“Kia Mitaki ha Mutolu a Mahani ki Mua he Tau Motu Kehe”

1. Ko e ha kua aoga ma tautolu ke mahani mitaki he tau fonoaga he tau nei?

¹ Kua lahi e onoono mai he tau tagata ki a tautolu he magahala he fonoaga he tau tau takitaha, ti kua aoga ma e tau mahani ha tautolu ke hukui fakamitaki e Atua ne tapuaki a tautolu ki ai. (Levi. 20:26) Ko e tau mahani mitaki ha tautolu mo e tau tapulu mo e tau tauteuteaga kua lata ke fakakite fakamaaliali a tautolu ko e tau tutaki mooli he Keriso. He o atu a tautolu ke he tau fonoaga faahimotu po ke he lalolagi katoa he tau nei, maeke fēfē ia tautolu ke ‘mitaki ha tautolu a mahani ki mua he tau motu kehe’ ti fakaheke foki ha tautolu a Matua he lagi?—1 Pete. 2:12.

2. Ha e fe e tau magaaho ke fakakite e aga Kerisiano ka o atu a tautolu ke he fonoaga?

² Fakakite e Aga Kerisiano: Ko e fakaalofa ha tautolu he taha ke he taha mo e puhala kua fehagai a tautolu mo “lautolu i tua” kua kehe mamao mo e agaaga he lalolagi. (Kolo. 3:10; 4:5; 2 Timo. 3:1-5) Kua lata ia tautolu ke totonu mo e fakauka ka fehagai mo e tau tagata gahua he hotela mo e tau fale kai, pete foki ka tupu e tau lekua. Omoomoi foki he tau mahani mitaki a tautolu ke toka taha tupe lafi ki luga (tip) kaeke ko e aga he matakavi ma lautolu kua taute e tau gahua fakatagata.

3. Ko e heigoa kua fakamanatu ke he tau matua, mo e ko e ha?

³ Kua lata e tau matua ke leveki fakalahi e tau fanau ha lautolu he fonoaga, tau fale kai, mo e hotela. (Fakatai 29:15) Ko e takitaki he taha fale kai he hotela ne tala age ke he hoa mau: “Fiafia ha ia ha mautolu ki a mutolu. Mitaki e tau mahani mo e totonu e tau magafaoa mo e tau fanau ha mutolu. Tutala oti e tau tagata gahua hagaao ki a mutolu, manako ha ia ha mautolu ke nonofo a mutolu hinei he tau matahiku faahi tapu oti.”

4. He matakavi he fonoaga, ko e heigoa e onoonoaga kua lata ma e tau tauteuteaga ha tautolu?

⁴ Tau Tapulu kua Gali: Ko e tau tapulu ha tautolu he fonoaga kua lata ke lilifu mo e gali, nakai fakakite e tau fasone ne aga mau he lalolagi. (1 Timo. 2:9) Pihia foki he magaaho ka hohoko atu mo e toka e hotela mo e tau magaaho okioki to kamata mo e ka oti e fonoaga, manako a tautolu ke kalo mai neke molea e fakateaga po ke fakahanoa e tau tauteuteaga. Ti kua matalahi a tautolu ke tau e pine fakamailoga he fonoaga mo e ua fuafua kelea ke fakamatala he magaaho kua lata. Ko e tau tauteuteaga mo e tau mahani mitaki ha tautolu ka o atu ke he tau fonoaga he tau nei to futia mai e tau tagata loto molū ke he ogo he moui he Tohi Tapu, mo e fakafiafia foki a Iehova.—Sefa. 3:17.

Tau Fakamanatu he Fonoaga he 2014

◼ Tau Magaaho he Polokalama: To hafagi e tau gutuhala he fale he matahola 8:00 he pogipogi. Ko e leo kofe hafagi to kamata he matahola 9:20 he pogipogi he tau aho tolu ia. He magaaho ia, kua lata a tautolu oti ke o atu ke he tau nonofoaga ha tautolu ke kamata e fakaholoaga he puhala lilifu. Ko e lologo fakahiku mo e liogi to taute he matahola 4:55 he afiafi he Aho Faraile mo e Aho Faiumu mo e matahola 3:50 he afiafi he Aho Tapu.

◼ Fonoaga he Lalolagi Katoa: Falu matakavi to taute ai e tau fonoaga he lalolagi katoa. Kia manatu ko e la ofisa kua uiina falu fakapotopotoaga pauaki mo e tau hukui mai he tau motu kehekehe he mole e fifili fakamatafeiga mo e fuafua e tau numera he tau nofoa, tau tokaaga motoka, mo e tau poko hotela ke nonofo ai. Liga to apiapi lahi kaeke kua ō e tau matakainaga ke he fonoaga he lalolagi katoa ne nakai uiina a lautolu ke ō ki ai. Kaeke kua nakai maeke a koe ke fano he fonoaga ne kotofa a koe ke fano ki ai, ua fifili a koe ke fano he fono he fonoaga lalolagi katoa.

◼ Paaka Motokā: He tau matakavi oti he fonoaga ne leveki e tautolu e tau paakaaga, to ha ha i ai e tau paakaaga nakai totogi ma lautolu ka hohoko mua mai. Fakakaupā ni e tau paakaaga, ti kua lata ke heke auloa e tau motokā ka maeke. Ko lautolu ni kua moua e tohi fakaatā ma e tau tagata matematekelea kua maeke ke paaka he tuaga ne toka pauaki ma lautolu.

◼ Toka e Tau Nofoa: Ka hafagi e tau gutuhala he fale fono he tau mogo pogipogi, ua mafiti ke hou ke moua e tau nofoa he mena ne manako a koe ke nofo ai ke tuga ko e mena kua poitufi a koe mo e falu matakainaga. Ko e agaaga foaki noa ne omoi a tautolu ke kumi e mitaki he falu, kua fakamailoga a tautolu ko e tau Kerisiano mooli ti omoi a lautolu kua kitekite mai ke fakaheke e Atua. (Ioane 13:34, 35; 1 Kori. 13:4, 5; 1 Pete. 2:12) Maeke ke toka e tau nofoa ma lautolu ni ne nonofo he kaina haau po ke heke he motokā haau po ke ma lautolu mogonei ne fakaako Tohi Tapu mo koe. Ko e tau nofoa pauaki ne foaki ma e tau momotua mo lautolu ne fakakaupā e tau malolō tino. Ha kua gahoa e tau nofoa ke he fakaholoaga nei, kua lata ni ke taha po ke ua e tagata lagomatai ke nonofo fakalataha mo ia ne nakai malolō.

◼ Kai Laā: Fakamolemole tamai e mena kai ka e ua ō kehe mai he fonoaga ke kumi mena kai ka okioki he mogo laā. Fakaaoga e puha tuku kai tote ke hao he lalo nofoa. Ko e tau puha tuku kai lalahi mo e tau lupo kalase kua nakai fakaatā ke he matakavi he fonoaga.

◼ Tau Mena Fakaalofa: Maeke ia tautolu ke fakakite e loto fakaaue ma e tau fakaholoaga he fonoaga he foaki e tau mena fakaalofa ke he gahua he lalolagi katoa he fonoaga. Ko e tau tieke kua lata ke fakapuke ke totogi ke he “Christian Congregation of Jehovah’s Witnesses.” Kua maeke foki ke tuku e tau mena fakaalofa puhala atu he tau debit po ke credit card.

◼ Tau Vai Ekekafo: Ka fakaaoga a koe he tau vai ekekafo pauaki, fakamolemole kikite kua lahi e vai haau ka tamai, ha to nakai fai ka moua he fonoaga. Ko e tau nila huki gagao suka kua lata ke tuku fakamitaki he tau otaota hagahaga kelea pauaki ka e nakai tuku i loto he tau tini veve he fonoaga po ke hotela.

◼ Hatakiaga ke he Puipuiaga: Fakamolemole fakaeneene ke leveki neke pakia ka kuheke po ke veli. He tau tau takitaha kua loga e tau pakia ha ko e tau tēvae, mua atu ke he tau tēvae mui tokoluga. Kua mitaki lahi ke fifili e tau tēvae ne gali mo e hao mitaki ke ua pakia ka fano he tau mena paiaia, tau sitepe mo e tau hala pihia foki.

◼ Nakai Logona Mitaki: To fakapuloa mai e fakaholoaga i loto ia ni ke he letio FM. Ke logona ai, kua lata ia koe ke tamai e letio FM tote ne gahua he maka mo e tau mena fanogonogo teliga.

◼ Tau Peleō Tama mo e Tau Nofoa Fatufatu: Ko e tau peleō tama mo e tau nofoa fatufatu kua nakai lata ke tamai ke he fonoaga. Pete ia, kua fakaatā e tau nofoa tama ne maeke ke fakamau ke he nofoa he tapa he tau matua.

◼ Tau Lolo Poki: Laulahi he tau fonoaga na taute i loto he tau fale ne puipui e tau faahi ti fakakaupā e tau fakamaama fakahauhau. Ko e mena ia, ko e mahani fakaalofa ha tautolu ke fakakaupā e fakaaogaaga he tau lolo poki mo e tau mena fakamanogi ne maō e namu neke hufia e tau tagata ne uka ke fafagu po ke falu lekua pihia.—1 Kori. 10:24.

◼ Tau Laupepa Please Follow Up (S-43): Ko e laupepa Please Follow Up kua lata ke fakaaoga ke foaki e tau talahauaga hagaao ke he ha fiafia mai he fakamatala he tau magaaho noa he magahala he fonoaga. Lata ke age e tau laupepa kua fakapuke ke he Poko Toka Tohi po ke age ke he tohikupu he fakapotopotoaga haau ka liu a koe ki kaina.

◼ Tau Fale Kai: Kia fakaheke e higoa a Iehova ha ko e mahani mitaki haau he tau fale kai. Tui e tau tapulu kua felauaki mo e fekafekau Kerisiano. Toka taha tupe ma e tagata gahua kaeke ko e aga fakamotu anei.

◼ Tau Hotela:

Fakamolemole ua loga e poko ka fakamau ke he mena ka fakaaoga e koe, ti ua loga e tagata ka nonofo he poko haau ke he mena kua fakaatā.
Ua liuaki e poko haau ne fakamau, taute pihia ni ka fai matematekelea tupu fakaofo, ti fakailoa fakamafiti ai ke he hotela ke maeke ke age ke he falu ne manako ke fakaaoga e poko. (Mata. 5:37) Ka liuaki e poko haau, lali ke moua e numera ke fakamooli aki. Ka nakai katoa e 48 e tulā ne toe ti liuaki e koe e poko, to nakai moua e koe e tupe ne fakamau aki.
Fakamolemole mailoga ka fakaaoga e koe e debit po ke credit card ka fakamau e hotela haau, ko e aga fa mahani he hotela ke taofi e tupe katoa ke totogi aki e poko, mo e falu mena foki neke malona po ke fakaaoga he mogo ka nofo ai a koe. To nakai maeke ia koe ke fakaaoga taha vala he tupe ia ato taaki mai e tupe katoa ke lata mo e poko haau ka fai aho he mole e toka e koe e hotela.
Uta ni e peleō lau kato ka mau a koe ke fakaaoga ai, ti liuaki fakaave ke fakaaoga he falu.
Kaeke ko e aga he motu ha mutolu, age taha tupe ke he tau tagata gahua he hotela ka uta e tau kato haau mo e toka foki taha tupe mo e tagata fakamea.
Kaitunu ni he tau poko ne kua fakaatā ke kaitunu.
Ua fakaaoga fakahehē e tau kai pogipogi, kofe, po ke aisa ne foaki ke fakaaoga he tau tagata ne nonofo he hotela he uta e tau koloa nei ke he fonoaga.
He tau magaaho oti, fakatātā e fua he agaaga ka fehagai mo e tau tagata gahua he hotela. Kua leveki a lautolu ke he numera lahi mahaki he tau tagata ne nonofo ai ti loto fakaaue ke he mahani totonu, fakauka, mo e mahani fakalatalata ha tautolu.
Lata e tau matua ke leveki e tau tama ha lautolu he tau magaaho oti he hotela, putoia e tau elevator, pā koukou, poko faofao, mo e falu foki.
Ko e totogi he poko ne tu he Recommended Lodging List ko e totogi a ia he taha e aho katoa, nakaila lafi ki ai e tukuhau. Ka molea e tupe kua lata ke totogi e koe, ua talia ke totogi ka e fakailoa fakamafiti ke he Rooming Department he fonoaga.
Ka fai lekua mo e poko haau he hotela, fakailoa ke he Rooming Department ka fina atu a koe he fonoaga ke maeke ia lautolu ke lagomatai a koe.

◼ Gahua Foaki Noa: Ko e ha tagata ne manako ke gahua foaki noa kua lata ke fina atu ke he Volunteer Service Department he fonoaga. Ko e tau fanau i lalo hifo he 16 tau kua maeke ke gahua i lalo he levekiaga he matua po ke tagata leveki po ke falu tagata lalahi ne fakaatā he matua po ke tagata leveki.