To Nakai Loto a Koe ke Galo i Ai!
GALO he heigoa? Mai he Fonoaga Fahi Motu he “Tau Tagata Uta Fekau he Mafola Mahani Atua” he Tau Fakamoli a Iehova hane tata lahi mai! Kua loga e tau matakavi ka kamata e fono he hola 9:30 he pogipogi Falaile mo e fakaholoaga leo kofe. Ka mole ai he fanogonogo ke he tau huhuaga tala ne mua atu e fakamalolo tua he magahala he vala he lauga “Logona Mai he Tau Tagata Tukuogo Mafola Fakamakutu Lahi,” to olioli ai a koe ka fanogonogo ke he lauga ati hake lahi “Ko e heigoa ne Manako e Atua Mai Ia Tautolu?”
Ko e mena ne mua atu e mitaki he magaaho pale la he Aho Falaile ko e lauga ne mua atu e fakaohooho lahi “Ko e Ha Tautolu a Matagahua he Tau Tagata Uta Fekau he Mafola Mahani Atua.” Mui mai mogoia e vala “Lagomatai e Falu ke Iloa e Tau Mena ne Manako e Atua ki Ai” ka foaki mai e tau lagomataiaga ke he puhala ke fakaako aki e tau faoa fou. Ke he mena nei to mui mai e tau fufuta lauga he magaaho tonu, “Mataala ke he Tau Hele Galo he Fakafiafiaaga Tino.” To oti e fakaholoaga he Aho Falaile mo e tau lauga “Totoko ke he Tiapolo—Kia Nakai Toka e Fetotokoaki” mo e “Fakamoli ke Lalago e Fakamoliaga he Kupu he Atua.”
To pehi lahi he fakaholoaga he pogipogi Faiumu e aoga lahi he gahua taute tutaki mai he fufuta lauga ne tolu e vala “Tamai he Tau Tagata Uta Fekau e Tala Mitaki he Mafola.” To oti e fakaholoaga mo e tau fakamatalaaga, “Foaki mo e Fiafia i Loto he Fakatokatokaaga a Iehova” mo e “Moui mo e Mafola ne Puhala Mai he Tukuleleaga mo e Papatiso,” ka mole ai to fai magaaho ma e tau tutaki fou ke papatiso.
Ko e fakamatalaaga “Manamanatu ke he Tau Manatu a Iehova ke he Tau Mena” he magaaho palela he Aho Faiumu ka tali e tau huhu tuga e ‘Kaufakalataha nakai e tau Kerisiano ke he gahua vehevehe he vaha nei?’ mo e ‘Ko e heigoa e onoonoaga he Tohi Tapu ke he fakahala mate?’ To olioli foki a koe ke he fufuta lauga ne ua e vala “Fakaalofa e Atua he Mafola ki a Koe” mo e mua atu foki ke he lauga fakahiku “Tutuli e Mafola Mahani Atua he Moui Fakamagafaoa.”
To ha ai he fakaholoaga he pogipogi Tapu e fufuta lauga ne tolu e vala “Ke Kitia Moli e Vahega Tagata Uta Fekau ne Hako” mo e lauga “Fanogonogo mo e Omaoma ke he Kupu he Atua.” To oti e fakaholoaga pogipogi mo e taute tala ne tui mena tui pauaki kua tamai e tau fakaakoaga ne mua e uho mai he fakamauaga he Tohi Tapu ke he Ikifakafili ko Kiteona.
Ko e vala fakahiku he fonoaga he magaaho palela he Aho Tapu ka ha ha i ai e lauga ke he tau tagata, ne fakahigoa “Kua Hoko Tuai e Mafola Moli!—Mai he Punaaga Fe?” Ke fakahiku aki, ko e lauga fakalagalaga lahi “O ki Mua ha ko e Tau Tagata Uta Fekau he Mafola Mahani Atua” ka uta e fonoaga ke he otiaga.
Taute e tau fakatokatoka he magaaho nei ke fakalataha atu. Ke moua e tau matakavi tata ke he tau kaina ha mutolu, kia fakaati atu ke he Fale he Kautu he Tau Fakamoli a Iehova he kavi hau po ke tohi ki a lautolu ne lomi fakailoa e mekasini nei. Ko e fufuta tohi a Iuni 8 he Awake! ka fakamau ai e tau kaina he tau fonoaga oti he Tau Fahi Kaufakalataha, Kanata, Peritania, mo Ailani.