua moli nakai ko e Tolu Taha. Ko e fakamaamaaga “ko e mena galo” kua nakai fakamakona a lautolu. Maeke fefe ia lautolu ke fakatata ke he Atua kua uka ke maama? Ti, ko e fua he fakaakoaga ia, kua eke a lautolu ke nakai fakateliga ke he Matua (ko e higoa ia kua nakai la logona ia lautolu he fale tapu) mo e tapuaki ki a Iesu ke tuga ko e Atua po ke ke takitaki ha lautolu a tapuakiaga ki a Maria (ke he mena kua fakaako a lautolu ko e “Matua Fifine he Atua”). Ka ko e tau loto ha lautolu kua fakateliga mo e fiafia he magaaho kua hafagi he taha he Tau Fakamoli a Iehova e Tohi Tapu mo e fakakite age ki a lautolu e higoa moli he Atua, ko Iehova. (Salamo 83:18) Ko e fifine Venesuela ne puke he fiafia he fakakite age e higoa faka-Atua ne peka atu a ia ke he Fakamoli fuata ne tala age ki a ia e kupu moli uho mo e kua talia ke taute e fakaakoaga Tohi Tapu he kaina. He magaaho ka fakaako e tau tagata pihia kua vagahau a Iesu ke he Matua hana ko e “haku a Atua mo e ha mutolu a Atua” mo e mena ia ne talahau e Iesu ko e Matua hana ko e “Atua tokotaha ni,” kua mailoga e lautolu e mena ne fakaako he Tohi Tapu hagaao ke he Atua kua nakai uka ke maama. (Ioane 17:3; 20:17) He o mai a lautolu ke iloa e tau fua ha Iehova, kua logona e lautolu e tata ki a ia, kamata ke liogi ki a ia, mo e manako ke fakafiafia a ia. Ko e heigoa e fua?

8. (a) Ha ko e fakaalofa ha lautolu ki a Iehova mo e ha lautolu a manako ke fakafiafia a ia, ko e heigoa he tau miliona he tau tagata kua taute? (e) Ko e ha e papatisoaga he Kerisiano kua aoga lahi?

⁸ Ke he magahala he hogofulu e tau tau kua mole, 2,528,524 e tau tagata ke he ono e matakavi mo e ke he loga he tau aelani kua tukulele ha lautolu a tau momoui ki a Iehova mo e fakamailoga he tukulele ke he papatisoaga ke he vai. Ko koe nakai taha ia lautolu, po ke kua tauteute a koe he mogonei ke papatiso? Ko e papatisoaga ko e lakaaga aoga lahi he moui he tau Kerisiano moli oti. Kua poaki e Iesu ke he hana a tau tutaki ke taute tutaki ke he tau tagata he tau motu oti mo e papatiso a lautolu. (Mataio 28:19, 20) Kua aoga lahi foki he muitua fakamafiti ke he papatisoaga ha Iesu kua vagahau a ia ni ko Iehova mai he lagi, pehe: “Ko e haku a Tama fakahele a koe, kua fiafia ni au kia koe.”​—Luka 3:21, 22.

9. Ke tumau e talia e fakafetuiaga mo Iehova, ko e heigoa kua lata ke he ha tautolu a vala?

⁹ Ko e fakafetuiaga talia mo Iehova ko e mena ke ofania. Kaeke ke hu a koe ke he fakafetuiaga pihia he tukuleleaga mo e papatisoaga, ki a tiaki e ha mena ke fakakelea e fakafetuiaga ia. Kia nakai fakaata e tau fakaatukehe he moui mo e manamanatu ke he tau mena he tino ke omoi aki ke he tuaga ke ua. (1 Timoteo 6:8-12) Moli ke moui lagotatai mo e fakatonuaga he Fakatai 3:6: “Kia manatu e koe a [Iehova], ke he hāu a tau puhala oti, ti fakahakohako ai e ia hāu a tau puhala.”

Hokulo Fefe e Fakaalofa ha Keriso kua Lauia ki a Koe?

10. Ko e ha e ha tautolu a tapuakiaga ki a Iehova nakai fakatupu a tautolu ke tiaki a Iesu?

¹⁰ Ko e fakaaueaga mitaki ma Iehova ko e Atua tokotaha moli, kua moli, kua nakai fakatupu e tagata ke nakai fanogonogo ki a Iesu Keriso. Ke he taha mena, Fakakiteaga 19:10 ne talahau: “Ha ko e talahau kia Iesu ko e agaga ia he perofetaaga.” Mai ia Kenese ki a Fakakiteaga, ko e omoi he tau perofetaaga kua foaki fakamatafeiga mai hagaao ke he matagahua ha Iesu Keriso ke he finagalo ha Iehova. Ke tuga e tagata ke fakamahani mo e tau fakamatafeiga ia, kua tupu mai e ata fulufuluola kua tokanoa mai he tau fakaheheina mo e tau manatu hepe kua fua mai he tau fakaakoaga fakavai ha Kerisitenitome.

11. Lauia fefe e taha fifine i Polani he iloa e fakaakoaga moli he Tohi Tapu ke he Tama he Atua?

¹¹ Ko e maamaaga ke he kupu moli hagaao ke he Tama he Atua kua maeke ke ha ha i ai e lotomatala hokulo he tagata. Ko e mena nei ne tupu ki a Danuta, ko e fifine i Polani. Kua matutaki a ia mo e Tau Fakamoli a Iehova ke he valu e tau tau, fiafia ke he mena ne fakaako e lautolu, ka e nakai taute e tapuakiaga moli ke eke mo puhala ke he hana a moui. Ti moua ai e ia e lagaki he tohi The Greatest Man Who Ever Lived, ne kua fakatata e moui ha Keriso ke he puhala mukamuka ke maama.a Mule ke he magaaho afiafi, kua hafagi e ia e tohi, manatu ai ke totou taha ni e veveheaga. Nakai leva to hoko ke he matafatafa aho, ne oti e tohi hana, ne tuku e ia ke he kelekele. Ne pa e tagi hana. “Iehova, fakamagalo mai au,” he ole e ia. Ko e fua he mena ne totou e ia, kua kitia maaliali e ia nakai tuga fakamua e fakaalofa ne fakakite e Iehova mo e hana a Tama. Ne mailoga e ia ke he valu e tau kua nakai fakaaue a ia he liliu kehe mai he lagomatai he Atua kua fakaloa fakatekiteki ki a ia. Ke he 1993 kua papatiso a ia he fakamailoga e hana a tukuleleaga ki a Iehova ke he fakaveaga he tua ki a Iesu Keriso.

12. Lauia fefe e lotomatala moli ki a Iesu Keriso ke he ha tautolu a tau momoui?

¹² “Ke he maama mitaki ke he Iki ha tautolu ko Iesu Keriso” kua fakalataha ai ke eke mo Kerisiano kua fua loga mo e hakahakau. (2 Peteru 1:8) Ke he fakalaulahiaga fe ka fakalataha a koe ke he taha vala he gahua ia, he fakafeheleaki ai e fekau he Kautu mo e falu? Ko e lahi he mena he tau tagata takitaha kua maeke ke taute kua lauia ai ke he loga e tau tutuaga. (Mataio 13:18-23) Ke he falu a tau tutuaga kua nakai maeke ia lautolu ke hiki; ka ko e falu kua maeke. Ko e heigoa ka fakalagalaga a tautolu ke kitia mo e taute e hikiaga ne maeke ke taute? Ne tohi he aposetolo ko Paulo: “Ha kua omoomoi a mautolu he fakaalofa a Keriso”; ke he falu a tau kupu, ko e fakaalofa ne fakakite e ia he tuku hifo hana a moui ke lata mo tautolu kua maaliali ai ti ko e ha tautolu a fakaaueaga ke he mena ia kua tupu, to fakaohooho ai fakahokulo ha tautolu a tau loto. Ko e fua, kua mailoga e tautolu kua nakai lata ki a tautolu ke fakatumau ke tutuli e tau foliaga lotokai mo e nonofo fakalahi ke fakatokoluga ni a ia. Ka e hiki e tautolu e tau mena ha tautolu ke foaki fakamua ke he gahua ne fakaako e Keriso ke he tau tutaki hana ke taute.​—2 Korinito 5:14, 15.

Vevehe Kehe Mai he Lalolagi ​—Ke Hoko ki Fe?

13. Ko e ha ne manako a tautolu ke nakai fai vala he lotu ne taute a ia ke fai vala ke he lalolagi?

¹³ Nakai uka ke kitia e fakamauaga ne taute he Kerisitenitome mo e falu he tau lotu kakano kua manako a lautolu ke eke mo taha vala he lalolagi. Ko e fakaputuaga tupe he tapu kua fakaaoga ke fakatupe aki e tau mena tau. Ko e tau ekepoa kua eke ai mo tau tagata tau he felakutaki. Taha aho ke he taha aho, kua fakakite mai he tau nusipepa e tau hokotakiaga hagaao ke he tau mena fakalotu ke he tau vala kehekehe he lalolagi kua tau ai e taha ke he taha. Ko e ha lautolu a tau lima kua hihina he toto. (Isaia 1:15) Ke he lalolagi katoa ko e tau fekafekau lotu kua fakatumau ke lali ke toho e kitiaaga fakapolitika. Ko e tau tagata tapuaki kua nakai fai vala ke he mena nei.​—Iakopo 4:1-4.

14. (a) Ko e heigoa ha tautolu fakatagata kua lata ke tiaki kaeke ke fakatumau a tautolu ke vevehe kehe mai he lalolagi? (e) Ko e heigoa ke lagomatai a tautolu ke tiaki neke hele he tau mahani mo e tau gahua he lalolagi?

¹⁴ Ka ko e vevehe kehe mai he lalolagi kua putoia lahi atu ke he mena ia. Ko e lalolagi kua mailoga ha ko e fakaalofa ke he tupe mo e mena ke maeke he tupe ke fakatau, ko e manako ma e talahaua fakatagata, mo e tutuli tumau ke he tau mena fakafiafia, fakalataha mo e tau mena pihia ko e tote he manamanatuaga moli ma e falu, pikopiko mo e tau vagahau kelea, totoko ke he tui, mo e kaumahala ke fakagahuahua e taofi-ni. (2 Timoteo 3:2-5; 1 Ioane 2:15, 16) Ha ko e ha tautolu a nakai mitaki katoatoa, kua ha ha ia tautolu ke he tau magaaho kua fakaata mai e tau aga pihia. Ko e heigoa ke lagomatai a tautolu ke he fetului ke tiaki e tau matahele pihia? Kua lata ke fakamanatu tumau e tautolu a tautolu ko hai i tua he tau mena oti ia. “Ka ko e lalolagi oti ha he pule hana kua mahani kelea.” (1 Ioane 5:19) Pete ni he futiaki e taha puhala kua kitia mai, pete ni e loga he tau tagata kua momoui ke he puhala ia, ka kitia e tautolu e iki fi ha Iehova, ko Satani ko e Tiapolo, i tua he mena ia, kua mailoga e tautolu ko e teteki ha ia moli he mena ia.​—Salamo 97:10.

Hoko Ki Fe e Fakaalofa Hau?

15. Lagomatai fefe he fakaalofa nakai lotokai ne kitekite e koe ke kitia e lotu hako?

¹⁵ He magaaho ne kamata fakamua a koe ke fakalataha mo e Tau Fakamoli a Iehova, ko e fakaalofa ne kitia maali ke he vahaloto ia lautolu kua nakai fakauaua kua futiaki e koe kakano ko e hana a kehe mai he agaga he lalolagi. Pehi ai ke he fakaalofa nakai lotokai kua fakakehe aki e tapuakiaga mea ha Iehova mai he falu he tau vahega tapuaki. Ko e liga ko e mena nei kua fakamoli ki a koe ko e Tau Fakamoli a Iehova kua fakagahua moli e lotu moli. Ko ia ko Iesu Keriso ne talahau: “Ko e mena ia ke iloa ai he tau tagata oti kana, ko e haku a tau tutaki a mutolu, ka feofanaki a mutolu.”​—Ioane 13:35.

16. Ko e heigoa e tau kotofaaga kua ha ha i ai ma tautolu takitaha ke fakalaulahi atu e ha tautolu a fakaalofa?

¹⁶ Kua fakakite foki kia he fua ia ko koe ko e taha he tau tutaki ha Keriso? Ha ha i ai nakai ha puhala kua maeke ia koe ke fakalaulahi he fakakite e koe e fakaalofa? Nakai fai fakauaua kua maeke ia tautolu oti. Ha ha i ai e lahi atu he mena ia he fakakapitiga ni ke he falu he Fale he Kautu. Ti kaeke ke fakalaulahi e fakaalofa ha tautolu ki a lautolu ni ne fakaalofa mai ki a tautolu, ti kehe fefe a tautolu mai he lalolagi? “Kia mua ke he tau mena oti ke moua e mutolu e fakaalofa lahi ko e taha kia taha,” he fakamafana mai he Tohi Tapu. (1 Peteru 4:8) Kia liga ki a hai ka fakakite e tautolu e fakaalofa lahi ki ai? Ke he matakainaga tane po ke fifine kia ne nakai tatai e tupuaga mo e ha tautolu mo e puhala ne taute e taha mena kua fakaita aki a tautolu? Ko e taha tagata kia, kua fua mai ha ko e gagao po ke fuakau ke he tau tau moui, kua nakai maeke ke fano tumau ke he tau feleveiaaga? Ko e hoa he fakamauaga kia ha tautolu? Po ke, ko e tau mamatua fuakau ha tautolu? Ko e falu ne holo mitaki he fakakite e tau fua he agaga, fakalataha ai mo e fakaalofa, kua logona ko e tuga kua liu a lautolu fakaako e tau mena oti nei he magaaho ne fehagai a lautolu mo e tau tutuaga uka kua maeke ke tutu mai he teitei foaki oti e levekiaga ke he tagata he magafaoa ne kua matematekelea lahi. Ti pihia he magaaho ne fakafehagai mo e tau tutuaga nei, moli, ko e fakaalofa ha tautolu kua lata ke molea atu ke he magafaoa ni ha tautolu.

Fakamatalaaga he Kautu​—Aoga Lahi Fefe ki a Koe?

17. Kaeke ke fai aoga a tautolu fakatagata ke he tau ahi mai he Tau Fakamoli a Iehova, ko e heigoa mogo nei ha tautolu kua manako ke omoi ke taute?

¹⁷ Ko e puhala aoga lahi ke fakakite e tautolu e fakaalofa ma e ha tautolu a tau tagata ko e fakamatala ki a lautolu hagaao ke he Kautu he Atua. Taha ni e matakau he tau tagata ne taute e gahua nei ne talahau tuai e Iesu. (Mareko 13:10) Ko e Tau Fakamoli a Iehova a nei. Kua aoga fakatagata ki a tautolu e mena ia. Magaaho nei ko e kotofaaga ha tautolu ke lagomatai e falu. Kaeke ke fakafeheleaki e tautolu e manatu he Atua ke he mena ia, to talahaua e mena nei ke he ha tautolu a tau momoui.

18. Fakaohooho fefe he totouaga ha tautolu ke he tohi Jehovah’s Witnesses​—Proclaimers of God’s Kingdom ke lagomatai ke he fakamatalaaga he Kautu?

¹⁸ Ko e talahauaga ofoofogia he fekau he Kautu kua hoko ai ke he tau kalakala oti he lalolagi he magahala he tau aho fakahiku nei kua talahau he tohi Jehovah’s Witnesses​—Proclaimers of God’s Kingdom. Kaeke ke iloa e koe e faka-Peritania, kia nakai kaumahala ke totou ai. He taute e koe, kia fakamaumau pauaki e tau puhala oti nei ne ha ha he tau tagata takitokotaha ne felagomataiaki ke he gahua fakamatala he Kautu. Ha ha i ai nakai e falu fakafifitakiaga kua maeke ia koe ke fifitaki? Kua ha i ai e tau magaaho loga kua hafagi mai ki a tautolu oti. Kia eke e fakaalofa ha tautolu ki a Iehova ke omoi a tautolu ke fakaaoga fakamitaki a lautolu.

19. Aoga fefe ki a tautolu he magaaho ka talia e matagahua ne fakalataha mo e iloa e lotu hako?

¹⁹ He magaaho ka fakagahua e tautolu a tautolu ke taute e finagalo ha Iehova, kua moua e tautolu e tali ke he huhu, Ko e heigoa e kakano he moui? (Fakakiteaga 4:11) Nakai liu a tautolu ke fakahahaku, nofo mo e logonaaga kua gatigati. Kua nakai fai gahua ne kua fakamoli a koe ki ai ke tamai e fiafia lahi ka e ko e fakagahua mo e loto katoa a koe ke he gahua he Atua ko Iehova. Mo e ko e monuina lahi ha ia he vaha mai mua kua tuku mai! Ko e makona tukumalagi he moui ke he lalolagi fou hana, to maeke ia tautolu ke fakaaoga ha tautolu a tau manamanatuaga ke he katoatoa lagotatai ke he finagalo fakaalofa ne tufugatia he Atua e tagata.

[Tau Matahui Tala]

To Tali Fefe e Koe?

◻ Ko e ha kua lata e lotu ne talia e Tohi Tapu ko e Kupu he Atua mo e fakatokoluga a Iehova ko e Atua moli?

◻ Ko e heigoa he lotu moli kua fakaako ke he matagahua ha Iesu ko e Lukutoto?

◻ Ko e ha kua lata e tau Kerisiano ke vevehe kehe mai he lalolagi mo e fakagahua e fakaalofa nakai lotokai?

◻ Ko e heigoa e matagahua he fakamatalaaga he Kautu kua ha ha i ai ke he lotu hako?

[Tau Fakatino he lau 26]

Ko e papatisoaga ko e lakaaga kua lata he talia e tau matagahua he tapuakiaga moli. Ke he tau mahina takitaha, ko e falu 25,000 he lalolagi katoa kua uta e lakaaga ia

Rusia

Senekala

Papua Niu Kini

F.K.A.

[Tau Fakatino he lau 27]

Lagomatai ke he kupu moli he Tohi Tapu mo e falu ko e taha vala he tapuakiaga moli

F.K.A.

F.K.A.

Parasili

Hogo Kogo