Gahua mo Tau Uta Fekau he Mafola Mahani Atua
“Kua fulufuluola lahi ni ki luga he tau mouga e tau hui . . . kua fakailoa mai e fakamouiaga.”—ISAIA 52:7.
1, 2. (a) Tuga kua talahau tuai he Isaia 52:7, ko e heigoa e tala mitaki ka fakailoa? (e) Ko e heigoa e kakano he tau kupu fakaperofeta ha Isaia ke he mena ne tupu ki a Isaraela i tuai?
KUA ha ha ai e tala mitaki ke fakapuloa! Ko e tala haia he mafola—ko e mafola moli. Ko e matafekau he fakamouiaga ne kua putoia ke he Kautu he Atua. Tali mai i tuai ne tohia e perofeta ko Isaia hagaao ki ai, mo e kua puipui ai e tau kupu hana ma ha tautolu he Isaia 52:7, ka totou ai e tautolu: “Kua fulufuluola lahi ni ki luga he tau mouga e tau hui hana kua talahau mai e tala mitaki, ko ia kua ogo mai e monuina, kua talahau mai e tala mitaki; kua fakailoa mai e fakamouiaga; kua pehe mai kia Siona, Kua pule hau a Atua.”
2 Nukua omoi he agaga ha Iehova hana a perofeta ko Isaia ke fakamau hifo e matafekau ia ma e aoga ha Isaraela i tuai mo e ma e ha tautolu a aoga he vaha nei. Ti ko e heigoa e kakano he mena ia? He magaaho ne tohia e Isaia e tau kupu ia, liga kua fita he uta paea he tau Asuria e kautu he fahi tokelau ha Isaraela. Ka mole atu ai, ko lautolu he fahi tokelau ha Iuta to uta mo tau tagata paea ki Papelonia. Ko e tau aho fakamamahi loto mo e miha a ia he motu kakano ha kua nakai omaoma e tau tagata ki a Iehova ti ko e mena ia kua nakai mafola ai mo e Atua. Tuga ne tala age a Iehova ki a lautolu, ko e ha lautolu a mahani agahala kua eke ia mo veveheaga ke he vaha ha lautolu mo e ha lautolu a Atua. (Isaia 42:24; 59:2-4) He puhala mai ia Isaia, ne talahau tuai a Iehova ko e he magaaho kotofa to mahafagi e tau hala ha Papelonia. To tokanoa ai e tau tagata he Atua ke liliu ke he ha lautolu a motu, ke liu ati hake i ai e faituga ha Iehova. To tanaki fakafou ai a Siona, mo e to liu taute foki e tapuakiaga ke he Atua moli i Ierusalema.—Isaia 44:28; 52:1, 2.
3. Kua taute fefe e maveheaga he liuakiaga ma Isaraela ke eke foki mo perofetaaga he mafola?
3 Ko e maveheaga he laveakiaga nei kua eke ai foki mo perofetaaga he mafola. Ha kua liuaki ai ke he motu ne age e Iehova ke he tau Isaraela, kua eke tuai mo fakamoliaga ke he fakaalofa hohofi he Atua mo e ma e ha lautolu a tokihala. To eke ai ke fakakite kua mafola a lautolu mo e Atua.—Isaia 14:1; 48:17, 18.
“Kua Pule Hau a Atua”
4. (a) Ko e heigoa e kakano ne kua talahau ai he 537 F.V.N. ‘kua pule a Iehova’? (e) Kua fakaholahola fefe e Iehova e tau mena ma e aoga he hana tau tagata he tau tau ne mole atu?
4 He magaaho ne taute e Iehova e laveakiaga nei he 537 F.V.N., kua lata tonu e fakailoaaga ki a Siona: “Kua pule hau a Atua.” Moli ai, ko Iehova ko e “Patuiki he tau tagata tapu na e.” (Fakakiteaga 15:3) Ka ko e laveakiaga nei he hana tau tagata ko e fakakiteaga fou he hana a pule katoatoa. He puhala maaliali, kua fakatata ai e mua ue atu he hana a malolo mai he kautu malolo lahi fakatagata ato hoko ke he magaaho ia. (Ieremia 51:56, 57) Ti ko e fua he fakagahuahuaaga he agaga ha Iehova, kua fakakaumahala aki e falu he tau fakafualoto ke he hana tau tagata. (Eseta 9:24, 25) Kua liu foki mo e liu foki a Iehova ke fakalavelave atu ke he tau puhala kehekehe ke taute e tau patuiki Metai-Peresia ke kau fakalataha ke he lagakiaga he hana ni a finagalo mua ue atu. (Sakaria 4:6) Ko e tau mena ofoofogia ne tutupu he tau aho ia kua fakamau hifo ma tautolu i loto he tau tohi Tohi Tapu ha Esera, Nehemia, Eseta, Hakai, mo Sakaria. Mo e ko e mena fakamalolo tua ha ia ke liu manamanatu ke he tau mena ia!
5. Ko e heigoa e tau gahua kehe lahi ne kua tuhi ki ai he Isaia 52:13–53:12?
5 Ka e, ko e mena ne tupu he 537 F.V.N. mo e he mole atu ko e kamataaga laia. He mui fakalutukia atu ke he perofetaaga he liuakiaga i loto he veveheaga 52, ne tohia a Isaia hagaao ke he hauaga he Mesia. (Isaia 52:13–53:12) He puhala mai he Mesia, ne kua kitia moli ko Iesu Keriso, to foaki e Iehova e matafekau he laveakiaga mo e mafola ke mua ue atu foki mai he mena ne tupu he 537 F.V.N.
Ko e Uta Fekau Mua Atu ha Iehova he Mafola
6. Ko hai e uta fekau he mafola ne mua atu ha Iehova, mo e ko e heigoa e matagahua ne fakagahuahua e ia ki a ia ni?
6 Ko Iesu Keriso e uta fekau mua atu ha Iehova he mafola. Ko ia ko e Loko he Atua, ko e Fakahokohoko Kupu hokoia ni ha Iehova. (Ioane 1:14) Ke fakatatai mo e mena nei, he mole atu e falu magaaho he papatiso he Vailele ko Ioritana, ne tu hake a Iesu i loto he sunako i Nasareta mo e totou fakalahi hana a matagahua mai he Isaia veveheaga 61. Ko e matagahua ia kua fakamaali mai e mena ne fakafano mai a ia ke fakamatala kua putoia ai e “tokanoaaga” mo e ‘fakaala,’ mo e fai magaaho foki ke moua e taliaaga mo Iehova. Ka e, kua mua atu e mena ne taute e Iesu mai he fakailoa ni e matafekau he mafola. Kua fakafano mai foki he Atua a ia ke foaki e fakaveaga ma e mafola tukumalagi.—Luka 4:16-21.
7. Ko e heigoa e tau fua mai he mafola mo e Atua ne kua fahia ki ai he puhala mai ia Iesu Keriso?
7 He magaaho he fanauaga ha Iesu, kua fita e o atu e tau agelu ke he tau leveki mamoe ne tata atu ki Petelehema, kua fakaheke atu ke he Atua mo e talahau: “Ko e fakahekeaga, ke he Atua ni ke he tau mena i luga muatua; mo e mafola ke he lalolagi, ko e finagalo fakaalofa ke he tau tagata.” (Luka 2:8, 13, 14) E, to ha ha ia lautolu e mafola ne fakakite ki ai he Atua e finagalo fakaalofa kakano ha kua fakagahuahua e lautolu e tua ke he foakiaga ne kua taute e ia he puhala mai he hana a Tama. Ko e heigoa mogoia e kakano he mena ia? Ko e kakano, ko e pete ni kua fanau e tau tagata ke he agahala, to maeke ia lautolu ke moua e tuaga mea mo e Atua, ko e fakafetuiaga fiafia mo ia. (Roma 5:1) To maeke ia lautolu ke olioli ke he milino he loto, ko e mafola, ne nakai fai puhala ke moua ai foki. He magaaho ka kotofa ai he Atua, to ha ha ai e tokanoaaga mai he tau hufiaaga he agahala ne moua mai ia Atamu, fakalataha mo e tau gagao mo e mate. To nakai liliu ai e tau tagata ke matapouli po ke teliga tuli po ke kulikuli. Ko e tau lolelole hauhaua mo e tau fakatupetupe fakahukia loto to uta kehe tukulagi. To maeke ai ke olioli e moui mitaki katoatoa ke he vaha tukulagi.—Isaia 33:24; Mataio 9:35; Ioane 3:16.
8. Kua tuku age ki a hai e mafola mahani Atua?
8 Kua tuku age ki a hai e mafola mahani Atua? Kua tuku age ai ki a lautolu oti ne fakagahuahua e tua ki a Iesu Keriso. Ne tohia he aposetolo ko Paulo ‘kua finagalo e Atua ki a fakafeilo foki ia Keriso e tau mena oti mo ia ha kua fakatupu ai e ia e mafola ke he toto he hana [Iesu] satauro.’ Kua lafi atu e aposetolo ko e fakafeiloaga nei to putoia ai e “tau mena ha he lagi”—ko e kakano, ko lautolu a ia ka eke mo tau hakeaga fakalataha mo Keriso he lagi. To putoia ai foki mo e “tau mena ha he lalolagi”—ko e kakano, ko lautolu ka moua e amaamanakiaga ke moui tukulagi he lalolagi nei he magaaho ka tamai ai ke he tuaga katoatoa he Parataiso. (Kolose 1:19, 20) Kakano ha kua fakaaoga e lautolu e aoga he poa ha Iesu mo e ha ko e ha lautolu a omaoma ke he Atua mai he loto, kua maeke ai ia lautolu oti nei ke olioli e fekapitigaaki mafanatia mo e Atua.—Fakatatai Iakopo 2:22, 23.
9. (a) Ko e mafola mo e Atua ka fakaohooho e falu he tau fakafetuiaga fe? (e) Mo e hagaaoaga ke he mafola tukulagi he tau kavi oti, ko e heigoa e pule ne tuku age e Iehova ke he hana Tama?
9 Kua aoga lahi ha a ia he mafola pihia mo e Atua! Kaeke ke nakai fai mafola mo e Atua, to nakai ha ha i ai e mafola tukulagi po ke fai kakano he ha fakafetuiaga foki. Ko e mafola mo Iehova ko e fakaveaga a ia ma e mafola moli he lalolagi. (Isaia 57:19-21) Kua lata ai, ko Iesu Keriso e Iki he Mafola. (Isaia 9:6) Ki a ia nei ne kua maeke ai e tau tagata ke fakafeilo ke he Atua, kua kotofa foki e Iehova e pule malolo. (Tanielu 7:13, 14) Mo e hagaao ke he tau fua he pule faka-patuiki ha Iesu ki luga he tau tagata, ne mavehe a Iehova: “Mo e mafola to nakai fai fakaotiaga.”—Isaia 9:7, NW; Salamo 72:7.
10. Kua fakatokatoka fefe e Iesu e fakafifitakiaga he fakailoaaga he matafekau mafola he Atua?
10 Ko e matafekau mafola he Atua kua lata ai mo e tau tagata oti. Kua fakatoka ni e Iesu e fakafifitakiaga fakamakutu ke fakamatala ai. Kua taute pihia e ia he faituga he maaga i Ierusalema, he fahi mouga, ke he puhala tu, ke he fifine Samaria he vaikeli, mo e i loto he tau kaina he tau tagata. Ko e mena ni ne ha ha i ai e tau tagata, kua fakaata e Iesu e tau magaaho ke fakamatala hagaao ke he mafola mo e ke he Kautu he Atua.—Mataio 4:18, 19; 5:1, 2; 9:9; 26:55; Mareko 6:34; Luka 19:1-10; Ioane 4:5-26.
Fakamahani ke O he Tau Tuaga Hui ha Iesu
11. Ma e gahua fe ne fakamahani e Iesu hana tau tutaki?
11 Ne fakaako e Iesu hana tau tutaki ke fakamatala e matafekau mafola he Atua. Ke tuga ni a Iesu ko e taha “fakamoli mo e moli” ha Iehova, kua mailoga foki e lautolu kua ha ha foki ia lautolu e matagahua ke fakamatala. (Fakakiteaga 3:14; Isaia 43:10-12) Kua onoono a lautolu ki a Keriso ma ha lautolu a Takitaki.
12. Kua fakakite fefe e Paulo e aoga he gahua fakamatala?
12 Kua fakamaama mai he aposetolo ko Paulo e aoga he gahua fakamatala, he talahau: “Nukua pehe mai e Tohi, Nakai ma e taha kua tua kia ia.” Ko e kakano, to nakai fai tagata ne kua fakagahuahua e tua ki a Iesu Keriso ko e Iki he Moui he fakamouiaga ha Iehova ka ma ai. Mo e nakai fai feakiaga fakamatakau ka eke mo taha mena ke fakavihia ai, ha kua pehe foki a Paulo: “Ha ko e mena nakai kehekehe e Iutaia mo e Heleni; ha ko e Iki tokotaha he tau tagata oti kana kua lahi ue atu hana fakaalofa kia lautolu oti kana kua ui kia ia. Ha ko e mena fakamomoui a lautolu oti kana kua ui ke he higoa he Iki.” (Roma 10:11-13) Ka e kua maeke fefe e tau tagata ke fakaako hagaao ke he monuina ia?
13. Ko e heigoa kua lata ke moua kaeke ke logona he tau tagata e tala mitaki, mo e kua talia fefe e tau Kerisiano he senetenari ke fakamua aki ke he manako ia?
13 Kua fehagai ai a Paulo mo e manako ia he huhu e tau huhu ne kua mitaki he tau fekafekau ha Iehova ke igatia ke manamanatu hagaao ki ai. Kua huhu ai e aposetolo: “Po ke tauui fefe a lautolu kia ia kua nakai tua ki ai a lautolu? ka e tua fefe a lautolu kia ia kua nakai fanogonogo atu ki ai a lautolu? ka e fanogonogo atu fefe a lautolu, ka nakai fai tagata ke fakamatala atu? Ka e fakamatala atu fefe e tau tagata, kaeke ke nakai fekau atu a lautolu ki ai?” (Roma 10:14, 15) Kua ha ha he fakamauaga he vaha fakamua he faka-Kerisiano e fakamoliaga talahaua he talia he tau tagata tane mo e fifine, tau fuata mo e tau momotua, e fakafifitakiaga ne fakatoka e Keriso mo e hana tau aposetolo. Kua eke ai a lautolu mo tau tagata fakailoa makutu he tala mitaki. He fifitaki atu ki a Iesu, ne fakamatala a lautolu ke he tau tagata ke he ha mena ni ka moua ai a lautolu. Fakalataha mo e manako ke nakai fai tagata ka toe, ne taute e lautolu e fekafekauaga ha lautolu ke he tau mena ne ha ha i ai e tau tagata mo e ke he taha fale mo e taha fale.—Gahua 17:17; 20:20.
14. Kua kitia moli fefe ko e “tau hui” ha lautolu ne fakailoa e tala mitaki na “fulufuluola”?
14 Moli, kua nakai totonu mai e tau tagata oti ke he tau Kerisiano fakamatala. Ka e pete ni ia, ko e fatiakiaga ha Paulo mai he Isaia 52:7 kua kitia mitaki ai ke moli. He mole atu he huhu e huhu, “Ka e fakamatala atu fefe e tau tagata, kaeke ke nakai fekau atu a lautolu ki ai?” ne pehe foki a ia: “Tuga he tohi mai, Kua fulufuluola ni e tau hui ha lautolu kua ta mai e tala mitaki ke he monuina, ko lautolu kua ta mai e tala ke he tau mena mitaki.” Tokologa ia tautolu ne nakai manatu ke he tau hui ha tautolu ko e fulufuluola, po ke homo. Ti, ko e heigoa mogoia e kakano he mena nei? Ko e tau hui a ia ne uta fano e tagata he fano a ia ke fakamatala ke he falu. Ko e tau hui pihia kua fakatino moli ai e tagata. Mo e kua iloa moli e tautolu ko e ke he tokologa ne logona e tala mitaki mai he tau aposetolo mo e mai he falu tutaki he senetenari ke fakamua aki ha Iesu Keriso, ko e tau Kerisiano nei he vaha fakamua kua eke moli mo fakatino fulufuluola. (Gahua 16:13-15) Mahomo atu ke he mena ia, kua uho lahi a lautolu ke he kitiaaga he Atua.
15, 16. (a) Kua fakatata fefe he tau Kerisiano he vaha fakamua ko lautolu ko e tau uta fekau moli he mafola? (e) Ko e heigoa ka maeke ke lagomatai a tautolu ke fakatumau ha tautolu a fekafekauaga he puhala taha ia ni ne taute he tau Kerisiano he senetenari ke fakamua aki?
15 Kua ha ha he tau tutaki ha Iesu e matafekau he mafola, mo e kua fakailoa ai e lautolu ke he puhala mafola. Ne tuku age e Iesu ke he hana tau tutaki e tau hatakiaga nei: “Ko e fale ke huhu atu a mutolu ki ai, kia pehe atu fakamua a mutolu, Kia monuina e faoa nai. Kaeke ko e tagata he monuina ha i ai, to hoko kia ia ha mutolu a fakamonuina; ka nakai, ti liuaki mai ai kia mutolu.” (Luka 10:5, 6) Sha·lohmʹ, po ke “mafola,” ko e kupu toka tuai faka-Iutaia ma e feleveiaaga. Ka e, kua mahomo atu e putoiaaga he tau hatakiaga ha Iesu ke he mena nei. Ha “ko e tau fekau a Keriso,” kua fakamalolo he hana tau tutaki fakauku e tau tagata: “Kia fakafeilo a mutolu mo e Atua.” (2 Korinito 5:20) Ke fakalautatai atu ke he tau hatakiaga ha Iesu, ne tutala a lautolu mo e tau tagata hagaao ke he Kautu he Atua mo e ke he mena ka lauia ai a lautolu ko e tau tagata takitokotaha. Ko lautolu ne fanogonogo to moua e fakamonuinaaga; ko lautolu ne holia e matafekau to nakai moua ai.
16 Kua taute ai he Tau Fakamoli a Iehova ke he puhala taha ia ni ha lautolu a fekafekauaga he vaha nei. Ko e tala mitaki ne uta e lautolu ke he tau tagata nakai ko e ha lautolu; kua mai ni ia Ia ne fakafano atu a lautolu. Ko e ha lautolu a matagahua ke fakailoa ai. Kaeke ke talia ai he tau tagata, kua tuku e lautolu a lautolu he tuaga ke moua e tau fakamonuinaaga homo ue atu. Kaeke ke holia ai e lautolu, kua holia ai e lautolu e mafola mo e Atua ko Iehova mo e hana Tama, ko Iesu Keriso.—Luka 10:16.
Mahani Mafola he Lalolagi Miha
17. Pihia foki he magaaho ka fehagai atu mo e tau tagata kelea, kua lata ia tautolu ke fefe e tau mahani, mo e ko e ha?
17 Ko e heigoa ni e tau mahani he tau tagata, kua aoga ke he tau fekafekau ha Iehova ke mauloto ko lautolu ko e tau uta fekau he mafola mahani Atua. Ko e tau tagata he lalolagi to liga ha ha he tau fetotokoaki velagia mo e fakakite e ita he taute e tau talahauaga ke fakahukia po ke kupu kelea ki a lautolu ne fakaita a lautolu. Liga ko e falu ia tautolu kua pihia ai he vaha kua mole. Ka e, kaeke kua tui e tautolu e tagata fou mo e he mogonei kua nakai fai vala he lalolagi, to nakai fifitaki e tautolu e tau puhala ha lautolu. (Efeso 4:23, 24, 31; Iakopo 1:19, 20) Pete ni ko e heigoa e aga he falu, to fakagahuahua e tautolu e fakatonuaga: “Kaeke kua maeke ia mutolu, kia nonofo fakamitaki mo e tau tagata oti kana.”—Roma 12:18.
18. Kua lata a tautolu ke tali fefe kaeke ke vale mai e tau tagata fakatufono ki a tautolu, mo e ko e ha?
18 Fa liga tamai he ha tautolu a fekafekauaga he falu magaaho a tautolu ki mua he tau tagata fakatufono. He talahau ai ha lautolu a pule, liga to ‘huhu mai kia tautolu’ a lautolu ma e fakamaamaaga ko e ha ne taute ai e tautolu e falu mena pauaki po ke ha ne kalo kehe mai a tautolu he fakalataha atu ke he falu a gahua. Liga to manako a lautolu ke iloa ko e ha ne fakamatala e tautolu e matafekau ke he puhala ne taute ai e tautolu—ko e taha ne fakatapakupaku e lotu pikopiko mo e mena ne fakapuloa e fakaotiaga he fakatokatokaaga he tau mena he mogonei. Ko e ha tautolu a fakalilifu ma e fakafifitakiaga ne fakatoka e Keriso ka omoomoi a tautolu ke fakakite e mahani totonu mo e fakalilifu hokulo. (1 Peteru 2:23; 3:15) Kua fa mahani ai e tau tagata fakatufono pihia ke fakaohooho he tau akoako po ke liga mai ni he ha lautolu a tau pule. Ko e tali totonu ka liga lagomatai a lautolu ke maama mitaki ko e nakai fakahagahaga kelea he ha tautolu a gahua a lautolu po ke ke he mafola he maaga. Kua fakatupu he tali pihia e agaga fakalilifu, kau fakalataha, mo e mafola ki a lautolu ne talia ai.—Tito 3:1, 2.
19. Ko e heigoa e tau gahua ne nakai putoia e Tau Fakamoli a Iehova ki ai?
19 Ko e Tau Fakamoli a Iehova kua talahaua he lalolagi katoa mo tau tagata ne nakai fai vala he taulatau he lalolagi. Kua nakai fakalataha a lautolu ke he tau fetotokoaki ha ko e lanu tagata, lotu, po ke tau mena politika he lalolagi. (Ioane 17:14) Ha kua hataki mai e Kupu he Atua ki a tautolu ke ‘omaoma ke he tau tui ne mua,’ to nakai manatu a tautolu ke fakalataha atu ke he tau gahua liuliu ke fetoko atu ke he tau puhala he fakatufono. (Roma 13:1) Kua nakaila lagataha e Tau Fakamoli a Iehova ke fakalataha atu ke he ha gahua ne lali ke fakakaumahala e fakatufono. He mailoga ai e tau tutuaga ne fakatokatoka e Iehova ma e hana tau fekafekau Kerisiano, ko e ha lautolu a putoiaaga ke he lima toto po ke favale ke he ha puhala ni kua fakamamao mai i ai! Ti kua nakai ni tutala hokoia e tau Kerisiano moli hagaao ke he mafola; kua momoui a lautolu ke felauaki mo e mena ne fakamatala e lautolu.
20. He hagaao atu ke he mafola, ko e heigoa e mena talahaua ne taute e Papelonia Lahi?
20 He kehe mai mo e tau Kerisiano moli, ko lautolu ne fakatino e tau fakatokatokaaga fakalotu ha Kerisitenitome kua nakai kitia mo tau uta fekau he mafola. Ko e tau lotu ha Papelonia Lahi—ko e tau lotu ha Kerisitenitome mo e tau lotu nakai Kerisiano pihia—kua taute e tau fakamolemole, lagomatai, mo e kua fakamua ai ke takitaki e tau felakutaki he tau motu. Kua fakaohooho foki e lautolu e favaleaga mo e kelipopo foki he tau fekafekau tua fakamoli ha Iehova. Hagaao atu ki a Papelonia Lahi, kua fakailoa mai he Fakakiteaga 18:24: “Kua moua foki ia koe e toto he tau perofeta mo e tau tagata tapu, mo lautolu oti ne kelipopo ke he lalolagi.”
21. Kua tali fefe e tokologa ha lautolu ne loto fakamoli he magaaho ka kitia ai e lautolu e kehekeheaga he tau mahani he tau tagata ha Iehova mo e ha lautolu ne fakagahuahua e lotu pikopiko?
21 Kua nakai tatai ai mo e tau lotu ha Kerisitenitome mo e falu ne toe ha Papelonia Lahi, ko e lotu moli ko e fakamaloloaga tonu mo e kaufakalataha. Ke he hana a tau tutaki moli, ne pehe a Iesu Keriso: “Ko e mena ia ke iloa ai he tau tagata oti kana, ko e haku a tau tutaki a mutolu, ka feofanaki a mutolu.” (Ioane 13:35) Ko e fakaalofa haia ne mua atu e molea mai he tau mena fakamotu, kaufakalatahaaga, fahi tupe, mo e tau fakakaupaaga lanu tagata ne he mogonei kua fakamavehevehe ai e tau tagata ne toe. Ha kua mailoga ai e mena nei, ko e tau miliona he tau tagata he lalolagi katoa kua talahau age ke he tau fekafekau fakauku ha Iehova: “To o a tautolu mo mutolu; ha kua logona e mautolu ha ha ia mutolu e Atua.”—Sakaria 8:23.
22. Kua mailoga fefe e tautolu e gahua fakamatala ne kua lata agaia ke taute?
22 Ha ko e tau tagata ha Iehova, kua lahi e olioli ha tautolu ke he mena kua fita he taute, ka e nakaila oti ia e gahua. He oti e to he tau tega mo e gahua e fonua hana, kua nakai hola e tagata faama. Kua fakatumau a ia ke gahua, mua atu ka muatua e motua he vaha he heleheleaga. Kua lata ai e magaaho heleheleaga ke gahua fakatumau mo e fakamalolo. Mo e he mogo tonu nei kua ha ha ai e heleheleaga ne mua atu he tau tagata tapuaki he Atua moli ne nakaila pihia. Ko e magaaho ke fiafia anei. (Isaia 9:3) Moli na feleveia a tautolu ke he totokoaga mo e fekehekeheaki. Ha ko e tau tagata takitokotaha, liga to fakamalolo a tautolu ke fehagai mo e tau gagao hagahaga kelea, tau tutuaga uka fakamagafaoa, po ke uka he faahi tupe. Ka kua omoi he fakaalofa ma Iehova a tautolu ke fakauka. Ko e matafekau ne kua tuku mai he Atua ki a tautolu ko e mena kua lata he tau tagata ke logona. Ko e matafekau he mafola a ia. Moli, ko e matafekau a ia ne fakamatala ni e Iesu—ko e tala mitaki he Kautu he Atua.
Ko e Heigoa Hau a Tali?
◻ Ko e heigoa e fakamoliaga ne ha ha ia Isaia 52:7 ki a Isaraela i tuai?
◻ Kua taute fefe a Iesu ke eke mo uta fekau he mafola ne mua atu?
◻ Kua taute fefe he aposetolo ko Paulo ke fakalataha e Isaia 52:7 mo e gahua ne fakaauloa ki ai e tau Kerisiano?
◻ Ko e heigoa ka putoia kaeke ko e tau uta fekau he mafola he vaha nei a tautolu?
[Tau Fakatino he lau 7]
Ke tuga a Iesu, ko e Tau Fakamoli a Iehova ko e tau uta fekau he mafola mahani Atua
[Tau Fakatino he lau 9]
Nukua tumau e Tau Fakamoli a Iehova ke mahani mafola pete ni ko e fefe e tali he tau tagata ke he matafekau he Kautu