Tau Mahani ne Fakaheke e Atua

1. Ko e ha ne fa kitia maaliali e Tau Fakamoli a Iehova ka o atu he tau fonoaga faahimotu?

¹ Ka ō ke he tau fonoaga faahimotu, kua fa kitia maaliali a tautolu. Ke he loga e tau taone ne hoko ki ai e tau fonoaga, ne fakailoa he tau ofisa tohi tala he maaga ia hagaao ki a tautolu. Kua fa puke e tau hotela mo e tau fale kai he tau tagata ne o atu ke he fonoaga, ti mailoga he tau tagata he matakavi ia e tokologa he tau tagata ahiahi kua tau e tau pine he fonoaga. Ko e tau vala ka mui mai ko e falu fakamanatuaga ka lagomatai a tautolu ke fakaheke e Atua ha ko e tau mahani mitaki ha tautolu he taone he fonoaga.​—1 Pete. 2:12.

2. Fakaheke fēfē e tautolu e Atua he lilifu e tau tauteuteaga ha tautolu ka haia he taone he fonoaga?

² Tau Tapulu Lilifu: Ko e tau tapulu fakalilifu ha tautolu ka o atu he tau fonoaga kua fa fiafia ki ai e tau tagata onoono. Pete ia, ko e tau tapulu ha tautolu he tau magaaho ne toe​—ka hoko atu ke he hotela, ka kai he tau fale kai, ka ō ke he fale koloa, mo e falu mena foki​—to liga mailoga lahi he tau tagata kitekite. Pete kua nakai lata tumau ke tui e tau tapulu tuga he ō ke he fonoaga he tau magaaho pehēnei, kua lata e tau mena tui ha tautolu ke gali, lilifu, mo e nakai fakateaga lahi. Kua lata e tau tagata ne onoono mai ke kitia e kehekehe ha tautolu mai ia lautolu ne nakai tua. (Roma 12:2) Lafi ki ai, kua lata ia tautolu ke tau e tau pine he fonoaga, ha kua fakailoa he mena nei e fonoaga, takitaki ke moua e magaaho ke fakamatala, mo e maeke e falu tagata he fonoaga ke kitia a tautolu.

3. Fakakite fēfē e tautolu e fakauka mo e mahani mitaki?

³ Fakauka mo e Mahani Mitaki: He magahala ne tokologa e tagata he lalolagi ne ofaofa ki a lautolu ni mo e nakai loto fakaaue, to fakahauhau mooli e fakauka mo e mahani mitaki ha tautolu ke he tau tagata ne onoono mai, tuga e tau tagata gahua he hotela mo e tau fale kai! (2 Timo. 3:1-5) Ka toka e tau nofoa po ke fakalaini ke moua e tau koloa foou ka fakatoka mai he fonoaga, kua lata ia tautolu ke nakai kumi ni e mitaki ha tautolu ka e kumi e mitaki he falu. (1 Kori. 10:23, 24) He mole e fina atu fakamua e taha tagata taane ne fiafia ke he fonoaga ne pehē a ia, “Ai manatu e au ha lauga he aho ia, ka e manatu agaia e au e tau mahani he Tau Fakamoli.”

4. Ko e ha kua lata ia tautolu ke manamanatu ke gahua foaki noa he fonoaga ka maeke ia tautolu?

⁴ Tau Tagata Gahua kua Makai ke Foaki Noa: Ko e aga foaki noa ko e fakamailoga a ia he tau Kerisiano mooli. (Sala. 110:3) Maeke nakai a koe ke foaki noa ke lagomatai he fonoaga? He taha fonoaga, kavi ke he 600 e matakainaga ne gahua foaki noa ke fakameā ato kamata e fonoaga. Ne pehē e tau tagata gahua: “Ko e kitia laia a mautolu he mena ofoofogia pehēnei! Ko e uka ha ia ke manamanatu ko e mena gahua foaki noa e tau tagata oti nei.” Kua amaamanaki lahi a tautolu ke he tau fonoaga faahimotu he 2013 mo e magaaho ka nakai ni fanogonogo mo e fakaako mai he Atua a tautolu, ka e fakaheke foki e tautolu a ia.

[Puha he lau 3-6]

2013 Tau Fakamanatu he Fonoaga Faahimotu

◼ Tau Magaaho he Fakaholoaga: To hafagi e tau gutuhala he fale he matahola 8:00 he pogipogi. Ko e leo kofe hafagi to kamata he matahola 9:20 he pogipogi he tau aho tolu ia. He magaaho ia, kua lata a tautolu oti ke o atu ke he tau nonofoaga ha tautolu ke kamata e fakaholoaga he puhala lilifu. Ko e lologo fakahiku mo e liogi to taute he matahola 4:50 he afiafi he Aho Faraile mo e Aho Faiumu mo e matahola 3:35 he afiafi he Aho Tapu.

◼ Paakaaga: He tau matakavi oti he fonoaga ne leveki e tautolu e tau paakaaga, to ha ha i ai e tau paakaaga nakai totogi ma lautolu ka hohoko mua mai. Fakakaupā ni e tau paakaaga, ti kua lata ke heke auloa e tau motokā ka maeke. Ko lautolu ni kua moua e tohi fakaatā ma e tau tagata matematekelea kua maeke ke paaka he tuaga ne toka pauaki ma lautolu.

◼ Toka e Tau Nofoa: Maeke ke toka e tau nofoa ma lautolu ni ne nonofo he kaina haau po ke heke he motokā haau po ke ma lautolu mogonei ne fakaako Tohi Tapu mo koe. Gahoa ni e nofoa ma lautolu ne momotua mo e nakai tino malolō, ti liga nakai maeke a lautolu oti he magafaoa ke nonofo auloa mo lautolu ia. Fakamolemole toka e tau nofoa nei ma lautolu kua momotua mo e nakai tino malolō mo lautolu foki kua leveki a lautolu.​—1 Kori. 13:5.

◼ Kai Laā: Fakamolemole tamai e kai māmā ka e ua ō kehe mai he fonoaga ke kumi mena kai ka okioki he mogo laā. Fakaaoga e puha tuku kai tote ke hao he lalo nofoa. Ko e tau puha tuku kai lalahi mo e tau lupo kalase kua nakai fakaatā ke he matakavi he fonoaga.

◼ Tau Mena Fakaalofa: Maeke ia tautolu ke fakakite e loto fakaaue ma e tau fakaholoaga he fonoaga he foaki e tau mena fakaalofa ke he gahua he lalolagi katoa he fonoaga. Ko e tau tieke kua lata ke fakapuke ke totogi ke he “Christian Congregation of Jehovah’s Witnesses.” Kua maeke foki ke tuku e tau mena fakaalofa puhala atu he tau debit po ke credit card.

◼ Tau Vai Ekekafo: Ka fakaaoga a koe he tau vai ekekafo pauaki, fakamolemole kikite kua lahi e vai haau ka tamai, ha to nakai fai ka moua he fonoaga. Ko e tau nila huki gagao suka kua lata ke tuku fakamitaki he tau otaota hagahaga kelea pauaki ka e nakai tuku i loto he tau tini veve he fonoaga po ke hotela.

◼ Tau Tēvae: He tau tau takitaha kua loga e tau pakia ha ko e tau tēvae, mua atu ke he tau tēvae mui tokoluga. Kua mitaki lahi ke fifili e tau tēvae ne gali mo e hao mitaki ke ua pakia ka fano he tau mena paiaia, tau sitepe mo e tau hala pihia foki.

◼ Nakai Logona Mitaki: To fakapuloa mai e fakaholoaga i loto ia ni ke he letio FM. Ke moua ai, kua lata ia koe ke tamai e letio FM tote ne gahua he maka mo e tau mena fanogonogo teliga.

◼ Tau Peleō Tama mo e Tau Nofoa Fatufatu: Ko e tau peleō tama mo e tau nofoa fatufatu kua nakai lata ke tamai ke he fonoaga. Pete ia, kua fakaatā e tau nofoa tama ne maeke ke fakamau ke he nofoa he tapa he tau matua.

◼ Tau Lolo Poki: Laulahi he tau fonoaga na taute i loto he tau fale ne puipui e tau faahi ti fakakaupā e tau fakamaama fakahauhau. Ko e mena ia, ko e mahani fakaalofa ha tautolu ke fakakaupā e fakaaogaaga he tau lolo poki mo e tau mena fakamanogi ne maō e namu neke hufia e tau tagata ne uka ke fafagu po ke falu lekua pihia.​—1 Kori. 10:24.

◼ Tau Laupepa Please Follow Up (S-43): Ko e laupepa Please Follow Up kua lata ke fakaaoga ke foaki e tau talahauaga hagaao ke he ha fiafia mai he fakamatala he tau magaaho noa he magahala he fonoaga. Lata ke age e tau laupepa kua fakapuke ke he Poko Toka Tohi po ke age ke he tohikupu he fakapotopotoaga haau ka liu a koe ki kaina.

◼ Tau Fale Kai: Kia fakaheke e higoa a Iehova ha ko e mahani mitaki haau he tau fale kai. Tui e tau tapulu kua felauaki mo e fekafekau Kerisiano. Toka taha tupe ma e tagata gahua kaeke ko e aga fakamotu anei.

◼ Tau Hotela:

(1) Fakamolemole ua loga e poko ka fakamau ke he mena ka fakaaoga e koe, ti ua loga e tagata ka nonofo he poko haau ke he mena kua fakaatā.

(2) Ua liuaki e poko haau ne fakamau, taute pihia ni ka fai matematekelea tupu fakaofo, ti fakailoa fakamafiti ai ke he hotela ke maeke ke age ke he falu ne manako ke fakaaoga e poko. (Mata. 5:37) Ka liuaki e poko haau, lali ke moua e numera ne liuaki aki. Ka nakai katoa e 48 e tulā ne toe ti liuaki e koe e poko, to nakai moua e koe e tupe ne fakamau aki.

(3) Fakamolemole mailoga ka fakaaoga e koe e debit po ke credit card ka fakamau e hotela haau, ko e aga fa mahani he hotela ke taofi e tupe katoa ke totogi aki e poko, mo e falu mena foki neke malona po ke fakaaoga he mogo ka nofo ai a koe. To nakai maeke ia koe ke fakaaoga taha vala he tupe ia ato taaki mai e tupe katoa ke lata mo e poko haau ka fai aho he mole e toka e koe e hotela.

(4) Uta ni e peleō lau kato ka mau a koe ke fakaaoga ai, ti liuaki fakaave ke fakaaoga he falu.

(5) Kaeke ko e aga he motu ha mutolu, age taha tupe ke he tau tagata gahua he hotela ka uta e tau kato haau mo e toka foki taha tupe mo e tagata fakamea he tau aho takitaha.

(6) Kaitunu ni he tau poko ne kua fakaatā ke kaitunu.

(7) Ua fakaaoga fakahehē e tau kai pogipogi, kofe, po ke aisa ne foaki ke fakaaoga he tau tagata ne nonofo he hotela he mogoia.

(8) He tau magaaho oti, fakatātā e fua he agaaga ka fehagai mo e tau tagata gahua he hotela. Kua leveki a lautolu ke he numera lahi mahaki he tau tagata ne nonofo ai ti loto fakaaue ke he mahani totonu, fakauka, mo e mahani fakalatalata ha tautolu.

(9) Lata e tau matua ke leveki e tau tama ha lautolu he tau magaaho oti he hotela, putoia e tau elevator, pā koukou, poko faofao, mo e falu foki.

(10) Ko e totogi he poko ne tu he Recommended Lodging List ko e totogi a ia he taha e aho katoa, nakaila lafi ki ai e tukuhau. Ka molea e tupe kua lata ke totogi e koe, ua talia ke totogi ka e fakailoa fakamafiti ke he Rooming Department he fonoaga.

(11) Ka fai lekua mo e poko haau he hotela, fakailoa ke he Rooming Department ka fina atu a koe he fonoaga ke maeke ia lautolu ke lagomatai a koe.

◼ Gahua Foaki Noa: Ko e ha tagata ne manako ke gahua foaki noa kua lata ke fina atu ke he Volunteer Service Department he fonoaga. Ko e tau fanau i lalo hifo he 16 tau kua maeke ke gahua i lalo he levekiaga he matua po ke tagata leveki po ke falu tagata lalahi ne fakaatā he matua po ke tagata leveki.