Tau Fakamanatu he Fonoaga
Tau Magaaho he Polokalama: To hafagi e tau gutuhala he fale he matahola 8:00 he pogipogi. Ko e leo kofe hafagi to kamata he matahola 9:20 he pogipogi he tau aho tolu ia. He magaaho ia, kua lata a tautolu oti ke o atu ke he tau nonofoaga ha tautolu ke kamata e fakaholoaga he puhala lilifu. To fakahiku e fakaholoaga ke he kavi matahola 5:00 he afiafi he Aho Faraile mo e Aho Faiumu mo e kavi matahola 4:00 he afiafi he Aho Tapu.
‘Fakaheke a Iehova Aki e Lologo’: Ko e tau tagata he Atua i tuai ne fakaheke a Iehova ke he lologo, ti uho lahi agaia e leo kofe ke he tapuakiaga mooli he vahā nei. (Sala. 28:7) Igatia e vala he ha tautolu a fonoaga he matakavi mo e kamata aki e leo kofe fakatagitagi fakakū. Nakai ko e leo kofe fakatagitagi teao noa ni anei ka kua tauteute ai ke maeke ia tautolu ke iloa mo e tapuaki ki a Iehova. Ti ka fakailoa he tagata nofoa kua kamata fai e leo kofe fakatagitagi fakakū, ko e mogo a ia ke nonofo ti fanogonogo mo e loto fakaaue ke he leo kofe, ka e nakai ke tutala. He taute pihia e tautolu ne fakakite kua tokiofa e tautolu e tau laliaga he matakau tā leo kofe he Watchtower. Lagaua he tau ne fenoga atu e tau matakainaga nei ne kua totogi ne lautolu ki Patterson i New York, ke taute e tau leo kofe fulufuluola ke fanogonogo a tautolu ki ai. He oti e fanogonogo fakamitaki ke he leo kofe fakatagitagi fakakū, lata e tau tagata oti ke fakalataha ke fakaheke a Iehova he uhu ai e tau lologo he Kautu.
Paaka Motokā: He tau matakavi oti he fonoaga ne leveki e tautolu e tau paakaaga, to ha ha i ai e tau paakaaga nakai totogi ma lautolu ka hohoko mua mai. Fakakaupā ni e tau paakaaga, ti kua lata ke heke auloa e tau motokā ka maeke. Ko lautolu ni kua moua e tohi fakaatā ma e tau tagata matematekelea kua maeke ke paaka he tuaga ne toka pauaki ma lautolu.
Toka e Tau Nofoa: Ka hafagi e tau gutuhala he fale fono he tau mogo pogipogi, ua mafiti ke hou ke moua e tau nofoa he mena ne manako a koe ke nofo ai ke tuga ko e mena kua poitufi a koe mo e falu matakainaga. Fakamolemole kia manamanatu ke he falu, ti tuku ke he mafoa e tau manako ha tautolu ke lata ai ma e tau matakainaga ha tautolu. Ko e agaaga foaki noa kua fakamailoga a tautolu ko e tau Kerisiano mooli ti omoi a lautolu kua kitekite mai ke fakaheke e Atua. (Ioane 13:34, 35; 1 Kori. 13:4, 5; 1 Pete. 2:12) Maeke ke toka e tau nofoa ma lautolu ni ne heke he motokā haau, nonofo he kaina mo koe, po ke ma lautolu mogonei ne fakaako Tohi Tapu mo koe. Fakamolemole ua toka e tau koloa he tau nofoa ne nakai fakaaoga e koe. Ko e kaufakalataha haau ke he manatu nei ka fakaatā e falu ke kitia e tau nofoa ia kua atā. Ko e tau nofoa pauaki ne foaki ma e tau momotua mo lautolu ne fakakaupā e tau malolō tino. Ha kua gahoa e tau nofoa ke he fakaholoaga nei, kua lata ni ke taha po ke ua e tagata lagomatai ke nonofo fakalataha mo ia ne nakai malolō.
Tau Tapulu kua Gali: Ko e tau tapulu ha tautolu he fonoaga kua lata ke lilifu mo e gali, nakai fakakite e tau fasone ne aga mau he lalolagi. (1 Timo. 2:9) Pihia foki he magaaho ka hohoko atu mo e toka e hotela mo e tau magaaho okioki to kamata mo e ka oti e fonoaga, manako a tautolu ke kalo mai neke molea e fakateaga po ke fakahanoa e tau tauteuteaga. Ti kua matalahi a tautolu ke tau e pine fakamailoga he fonoaga mo e ua fuafua kelea ke fakamatala he magaaho kua lata. Ko e tau tauteuteaga mo e tau mahani mitaki ha tautolu ka o atu ke he tau fonoaga he tau nei to futia mai e tau tagata loto molū ke he ogo he moui he Tohi Tapu, mo e fakafiafia foki a Iehova.—Sefa. 3:17.
Tau Mahani Mitaki he Fakaaoga e Tau Matini Hila: Fakakite e tautolu e tau mahani mitaki he mogo ka fono ai he hiki e fakatokaaga he tau selafoni po ke falu matini hila ha tautolu ke nakai fakatauhele e falu. Ka fakaaoga e pokiata, tapaki vitiō, tablet, po ke falu koloa pihia foki, manako a tautolu ke manamanatu he nakai fakatauhele e falu po ke poloka e kitiaaga ha lautolu. Fakakite foki e tautolu e tau mahani mitaki he mogo ka fono he nakai tohitohi he selafoni po ke meli hila noa ni.
Kai Laā: Fakamolemole tamai e mena kai ka e ua ō kehe mai he fonoaga ke kumi mena kai ka okioki he mogo laā. Fakaaoga e puha tuku kai tote ke hao he lalo nofoa. Ko e tau puha tuku kai lalahi mo e tau lupo kalase kua nakai fakaatā ke he matakavi he fonoaga.
Tau Mena Fakaalofa: Maeke ia tautolu ke fakakite e loto fakaaue ma e tau fakaholoaga he fonoaga he foaki e tau mena fakaalofa ke he gahua he lalolagi katoa he fonoaga. Ko e tau tieke kua lata ke fakapuke ke totogi ke he “Christian Congregation of Jehovah’s Witnesses.” Kua maeke foki ke tuku e tau mena fakaalofa puhala atu he tau debit po ke credit card.
Tau Vai Ekekafo: Ka fakaaoga a koe he tau vai ekekafo pauaki, fakamolemole kikite kua lahi e vai haau ka tamai, ha to nakai fai ka moua he fonoaga. Ko e tau huki mo e tau nila gagao suka kua lata ke tuku fakamitaki he tau otaota hagahaga kelea ka e nakai i loto he tau tini veve he matakavi fonoaga po ke hotela.
Hatakiaga ke he Puipuiaga: Fakamolemole fakaeneene ke leveki neke pakia ka kuheke po ke veli. He tau tau takitaha kua loga e tau pakia ha ko e tau tēvae, mua atu ke he tau tēvae mui tokoluga. Kua mitaki lahi ke fifili e tau tēvae ne gali mo e hao mitaki ke ua pakia ka fano he tau mena paiaia, tau sitepe mo e tau hala pihia foki.
Nakai Logona Mitaki: To fakapuloa mai e fakaholoaga i loto ia ni ke he letiō FM. Ke logona e fakaholoaga, kua lata ia koe ke tamai e letiō FM tote ne gahua he maka mo e tau mena fanogonogo teliga.
Tau Peleō Tama mo e Tau Nofoa Fatufatu: Ko e tau peleō tama mo e tau nofoa fatufatu kua nakai lata ke tamai ke he fonoaga. Pete ia, kua fakaatā e tau nofoa tama ne maeke ke fakamau ke he nofoa he tapa he tau matua.
Tau Lolo Poki: Laulahi he tau fonoaga na taute i loto he tau fale ne puipui e tau faahi ti fakakaupā e tau fakamaama fakahauhau. Ko e mena ia, ko e mahani fakaalofa ha tautolu ke fakakaupā e fakaaogaaga he tau lolo poki mo e tau mena fakamanogi ne maō e namu neke hufia e tau tagata ne uka ke fafagu po ke falu lekua pihia.—1 Kori. 10:24.
Tau Fale Kai: Kia fakaheke e higoa a Iehova ha ko e mahani mitaki haau he tau fale kai. Tui e tau tapulu kua felauaki mo e fekafekau Kerisiano. Toka taha tupe ma e tagata gahua kaeke ko e aga fakamotu anei.
Tau Hotela:
Fakamolemole ua loga e poko ka fakamau ke he mena ka fakaaoga e koe, ti ua loga e tagata ka nonofo he poko haau ke he mena kua fakaatā.
Ua liuaki e poko haau ne fakamau, taute pihia ni ka fai matematekelea tupu fakaofo, ti fakailoa fakamafiti ai ke he hotela ke maeke ke age ke he falu ne manako ke fakaaoga e poko. (Mata. 5:37) Ka liuaki e poko haau, lali ke moua e numera ke fakamooli aki ti fakakia e fakatokaaga he hotela ke he liuakiaga he poko ke maeke ke liu moua e tupe ne toka aki.
Fakamolemole mailoga ka fakaaoga e koe e debit po ke credit card ka fakamau e hotela haau, ko e aga fa mahani he hotela ke taofi e tupe katoa ke totogi aki e poko, mo e falu mena foki neke malona po ke fakaaoga he mogo ka nofo ai a koe. To nakai maeke ia koe ke fakaaoga taha vala he tupe ia ato taaki mai e tupe katoa ke lata mo e poko haau ka fai aho he mole e toka e koe e hotela.
Uta ni e peleō lau kato ka mau a koe ke fakaaoga ai, ti liuaki fakaave ke fakaaoga he falu.
Kaeke ko e aga he motu ha mutolu, age taha tupe ke he tau tagata gahua he hotela ka uta e tau kato haau mo e toka foki taha tupe mo e tagata fakamea.
Kaitunu ni he tau poko ne kua fakaatā ke kaitunu.
Ua fakaaoga fakahehē e tau kai pogipogi, kofe, po ke aisa ne foaki ke fakaaoga he tau tagata ne nonofo he hotela.
He tau magaaho oti, fakatātā e fua he agaaga ka fehagai mo e tau tagata gahua he hotela. Kua leveki a lautolu ke he numera lahi mahaki he tau tagata ne nonofo ai ti loto fakaaue ke he mahani totonu, fakauka, mo e mahani fakalatalata ha tautolu.
Lata e tau matua ke leveki e tau tama ha lautolu he tau magaaho oti he hotela, putoia e tau elevator, pā koukou, poko faofao, mo e falu foki.
Ka fai lekua mo e poko haau he hotela, fakailoa ke he Rooming Department ka fina atu a koe he fonoaga ke maeke ia lautolu ke lagomatai a koe.
Gahua Foaki Noa: Ko e ha tagata ne manako ke gahua foaki noa kua lata ke fina atu ke he Volunteer Service Department he fonoaga. Ko e tau fanau i lalo hifo he 16 tau kua maeke ke gahua i lalo he levekiaga he matua po ke tagata leveki po ke falu tagata lalahi ne fakaatā he matua po ke tagata leveki.