Ha Tautolu a Tau Fonoaga he Faahimotu—Fakamooliaga Malolō Lahi ke he Kupu Mooli
1. Ko e tau galue tumau ne foaki ke he tau Isaraela e magaaho ke manamanatu ki ai mo e fakatutala ke he tau kupu mooli fakaagaaga uho fe?
1 Ne fakapotopoto e tau Isaraela i tuai lagatolu he tau ma e tau galue tumau. Pete ni ko e tau tagata taane ne lata ke o atu, fa mahani ko e magafaoa katoa ne fenoga ki Ierusalema ke fakalataha ke he tau fonoaga fiafia nei. (Teu. 16:15, 16) Ko e tau mogo pihia ne moua e magaaho ke manamanatu ai mo e fakatutala e tau kupu mooli fakaagaaga uho lahi. Ko e heigoa falu he tau kupu mooli nei? Taha ko Iehova ko e Foaki fakamokoi mo e fakaalofa. (Teu. 15:4, 5) Ko e taha foki kua maeke a ia ke falanaki ki ai ma e takitakiaga mo e puipuiaga. (Teu. 32:9, 10) Maeke foki e tau Isaraela ke manamanatu ha ko lautolu ko e tau tagata ma e higoa a Iehova, kua lata ia lautolu ke fakaata fakamitaki e tututonu haana. (Teu. 7:6, 11) He vahā nei ko e ha tautolu a tau fonoaga faahimotu lagataha he tau kua aoga agaia foki ki a tautolu.
2. To fakakikila fēfē he fakaholoaga he fonoaga faahimotu e kupu mooli?
2 Ko e Fakaholoaga kua Fakakikila e Maama ke he Kupu Mooli: He tau fonoaga faahimotu ha tautolu, kua fiafia a tautolu ke he tau lauga, tau taute tala, tau fakatātā, mo e tau hūhū tala ne fakakikila e maama ke he tau kupu mooli aoga he Tohi Tapu. (Ioane 17:17) Fitā he lahi e gahua ne tauteute ke lata mo e fonoaga i mua. Kua tauteute he fakatokatokaaga a Iehova e fakaholoaga ne kua talaga pauaki ke felauaki mo e tau manako mogonei he fonua he lalolagi katoa. (Mata. 24:45-47) Makai nakai a koe ke kitia mo e logona e tau mena ka folafola mai?
3. Ko e heigoa kua lata ia tautolu ke taute ke aoga mai he fakaholoaga?
3 Mooli, to aoga lahi ki a tautolu kaeke ke o atu mo e fanogonogo fakamakutu a tautolu ke he tau aho tolu ia. Ka nakaila taute ia e koe, tutala ke he takitaki gahua haau ke fai magaaho ka nakai gahua ai. Eketaha ke lahi e okioki he tau pō takitaha ke maeke a koe ke mataala he fakaholoaga. Tokologa ne hagaaki tumau ke he tagata lauga mo e tohi hifo e tau manatu kūkū kua lagomatai a lautolu ke fakatumau e mataala. Ua fakaatā e selafoni po ke fakahoko fekau haau ke fakatauhele a koe po ke falu. Kalo kehe he tutala, tohitohi he selafoni, kai, po ke inu he fakaholoaga.
4. Maeke fēfē e tau matua ke lagomatai e tau fanau ha lautolu ke aoga mai he fonoaga?
4 Ko e tau vahā Sapati, he magaaho ne fakapotopoto e tau magafaoa Isaraela ke logona e Fakatufono ne totou he Galue he Tau Fale Api, ne fakalataha foki ha lautolu a “tau tama ikiiki” mo lautolu “kia fanogonogo ai a lautolu, mo e ako ai e lautolu.” (Teu. 31:12) Ko e fakamalolō ha ia ke kitia e tau magafaoa ne nonofo fakalataha he fonoaga mo lautolu ne ikiiki kua aala mo e fanogonogo fakamitaki! He tau afiafi takitaha, ko e ha he fakakia e tau mena ne tohi hifo e koe ti fakatutala auloa e tau manatu mai he fakaholoaga ne kua fiafia lahi a koe ki ai? “Kua lili ai e goagoa ke he loto he tama,” ti kua lata e tau matua ke leveki e tau tama ha lautolu, putoia a lautolu ne fuata mui, he tau mogo kai laā mo e he motela, ka e nakai “toka noa” a lautolu.—Fakatai 22:15; 29:15.
5. To fakalilifu fēfē he tau mahani mitaki ha tautolu e kupu mooli he haia he motela?
5 Ko e Mahani Mitaki ha Tautolu kua Fakalilifu e Kupu Mooli: Ko e mahani mitaki ha tautolu he haia he taone ne fono ai kua fakalilifu e kupu mooli. (Tito 2:10) Ne mailoga he kau gahua motela e matakau ne omaoma e tau matafakatufono he motela mo e fakakite e mahani fakauka mo e totonu ke he kau gahua. (Kolo. 4:6) He fakatutala e tau hukui he la ofisa mo e hotela he tau kua mole, ko e takitaki gahua ne tala age ki a lautolu: “Kua fiafia lahi a mautolu ke o mai e tau tagata ha mutolu ke he hotela ha mautolu ha ko e tau tagata mitaki a lautolu. Ko lautolu ko e tau tagata mahani mitaki mo e totonu, ti taute fakalilifu tumau e lautolu e tau tagata gahua ha mautolu mo e tau fale ha mautolu.”
6. Maeke fēfē a tautolu ke fakalilifu e kupu mooli he puhala kua tauteute a tautolu he haia he taone ne fono ai?
6 Ka tau e tautolu e tau pine he fonoaga ha tautolu, to nakai ni eke e mena nei mo fakailoa he fonoaga mo e maeke he falu tagata ne uiina ke kitia a tautolu ka e pihia foki ke fakamatala atu ke he tau tagata kitekite. Ko e tau tagata he taone ne fono ai to kitia ko lautolu ne tau e tau pine he fonoaga kua maopoopo mo e gali e tau tauteuteaga, nakai ke he tau puhala fulufagu mo e fakataki ne kitia lahi ke he lalolagi. (1 Timo. 2:9, 10) Ko e mena ia, kua lata ia tautolu ke mailoga e tau mena tui mo e tauteuteaga ha tautolu he taone ne fono ai, putoia foki he mogo ka o atu a tautolu ke he motela. Ko e hohoko atu he fīhui kū mo e tapulu miti to nakai fakaata e fakalilifu. Pete foki kua fakahoko e fonoaga he malē, kua lata e tau mena tui ha tautolu ke lilifu. Kaeke ke fifili a tautolu ke hiki e tau mena tui ka oti e fakaholoaga ti ō ke he fale kai, lata ia tautolu ke manatu ko e tau tagata uiina agaia a tautolu ke he fonoaga ti kua nakai lata a tautolu ke fakahanoa lahi e tau mena tui.
7. Ko e heigoa e taha puhala ke olioli e fakalatahaaga Kerisiano ha tautolu he fonoaga?
7 He tau galue tumau, kua olioli he tau Isaraela e feoakiaga atihake mo e tau tagata tapuaki mai he falu faahi he motu mo e lalolagi, ti fakatupu he mena nei e kaufakalataha. (Gahua 2:1, 5) He tau fonoaga faahimotu ko e fakamatakainaga Kerisiano lahi mahaki ha tautolu kua fakatātā katoatoa ai. Ko e vala mitaki nei he parataiso fakaagaaga ha tautolu kua fa nava e tau tagata kitekite ki ai. (Sala. 133:1) He nakai toka e fale fono he mogo kai laā ke fakatau mena kai, kua mitaki ha ia ke uta e kai laā māmā mo tautolu ti fai magaaho mitaki ke feleveia mo e tutala ke he tau matakainaga ha tautolu ne nonofo tata mai!
8. Ko e heigoa e tau kakano kua ha ha i ai ke foaki noa ke gahua kaeke kua fakaatā he tau tuaga ha tautolu?
8 Kua fa nava e tau tagata kitekite ke he tau fonoaga fakatokatoka mitaki mo e maopoopo ha tautolu, mua atu ka iloa e lautolu kua taute he tau tagata foaki noa e tau gahua oti kana. Maeke nakai a koe ke foaki ne koe a koe ke gahua he fonoaga? (Sala. 110:3) Ko e tau magafaoa katoa ne fa foaki noa ke gahua ko e puhala ke fakamahani e tau fanau ha lautolu ke foaki ne lautolu a lautolu. Ka mā a koe, ko e gahua he fonoaga e puhala mitaki ke feleveia mo e falu matakainaga. Taha e matakainaga fifine ne pehē: “Mai he magafaoa mo e tau kapitiga tokogahoa haaku, nakai tokologa i ai ne iloa e au. Ka ko e mogo ne lagomatai e au e fakameā, ne feleveia au mo e tokologa he tau matakainaga taane mo e fifine. Ko e mena fiafia lahi!” Ko e fakalahi atu he tau kapitiga ha tautolu he lagomatai ke he fonoaga to tamai ki a tautolu e olioli lahi mahaki. (2 Kori. 6:12, 13) Ka nakaila foaki noa a koe, tutala ke he tau motua ma e puhala ke maeke a koe ke lagomatai.
9. To uiina fēfē e tautolu e falu ke o mai ke he fonoaga?
9 Uiina e Falu ke Logona e Kupu Mooli: Tolu e faahi tapu ato kamata e fonoaga ha tautolu, tuga he tau tau kua mole, to fakalataha a tautolu ke he matagahua ke uiina e falu ke hohoko atu. To manako e tau fakapotopotoaga ke lahi e fonua ha lautolu ka taute he tufa e uiina. (Kikite e puha “To Foaki Fēfē e Tautolu e Uiina?”) Ko e tau uiina ka toe kua lata ke tamai ke he fonoaga. To fakaaoga ai e lautolu ne uiina ke fakamatala he magaaho noa he haia he taone ne fono ai.
10. Talahau e tau mena tutupu ke fakamooli aki kua fai fua e matagahua uiina ha tautolu he tau tau takitaha.
10 Talia nakai he tau tagata e matagahua nei he tau tau takitaha? He taha fonoaga, ne lagomatai he matakainaga taane leveki e hoa mau ke kumi e nofoa. Ne tala age a laua ki a ia he moua e laua e uiina ti “manatu kua fulufuluola ai.” Kua fakaholo atu a laua he motokā ki ai ke molea e 320 e kilomita! He taha mena foki, ko e matakainaga fifine ne fano he taha fale ke he taha fale ne age e uiina ke he tagata taane ne tuga kua fia iloa hagaao ke he fonoaga. Ti fakaaoga e ia e magaaho ke fakatutala e uiina mo ia. Fai aho gahoa he mole he fina atu ke he fonoaga, ne kitia he matakainaga fifine e tagata taane mo e taha he tau kapitiga haana he fonoaga, kua igatia a laua mo e tohi ne fakatoka foou mai!
11. Ko e ha e o atu ha tautolu ke he tau fonoaga faahimotu ha tautolu he tau tau takitaha kua aoga ai?
11 Ko e tau galue tumau ko e foakiaga fakaalofa mai ia Iehova ke lagomatai e tau Isaraela ke “fekafekau atu . . . kia ia mo e loto katoa mo e fakamoli.” (Iosua 24:14) Pihia foki, ko e o atu ha tautolu he tau tau takitaha ke he tau fonoaga faahimotu ha tautolu kua lagomatai a tautolu ke ‘eke e mahani he kupu moli’ ti ko e vala aoga he tapuakiaga ha tautolu. (3 Ioa. 3) Kia fakamonuina e Iehova e tau laliaga he tau tagata oti ne fiafia ke he kupu mooli ke o atu mo e aoga katoatoa ai!
[Blurb he lau 4]
Ko e mahani mitaki ha tautolu he haia he taone ne fono ai kua fakalilifu e kupu mooli
[Blurb he lau 7]
Tolu e faahi tapu ato kamata e fonoaga ha tautolu, to fakalataha a tautolu ke he matagahua ke uiina e falu ke hohoko atu
[Puha he lau 3-4, 7-8]
Tau Fakamanatu He 2012/13 Fonoaga He Faahimotu
◼ Tau Magaaho he Polokalama: To kamata e polokalama he matahola 9:20 he pogipogi he tau aho tolu oti. To hafagi e tau gutuhala he matahola 8:00 he pogipogi. He fakailoa e leo kofe hafagi, lata ia tautolu oti ke o atu ke he tau nonofoaga ke kamata e polokalama he puhala lilifu. To oti e polokalama he matahola 4:55 he afiafi he Aho Faraile mo e Aho Faiumu, mo e he matahola 3:40 he afiafi he Aho Tapu.
◼ Paaka Motokā: He tau matakavi fonoaga oti ne leveki e tautolu e tau paaka motokā, to ha ha i ai e tau paaka tokanoa ne nakai totogi ma lautolu ka hohoko mua mai. Ko lautolu ni ne fai Mobility Parking Permit ka fakaatā ke paaka he tuaga pauaki ma lautolu. Ha kua nakai mahani ke loga e tau paaka motokā, kua lata ke heke auloa e tau motokā ka maeke.
◼ Toka e Tau Nofoa: Maeke ke toka e tau nofoa ma lautolu ni ne nonofo he kaina ha tautolu po ke heke he motokā ha tautolu po ke ma lautolu mogonei hane fakaako Tohi Tapu mo koe.—1 Kori. 13:5.
◼ Kai Laā: Fakamolemole tamai e kai laā ka e ua o kehe mai he matakavi fonoaga ke kumi mena kai he okioki laā. Fakaaoga ni e puha tuku kai tote ne hao i kelekele he nofoa. Ko e tau puha tuku kai lalahi mo e tau lupo kalase kua nakai fakaatā ke he matakavi fonoaga.
◼ Tau Mena Fakaalofa: Maeke ia tautolu ke fakakite e loto fakaaue ma e tau fakaholoaga he fonoaga he foaki noa e tau mena fakaalofa ke he gahua he Kautu he fonoaga. Ko e tau tieke kua lata ke tohi ke totogi ke he “Christian Congregation of Jehovah’s Witnesses.”
◼ Tau Pakia mo e Tau Mena Fakalutukia: Ka tupu taha fakalutukia fakaekekafo he fonoaga, fakamolemole tala age ke he fekafekau ne tata mai, ka fakailoa fakamafiti ke he First Aid ke maeke he tau tagata gahua lagomatai pauaki ke fuafua kua fēfē e hagahaga kelea he tuaga ti foaki e lagomatai. Ka lata, to hea he tau tagata gahua lagomatai ha tautolu e numera 111. To puipui he mena nei e faahi gahua fakalutukia ke ua loga e tagata ka hea atu.
◼ Tau Vai Ekekafo: Ka fakaaoga a koe he tau vai ekekafo pauaki, fakamolemole kikite kua lahi e vai haau ka tamai, ha kua nakai fai he fonoaga. Ko e tau huki mo e tau nila gagao suka kua lata ke tuku fakamitaki he tau otaota hagahaga kelea ka e nakai i loto he tau tini veve he tau matakavi fonoaga mo e tau motela.
◼ Tau Tēvae: He tau tau takitaha kua loga e tau pakia ne lauia ha ko e tau tēvae. Kua mitaki lahi ke fifili e tau tēvae ne gali mo e hao mitaki ke nakai pakia e tagata ka fano he tau sitepe mo e tau hala pihia foki.
◼ Nakai Logona Mitaki: To fakapuloa mai e fakaholoaga i loto ia ni ke he letio FM. Ke moua ai, to lata ia koe ke tamai e letio FM tote ne gahua he maka mo e tau mena fanogonogo teliga.
◼ Tau Peleō Tama mo e Tau Nofoa Fatufatu: Ko e tau peleō tama mo e tau nofoa fatufatu kua nakai lata ke tamai ki loto he fonoaga. Pete ia, kua fakaatā e tau nofoa tama ne maeke ke fakamau ke he nofoa he tapa he tau matua. Laulahi he tau fonoaga kua haia e faahi ke toka ai e tau peleō tama.
◼ Tau Lolo Poki: Laulahi he tau fonoaga ne taute i loto he tau fale ne ha ha i ai e matini fakahauhau. Ko e mena ia, ko e mahani fakaalofa ha tautolu ke fakakaupā e fakaaogaaga he tau lolo poki mo e tau mena fakamanogi ne maō e namu neke hufia e tau tagata ne uka ke fafagu po ke falu lekua pihia.—1 Kori. 10:24.
◼ Tau Laupepa Please Follow Up (S-43): Ko e laupepa Please Follow Up kua lata ke fakaaoga ke foaki e tau talahauaga hagaao ke he ha fiafia mai he fakamatala he tau magaaho noa he magahala he fonoaga. Kua lata he tau tagata fakailoa ke tamai taha po ke ua e laupepa ke he fonoaga. Lata ke age e tau laupepa kua fakapuke ke he Poko Toka Tohi po ke ke he tohikupu he fakapotopotoaga ka liu a koe.—Kikite Ha Tautolu a Fekafekauaga he Kautu, Aperila 2011, lau 6.
◼ Tau Fale Kai: Kia fakaheke e higoa a Iehova ha ko e mahani mitaki haau he tau fale kai.
◼ Tau Motela:
(1) Fakamolemole ua loga e poko ka fakamau ke he mena ka fakaaoga e koe, ti ua loga e tagata ka nonofo he poko haau ke he mena kua fakaatā.
(2) Ua liuaki e poko haau ne fakamau, taute pihia ni ka fai matematekelea tupu fakaofo, ti fakailoa fakamafiti ai ke he motela.—Mata. 5:37.
(3) Uta ni e peleō lau kato ka mau a koe ke fakaaoga ai, ti liuaki fakaave ke fakaaoga he falu.
(4) Kaitunu ni he tau poko ne fakaatā ke kaitunu.
(5) Ua fakaaoga fakahehē e tau kai pogipogi, kofe, po ke aisa ne foaki noa ke fakaaoga he tau tagata ne nonofo he motela he mogo ia.
(6) Fakatātā e fua he agaaga he fehagai mo e tau tagata gahua he motela. Kua leveki a lautolu ke he numera lahi mahaki he tau tagata ne nonofo ai ti loto fakaaue ke he mahani totonu, fakauka, mo e mahani fakalatalata ha tautolu.
◼ Gahua Foaki Noa: Ko e ha tagata kua manako ke lagomatai kua lata ke fina atu ke he Volunteer Service Department he fonoaga. Ko e tau fanau i lalo hifo he 16 tau kua maeke ke gahua i lalo he takitakiaga he matua po ke tagata leveki po ke falu tagata lalahi ne fakaatā he matua po ke tagata leveki.
[Puha he lau 8]
To Foaki Fēfē e Tautolu e Uiina?
Ke maeke ke oti e fonua ha tautolu, kua liga lata ia tautolu ke fakakū. Liga talahau e tautolu taha mena pehē: “Fakaalofa atu. Kua fakalataha a mautolu ke he gahua he lalolagi katoa ke tufa e uiina nei. Ha ē e lagaki haau. To moua e koe e falu vala tala matafeiga i loto he uiina.” Kia hakahakau. Ka fakalataha ke he tufatufaaga he tau matahiku faahi tapu, kua lata foki ia koe ke foaki e tau mekasini kaeke kua latatonu.