Tau Fonoaga he Faahimotu—Ko e Magaaho Tapuaki Fiafia
1. Tatai fēfē e tau galue i Isaraela mo e ha tautolu a tau fonoaga he faahimotu he vahā nei?
1 Ko Iosefa, Maria, fanau ha laua, mo e falu ne o hake tumau ki Ierusalema ke he tau galue he tau tau takitaha. He tau magaaho pehēnei ne toka hifo e lautolu mo e falu tagata tapuaki e tau tupetupe he tau aho takitaha ka e hagaaki ke he tau mena fakaagaaga ne mua atu e aoga he tau momoui ha lautolu. Ne foaki he tau galue e magaaho ke manamanatu mo e tutala hagaao ke he mitaki lahi ha Iehova mo e ke onoono ke he Fakatufono Haana. To foaki foki he ha tautolu a tau fonoaga he faahimotu hane gutu mai e tau magaaho pihia ma e tapuakiaga fiafia ki a Iehova.
2. Ko e heigoa kua lata ia tautolu ke tauteute ke lata mo e fonoaga he faahimotu hane gutu mai?
2 Lata ke Mautauteute: He o mai i Nasareta ne lata he magafaoa a Iesu ke o hui kavi ke he 200 kilomita he o atu mo e liliu mai. Pete he nakai iloa e tautolu ko e tokofiha e lafu ha Iesu, maeke ia tautolu ke manamanatu ke he fakatokaaga mo e gahua kua lata ia Iosefa mo Maria. Taute nakai e koe e tau fakatokatokaaga kua lata ke hohoko atu ke he tau aho tolu he fonoaga he faahimotu hane gutu mai? Liga lata e mena nei mo e fakaaoga e magaaho okioki mai he gahua po ke tutala ke he takitaki gahua haau po ke faiaoga he tama ke nakai fano e tama he aoga. Kua fakamau nakai e koe e motela kaeke kua lata? Fakailoilo nakai a koe he lagomatai e taha i loto he fakapotopotoaga ne ha ha ai e tau manako pauaki ke hoko atu ke he fonoaga?—1 Ioa. 3:17, 18.
3. Foaki fēfē he tau galue i Isaraela e tau magaaho ma e fakalatahaaga atihake?
3 Feoakiaga Atihake: Ko e magaaho mitaki lahi mooli ne foaki he tau galue faka-Iutaia ma e lafiaga atihake he tau tagata tapuaki! Nakai fakauaua kua amaamanaki lahi e magafaoa ha Iesu ke liu fakalataha mo e tau kapitiga kua leva lahi. Ne olioli foki e lautolu e tau magaaho ke moua e tau kapitiga foou he tau tagata Iutaia mo e tau tagata ne liliuina ka fakalataha i ai po ke o atu mo e liliu ki Ierusalema.
4. Maeke fēfē ia tautolu ke fakakite kua nakai uta fakateaga e tautolu e fakamatakainaga faka-Kerisiano kaufakalataha ha tautolu?
4 Taha kakano ne fakatoka he fekafekau fakamoli mo e loto matala ma tautolu ke fakapotopoto auloa ke logona e tau lauga he tau fonoaga he faahimotu he nakai ni foaki e tau vala tala pihia he tohi hifo ke maeke ia tautolu ke atihake e falu. (Hepe. 10:24, 25) Ko e mena ia, taute e tau fakatokaaga ke hoko tuai atu he tau aho takitaha ke he fonoaga ke olioli e feoakiaga mo e falu ato hafagi he tagata nofoa e fakaholoaga aki e leo kofe fakatagitagi fakakū, ke fakakite kua hoko e magaaho ke nonofo he tau nofoa. He nakai toka e fale fono he magaaho pale laā ke kumi mena kai, kua fakamafana ki a tautolu ke tamai e kai laā mukamuka mo e nonofo ai he fonoaga ke maeke ke feleveia mo e tutala ki a lautolu ne takatakai ia tautolu. Ko e fakamatakainaga faka-Kerisiano ha tautolu ko e mena fakaalofa mai ia Iehova ti nakai lata ia tautolu ke uta fakateaga.—Mika 2:12.
5. Ko e heigoa ka lagomatai a tautolu ke aoga katoa mai he fakaholoaga?
5 Ko e Magaaho ke Fakaako: Mai he vahā tote, ne fakaaoga e Iesu e tau galue ke fakaako hagaao ke he haana Matua he lagi. (Luka 2:41-49) Ko e heigoa ka lagomatai a tautolu mo e tau magafaoa ha tautolu ke aoga katoa he tau vala ka fakatoka mai? He tau magaaho ka lauga, nonofo he tau nofoa ti kalo mai he tala noa. Ua fakaatā e selafoni, utafekau, po ke tau matini pihia ke fakatauhele a koe po ke falu. Hagaaki ke he tagata lauga ti fakamaumau hifo e tau manatu kūkū. Nonofo auloa ko e magafaoa ti mailoga kua fanogonogo foki e tau tama haau. He magaaho afiafi fakatoka taha magaaho ke fakatutala auloa ke he tau manatu ne olioli e koe.
6. Ko e heigoa kua lata ke tokaloto e tautolu hagaao ke he tau mena tui mo e tauteuteaga ha tautolu?
6 Tau Mena Tui mo e Tauteuteaga: Mukamuka lahi e tau tagata fakafua koloa ne o fenoga he puhala tu ke kitia e magafaoa a Iesu mo e falu he tau tagata tapuaki Iutaia ne o atu mo e liliu mai he tau galue ha kua fakahafehafe e tau matapotu he tau tapulu ha lautolu mo e afo lanu moana ki luga he tau mena fakahafehafe. (Nume. 15:37-41) Pete he nakai tui he tau Kerisiano e tau tapulu pauaki, ka kua talahaua a tautolu ha ko e tau tapulu kua lilifu mo e maopoopo mo e meā. Kua lata ia tautolu ke onoono fakalahi ke he tau tauteuteaga ha tautolu ka o atu mo e liliu mai he fonoaga mo e haia he taone ne fono ai. Pete foki ka hiki e tau mena tui ha tautolu ka oti e fakaholoaga, kua lata ia tautolu ke tumau e tauteuteaga lilifu mo e tau ai e tau pine fonoaga ha tautolu. He puhala nei to kitia maali a tautolu mai ia lautolu ne nakai ko e Tau Fakamoli mo e mailoga mitaki ai he tau tagata kitekite.
7. Ko e ha kua lata ke manamanatu a tautolu ke foaki e lagomatai ke gahua he fonoaga?
7 Manako Tagata Gahua Foaki Noa: Lata ke tokologa e tagata gahua ke maeke ke holo mitaki e fonoaga. Maeke nakai a koe ke foaki lagomatai? (Sala. 110:3) Ko e gahua ne taute he tau fonoaga ko e vala he fekafekauaga tapu ha tautolu mo e foaki e fakamatala mitaki. Ko e takitaki he fale fono ne fiafia lahi ha ko e tau tagata ne foaki e lagomatai ne fakameā e fale fono ne tohi e mena nei: “Manako au ke fakaaue ki a mutolu ke he mena ofoofogia lahi ne taute ne nakaila kitia ia e au. Na logona tumau e au ko e Tau Fakamoli a Iehova ko e tau tagata uho lahi he leva e talahaua he pisinisi ha mautolu he toka hifo tumau e fale fono ke mua atu e meā nakai pihia fakamua. Kua taute e mutolu mo e fakatokatokaaga ha mutolu e fale nei mo matakavi mitaki ma e toloaga mo e taute ai he matakau he tau tagata totonu ati fiafia lahi a mautolu ke iloa a mutolu.”
8. Ha e fe e tau magaaho ka fakamatala he taone ne fono ai?
8 Tau Magaaho ke Fakamatala: Tokologa e tagata he taone ne fono ai ka mailoga e tau tagata ahiahi ne tui he tau mena tui maopoopo mo e meā kua tau e tau pine he fonoaga, ti liga fakalagā he mena nei e fia iloa ha lautolu, ati foaki e magaaho ki a tautolu ke tala age ki a lautolu hagaao ke he fonoaga. Taha e tama fā e tau he moui ne tamai e lagaki haana he tohi ne fakatoka mai laia ke he fale kai he oti e fakaholoaga ti fakakite ke he taha he tau tagata tufa kai. Ne hafagi he mena nei e puhala ke he tau matua he tama taane ke uiina e fifine ke he fonoaga.
9. Fifitaki fēfē e tautolu e loto fakaaue he magafaoa ha Iesu ma e tau foakiaga fakaagaaga ha Iehova?
9 Ko e tau magaaho fiafia e tau galue ne amaamanaki lahi atu e tau Iutaia manamanatuaga fakaagaaga. (Teu. 16:15) Ne fiafia e magafaoa ha Iesu ke taute e tau foakiaga ke o atu mo e olioli katoa ai. Ha ha ia tautolu foki e loto fakaaue pihia ma e tau fonoaga he faahimotu ha tautolu, he onoono ki ai ko e mena fakaalofa mai he ha tautolu a Matua fakaalofa he lagi. (Iako. 1:17) Ko e magaaho anei ke mautauteute ma e magaaho tapuaki fiafia ki a Iehova he tau nei!
[Puha he lau 6, 7]
Tau Fakamanatu he Fonoaga he Faahimotu
◼ Tau Magaaho he Polokalama: To kamata e polokalama he matahola 9:20 he pogipogi he tau aho tolu oti. To hafagi e tau gutuhala he matahola 8:00 he pogipogi. He fakailoa e leo kofe hafagi, lata ia tautolu oti ke fitā e nonofo ke kamata e polokalama he puhala lilifu. To oti e polokalama he matahola 4:55 he afiafi he Aho Faraile mo e Aho Faiumu mo e he matahola 3:40 he afiafi he Aho Tapu.
◼ Paaka Motokā: He tau matakavi fonoaga oti ne leveki e tautolu e tau paaka motokā, to ha ha ai e tau paaka tokanoa ne nakai totogi ma lautolu ka hohoko mua mai. Ko lautolu hokoia ne fai Mobility Parking Permit ka fakaatā ke paaka he tuaga pauaki ma lautolu ne matematekelea. Ha kua nakai mahani ke loga e tau paakaaga motoka, kua lata ke heke auloa e tau motoka ka maeke.
◼ Toka e Tau Nofoa: Maeke ke toka e tau nofoa ma lautolu ni ne heke he motokā haau po ke nonofo mo koe i kaina, ti pihia mo lautolu mogonei hane fakaako Tohi Tapu mo koe.—1 Kori. 13:5.
◼ Kai Laā: Fakamolemole tamai e kai laā ka e ua ō kehe mai he matakavi fonoaga ke kumi mena kai he okioki laā. Fakaaoga ni e puha tuku kai tote ne hao i kelekele he nofoa. Ko e tau puha tuku kai lalahi mo e tau lupo kalase kua nakai fakaatā ke he matakavi fonoaga.
◼ Tau Mena Fakaalofa: Maeke ia tautolu ke fakakite e loto fakaaue ma e tau fakaholoaga he fonoaga he foaki noa e tau mena fakaalofa ma e gahua he lalolagi katoa ke he ha tautolu a Fale he Kautu po ke he fonoaga. Ko e tau tieke ne foaki ke he fonoaga kua lata ke tohi ke totogi ke he “Christian Congregation of Jehovah’s Witnesses.”
◼ Tau Pakia mo e Tau Mena Fakalutukia: Ka tupu taha fakalutukia fakaekekafo he fonoaga, fakamolemole tala age ke he fekafekau ne tata mai, ka fakailoa fakamafiti ke he First Aid ke maeke he tau tagata gahua lagomatai pauaki i ai ke fuafua kua fēfē e hagahaga kelea he tuaga ti foaki e lagomatai. Ka lata, to hea he tau tagata gahua lagomatai ha tautolu e numera 111. To puipui he mena nei e faahi gahua fakalutukia he moua e tau hea selafoni loga ke lata mo e tau mena ikiiki.
◼ Tau Tēvae: He tau tau takitaha kua loga e tau pakia ne lauia he tau tēvae. Kua mitaki lahi ke fifili e tau tēvae ne gali mo e hao mitaki ke maeke he tagata ke nakai pakia ka hake he tau sitepe mo e tau hala pihia foki.
◼ Nakai Logona Mitaki: I Niu Silani to fakapuloa e polokalama i loto ia ni ke he letio FM. Ke moua ai, to lata ia koe ke tamai e letio FM tote ne gahua he maka mo e tau mena fanogonogo teliga.
◼ Tapakiaga: Ko e tau mena tapaki kua nakai lata ke palaki ke he hila po ke fakatokaaga leo he fale fono, ti maeke ke fakaaoga ni ke he puhala ka nakai fakatauhele e falu.
◼ Tau Peleō Tama mo e Tau Nofoa Nofo Fafo: Ko e tau peleō tama mo e tau nofoa nofo fafo kua nakai lata ke tamai ki loto he fonoaga. Pete ia, kua fakaatā e tau nofoa tama ne maeke ke fakamau ke he nofoa he tapa he tau matua. He laulahi he tau fonoaga kua ha ha ai e faahi ma e tau peleō tama.
◼ Tau Lolo Poki: Laulahi he tau fonoaga ne taute i loto he tau fale ne ha ha i ai e matini fakahauhau. Ko e mena ia, ko e mahani fakaalofa ha tautolu ke fakaaoga fakatote e tau lolo poki mo e tau mena fakamanogi ne maō e namu neke hufia e tau tagata ne uka ke fafagu po ke falu lekua pihia.—1 Kori. 10:24.
◼ Tau Laupepa Aahi Atu: Ko e laupepa Please Follow Up (S-43) kua lata ke fakaaoga ke foaki e tau talahauaga hagaao ke he ha fiafia mai he fakamatala he tau magaaho noa he magahala he fonoaga. Kua lata he tau tagata fakailoa ke tamai taha po ke ua e laupepa aahi atu ke he fonoaga. Kia age mogoia e tau laupepa kua fitā e fakapuke ke he Poko Toka Tohi ke taute po ke ke he tohikupu he fakapotopotoaga haau ka liu a koe.—Kikite Ha Tautolu a Fekafekauaga he Kautu, Novema 2009, lau 4.
◼ Tau Fale Kai: Kia fakaheke e higoa a Iehova ha ko e mahani mitaki haau he tau fale kai.
◼ Tau Motela: (1) Fakamolemole ua loga e poko ka fakamau ke he mena ka fakaaoga e koe, ti ua loga e tagata ka nonofo he poko motela haau ke he mena kua fakaatā. (2) Kaeke kua lata ke liuaki e poko haau ne fakamau, fakailoa fakamafiti ke he motela. (3) Uta ni e peleō lau kato ka mau a koe ke fakaaoga ai, ti liuaki fakaave ke fakaaoga he falu. (4) Ua kaitunu he tau poko ne nakai fakaatā ke kaitunu. (5) Aua neke fakaaoga fakahehē e tau kai pogipogi, kofe, po ke aisa ne foaki noa ke fakaaoga he tau tagata ne nonofo he motela he mogo ia. (6) Fakatātā e tau fua he agaaga he fehagai mo e tau tagata gahua he motela he tau magaaho oti. Kua leveki a lautolu ke he numera lahi mahaki he tau tagata ne nonofo ai ti loto fakaaue ke he mahani totonu, fakauka, mo e mahani fakalatalata ha tautolu.
◼ Gahua Foaki Noa: Ko e fiafia kua moua e tautolu he o atu ke he fonoaga to mua atu foki ka foaki e tautolu e magaaho ke lagomatai e tau gahua kua lata ne putoia ai. (Gahua 20:35) Ko e ha tagata kua manako ke lagomatai kua lata ke fina atu ke he Volunteer Service Department he fonoaga. Ko e tau fanau 16 tau ki lalo kua maeke foki ke lagomatai he gahua i lalo hifo he matua po ke tagata ne leveki po ke tagata lahi ne talia he taha ia laua.