Fono he “Tau Tagata Uta Fekau he Mafola Mahani Atua” he 1996

KO E vaha ia, ne fakamanatu he tau tagata a Iehova tolu e tau kaiaga galue lalahi he tau. Kua pihia foki, e tau tagata ne ui aki e higoa a Iehova he vaha fou nei, ne feleveia lagatolu he tau, a lautolu ma e tau magaaho kaiaga galue fiafia. Kua olioli a lautolu ke tolo auloa he aho toloaga pauaki ne taha ni e aho, ke he toloaga he takaiaga ne ua e aho, mo e ke he fonoaga he fahimotu ne tolu po ke fa e aho. Ko e tau nei, ko e “Tau Tagata Uta Fekau he Mahani Atua Mafola” e matapatu tala he fonoaga he fahimotu.

Kua lata lahi ha e matapatu tala ia! Ko e ha tautolu a Atua, ko Iehova, “ko e Atua he mafola,” e, “ko e Atua ne foaki mai e mafola.” Ko e ha tautolu a Takitaki, ko Iesu Keriso, ko ia ko e “Iki he Mafola,” mo e fekau ne tamai he tau fekafekau a Iehova ko e fekau mafola he mahani Atua. (Filipi 4:9; Roma 15:33; Isaia 9:6; Nahuma 1:15) Kua fita he fakatokatoka e fakaholoaga mitaki ma e fono ka lagomatai aki e tau tagata oti ke fakaaue mo e maama lahi ko e mena aoga e mafola mahani Atua.

Ko e tau nai to taute ai ni ke he Tau Fahi Kaufakalataha, 198 e tau fonoaga. Liga, to ha ha i ai e fonoaga he kavi ne tata ki a koe. Fefe he huhu ke he Tau Fakamoli a Iehova he tau tuuta kaina hau ko e taute a fe mo e ke he kavi fe, ti fakatokatoka tuai mogoia ke o ki ai? To moua oti he tau tagata ne fiafia pauaki ke he mafola moli tukulagi, e fakafeleveiaaga mafanatia.