Kua Moua Nakai e Koe e Lotu Hako?

“Ko e hanai e oma ke he Atua kua mitaki mo e fakamoli ki mua he Atua e Matua.”​—IAKOPO 1:27.

1, 2. (a) Ke he manamanatu he tokologa he tau tagata, ko e heigoa kua fakatonu aki ko e ha lautolu a lotu kua hako? (e) Ko e heigoa kua lata ke manamanatu fakalahi he fakafili e lotu?

KUA nonofo a tautolu he vaha ne tokologa e tau tagata kua fiafia ke foaki e vala tote he ha lautolu a tau momoui ke he lotu. Kua liga fa o a lautolu ke he falu he tau fekafekauaga fakalotu, ka e gahoa kua taute pihia tumau. Laulahi he tau tagata kua nakai taofi ko e falu he tau lotu oti kua hepe ka ko e ha lautolu kua hako. Kua liga logona ni a lautolu ko e lotu ha lautolu kua hako ma lautolu.

² Ke he onoonoaga he mena nei, ti ko e huhu, Kua moua nakai e koe e lotu hako? ko e kakano, Kua moua nakai e koe e lotu ne manako a koe ki ai? Ko e heigoa ne fakatonu aki e manako hau? Ko e magafaoa hau? Ko e tau kapitiga hau? Ko e tau logonaaga ni hau? Kua lahi fefe e manamanatu hau ke he onoonoaga he Atua ke he mena ia?

Maeke Fefe ia Tautolu ke Iloa e Manatu he Atua?

3. (a) Kaeke ke iloa e tautolu e manatu he Atua, ko e heigoa kua lata ke moua e tautolu? (e) Ko e heigoa e tau huhu kua lata ia tautolu ke huhu ko e ha ne talitonu fakatagata ko e Tohi Tapu kua mai he Atua?

³ Kaeke ke iloa e tautolu ko e heigoa e manatu he Atua, ti kua lata ke ha ha i ai falu fakakiteaga mai ia ia. Ko e Tohi Tapu ko e tohi kua mua atu e tuai kua talahau ai kua omoi he agaga he Atua. (2 Timoteo 3:16, 17) Ka kua moli kia ke talahau ko e tohi nei, kua kehe mai he falu, kua moua ai e fekau he Atua ma e tau tagata oti? To tali fefe e koe e huhu ia, mo e ko e ha? Kua pihia kia ha kua taofi e tau mamatua hau ki ai? Kua pihia kia ha ko e tau aga he tau kapitiga hau? Kua kumikumi nakai e koe e fakamoliaga? Ko e ha ne nakai taute ai e mena ia he magaaho nai, fakaaoga e tau puhala ne fa mui mai he fakamoliaga?

4. Ke he ataina, ko e heigoa kua fakakite ko e Tohi Tapu, nakai ko e falu tohi, kua mai he Atua?

⁴ Ataina: Ko e fekau kua mai moli he Atua mo e kua lata ia mo e magafaoa oti he tagata kua lata ke ataina ki a lautolu. Kua moli kia e mena ia ke he Tohi Tapu? Manamanatu ke he mena nei: Ko e Tohi Tapu, katoa po ke falu vala, kua tohia fakailoa he magaaho nei ke he molea e 2,000 he tau vagahau. Hagaao ke he Kaufakalatahaaga Tohi Tapu Amerika, teitei ke hogofulu e tau tau kua mole ko e tau vagahau kua tohia fakailoa e Tohi Tapu kua ataina ke he 98 e pasene he puke tagata he lalolagi. Tuga he tuhi mai he Guinness Book of World Records, kua mua mamao “ko e tohi kua tufa fakalaulahi he lalolagi katoa.” Ko e mena tuai ni a nei ne amaamanaki a tautolu ke he fekau he Atua kua lata ai mo e tau tagata he magafaoa mo e tau motu mo e tau vahega vagahau oti. (Fakatatai Fakakiteaga 14:6.) Nakai fai tohi foki he lalolagi kua ha ha i ai e fakamauaga kua pihia.

5. Ko e ha e fakamauaga tala tuai he Tohi Tapu kua mitaki lahi mahaki?

⁵ Fakamauaga tohi tuai: Ko e kumikumiaga fakamitaki ke he tau mena tutupu faka-Tohi Tapu kua fakakite mai e taha puhala kua fakakehe mai e Tohi Tapu mai he falu he tau tohi ne kua talahau ai kua tapu. Kua moua mai he Tohi Tapu e tau fakamauaga tala tuai kua moli, nakai ko e tau tala tuai kua nakai moli. Ko Irwin Lin­ton, ko ia ko e loea kua fa mahani ke kitekite fakamatafeiga ke he tau mena kua lata ke eke mo fakamoliaga he hopoaga he matafakatufono, ne tohi: “Ha ko e tau tupuaga mai ke he tau tala tuai mo e fakamoli fakavai kua fakaeneene ai ke tuku e tau mena tutupu he matakavi mamao mo e magaaho moli, . . . kua foaki mai he tau mena tutupu he Tohi Tapu ki a tautolu e aho mo e matakavi he tau mena kua maeke ke fakatatai mo e hakotika kua lahi.” (Ma e tau fakatai, kikite e 1 Tau Patuiki 14:25; Isaia 36:1; Luka 3:1, 2.) Ma e tau tagata kua fuluhi atu ke he lotu nakai ma e fakahaoaga mai he mena moli ka e ma e kupu moli, ko e manamanatuaga aoga lahi a nei.

6. (a) Lagomatai moli fefe he Tohi Tapu e tagata ke he tau mena vihi he moui? (e) Ke he tau puhala tolu fe kua lagomatai he Tohi Tapu e tagata ke fehagai mo e tau mena favale moli?

⁶ Fakagahuaaga: Ko lautolu ne kumikumi fakahokulo e Tohi Tapu ne nakai leva ti mailoga mafiti ko e hana a tau hatakiaga mo e tau fakaakoaga kua nakai talaga ke fakahehe aki a lautolu. Nakai, ko e tau mena nei kua fakakite mai e puhala he moui ne kua tamai e aoga ki a lautolu ne fakapiki fakatata ki a lautolu. (Isaia 48:17, 18) Ko e mafanatia kua foaki ki a lautolu kua matematekelea kua nakai potake, fakave ai ke he tau pulotu nakai fai kakano. Ka e, kua lagomatai e tau tagata ke fehagai mo e tau mena vale moli he moui. Fefe? Ke he tolu e puhala: (1) he foaki e fakatonuaga kua lata mo e puhala ke fakafehagai mo e tau mena uka, (2) he fakamaama e puhala ke moua e lagomataiaga fakaalofa kua foaki he Atua ke he hana a tau fekafekau he magaaho nei, mo e (3) he fakakite e vaha mai i mua kua mua he mitaki ne toka he Atua ma lautolu ne fekafekau ki a ia mo e age ki a lautolu e tau kakano kua lata ke mauokafua ke he hana a tau maveheaga.

7. (a) Fakaaoga ai e tau tohiaga tapu kua tohi ai ke he matahuitala, fakamaama e tali he Tohi Tapu ke he taha matakupu lahi kua hagaao ke he tau tagata he vaha nei. (e) Fakakite ko e puipui fefe he fakatonuaga he Tohi Tapu a tautolu po ke lagomatai a tautolu ke fehagai mo e tau tuaga fakaatukehe.

⁷ Ka ko e fakatonuaga he Tohi Tapu kua fa mahani tumau ke nakai talahaua ke he vahaloto ha lautolu kua tiaki e pule mo e tutuli e moui he ukutaha ni, tokologa kua o mai ke mailoga ko e moui pihia kua nakai tamai ki a lautolu ha fiafia moli. (Kalatia 6:7, 8) Kua foaki he Tohi Tapu e tau tali fakahako ke he tau huhu hagaao ke he moumou tama, tau vevehe, mo e mahani fakasotoma. Ko e fakatonu hana ko e puipuiaga mai he tau vaikona mo e fakaaoga fakahehe he kava mo e totoko ke he AIDS ne puhala mai he toto nakai mea po ke mahani fakatane mo e fifine. Kua fakakite ki a tautolu e puhala ke ha ha i ai e tau magafaoa fiafia. Kua taute e tau tali ke fakamalolo e tagata ke fehagai mo e tau tutuaga matematekelea lahi he moui, fakalataha mo e vihiatia mai he magafaoa, tatalu lahi, mo e mate e taha fakahele. Kua lagomatai a tautolu ke fakalotomatala ke he ha tautolu a tau mena kua aoga ti ke puke ha tautolu a tau momoui ke he fai kakano ka e nakai mo e tokihala.a

8, 9. (a) Ha e fe e perofetaaga kua omoi aki a koe fakatagata ko e mena moli e fakaohoohoaga he Tohi Tapu? (e) Ko e heigoa e tau perofetaaga he Tohi Tapu kua fakamoli ke he ha lautolu a kamataaga?

⁸ Perofetaaga: Kua kehe lahi e Tohi Tapu ko e tohi he perofetaaga, ko e tohi kua talahau e mena ka hoko ke he vaha mai i mua, mo e kua fakamatafeiga mai ai pihia he mena ia. Kua talahau tuai e fakaotiaga he motu i tuai i Turo, ko e veliaga ha Papelonia, ko e liu atihake ha Ierusalema, ko e tu mo e veli he tau patuiki ha Metai-Peresia mo Heleni, mo e tau mena tutupu loga ke he moui ha Iesu Keriso. Kua talahau tuai foki mo e fakamatafeiga e tau tutuaga he lalolagi kua tutupu ke he senetenari nei, mo e kua fakamaama ai e ha lautolu a mua ue atu. Kua fakakite ko e to moua e tali ke he tau mena vihi ne fehagai mo e tau tagata pule, mo e fakakite ai e Pule ka tamai e mafola tukulagi mo e haohao moli ke he tau tagata.b​—Isaia 9:6, 7; 11:1-5, 9; 53:4-6.

⁹ Mua ue atu, kua fakakite he Tohi Tapu e lotomatala ke talahau tuai e vaha i mua mo e hakotika ko e kamatamata he pule Atua. (Isaia 41:1–​46:13) Ko Ia ne maeke ke taute ai po ke fakaohooho e falu ke taute ai nakai ko e mena fakatai nakai fai moui noa ni. Nakai ko e tagata fakamakai noa ni a ia. Ko ia ko e Atua moli, mo e ko e tohi kua moua ai e perofeta ia ko e hana a Kupu.​—1 Tesalonia 2:13.

Hako Kia a Lautolu Oti ne Fakaaoga e Tohi Tapu?

10, 11. He fakakite e Iesu, pete ni e fakaaoga he tagata fekafekau lotu e Tohi Tapu, ko e heigoa ke kitia kua nakai fai kakano e lotu ne omoi e ia ki ai?

¹⁰ Kua fai kakano kia​—aoga lahi, mai kia he Tohi Tapu​—ke fakaoti, mogoia, ko e tau matakau lotu oti kua talahau ke fakaaoga e Tohi Tapu ke fakaako e lotu moli? Ko lautolu kia ne uta po ke fatiaki e Tohi Tapu kua fakagahuahua e lotu hako?

¹¹ Loga he tau fekafekau lotu, pete ni e ha ha ia lautolu e Tohi Tapu, kua fakaaoga e lotu tuga ko e kakano ke fakatokoluga aki a lautolu ni. Ne fio e lautolu e mea he kupu moli mo e tau mena fakamotu mo e tau pulotu fakatagata. Kua talia kia ha lautolu a tapuakiaga ke he Atua? Ke he tau takitaki lotu he senetenari he vaha fakamua ko Ierusalema kua taute tuga ni pihia, ne fakagahua fakamitaki e Iesu Keriso e ogo he Atua puhala mai he perofeta ko Isaia, pehe: “Kua fakatata mai kia au e motu nai ke he tau gutu ha lautolu, mo e fakaheke mai kia au ke he tau laugutu ha lautolu; ka ko e tau loto ha lautolu, kua fakamamao a ia ia au. Kua tapuaki noa mai a lautolu kia au he fakaako e lautolu e tau poaki he tau tagata.” (Mataio 15:8, 9; 23:5-10) Maaliali ai, ko e faga lotu pihia kua nakai ko e lotu moli.

12, 13. (a) Fefe e mahani he tau tagata he lotu ka lagomatai e tagata ke fakatonu ko e ha lautolu a lotu kua hako? (e) Onoono fefe e Atua ke he ha tautolu a tapuakiaga kaeke ke fifili e ia a tautolu ne fakalataha mo lautolu ne tiaki e ia? (2 Nofoaga he Tau Patuiki 19:2)

¹² Ka e kua e tau fua ne moua mai he tau fakaakoaga he tau lotu, kua kitia maali ke he tau tagata ha lautolu ne ha ha i ai e tuaga mitaki, kua popo? Ke he hana a Lauga he Mouga, kua poaki e Iesu: “A mutolu mo e tau perofeta pikopiko . . . To iloa mali e mutolu a lautolu ke he tau fua ha lautolu. . . . Pihia foki e tau akau mitaki oti kua takitaha mo e fua mai e tau fua mitaki; ka ko e tau akau kelea kua fua mai e tau fua kelea.” (Mataio 7:15-17) Kua moli ko e tau tagata takitokotaha kua liga taute e mena hepe mo e kua lata ke fakahako. Ka e ko e tuaga kua kehe he magaaho ka fakalataha e tau tagata he lotu, pihia foki ke he fekafekau lotu, kua taute e mahani faivao mo e feuaki, latau, konahia, lotokai, pikopiko, taulatua, tapuaki ke he tau tupua ta​—ko e ha mena po ke tau mena oti nei​—ka e nakai fai akonakiaga kua taute, mo e ko lautolu kua fakatumau ke he puhala nei kua nakai uta kehe he fakapotopotoaga. Kua fakakite fakamaaliali mai he Tohi Tapu ko lautolu ne fakagahua e tau mena oti pihia kua lata ke tuku kehe mai he fakapotopotoaga; to nakai fai nofoaga e Kautu he Atua ma lautolu. (Kalatia 5:19-21) Ko e ha lautolu a tapuakiaga kua nakai mitaki ke he Atua, po ke pihia foki ke he ha tautolu a tapuakiaga kua nakai fiafia ke he Atua kaeke ke fifili a tautolu ke fakalataha mo lautolu ne tiaki e ia.​—1 Korinito 5:11-13; 6:9, 10; Fakakiteaga 21:8.

¹³ Kua maaliali ai ko e tau matakau oti ne talahau ke fakaaoga e Tohi Tapu kua nakai fakagahua e lotu moli ne kua fakamaama mai. Ti ko e heigoa, mogoia, kua fakatoka mai he Tohi Tapu ko e fakamailoga kua fakakite e lotu moli?

Fakakiteaga he Tau Fakamailoga he Lotu Moli

14. (a) Fakave ke he mena fe e tau fakaakoaga he lotu moli? (e) Kautu fefe e tau fakaakoaga ha Kerisitenitome hagaao ke he Atua mo e solu ke he kamatamata nei?

¹⁴ Ko e hana a tau fakaakoaga kua fakave fakamalolo ke he tau Tohiaga Tapu kua omoomoi he agaga. “Ko e tau Tohi Tapu oti kana mai he Agaga he Atua ia, kua aoga ni ke fakaako ai, ke fakatonu ai, ke akonaki ai, ke fakailoilo ai foki ke he tututonu.” (2 Timoteo 3:16) Ka e vagahau mai he mena fe he Tohi Tapu ke he Tolu Taha ha Kerisitenitome? Mo e fakaako mai he mena fe he Tohi Tapu, tuga he taute he fekafekau lotu, kua ha ha he tau tagata e solu kua hao mai he mate he tino fakatagata? Kua huhu nakai a koe ke he fekafekau lotu ke fakakite atu ki a koe e tau fakaakoaga ia he Tohi Tapu hau? Kua talahau mai he The New Encyclopædia Britannica: “Noa ke he kupu Tolu Taha po ke ko e fakaakoaga tuai kua kitia ke he Maveheaga Fou.” (1992, Micropædia, Volume 11, lau tohi 928) Mo e ko e New Catholic Encyclopedia kua talahau: “Ke he tau Mamatua Tane Aposetolo, kua ha ha i ai e nakai fai manamanatuaga po ke onoonoaga pihia.” (1967, Volume XIV, lau tohi 299) Ma e tau manatu he Kerisitenitome ke he solu kua vevehe mai he tino he mate, ko e tau ako tokoluga he tapu kua talahau kua fakaaoga e lautolu e manatu mai he fakaakoaga Heleni. Pete ia, ko e lotu moli kua nakai toka kehe e kupu moli he Tohi Tapu ma e pulotu he tagata.​—Kenese 2:7; Teutaronome 6:4; Esekielu 18:4; Ioane 14:28.

15. (a) Fakakite fefe he Tohi Tapu a Ia kua lata ni ke tapuaki? (e) Fefe e logona he tau tagata tapuaki moli hagaao ke he fakatata atu ki a Iehova?

¹⁵ Ko e lotu moli kua lagomatai e tapuakiaga he Atua moli tokotaha maka ni, ko Iehova. (Teutaronome 4:35; Ioane 17:3) Talahau fakaku ke he tau kupu a Teutaronome 5:9 mo e 6:13, kua talahau fakamauokafua e Iesu Keriso: “Kia hufeilo a koe ke he Iki hau a Atua, ko ia ni hokoia ke fekafekau atu a koe ki ai.” (Mataio 4:10) Fakatatai ai ke he mena ia, kua fakailoa e Iesu e higoa he hana a Matua ke he hana a tau tutaki. (Ioane 17:26) Kua fakaako kia he lotu hau a koe ke tapuaki ki a Iehova? Kua iloa kia e koe e Peresona kua fakakite ke he higoa ia​—ke he hana a fingalo, ke he hana a tau gahua, ke he hana a tau mahani​—ti kua maeke ia koe ke logona kua fakatata mauokafua a koe ki a ia? Kaeke ko e lotu moli hau, ko e tali ko e e.​—Luka 10:22; 1 Ioane 5:14.

16. Ko e heigoa he tua ki a Keriso kua kakano ki a lautolu ne fakagahua e lotu moli?

¹⁶ Ko e vala aoga lahi he tapuakiaga kua mitaki ke he Atua ko e tua ke he hana Tama, ko Iesu Keriso. (Ioane 3:36; Gahua 4:12) Nakai kakano ni kua moui a ia kua talitonu po ke ko ia ko e tagata kua kehe lahi. Kua lauia ai e fakaaueaga ke he mena ne fakaako he Tohi Tapu hagaao ke he uho he poa moui he tagata mitaki katoatoa ha Iesu mo e kitiaaga ke he hana a tuaga he vaha nei ko e Patuiki he lagi. (Salamo 2:6-8; Ioane 3:16; Fakakiteaga 12:10) Kaeke ke fakalataha a koe mo lautolu kua fakagahuahua e lotu moli, ti iloa e koe ke he moui he tau aho takitaha kua tuku ki mua e lautolu e laliaga fakamakamaka ke omaoma ki a Iesu, ke muitua ke he hana a tau fakafifitakiaga, mo e ke felagomatai fakatino mo e fakamakutu ke he gahua kua foaki ke he hana a tau tutaki. (Mataio 28:19, 20; Ioane 15:14; 1 Peteru 2:21) Ka nakai moli ki a lautolu ne fakalataha mo koe ke he tapuaki, kua lata ia koe ke kumi atu foki ke he taha mena.

17. Ko e ha e tau tagata tapuaki moli kua fakaeneene ke aua neke ilaila mai he lalolagi, mo e ko e heigoa e mena ne fakalataha ki ai?

¹⁷ Ko e tapuakiaga moli kua nakai mea he lauia ai ke he tau mena politika mo e tau taufetoko fakalalolagi. (Iakopo 1:27) Ko e ha ne pihia ai? Kakano kua talahau e Iesu ke he hana a tau tutaki: “Nakai ko e tau tagata he lalolagi a lautolu, ke tuga foki au, nakai ko e tagata he lalolagi au.” (Ioane 17:16) Nakai putoia a Iesu ke he tau mena politika, mo e fakamamao mai e ia e hana a tau tutaki mai he fakalataha ke he kanavaakau tau. (Mataio 26:52) Ko lautolu ne tokaloto e mena ne talahau he Kupu he Atua ‘ke nakai ako tau.’ (Isaia 2:2-4) Kaeke ke ha ha i ai ha lotu mo e kua ha ha i ai e fakalataha kua tote foki a koe kua nakai lata mo e talahauaga, kua lata ke nakai fakalataha atu ki ai.​—Iakopo 4:4; Fakakiteaga 18:4, 5.

18. (a) Ko e heigoa he Ioane 13:35 kua fakakite ko e fua maali he lotu moli? (e) Lagomatai fefe e koe e taha tagata ke fakatonu ko e matakau fe kua tatai ke he Ioane 13:35?

¹⁸ Ko e lotu moli kua fakaako mo e fakagahuahua e fakaalofa nakai lotokai. (Ioane 13:35; 1 Ioane 3:10-12) Ko e fakaalofa ia kua nakai ni talahau ke he tau lauga. Kua maeke ke futiaki fakalataha e fakamatakainaga moli he tau tagata he tau lanu kehekehe oti, tau matakau fakatufono oti, tau vagahau kehekehe oti, tau motu oti. (Fakakiteaga 7:9, 10) Kua fakatoka ke he mai e tau Kerisiano mai he lalolagi ne takai ia lautolu. Kaeke ke nakai la taute ia e koe pihia, kia fina atu ke he Fale he Kautu he Tau Fakamoli ha Iehova, ti pihia foki ke he tau fonoaga lalahi ha lautolu. Kia kitekite ki a lautolu ne gahua auloa ke talaga hake e taha he ha lautolu a tau Fale he Kautu. Kitekite ko e fefe ha lautolu a levekiaga ke he tau momotua (fakalataha mo e tau takape) mo e tau tagata fuata (fakalataha mo lautolu ne taha e matua po ke nakai fai). (Iakopo 1:27) Fakatatai e mena ne kitekite e koe ke he mena ne kitia e koe ke he falu a lotu. Ti huhu hifo ki a koe, ‘Ko hai ne fakagahua e lotu moli?’

19. (a) Ko e heigoa e vailakau ke he tau mena vihi he tagata kua maeke he lotu moli ke lagomatai? (e) Ko e heigoa kua lata he tau tagata he matakau ke fakapiki ke he lotu moli ke taute?

¹⁹ Kua lagomatai he lotu moli e Kautu he Atua ko e vailakau tukulagi ke he tau mena vihi he tau tagata oti. (Tanielu 2:44; 7:13, 14; 2 Peteru 3:13; Fakakiteaga 21:4, 5) Kua taute nakai he ha lotu a Kerisitenitome e mena ia? Ko e heigoa e mena fakahiku ne logona e koe he tagata fekafekau lotu kua fakamaama e Kautu he Atua mo e ko e heigoa e mena ne fakakite he tau Tohiaga Tapu ka fakakatoatoa ai? Kua fakamalolo nakai he fakatokatokaaga ne fakalataha a koe ki ai ke tutala ke he falu hagaao ke he Kautu he Atua, mo e kaeke ke pihia, kua lagomatai nakai e tau tagata oti he taute e mena ia? Ne taute e Iesu e fakamatalaaga pihia; ti taute pihia foki he tau tutaki hana. Kua maeke foki ia koe ke moua e kotofaaga ke fakalataha ke he gahua fakamatala nei. Ko e gahua mua atu e aoga ke taute ke he lalolagi katoa he vaha nei.​—Mataio 24:14.

20. Ke lafi ke he kitiaaga he lotu moli, ko e heigoa ha tautolu kua lata ke taute?

²⁰ Pete kua ha ha i ai e tau afe he tau lotu, kua mafiti e Tohi Tapu ke lagomatai a tautolu ke hehele kehe e nakai maama ke maeke ke kitia e mena moli. Ka kua lata ia tautolu ke taute fakalahi atu nakai ni ke kitia moli. Kua lata ke fakagahua e tautolu a ia. Ko e mena ne lauia ai e mena nei ka kitekite fakalahi ai ke he vala tala ha tautolu ka mui mai.

[Tau Matahui Tala]

To Tali Fefe e Koe?

◻ Ke he kitiaaga he lotu moli, ha hai e manatu kua mua atu e aoga?

◻ Ko e heigoa e tau puhala ne fa he mena ne fakamoli kua tuhi ko e Tohi Tapu ko e Kupu he Atua?

◻ Ko e ha e tau lotu oti ne fakaaoga e Tohi Tapu kua nakai talia ai he Atua?

◻ Ko e heigoa e tau fakamailoga ne ono kua ha ha i ai e lotu hako?

[Puha he lau 21]

Tau Fakamoli a Iehova . . .

◆ Fakave e tau fakaakoaga oti ha lautolu ke he Tohi Tapu.

◆ Tapuaki e Atua tokotaha maka ni, ko Iehova.

◆ Moui fakatatai ke he ha lautolu a tua ki a Iesu Keriso.

◆ Nakai fakalataha ke he tau mena politika mo e tau taufetoko fakalalolagi.

◆ Tutuli ke fakalagalaga e fakaaalofa nakai lotokai ke he tau aho oti he moui.

◆ Lagomatai e Kautu he Atua ko e vailakau ke he tau mena vihi he tagata.

[Fakatino he lau 20]

KO E TOHI TAPU​—ko e heigoa kua fakakite mai kua ha ha i ai e fekau he Atua ma e tau tagata oti?