O Mai ke he Fonoaga Fahimotu ko e “Tua ke he Kupu he Atua”!
TO TOKOLOGA e tau miliona ka ha ha he tau matakavi teau he lalolagi katoa. He Tau Fahi Kaufakalataha hokoia ni, kua fakatoka ai ke 193 e tau fonoaga. To hoko mua ia Me 23-25 mo e fakaoti ia Sepetema 12-14. Liga ni ko e taha he tau fakapotopotoaga aho tolu nei—Aho Faraile ke he Aho Tapu—to ha ha ai he taone nakai mamao mai he hau a kaina.
To moua e koe e aoga he tau fakaakoaga fakagahuahua he Tohi Tapu. He tau matakavi loga, to kamata ai e polokalama he tau mogo pogipogi oti fakalataha mo e tau leo kofe he 9:30. He pogipogi Faraile to kitia ai ke he 25 e tau minuti he tau huhu fakamanatu ke he tau tagata ne kua lauia hokulo e tau momoui ha ko e ha lautolu a tua ke he Kupu he Atua. Ko e fakaholoaga fakamuaaki ia to fakaoti aki e lauga taute pauaki, “Kia O Fano ke he Tua, Nakai ke he Tau Mena Kitia.”
Ko e lauga fakamuaaki he magaaho palela he Aho Faraile ka tutala ke he vala aoga lahi he tau fuata i loto he fakapotopotoaga Kerisiano. Kua fakatutala e tau fufuta lauga ne tolu e vala ne mui mai ke he tau matafakatufono he Tohi Tapu he hagaao atu ai a lautolu ke he mahani Kerisiano he vagahau, tau aga, mo e tauteuteaga fakatagata. Ko e tau lauga ne mumui mai ko e “Kia Fakaeneene he Kaumahala ke Tua” mo e “Ko e Kupu he Atua kua Moui Ai” kua fakamahino atu ke he tomatomaaga mitaki he Heperu veveheaga 3 mo e 4. Ko e polokalama he Aho Faraile to fakaoti aki e lauga “Ko e Tohi ma e Tau Tagata Oti Kana.”
Ko e lauga fakamuaaki he pogipogi Faiumu ko e “Mate e Tua Kaeke ke Noa mo e Tau Gahua.” Ko e taha lauga uho he pogipogi ia, “Kia Mauokafua mo e Fakatumau ke he Kupu Moli,” kua fakamaama e puhala ne maeke ai e tupu fakaagaga ke moua. To fakaoti ai e fakaholoaga aki e vala taute mau he fonoaga, “Kua Takitaki Atu he Tua ke he Kupu he Atua ke he Papatisoaga,” he mole atu ai to fai foakiaga ma e tau tutaki fou ke papatiso.
Ko e lauga ke hafagi aki he magaaho palela he Aho Faiumu, “Kia Tau Fakamakamaka ma e Tua,” kua fakatutala ai ke he tomatomaaga he tohi ha Iuta he Tohi Tapu. Ko e tau fufuta lauga taha e matahola ne mataulu “Kia O a Tautolu ke he Fale a Iehova” to fakatutala ai ke he tau mena aoga he tau feleveiaaga Kerisiano. Ko e polokalama he aho ia to fakaoti aki e lauga “Ko e Tuaga he Tua Hau—Kamatamata ai he Mogonei.”
He polokalama he pogipogi Tapu to kitia ai e tau fufuta lauga ne tolu e vala ka tutala ke he tohi ha Ioelu he Tohi Tapu, pihia foki hana a hagaaoaga ke he ha tautolu a vaha. Ati mui mai e taute tala fakatai ke he Tohi Tapu ne mataulu “Kia Fakatumau ke Fakamukamuka Hau a Tau Mata.” Ko e vala ne mua atu he fonoaga ko e lauga ke he tau tagata he magaaho palela, “Tua mo e Vaha Hau Anoiha.”
Kua moli ai, to fakakoloa fakaagaga a koe he ha ha i ai. To feleveia fakamafanatia atu ki a koe he tau fakaholoaga takitaha. Ati taute ai he mogonei e tau fakatokatokaaga ke fina atu ki ai. Ma e matakavi ne tata atu ke he kaina hau, kia fakailoa ke he Fale he Kautu he Tau Fakamoli a Iehova he matatepu ia po ke tohi ke he tau tagata fakailoa he mekasini nei. Kua maeke foki ia koe ke moua e tau kaina he tau matakavi fonoaga he Tau Fahi Kaufakalataha, Kanata, Peritania, mo Ailani he fufuta he Awake! ia Iuni 8.