Tolu e Aho Fakahauhau Fakaagaaga
1. Ko e heigoa ka amanaki a tautolu ke moua mai he fonoaga faahimotu he tau nei?
1 He motu nakai fai vai fakaagaaga nei he lalolagi ha Satani, kua matutaki a Iehova ke fakahauhau e tau fekafekau haana. (Isaia 58:11) Taha e foakiaga kua fakaaoga e Iehova ke fakamalolō a tautolu ko e tau fonoaga faahimotu lagataha he tau. He tata mai e fonoaga he tau nei, to tauteute fēfē a tautolu ke moua mo e fakaaoga e tau fakahauhau fakaagaaga?—Fakatai 21:5.
2. Ko e heigoa e tau tauteuteaga kua lata ia tautolu ke fakakatoatoa?
2 Ka nakaila taute pihia e koe, fakaaoga taha magaaho mogonei ke fakatokatoka e tau mena fakatagata haau mo e tau setulu he gahuaaga ke maeke ke hoko atu he tau aho oti ne tolu he fonoaga. Kua fuafua nakai e koe e magaaho kua lata ke fenoga atu ke he matakavi he fonoaga he tau aho takitaha ke maeke ia koe ke hoko atu mo e moua tuai e nofoa ato kamata e fakaholoaga? To nakai manako a tautolu ke fakatō ha vala he galue fakaagaaga kua fakamalolō ne tauteute e Iehova ma tautolu! (Isaia 65:13, 14) Kua oti nakai e tau fakatokaaga haau ke he mena ke nofo ai mo e puhala ke fenoga atu ai?
3. Ko e heigoa e tau puhala ka lagomatai a tautolu mo e magafaoa ha tautolu ke aoga katoatoa mai he fakaholoaga?
3 Ko e heigoa ka lagomatai a koe ke nakai holo fano e manamanatuaga haau he tau magahala fonoaga? Ka maeke, lali ke lahi e okioki he tau po takitaha he fonoaga. Hagaaki ke he tagata lauga. Kumi e tau kupu tohi oti he Tohi Tapu haau. Fakamau hifo fakakūkū e tau manatu. Mitaki ma e tau magafaoa ke nonofo auloa ke maeke e tau matua ke lagomatai e tau fanau ha lautolu ke fanogonogo fakamitaki. (Fakatai 29:15) Liga maeke ia koe ke fakatutala ke he tau manatu he fakaholoaga he tau afiafi takitaha ko e magafaoa. Ke maeke he magafaoa haau ke matutaki ke hauhau ti pihia foki ka oti e fonoaga, maeke ke fakatoka taha magaaho he haau a Tapuakiaga Magafaoa he afiafi ke fakatutala ke he tau manatu pauaki kua lata he magafaoa haau ke fakagahua.
4. Maeke fēfē a tautolu ke lagomatai falu he fakapotopotoaga ha tautolu ke moua e fakahauhau fakaagaaga?
4 Lagomatai Falu ke Moua e Fakahauhau: Manako a tautolu ke moua foki he falu e fakahauhau fakaagaaga. Fai tagata fakailoa nakai ne momotua po ke falu he fakapotopotoaga ne manako lagomatai ke maeke ke hoko atu ke he fonoaga? Maeke nakai a koe ke lagomatai a lautolu? (1 Ioa. 3:17, 18) Ko e tau motua, mua atu ke he tau leveki matakau, kua lata ke fakakia e tau tagata fakailoa pihia ke moua e lagomatai kua lata.
5. Puhala fe ka tufa e tautolu e tau uiina ke he fonoaga? (Kikite foki e puha i luga.)
5 Tuga he mogo kua mole, he tolu e faahi tapu ato hoko e fonoaga ha tautolu, to taute e tautolu e matagahua ke uiina falu ke o mai. Lata e tau fakapotopotoaga ke fakatoka e foliaga ke tufa e tau fufuta uiina ha lautolu mo e ke lahi e fonua ha lautolu ka taute. Ko e tau uiina he magafaoa haau ne toe agaia he oti e matagahua, kua lata ke tamai ke he fonoaga ke fakaaoga ai e koe ka fakamatala he magaaho noa. To tala atu falu fakailoaaga ke he mena nei he fakaholoaga he Aho Faraile. Ko e tau uiina ne liga nakai amanaki e magafaoa haau ke fakaaoga he magaaho ka haia he taone ne fono ai, kua lata ke age ke he fekafekau ka hu mai a koe ke he fale he fonoaga. Fakamolemole toka taha lagaki ma haau, ha kua lata ia koe ke kikite ki ai he lauga fakahiku he Aho Tapu.
6. Ha e fe e tau puhala kua maeke ia tautolu ke fakakite e tau mahani mitaki he fonoaga?
6 Fakahauhau e Tau Mahani Mitaki: He magaaho kua tokologa e tagata ne ‘ofaofa a lautolu ni’ mo e nakai fakalilifu ke he tau logonaaga he falu, ko e hauhau ha a ia ke fakalataha mo e tau matakainaga Kerisiano hane eketaha ke fakakite e tau mahani mitaki! (2 Timo. 3:2) Fakakite e tautolu e tau mahani mitaki ka fakahautoka mo e fakalilifu he huhū atu ke he fale ka hafagi he matahola 8:00 he pogipogi ti toka ni e tau nofoa ma lautolu kua nonofo he kaina ha tautolu po ke heke he peleoafi ha tautolu po ke ma e tau tagata fakaako Tohi Tapu ha tautolu mogonei. To muitua a tautolu ke he talahauaga he tagata nofoa ka ole a ia ke o atu ke he tau nonofoaga ha tautolu ke fanogonogo ke he leo kofe ka kamata aki e tau vala takitaha he fonoaga. Ko e mahani mitaki ke fakatoka e tau selafoni mo e tau fakahoko fekau ha tautolu ke nakai fakatauhele e falu he magaaho he fakaholoaga. Fakakite foki e tautolu e tau mahani mitaki he nakai tutala, tohitohi he selafoni, kai, po ke takalo noa he tau avaloa he magaaho he fakaholoaga.
7. Moua mo e foaki fēfē e tautolu e fakahauhauaga ka lafi mo e tau matakainaga ha tautolu?
7 Lafiaga Fakahauhau: Lahi e magaaho kua foaki mai he tau fonoaga ki a tautolu ke olioli e fakalatahaaga hauhau faka-Kerisiano mo e tau matakainaga ha tautolu. (Sala. 133:1-3) Ko e ha he fakailoilo ke ‘fakalahi atu’ mo e feleveia ke he tau matakainaga i ai mai he falu fakapotopotoaga? (2 Kori. 6:13) Liga taute e koe mo foliaga haau ke iloa taha e tagata foou po ke magafaoa foou he tau aho takitaha. Ko e magaaho mitaki ke taute e mena nei he okioki tupou laā. Ti tamai e kai laā māmā ke olioli he kai auloa mo e lafi mo e falu i ai ka e nakai o ke fakatau kai ke kai he fale kai ne tata mai. Liga takitaki e mena nei ke he monuina he moua e tau kapitiga foou mo e tumau.
8. Ko e ha kua lata ia tautolu ke foaki noa ke gahua he fonoaga, ti taute fēfē e tautolu e mena nei?
8 Ko e fakahauhau ha a ia ke fakatau gahua mo e tau matakainaga tapuaki he fekafekauaga tapu! Maeke nakai ia koe ke foaki noa ke lagomatai taha faahi gahua po ke lagomatai e fakapotopotoaga haau ka kotofa ke fakameā? (Sala. 110:3) Ka nakaila fai kotofaaga gahua ia a koe, fakamolemole kia fina atu ke he Volunteer Service Department he fonoaga. Ka loga e lima ti fiafia mo e māmā e gahua.
9. Ko e ha kua lata ia tautolu ke hagaaki lahi ke he mahani mo e tau puhala tauteute ha tautolu he magaaho he fonoaga?
9 Fakahauhau e Mahani ha Tautolu ke he Tau Tagata Onoono: Ko tautolu ko e tau tagata o atu ke he fonoaga he tolu e aho katoa, nakai he magaaho ni he fakaholoaga. Ko lautolu kua onoono ki a tautolu ka haia a tautolu he taone he fonoaga kua lata ke kitia e kehekehe he hauhau ha tautolu mo lautolu ne nakai ko e Tau Fakamoli. (1 Pete. 2:12) Ko e tau mena tui mo e puhala tauteute ha tautolu ka haia he matakavi fonoaga, he mena ne nonofo ai a tautolu, mo e he tau fale kai, kua lata ke fakaheke a Iehova. (1 Timo. 2:9, 10) Ka tau e tau laupepa pine ha tautolu to maeke he tau tagata ne onoono ke kitia ko tautolu ko e Tau Fakamoli a Iehova. Liga foaki he mena nei ki a tautolu e magaaho ke tala age ki a lautolu hagaao ke he fonoaga ha tautolu mo e fakamatala fakalaulahi atu.
10. Maeke fēfē ia tautolu ke taute e tau tagata gahua he motela mo e tau fale kai ke mitaki e onoonoaga ke he fonoaga ha tautolu?
10 Maeke fēfē a tautolu ke kaufakalataha mo e tau tagata gahua he motela mo e tau fale kai? Nakai lata ia tautolu ke fakamau ke loga e poko motela ka nakai fakaaoga e tautolu, ha kua taofi he mena nei e falu ka o atu ke he fonoaga ke moua e tau poko ti uka lahi he motela ke fakalagotatai e pisinisi ka pihia. Ka lavelave e motela he magaaho ka hohoko atu po ke taute a tautolu ke o kehe mai ai, kua lata ia tautolu ke fakatātā e fakauka mo e fakaalofa.—Kolo. 4:6.
11. Ko e heigoa e tau mena tutupu ne fakakite e fakamatala mitaki ha ko e mahani faka-Kerisiano ha tautolu?
11 Lauia fēfē e falu ha ko e mahani mitaki ha tautolu he magaaho he fonoaga? Hagaao ke he taha vala tala he nusipepa, ko e takitaki he taha fale ne fakaaoga ma e tau fonoaga ne talahau e mena nei: “Kua to lahi e fakalilifu he tau tagata. Ti fiafia lahi a mautolu ke o mai a lautolu he tau tau oti.” He tau kua mole ne galo e pesi he taha tagata ne nakai ko e Fakamoli he hotela ne fakaaoga he tau matakainaga ne o atu ke he fonoaga. Magaaho ne liuaki atu e pesi ke he takitaki he hotela mo e mau maopoopo agaia e tau mena oti i loto, ne tala age e takitaki ke he tagata haana pesi: “Monuina a koe ha ko e Tau Fakamoli a Iehova ne o atu ke he fonoaga ha lautolu ne tata mai, ti puke e hotela ia lautolu. Ane mai nakai pihia to liga nakai liuaki atu e pesi haau.”
12. He tata mai e fonoaga, ko e heigoa e foliaga ha tautolu kua lata, mo e ko e ha?
12 Kua tata lahi mai tuai e tau fonoaga he tau nei. Kua lahi e magaaho mo e gahua kua taute ke fakahauhau e fakaholoaga mo e takatakaiaga he fonoaga. Kia eke mo foliaga haau ke hoko atu ki ai he tolu e aho katoa, ti tauteute ma e tau mena kua fakatoka e Iehova mo e haana fakatokatokaaga ma haau. Kia eketaha ke eke mo fakahauhau ke he falu ha ko e tau mahani mitaki mo e lafiaga olioli haau. Ti maeke ia koe mo e falu ke logona hifo tuga e taha matakainaga he fonoaga he tau kua mole ne tohi, “ai maeke au ke manatu ha mena kua olioli lahi pihia!”
[Blurb he lau 4]
Tuga he mogo kua mole, he tolu e faahi tapu ato hoko e fonoaga ha tautolu, to taute e tautolu e matagahua ke uiina falu ke o mai
[Blurb he lau 6]
Ko e tau mena tui mo e puhala tauteute ha tautolu ka haia he matakavi fonoaga, he mena ne nonofo ai a tautolu, mo e he tau fale kai, kua lata ke fakaheke a Iehova
[Blurb he lau 7]
Kia eketaha ke eke mo fakahauhau ke he falu ha ko e tau mahani mitaki mo e lafiaga olioli haau
[Puha he lau 4-7]
Tau Fakamanatu he 2011 Fonoaga he Faahimotu
◼ Tau Magaaho he Polokalama: To kamata e polokalama he matahola 9:20 he pogipogi he tau aho tolu oti. To hafagi e tau gutuhala he matahola 8:00 he pogipogi. He fakailoa e leo kofe hafagi, lata ia tautolu oti ke o atu ke he tau nonofoaga ke kamata e polokalama he puhala lilifu. To oti e polokalama he matahola 4:55 he afiafi he Aho Faraile mo e Aho Faiumu mo e he matahola 3:40 he afiafi he Aho Tapu.
◼ Paaka Motokā: He tau matakavi fonoaga oti ne leveki e tautolu e tau paaka motokā, to ha ha i ai e tau paaka tokanoa ne nakai totogi ma lautolu ka hohoko mua mai. Ko lautolu ni ne fai Mobility Parking Permit ka fakaatā ke paaka he tuaga pauaki ma lautolu. Ha kua nakai mahani ke loga e tau paaka motokā, kua lata ke heke auloa e tau motokā ka maeke.
◼ Toka e Tau Nofoa: Maeke ke toka e tau nofoa ma lautolu ni ne nonofo he kaina ha tautolu po ke heke he motokā ha tautolu po ke ma lautolu mogonei hane fakaako Tohi Tapu mo tautolu.—1 Kori. 13:5.
◼ Kai Laā: Fakamolemole tamai e kai laā ka e ua o kehe mai he matakavi fonoaga ke kumi mena kai he okioki laā. Fakaaoga ni e puha tuku kai tote ne hao i kelekele he nofoa. Ko e tau puha tuku kai lalahi mo e tau lupo kalase kua nakai fakaatā ke he matakavi fonoaga.
◼ Tau Mena Fakaalofa: Maeke ia tautolu ke fakakite e loto fakaaue ma e tau fakaholoaga he fonoaga he foaki noa e tau mena fakaalofa ke he gahua he lalolagi katoa he fonoaga. Ko e tau tieke kua lata ke tohi ke totogi ke he “Christian Congregation of Jehovah’s Witnesses.”
◼ Tau Pakia mo e Tau Mena Fakalutukia: Ka tupu taha fakalutukia fakaekekafo he fonoaga, fakamolemole tala age ke he fekafekau ne tata mai, ka fakailoa fakamafiti ke he First Aid ke maeke he tau tagata gahua lagomatai pauaki ke fuafua kua fēfē e hagahaga kelea he tuaga ti foaki e lagomatai. Ka lata, to hea he tau tagata gahua lagomatai ha tautolu e numera 111. To puipui he mena nei e faahi gahua fakalutukia ke ua loga e tagata ka hea atu.
◼ Tau Vai Ekekafo: Ka fakaaoga a koe he tau vai ekekafo pauaki, fakamolemole kikite kua lahi e vai haau ka tamai, ha kua nakai fai he fonoaga.
◼ Tau Tēvae: He tau tau takitaha kua loga e tau pakia ne lauia ha ko e tau tēvae. Kua mitaki lahi ke fifili e tau tēvae ne gali mo e hao mitaki ke nakai pakia e tagata ka fano he tau sitepe mo e tau hala pihia foki.
◼ Nakai Logona Mitaki: To fakapuloa mai e fakaholoaga i loto ia ni ke he letio FM. Ke moua ai, to lata ia koe ke tamai e letio FM tote ne gahua he maka mo e tau mena fanogonogo teliga.
◼ Tau Peleō Tama mo e Tau Nofoa Fatufatu: Ko e tau peleō tama mo e tau nofoa fatufatu kua nakai lata ke tamai ki loto he fonoaga. Pete ia, kua fakaatā e tau nofoa tama ne maeke ke fakamau ke he nofoa he tapa he tau matua.
◼ Tau Lolo Poki: Laulahi he tau fonoaga ne taute i loto he tau fale ne ha ha i ai e matini fakahauhau. Ko e mena ia, ko e mahani fakaalofa ha tautolu ke fakakaupā e fakaaogaaga he tau lolo poki mo e tau mena fakamanogi ne maō e namu neke hufia e tau tagata ne uka ke fafagu po ke falu lekua pihia.—1 Kori. 10:24.
◼ Tau Laupepa Please Follow Up (S-43): Ko e laupepa Please Follow Up kua lata ke fakaaoga ke foaki e tau talahauaga hagaao ke he ha fiafia mai he fakamatala he tau magaaho noa he magahala he fonoaga. Kua lata he tau tagata fakailoa ke tamai taha po ke ua e laupepa nei ke he fonoaga. Lata ke age e tau laupepa kua fakapuke ke he Poko Toka Tohi po ke ke he tohikupu he fakapotopotoaga ka liu a koe.—Kikite Ha Tautolu a Fekafekauaga he Kautu, Novema 2009, lau 4.
◼ Tau Fale Kai: Kia fakaheke e higoa a Iehova ha ko e mahani mitaki haau he tau fale kai.
◼ Tau Motela:
(1) Fakamolemole ua loga e poko ka fakamau ke he mena ka fakaaoga e koe, ti ua loga e tagata ka nonofo he poko haau ke he mena kua fakaatā.
(2) Ua liuaki e poko haau ne fakamau, taute pihia ni ka fai matematekelea tupu fakaofo, ti fakailoa fakamafiti ai ke he motela.—Mata. 5:37.
(3) Uta ni e peleō lau kato ka mau a koe ke fakaaoga ai, ti liuaki fakaave ke fakaaoga he falu.
(4) Kaitunu ni he tau poko ne fakaatā ke kaitunu.
(5) Ua fakaaoga fakahehē e tau kai pogipogi, kofe, po ke aisa ne foaki noa ke fakaaoga he tau tagata ne nonofo he motela he mogo ia.
(6) Fakatātā e tau fua he agaaga he fehagai mo e tau tagata gahua he motela he tau magaaho oti. Kua leveki a lautolu ke he numera lahi mahaki he tau tagata ne nonofo ai ti loto fakaaue ke he mahani totonu, fakauka, mo e mahani fakalatalata ha tautolu.
◼ Gahua Foaki Noa: Ko e fiafia kua moua e tautolu he o atu ke he fonoaga to mua atu foki ka foaki e tautolu e magaaho ke lagomatai e tau gahua kua lata ne putoia ai. (Gahua 20:35) Ko e ha tagata kua manako ke lagomatai kua lata ke fina atu ke he Volunteer Service Department he fonoaga. Ko e tau fanau i lalo hifo he 16 tau kua maeke foki ke foaki e lagomataiaga mitaki he gahua i lalo he takitakiaga he matua po ke tagata leveki po ke falu tagata lalahi ne fakaatā he matua po ke tagata leveki.
[Puha he lau 5]
To Foaki Fēfē e Tautolu e Uiina?
Ke maeke ke oti e fonua ha tautolu, kua lata ia tautolu ke fakakū. Liga talahau e tautolu taha mena pehē: “Fakaalofa atu. Kua fakalataha a mautolu ke he gahua he lalolagi katoa ke tufa e uiina nei. Ha ē e lagaki haau. To moua e koe e falu vala tala matafeiga i loto he uiina.” Kua fakaohooho manatu e lau i mua he uiina, ti age ke he tagata he kaina he puhala ke kitia mitaki e ia. Kia hakahakau. Ka fakalataha ke he tufatufaaga he tau matahiku faahi tapu, maeke foki e tau mekasini ke foaki kaeke kua lata.