Mafola Moli—Mai i Fe e Punaaga?
“Kua fakahiku e [Iehova] e tau ato hoko ke he fakatulakiaga he lalolagi.”—SALAMO 46:9.
1. Ko e heigoa e maveheaga mua ue atu ke he mafola ne kua kitia e tautolu he perofetaaga ha Isaia?
“KO E mena ke tupu mai he mahani tututonu ko e monuina haia; to tupu mai foki he mahani tututonu e okioki mo e nakai haofia tukulagi. To nonofo foki haku motu ke he mena ke monuina ai, mo e tau fale ke nakai haofia ai, mo e tau okiokihaga ke nonofo fakatekiteki ai.” (Isaia 32:17, 18) Ko e maveheaga fulufuluola ha ia! Ko e maveheaga a ia he mafola moli ne ta mai he Atua.
2, 3. Fakamaama la e mafola moli.
2 Ko e heigoa, mogoia, e mafola moli? Ko e tuaga nakai fai tauaga kia? Po ke vaha kia ne tauteute e tau motu ma e taha tauaga ka hoko mai? Ko e miti noa kia e mafola moli? Ko e tau huhu a ia ne manako a tautolu ma e tau tali kua lata. Fakamua, ko e mafola moli kua mua atu ke he miti. Ko e mafola ne mavehe mai he Atua kua matua atu ke he ha mena ne iloa he lalolagi nei. (Isaia 64:4) Nakai ko e mafola ni ke he tau tau gahoa po ke ke he tau hogofulu tau gahoa. Kua tumau tukumalagi ai! Mo e nakai mafola ma e toko gahoa ni—ka e putoia foki e lagi mo e lalolagi, tau agelu mo e tau tagata. Kua hokotia atu ke he tau tagata he tau motu, tau matakau fakamotu, tau vagahau, mo e tau lanu oti. Kua nakai iloa ha veveheaga, nakai fai kaupaaga, nakai ke kaumahala.—Salamo 72:7, 8; Isaia 48:18.
3 Ko e kakano he mafola moli ko e mafola e tau aho oti. Kua kakano to ala hake a koe he tau pogipogi takitaha mo e nakai fai manatu ke he tauaga, nakai tupetupe ke he vaha hau anoiha, vaha anoiha he hau a fanau, pihia foki ke he vaha anoiha he hau a tau mokopuna. Kua kakano ai to mafola katoatoa e loto manamanatu. (Kolose 3:15) Kua kakano ai to nakai liu ke holifono, nakai liu ke favale, nakai liu e magafaoa ke mavehevehe, nakai liu fai tagata ne nakai fai kaina, nakai liu fai tagata mamatehoge po ke tulituli he makalili, mo e nakai liu ke fai fakaagitau mo e ita. Ka e kua mua atu e mitaki, ko e kakano he mafola he Atua ko e lalolagi nakai fai gagao, mamahi, momoko, po ke mate. (Fakakiteaga 21:4) Ko e amaamanakiaga mua ue atu ha a ia ha tautolu ke fiafia tukumalagi ke he mafola moli! Nakai kia ko e faga mafola mo e fiafia pehenei ne manako lahi a tautolu oti ki ai? Nakai kia ko e faga mafola pehenei ne kua lata a tautolu ke liogi mo e gahua ke moua?
Ko e Tau Laliaga Kaumahala he Tagata
4. Ko e heigoa e tau laliaga ma e mafola ne kua taute he tau motu, mo e ko e heigoa e tau fua?
4 Ke he tau senetenari, na fetutalaaki e tau tagata mo e tau motu hagaao ke he mafola, kua taufetoko e mafola, kua fakamau fakamoli e tau teau he tau maveheaga he mafola. Ti, ko e heigoa ne fua mai? He 80 e tau tau ne mole, kua teitei ke nakai fai vaha ne nakai hokotia atu e tau motu po ke tau matakau ke he tauaga. Kua maali mitaki ai, kua fakagalogalo e mafola mai he tau tagata. Ti ko e huhu mogoia, Ko e ha ne kua kaumahala ai e tau laliaga oti he tagata ke fakatu e mafola ma e lalolagi katoa, mo e ko e ha ne nakai maeke e tagata ke ta mai e mafola moli ka tumau tukumalagi?
5. Ko e ha e tau laliaga he tau tagata ma e mafola ne fakatumau ai ke kaumahala?
5 Ko e tali mukamuka, ha kua nakai hahaga atu e tau tagata ke he punaaga hako ma e mafola moli. I lalo he fakaohoohoaga ha Satani ko e Tiapolo, kua fakatu he tau tagata e tau fakatokatokaaga ne matematekelea ke he ha lautolu ni a tau lolelole mo e tau mahani kelea—ha lautolu a lotokai mo e fia moua tuaga, ha lautolu a matakakana ma e pule mo e talahaua. Kua o atu a lautolu ke he tau fakatutuaga ne mua atu e fakaakoaga mo e taute e tau fakaveaga ke fakatupe aki e tau feua lagomatai mo e tau fakatokatokaaga ke kumikumi ke he tau lekua takitaha, tau mena ne kua fakalaulahi atu aki e tau puhala fakamatematekelea mo e moumouaga. Ko e heigoa e punaaga ne kua takitaki atu e tau tagata ki ai? Kua haga atu a lautolu ki fe?
6, 7. (a) Ko e heigoa e talahauaga ne taute he Kautaha he Tau Motu ma hana ni? (e) Ko e heigoa e talahauaga ke he Tau Motu Kaufakalatahaaga?
6 He 1919 ne tuku he tau motu e falanakiaga ha lautolu ke he Kautaha he Tau Motu ke taute e mafola tukulagi. Ko e amanakiaga ia kua malipilipi he magaaho ne tapaki e Mussolini a Aitiope he 1935 mo e kamata ai e tauaga he tau tagata noa i Sepania he 1936. Ne eke ai e Kautaha ke tunono ati kamata ai e Felakutaki II he Lalolagi he 1939. Ko e mena ne ui ko e mafola, kua nakai tumau ke 20 e tau tau.
7 Ka e kua ne fai e Tau Motu Kaufakalataha? Kua foaki mai nakai ha amaamanakiaga moli he mafola tukulagi ke he lalolagi katoa? Nakai fakaai. Kua molea e 150 e tau tauaga mo e tau fetotokoaki kanavaakau kua tutupu tali mai he hana a kamataaga he 1945! Ko e mena ia ati talahau ai e Gwynne Dyer, ko e tagata kumikumi i Kanata ke he tauaga mo e hana kamataaga, ko e UN “ko e fakapotopotoaga he tau tagata takafaga ne maliu tua ke puipui e tau manu, nakai ko e toloaga he tau tagata mitaki,” mo e “ko e fakatuaga nakai fai malolo ne lahi e tala ka e nakai fakamoli ki ai.”—Fakatatai Ieremia 6:14; 8:15.
8. Pete ni ko e ha lautolu a tau tala mafola, ko e heigoa ne fa e taute he tau motu? (Isaia 59:8)
8 Pete ni ha lautolu a tau tutalaaga ke he mafola, kua fakatumau e tau motu ke talaga mo e taute e tau kanavaakau. Ko e tau motu ne lago atu ke he tau fonoaga mafola ko e tau tagata ia ni ne fa mahani ke tomua ke taute e tau kanavaakau. Ko e malolo he tupu tolomaki he fakafuakoloa he tau motu nei kua fakaholo ki mua aki e tupu he tau kanavaakau tamate tagata, fakalataha mo e tau pomu tanu he fonua ne tamate po ke fakakunekune aki e falu 26,000 he tau tagata lalahi mo e fanau. Ko e lotokai mo e nakai fakamoli ko e tau fakaohoohoaga malolo. Ko e tau tupe fakavaivai mo e tau tupe fakapulefu ko e vala ne mua he fakafua kanavaakau he lalolagi katoa. Ko e falu he tau tagata politika kua fakamuhumena ni e lautolu a lautolu mai he puhala nei.
9, 10. Ko e heigoa ne mailoga he tau tagata pulotu he lalolagi hagaao ke he tau tauaga mo e tau foliaga he tagata?
9 Ia Tesemo 1995, ne tala age e tagata Polani makaka fakasaiene mo e ne mua he Nobel Prize ma e mafola ko Joseph Rotblat ke he tau motu ke fakaoti e taute he tau kanavaakau. Ne talahau e ia: “Ko e puhala hokoia ni ke tiaki [e taute he tau kanavaakau fou] ko e ke fakaoti katoatoa e tauaga.” Manatu nakai a koe to liga pihia e mena nei? Kamata mai he 1928, ne 62 e tau motu ne fakamau fakamoli e Kellogg-Briand Pact mo e talahau ko e tauaga nakai ko e puhala a ia ke fakamitaki e tau fekehekeheaki. Kua fakatata fakamaali mai tuai he Felakutaki II he Lalolagi ko e maveheaga ia kua nakai lata ke tohia hifo he laupepa.
10 Nakai ke fakatikai, kua fakatumau e tauaga ke eke mo patuo fakataututupe he puhala he fakamauaga tuai he tagata. Tuga ne tohia e Gwynne Dyer, “ko e tauaga ko e fakatuaga he lotouho he kaufakalatahaaga he tagata, mo e kua ha ha ai e fakamauaga tala tuai ne kua leva moli ke tuga ni e maama he kaufakalatahaaga.” E, kua teitei e tau kaufakalatahaaga mo e tau pule atu motu oti ke igatia mo e tau kautau toa lilifu, tau matakau tau, tau latauaga talahaua, tau aoga fakakautau tapu, mo e ha lautolu a fakaputuaga he tau kanavaakau. Pete ni ia, ko e ha tautolu a senetenari kua fakamailoga ai ha ko e tau tauaga ne mua atu mai he falu, ke he puhala moumouaga mo e galo he tau momoui.
11. Ko e heigoa e matapatu alito ne nakai mailoga he tau takitaki lalolagi he ha lautolu a kumikumiaga ma e mafola?
11 Nukua kitia moli ai kua tiaki he tau takitaki he lalolagi e matapatu pulotu he Ieremia 10:23: “Iehova na e, kua iloa e au, kua nakai ha i ai ke he tagata hana puhala, nakai ha ha he tagata kua fano ke fakatonu e mena ke fano a ia ki ai.” Ke noa mai e Atua he fakatino, to nakai fakaai ke fai mafola moli. Kua kakano kia e tau mena oti nei, he mogoia, ko e nakai maeke ke uta kehe e tauaga mai he kaufakalatahaaga fai maamaaga? Kua kakano kia ko e mafola—mafola moli—ko e miti nakai maeke?
Hokotia Atu ke he Matapatu he Kamataaga
12, 13. (a) Ko e heigoa ne fakakite he Tohi Tapu ke he matapatu he kamataaga galo he tauaga? (e) Kua fuluhi kehe fefe e Satani e onoonoaga he tagata mai he tali moli ke he tau mena vihi he lalolagi?
12 Ke tali e tau huhu ia, kua lata ia tautolu ke maama e tau kamataaga he tauaga. Ne tohi fakamaali mai he Tohi Tapu ko e agelu totoko ko Satani ko e kamataaga a ia he “keli tagata” mo e “pikopiko” mo e ko e “lalolagi oti ha he pule hana kua mahani kelea.” (Ioane 8:44; 1 Ioane 5:19) Ko e heigoa ne kua taute e ia ke fakaholo ki mua hana tau fakatokaaga? Kua totou ai e tautolu he 2 Korinito 4:3, 4: “Kaeke foki kua ufia ha mautolu a vagahau mitaki, kua ufia ia kia lautolu kua malaia. Kua fakapouli he atua he lalolagi nai e tau manatu ha lautolu kua nakai tua, neke kikila atu kia lautolu e maama he vagahau mitaki he lilifu a Keriso, ko ia kua fakatai ke he Atua.” Kua taute e Satani e tau mena oti ne fahia ki ai ke fuluhi kehe e tagata mai he Kautu he Atua ko e tali ke he tau mena vihi he lalolagi. Ne fakapouli mo e fakalavelave e ia e tau tagata ne mavehevehe e tau onoonoaga he fakalatahaaga, fakapolitika, mo e tau matakupu fakalotu, ke tuga kua mua e aoga he tau mena nei mai he tuaga pule he Atua. Ko e tupu tolomaki he papale fakamotu he lalolagi katoa he mogonei e fakataiaga.
13 Ne fakaholo ki mua e Satani ko e Tiapolo e papale fakamotu mo e fakamagafaoa, ko e tua ke he pule malolo he taha e motu, vahega tagata, po ke vahega magafaoa ki luga he falu. Ko e tau vihiatia hokulo matua ne taofi mau ke he tau senetenari kua liu ta hake mai ke fakamatamata aki atu e tau tauaga mo e tau totokoaga. Ko Federico Mayor, ko e takitaki pule he UNESCO, ne hataki mai hagaao ke he aga nei: “Pihia foki he kavi ne mahani e fakauka ke malolo ki ai, ko e hiki ke matakutaku ke he tau tagata kehe kua eke ke kitia lahi e moli, mo e tau tala ke he fakahakehake matakau po ke fili tagata ne tuga ko e mena tuai kua eke ai ke logona tumau.” Ti ko e heigoa ne fua mai? Ko e kelipopoaga matakutakuina i Iukosalavia fakamua mo e kelipopoaga fakamatakavi i Ruanata ko e ua ni a ia he tau mena tutupu ne tohia he tau nusipepa.
14. Kua fakatino fefe he Fakakiteaga 6:4 e tauaga mo e hana lauiaaga he ha tautolu a vaha?
14 Ne talahau tuai mai he Tohi Tapu ko e he magaaho fakamui he fakatokaaga nei, ko e solofanua kula, ne fakatai e tauaga, to hokotia atu ke he lalolagi katoa. Kua totou e tautolu he Fakakiteaga 6:4: “Ti fina atu ai e taha solofanua kua kula; kua ta age foki e pule kia ia kua heke ai ke uta kehe e mafola mai he lalolagi, kia fekeliaki ai a lautolu; kua ta age foki kia ia e pelu lahi.” Tali mai he 1914 kua kitia e tautolu e tagata heke solofanua fakatai nei ne “uta kehe e mafola,” mo e ko e tau motu kua fakatumau ke latau mo e ha ha he tau tauaga.
15, 16. (a) Ko e heigoa e matagahua he lotu ke he tau tauaga mo e kelipopoaga? (e) Kua fioia atu fefe a Iehova ke he tau mena ne taute he tau lotu?
15 Ko e mena nakai lata ke kaumahala ke mailoga e matagahua he tau lotu ke he tau tauaga mo e tau kelipopoaga nei. Ko e fakamauaga tuai fakamaligi toto he tagata kua putoia lahi atu foki ke he fakaohoohoaga fakaheheina he tau lotu fakavai. Ko e tagata kumikumi fakalotu Katolika ko Hans Küng ne tohia: “Kua nakai fakauaua ai ke he tau fakaohoohoaga totoko mo e moumou [ko e tau lotu] kua hokotia mo e taute agaia ke mua atu e lagomatai ki ai. Kua lahi mahaki e fetului mo e tau fetotokoaki fakamaligi toto, ti kua lata moli ai e ‘tau tauaga fakalotu’ ke fai fakalagoaga a lautolu; . . . mo e pihia foki ke he tau tauaga ua he lalolagi.”
16 Kua fioia fefe he Atua ko Iehova e matagahua he tau lotu fakavai he tau kelipopoaga mo e he tau tauaga? Ko e fakahala he Atua ke he lotu pikopiko, kua fakamau he Fakakiteaga 18:5, ne pehe: “Ha kua o fakalataha mo ia hana tau hala kua hoko ni ke he lagi, kua manatu foki he Atua hana tau mahani hepehepe.” Ko e feoaki he tau lotu fakavai mo e tau pule fakapolitika he lalolagi kua hoko atu ke he tau agahala pihia, ko e fakaputuputu he tau hala loga pihia, ati nakai mafai e Atua ke haga tua ki ai. Nakai leva to fakaotioti katoatoa e ia e mena fakataututupe nei he tamaiaga he mafola moli.—Fakakiteaga 18:21.
Ko e Puhala ke he Mafola
17, 18. (a) Ko e ha ne nakai ni ko e miti noa ke talitonu to fakamoli ai e mafola tukumalagi? (e) Ko e heigoa ne kua taute e Iehova ke fakamoliaki to hoko mai e mafola moli?
17 Ka nakai maeke e tau tagata ke ta mai e mafola moli mo e tukulagi, he puhala he tau hukui tuga e Tau Motu Kaufakalataha, to hoko mai he punaaga fe e mafola moli, mo e he puhala fe? Ko e miti noa kia ke talitonu ko e to fakamoli e mafola tukumalagi? Nakai kaeke ke hahaga atu a tautolu ke he punaaga hako he mafola. Ti ko hai a ia? Ne tali he Salamo 46:9 he talahau mai ki a tautolu “kua fakahiku e ia [Iehova] e tau ato hoko ke he fakatulakiaga he lalolagi; kua fafati e ia e kaufana, mo e tūtū e tao; kua huhunu foki e ia e tau kariota ke he afi.” Mo e kua fita he kamata e Iehova e fakaholoaga ke fakaoti e tau tauaga mo e fakatu e mafola moli. Fefe? He fakanofo a Keriso Iesu ki luga he hana nofoaiki tonuhia he Kautu he 1914 mo e he fakaohooho e matagahua fakaakoaga mahaki ma e mafola he fakamauaga tuai he tagata. Ne fakamafana mai e tau kupu he Isaia 54:13 ki a tautolu: “To fakaako e Iehova hau a fanau oti, ti lahi e monuina he fanau hau.”
18 Kua fakakite mai he perofetaaga nei e matapatu fakaakoaga he kamataaga mo e lauiaaga—ko e pehe a ia, ko e tau lauiaaga oti kua fai kamataaga. He mena nei, ko e fakaakoaga ha Iehova—ko e kamataaga—kua liliu tuai e tau tagata latau ke eke mo tau tagata ofania mafola ne kua ha ha he mafola mo e Atua. Ko e lauiaaga ko e hiki a ia he loto ne kua taute ai e tau tagata ke eke mo tau tagata ofania mafola. Ko e fakaakoaga nei ne hikihiki e tau loto mo e tau manamanatu he tau tagata kua tupu holofa foki he mogonei ke he lalolagi katoa he totou miliona ne fa e mumuitua ke he fakafifitakiaga he “Iki he Mafola,” ko Iesu Keriso.—Isaia 9:6.
19. Ko e heigoa ne fakaako e Iesu hagaao ke he mafola moli?
19 Ti ko e heigoa ne fakaako e Iesu hagaao ke he mafola moli? Kua nakai vagahau hokoia a ia hagaao ke he mafola he vahaloto he tau motu ka e ke he mafola he vahaloto he tau tagata he ha lautolu a tau fakafetuiaga mo e mafola he loto ne hau he manamanatuaga mitaki. Ia Ioane 14:27, ne totou e tautolu e tau kupu ha Iesu ke he hana tau tutaki: “Kua tuku atu e au kia mutolu e monuina; ko e monuina haku ke ta atu e au kia mutolu; nakai ta atu e au kia mutolu tuga ne ta atu he lalolagi. Aua neke fakaatukehe ha mutolu a tau loto; ua matakutaku foki a mutolu.” Kua fefe e kehe he mafola ha Iesu ke he mafola he lalolagi?
20. Ko e puhala fe ka ta mai e Iesu e mafola moli?
20 Fakamua, kua matutaki lahi e mafola ha Iesu ke he hana fekau he Kautu. Ne iloa e ia ko e fakatufono tututonu he lagi, ne ha ha i ai a Iesu mo e 144,000 ne pule auloa, ka fakaotioti e tauaga mo e tau tagata fakalagalaga tau. (Fakakiteaga 14:1, 3) Nukua iloa e ia to ta mai e tau tuaga parataiso mafola ne foaki e ia ke he tagata eke mena kelea ne mate he hana tapa. Nakai foaki age e Iesu ki a ia e nofoaga he Kautu i luga he lagi, ka e pehe a ia: “Kua moli lahi he tala atu e au ki a koe he aho nei, To fakalataha a koe mo au i Parataiso.”—Luka 23:43, NW.
21, 22. (a) Ko e heigoa e amaamanakiaga fakamalolo homo ue atu ne putoia ke he mafola moli? (e) Ko e heigoa ha tautolu kua lata ke taute ke kitia mata e monuina ia?
21 Kua iloa foki e Iesu to ta mai he hana Kautu he lagi e mafanatia ki a lautolu oti ne fakatutuku ne kua fakagahuahua e tua ki a ia. Ko e hana mafola kua putoia ai e amaamanakiaga fakamalolo homo ue atu he liu tu mai. Manatu e tau kupu fakamalolo hana ne moua he Ioane 5:28, 29: “Aua neke ofo a mutolu he mena ia, ha ko e mena hoko ke he aho ke logona ai ke he hana leo a lautolu katoa ha he tau tukuaga, mo e o mai ai. Ko lautolu ne mahani mitaki, to tutu mai ke he moui; ka ko lautolu ne mahani kelea, to tutu mai ke he fakahala.”
22 Kua amaamanaki atu nakai a koe ke he magaaho ia? Kua galo nakai hau a tau fakahelehele ke he mate? Kua manako kia a koe ke liu kitia a lautolu? Ati talia a e mafola ne foaki atu e Iesu. Kia tua ai ke tuga a Mareta, ko e mahakitaga ha Lasaro, ne tala age ki a Iesu: “Kua iloa e au, to tu mai ni a ia ke he tutuaga he aho fakamuiaki.” Ka e mailoga e tali fakalagalaga fiafia ha Iesu ki a Mareta: “Ko au nai ko e liu tu mai, mo e moui; ko ia ke tua mai kia au, pete ni he mate a ia, ka to moui ni a ia. Ko e tau tagata momoui oti, ke tua mai kia au, nakai mamate tukulagi ni; kua talia nakai e koe e mena ia?”—Ioane 11:24-26.
23. Ko e ha e iloilo tonu ke he Kupu he Atua kua aoga lahi ke moua aki e mafola moli?
23 Kua maeke foki ia koe ke talitonu ki ai mo e moua e aoga mai he maveheaga ia. Fefe? He moua e iloilo tonu he Kupu he Atua. Kia mailoga ai e puhala ne peehi he aposetolo ko Paulo e aoga he iloilo tonu: “Nakai okioki ai a maua he liogi ma mutolu, . . . kua ole atu foki kua puke a mutolu ke he maama mitaki ke he hana finagalo, ke he pulotu oti katoa mo e loto matala kua fakalata ke he Agaga. Kia mahani a mutolu ke lata mo e Iki, kia fiafia mai a ia kia mutolu ke he tau mena oti; kia fua mai ai a mutolu ke he tau gahua mitaki oti, kia tupu foki ha mutolu a maama mitaki ke he Atua.” (Kolose 1:9, 10) To fakamoli atu he iloilo tonu nei ki a koe ko Iehova ko e Atua e punaaga he mafola moli. To tala atu foki ki a koe e mena kua lata ia koe he mogonei ke taute ke maeke ai ia koe ke fakalataha atu ke he salamo he talahau: “To takoto au, ti mohe foki au mo e mafola; ha ko koe, Iehova na e, hoko koe ni kua nofo ai au mo e nakai haofia.”—Salamo 4:8.
Maeke Nakai a Koe ke Fakamaama?
◻ Ko e ha e tau laliaga he tagata ma e mafola ne kaumahala tumau ai?
◻ Ko e heigoa e matapatu he kamataaga he tauaga?
◻ Ko e ha e mafola tukumalagi nakai ko e miti noa?
◻ Ko e heigoa e punaaga he mafola moli?
[Fakatino he lau 6]
Nakai ko e miti e mafola moli. Ka ko e maveheaga he Atua
[Fakatino he lau 8]
Tali mai he 1914 kua uta kehe he tagata heke he solofanua kula fakatai e mafola mai he lalolagi