Kua Tauteute Nakai a Koe ma e Galue Fakaagaaga?

1. Ko e heigoa e tauteuteaga kua putoia ke he galue?

¹ Ko e gahua lahi ke tauteute e galue. Lata ke moua e tau mena kai, tauteute fakamitaki, ti fakatoka ai. Ko e tufatufa he tau mena kai kua lata ke fai fakatokatokaaga. Lafi ki ai, kua lata ke mautali e matakavi ke kai ai. Lata foki e tau tagata ne uiina ke tauteute, mua atu ka mamao e fenoga ha lautolu ke hohoko ki ai. Pete he lahi e gahua ne putoia, kua uho lahi e olioli he tau kai lolo mo e huhua mitaki fakalataha mo e tau kapitiga mo e magafaoa. Nakai leva to fakapotopoto auloa e Tau Fakamoli a Iehova he lalolagi katoa ke he tau matakau lalahi mo e ikiiki ke olioli e galue fakaagaaga ne amanaki lahi ki ai​—ko e Fonoaga he Faahimotu “Kia Mataala!” Kua fitā he lahi e gahua ke tauteute e polokalama mo e fakatokatoka ai. Kua uiina a tautolu oti. Ke maeke ke fakalataha mo e aoga lahi mai ai, kua lata foki ia tautolu takitokotaha ke tauteute.​—Fakatai 21:5.

2. Ko e heigoa kua lata ke taute ke fakalataha ke he tau kaiaga takitaha he galue fakaagaaga ha tautolu?

² Aoga Lahi Mai Ai: Kua fakakatoatoa nakai haau a tau pulega ke maeke ke fakalataha ke he tau kaiaga takitaha he galue fakaagaaga nei? Ka lata, tutala ke he takitaki gahua haau ke fakailoa ki a ia to finatu a koe ke he tau fakaholoaga oti he fonoaga haau, putoia e aho fakamua. Kua fakakatoatoa nakai e tau fakatokaaga ma e puhala ke fano ai mo e mena ke nofo ai? Lata he tau motua ke matakite kua fai levekiaga ki a lautolu ne momotua mo e fai matafatia mo lautolu foki ka manako lagomatai.​—Iere. 23:4; Kala. 6:10.

3. Ko e ha kua nakai lata a tautolu ke ō atu ke he fonoaga he lalolagi katoa, ne nakai uiina a tautolu ki ai?

³ To olioli he falu matakavi e tau fonoaga he lalolagi katoa. Kia tokaloto kua uiina e tau fakapotopotoaga pauaki mo e tau tagata kua fifili mai he falu motu ke he tau fonoaga nei. He taute e tau fakatokaaga nei, kua fatifati fakamitaki he la ofisa e numera ka uiina, he manamanatu ke he numera he tau nofoa mo e tau poko hotela kua atā. Liga apiapi ka ō atu e tau tagata fakailoa, ke he fonoaga he lalolagi katoa, ne nakai uiina a lautolu ki ai.

4. Ko e heigoa e tau fakamanatuaga ka lagomatai a tautolu ke mautali ato kamata e polokalama he tau aho takitaha?

⁴ Tauteute ke hohoko tuai ke he fonoaga he tau aho takitaki ke kumi e nofoa ato kamata e polokalama. Fakaaoga e falu minuti ke totou e polokalama ato kamata e fakaholoaga. To lagomatai he mena nei a koe ke tauteute e loto haau ma e vala tala ka fakatoka mai. (Esera 7:10) Ka fakailoa he tagata nofoa he fakaholoaga e leo kofe hafagi, olioli he fanogonogo ki ai ti mautali ke fakalataha ke he hafagiaga he lologo mo e liogi.

5. Liga aoga lahi fēfē e magafaoa ha tautolu mai he polokalama?

⁵ Ka nonofo auloa e tau tagata he magafaoa he fonoaga, to mailoga mooli he tau matua kua fanogonogo e fanau ha lautolu ke he polokalama. (Teu. 31:12) Kua fakamalolō oti ke muitua ke he tau Tohi Tapu ha lautolu he totou ai e tau kupu tohi. He tohi hifo fakakū e tau manatu to lagomatai a koe ke fanogonogo fakamitaki. Fakamui, to lagomatai he tau manatu ne tohi hifo e koe ke liu fatiaki mai e tau matapatu matakupu he tau lauga. Totoko e kamatamata ke tala noa he fakaholoaga po ke ua fano kehe he nofoa. Ka fai sela foni a koe, ua toka ke fakatauhele aki a koe po ke falu he polokalama. He mole e tau fakaholoaga he tau aho takitaha, ko e ha he tutala mo e falu ke he tau mena ne loto fakaaue a koe mai he polokalama?

6. Ko e heigoa e vala aoga lahi he tau fonoaga ha tautolu, ti maeke fēfē ia tautolu ke olioli katoa ki ai?

⁶ He fonoaga he faahimotu, moua e tautolu e magaaho ke olioli e fakafetuiaga tata fakalataha mo e tau matakainaga ha tautolu ne nakai moua ke he lalolagi. (Sala. 133:1-3; Mare. 10:29, 30) Ko e ha he fakafeleveia ki a lautolu ne nonofo he tapa haau mo e fetutalaaki he magaaho kai laā? Ko e taha he tau aoga anei he tamai e kai laā māmā mo e nofo hifo he fonoaga ka e nakai fano ki fafo ke he fale kai. Kia mailoga mitaki ke nakai tō noa e magaaho pihia ma e fefakamafanaaki.​—Roma 1:11, 12.

7. Ko e heigoa e tau tauteuteaga kua lata ke taute e tautolu hagaao ke he tau mena ka tui e tautolu?

⁷ Tau Mena Tui: Kua maaliali e poaki a Iehova ke he tau Isaraela ke fakahafehafe e tau matapotu he tau tapulu ha lautolu, ti tuku ai e afo lanu moana i luga he fakahafehafe. (Nume. 15:37-41a) Ko e fakamailoga anei ke kitia ko lautolu ko e tau tagata ne vevehe kehe ke tapuaki ki a Iehova. He vahā nei, ko e tau mena tui lilifu mo e gali ka tui e tautolu he fonoaga kua vevehe kehe aki a tautolu mai he lalolagi. Kua eke ai mo fakamatala malolō ki a lautolu ne onoono mai ti pihia foki ka ō atu a tautolu ke kai ka oti e polokalama. Ko e mena ia, kia manamanatu fakamitaki ke he tau mena ka tui e koe.

8. Liga fakamatala fēfē a tautolu ke he falu he haia he maaga ka fono ai?

⁸ Kia Fakamatala: He manamanatu tuai, to liga maeke ia tautolu ke fakamatala ke he tau tagata he haia he maaga ka fono ai. Taha e matakainaga taane ne finatu ke he fale kai mo e hoana haana he oti e polokalama, ne tuhi hifo ke he pine fonoaga haana ti hūhū ke he tagata tufa kai: “Tokologa nakai e tagata ne kitia e koe ne tau e tau pine nei?” Ne pehē e tagata tufa kai kua mailoga e ia a lautolu ti manamanatu ko e heigoa e kakano ne tau e lautolu. Ne takitaki e mena nei ke he fakatutalaaga, ti uiina he matakainaga e tagata tufa kai ke he fonoaga.

9. Maeke fēfē ia tautolu ke fakatātā e loto fakaaue ki a Iehova, ko Ia ne uiina a tautolu?

⁹ Pete ko e tau matakainaga taane ha tautolu ka taute e tau lauga, tau hūhū tala, mo e tau fakatātāaga oti, ko e ha tautolu a Matua he lagi, ko Iehova e Foaki fakaalofa he galue fakaagaaga nei he tau tau takitaha. (Isaia 65:13, 14) Kua fakatātā ha tautolu a loto fakaaue ki a Ia ne uiina a tautolu he fakalataha atu ke he tau aho takitaha mo e kai e tau mena fakaagaaga oti ne fakatoka mai. Kua fakakatoatoa nakai haau a tau tauteuteaga ke taute pihia?

[Matahui Tala]

[Puha he lau 6]

Tau Fakamanatu he Fonoaga he Faahimotu

◼ Tau Magaaho he Polokalama: To kamata e polokalama he matahola 9:20 he pogipogi he tau aho tolu oti. To hafagi e tau gutuhala he matahola 8:00 he pogipogi. He fakailoa e leo kofe hafagi, lata ia tautolu oti ke fitā e nonofo ke kamata e polokalama he puhala lilifu. To oti e polokalama he matahola 4:55 he afiafi he Aho Faraile mo e Aho Faiumu mo e he matahola 4:00 he afiafi he Aho Tapu. Ma e tau fonoaga he lalolagi katoa, to kamata e polokalama he Aho Tuloto he matahola 1:20 he afiafi ti oti he matahola 4:45 he afiafi.

◼ Paaka Motokā: He tau matakavi fonoaga oti ne leveki e tautolu e tau paaka motokā, to ha ha ai e tau paaka tokanoa ne nakai totogi ma lautolu ka hohoko mua mai. Ko lautolu hokoia ne fai Mobility Parking Permit ka fakaatā ke paaka he tuaga pauaki ma lautolu ne matematekelea. Ha kua nakai mahani ke loga e tau paakaaga motoka, kua lata ke heke auloa e tau motoka ka maeke.

◼ Toka e Tau Nofoa: Maeke ke toka e tau nofoa ma lautolu ni ne heke he motokā haau po ke nonofo mo koe i kaina.

◼ Kai Laā: Fakamolemole tamai e kai laā ka e ua ō kehe mai he matakavi fonoaga ke kumi mena kai he okioki laā. Fakaaoga ni e puha tuku kai tote ne hao i kelekele he nofoa. Ko e tau puha tuku kai lalahi mo e tau lupo kalase kua nakai fakaatā ke he matakavi fonoaga.

◼ Tau Mena Fakaalofa: Maeke ia tautolu ke fakakite e loto fakaaue ma e tau fakaholoaga he fonoaga he foaki noa e tau mena fakaalofa ma e gahua he Kautu ke he ha tautolu a Fale he Kautu po ke he fonoaga. Ko e tau tieke ne foaki ke he fonoaga kua lata ke tohi ke totogi ke he “Watch Tower.”

◼ Tau Pakia mo e Tau Mena Fakalutukia: Fa moua he faahi gahua fakalutukia e tau hea sela foni ke lata mo e tau mena ikiiki. Ka tupu taha fakalutukia fakaekekafo he fonoaga, fakamolemole tala age ke he fekafekau ne tata mai, ka fakailoa fakamafiti ke he First Aid ke maeke he tau tagata gahua pauaki i ai ke fuafua kua fēfē e hagahaga kelea he tuaga ti foaki e lagomatai. Ka lata, to hea he tau tagata gahua ha tautolu e numera 111.

◼ Tau Tēvae: He tau tau takitaha kua loga e tau pakia ne lauia he tau tēvae. Kua mitaki lahi ke fifili e tau tēvae ne gali mo e hao mitaki ke maeke he tagata ke nakai pakia ka hake he tau sitepe mo e tau hala pihia foki.

◼ Nakai Logona Mitaki: I Niu Silani to fakapuloa e polokalama i loto ia ni ke he letio FM. Ke fakaaoga e fakatokaaga nei, to lata ia koe ke tamai e letio FM tote ne gahua he maka mo e tau mena fanogonogo teliga.

◼ Tapakiaga: Ko e tau mena tapaki kua nakai lata ke palaki ke he hila po ke fakatokaaga leo he fale fono, ti maeke ke fakaaoga ke he puhala ka nakai faguna e falu.

◼ Tau Peleō Tama mo e Tau Nofoa Nofo Fafo: Ko e tau peleō tama mo e tau nofoa nofo fafo kua nakai lata ke tamai ki loto he fonoaga. Pete ia, kua fakaatā e tau nofoa tama ne maeke ke fakamau ke he nofoa he tapa he tau matua. He laulahi he tau fonoaga kua ha ha ai e faahi ma e tau peleō tama.

◼ Tau Lolo Poki: Laulahi he tau fonoaga ne taute i loto he tau fale ne ha ha i ai e matini fakahauhau. Ko e mena ia, ko e mahani totonu a ia ha tautolu ke fakaaoga fakatote e tau lolo poki mo e tau mena fakamanogi foki ne namu lahi neke hufia e tau tagata ne uka ke fafagu po ke falu lekua pihia.​—1 Kori. 10:24.

◼ Tau Laupepa Aahi Atu: Ko e laupepa Please Follow Up (S-43) kua lata ke fakaaoga ke foaki e tau talahauaga hagaao ke he ha fiafia mai he fakamatala he tau magaaho noa he magahala he fonoaga. Kua lata he tau tagata fakailoa ke tamai taha po ke ua e laupepa aahi atu ke he fonoaga. Kia age mogoia e tau laupepa kua fitā e fakapuke ke he Poko Toka Tohi ke taute po ke ke he tohikupu he fakapotopotoaga haau ka liu a koe.​—Kikite Ha Tautolu a Fekafekauaga he Kautu, Fepuari 2005 lau 6.

◼ Tau Fale Kai: Kia fakaheke e higoa a Iehova ha ko e mahani mitaki haau he tau fale kai.

◼ Tau Motela: (1) Fakamolemole ua loga e poko ka fakamau ke he mena ka fakaaoga e koe, ti ua loga e tagata ka nonofo he poko motela haau ke he mena kua fakaatā. (2) Kaeke kua lata ke liuaki e poko haau ne fakamau, fakailoa fakamafiti ke he motela. (3) Uta ni e peleō lau kato ka mau a koe ke fakaaoga ai, ti liuaki fakaave ke fakaaoga he falu. (4) Ua kaitunu he tau poko ne nakai fakaatā ke kaitunu. (5) Aua neke fakaaoga fakahehē e tau kai pogipogi, kofe, po ke aisa ne foaki noa ke fakaaoga he tau tagata ne nonofo he motela he mogo ia. (6) Fakatātā e tau fua he agaaga he fehagai mo e tau tagata gahua he motela he tau magaaho oti. Kua leveki a lautolu ke he numera lahi mahaki he tau tagata ne nonofo ai ti loto fakaaue ke he mahani totonu, fakauka, mo e mahani fakalatalata ha tautolu.