Muitua ke he Keriso he Fakakite e Lilifu
1. Hagaao fēfē e mataulu he fonoaga he faahimotu he tau nei ke he fakakiteaga he lilifu?
1 Ne fakamaama he Tohi Tapu kua fakatapulu e Pule Katoatoa he Lagi mo e Lalolagi, ko Iehova, ke he lilifu. (Sala. 104:1) Ne vagahau mo e gahua tumau a Iesu ke he puhala ne fakalilifu ke he Matua haana mo e tau foakiaga he Matua haana. (Ioane 17:4) To moua e tautolu e tau magaaho ke fifitaki a Iesu mo e tamai e lilifu ki a Iehova he magahala he tau Fonoaga he Faahimotu “Muitua ke he Keriso!” hane hau.
2. Maeke fēfē a tautolu ke fakaheke a Iehova he tauteute tuai ke ha ha he tau fakaholoaga takitaha?
2 Tapuaki Lilifu: Maeke ia tautolu ke fakalilifu a Iehova he fakatokatoka ke ha ha he kaiaga fakaagaaga nukua tauteute e ia ma tautolu. Kua tala nakai a koe ke he takitaki gahua haau mo e fakatokatoka e tau feua ke finatu he tau aho takitaha he fonoaga, pihia foki e Aho Faraile? Kua pulega nakai a koe ke fai magaaho ka hoko atu ke moua e nofoa mo e ke uhu fakalataha e lologo mo e liogi ke kamata aki? Kua taute nakai e koe e kai haau ke kai he fonua he fonoaga mo e tau matakainaga? He kamataaga he tau fakaholoaga takitaha, ka uiina fakamitaki mai e tagata nofoa ki a tautolu ke nonofo ato kamata e leo kofe, kua lata ia tautolu ke fakaoti fakamafiti e tutala ka e nonofo ke kamata e polokalama.
3. Fakalilifu fēfē e tapuakiaga ha tautolu he fanogonogo fakahokulo ke he polokalama?
3 He fanogonogo fakahokulo ke he polokalama ka fakalilifu foki ke he ha tautolu a Matua he lagi. He mole e finatu ke he fonoaga he faahimotu he matakavi, ne tohi he tagata hokotaki to nava lahi e tau tagata ka kitia e “mahani mitaki ha lautolu i ai, he muitua a lautolu ke he tau mena ne talahau he nonofo fakatekiteki a lautolu ati fakakite mooli kua futia auloa ke he tau mena fakaagaaga.” Ne tohi foki e ia “kua tokologa lahi e fanau . . . , ti matakehe e mahani mitaki ha lautolu oti po kua makutu foki he kumikumi e tau kupu he Tohi Tapu.” Ka hoko e polokalama, nakai ko e mogo a ia ke tutala noa, tohitohi he sela foni, kai, po ke takalo he tau avaloa. Lata e tau fuata ke nonofo mo e tau matua ha lautolu ke lagomatai he matua a lautolu ke aoga mai he polokalama. (Teu. 31:12; Fakatai 29:15) Kua fakakite he tau laliaga pihia e fakalilifu ma e falu mo e loto fakaaue ma e tau mena kai fakaagaaga aoga lahi hane foaki mai.
4. Ko e ha kua lata ia tautolu ke lilifu e tauteuteaga ka haia he fonoaga?
4 Tauteuteaga Lilifu: Tokologa ne fakakite e loto fakaaue ma e tau fakamanatuaga mai he lauga he tau kua mole he fonoaga he faahimotu “Fakakite e Lilifu Faka-Kerisiano he Tau Magaaho Oti,” ne peehi kua lata e tau fekafekau he Atua ke eketaha ke fakakite e lilifu faka-Kerisiano ke he tau tapulu mo e tauteuteaga ha lautolu. He tau nei kua lata ia tautolu ke hagaaki fakahokulo ke he mena nei. Kua fakakite he tauteuteaga ha tautolu e tau logonaaga ha tautolu ma Iehova mo e ma e monuina he eke mo Tau Fakamoli haana. Lata ia tautolu ke tapulu tumau ko e tau tagata ‘kua talahaua ke he mahani Atua.’—1 Timo. 2:9, 10.
5. Fakatumau fēfē a tautolu ke he tau tauteuteaga lilifu he tau magaaho okioki he taone ne fono ai?
5 Lata ni kia a tautolu ke lilifu e tauteuteaga ka o atu ke he fono? Manatu to kitia he tokologa a tautolu kua tui e tau pine he fonoaga he haia agaia he taone ne fono ai. Kua lata e tauteuteaga ha tautolu ke kehe mai he tau tagata tokologa. Ti pihia foki he tau magaaho okioki, tuga e ō ke kai ka oti e fono, kua lata a tautolu ke tauteute ko e tau fekafekau kua lata ne o mai ke he taone kakano ha ko e fonoaga faka-Kerisiano ti kua nakai lata ke tui e tau mena tui tuga e tau fihui paku, tau fihui kū, po ke tau tapulu miti. To eke mooli e mena nei mo fakamatalaaga ke he taone! Kua fiafia a Iehova ka fakaata he tauteuteaga ha tautolu e tuaga ha tautolu ko e tau fekafekau.
6. Ko e heigoa e tau fua mitaki he fakakite e lilifu faka-Kerisiano?
6 Tau Fua Mitaki: He fakakite e lilifu faka-Kerisiano he tau fonoaga ha tautolu ka moua e tau magaaho ke fakamatala nakai mautali ati nava a lautolu ne kitekite mai. He oti e taha he tau fonoaga, ne pehē taha tagata ofisa: “Nakaila kitia e mautolu e tau tagata mahani mitaki pihia. Ko e puhala he moui ha mutolu ne manako e Atua ma tautolu ke taute.” Ko e fakakite he lilifu kua fakatātā e fakalilifu mo e fakaalofa ke he taha mo e taha ti fakaheke a Iehova. (1 Pete. 2:12) Kua fakatātā ai e matakutaku Atua mo e loto fakaaue ha tautolu ma e monuina ha kua fakaako he Matua ha tautolu. (Hepe. 12:28) Kia eketaha a tautolu ke fakakite e lilifu he amaamanaki a tautolu ke he Fonoaga he Faahimotu “Muitua ke he Keriso!” he tau nei.
[Puha he lau 5]
Tau Fakamanatu he Fonoaga he Faahimotu
◼ Tau Magaaho he Polokalama: To kamata e polokalama he 9:20 a.m. he tau aho tolu oti. To hafagi e tau gutuhala he 8:00 a.m. Ka kamata e leo kofe, lata ia tautolu oti ke kumi e tau nofoa ke kamata e polokalama he puhala lilifu. To fakahiku e polokalama he 5:05 p.m. he Aho Faraile mo e Aho Faiumu mo e he 4:10 p.m. he Aho Tapu.
◼ Paaka Motoka: He tau matakavi fonoaga oti ne moua e tautolu e pule ke he tau paaka motoka, to ha ha ai e tau paaka tokanoa ka e nakai totogi kaeke ke o mai mua. Ko e tau pine he fonoaga to eke mo fakamailoga ke paaka e motoka. Ko lautolu ni ne fai laisini ne fakaatā mai he fakatufono ma e tau tagata fai matematekelea po ke laupepa fakaatā ka paaka he tau paakaaga pauaki ma lautolu ia ni. Ha kua nakai mahani ke loga e tau paakaaga motoka, kua lata ke heke auloa e tau motoka ka maeke.
◼ Fakamau e Tau Nofoa: Kua lata ke fakamau e tau nofoa ma lautolu ni ne heke he motoka haau po ke nonofo mo koe i kaina.
◼ Kai Tupou Laā: Fakamolemole tamai e kai laā ka e ua o kehe mai he matakavi fonoaga ke kumi mena kai he okioki tupou laā. Ti fakaaoga ni e puha tuku kai tote ne hao i kelekele he nofoa haau. Ko e tau puha tuku kai lalahi, tau lupo hio, mo e tau kava kua nakai fakaatā ke he matakavi fonoaga.
◼ Tau Mena Fakaalofa: Kua lahi mahaki e tupe ke fakatoka e fakaholoaga he fonoaga he faahimotu. Maeke ia tautolu ke fakakite e loto fakaaue he foaki e tau mena fakaalofa ke he gahua he lalolagi katoa he Fale he Kautu ha tautolu po ke he fonoaga. Ko e tau tieke ne foaki ke he fonoaga kua lata ke tohi ke totogi ke he “Watch Tower.”
◼ Tau Pakia mo e Tau Mena Fakalutukia: Kua gūgū mai e tau tagata ne tali e tau fakalutukia ha kua loga lahi e hea he tau sela foni ke he tau mena ikiiki. Kaeke ke tupu taha mena fakalutukia fakaekekafo he fonoaga, fakamolemole tala age ke he fekafekau ne tata mai, ko ia ka fakailoa fakamafiti ke he Faahi Lagomatai Matematekelea ke maeke he tau tagata gahua he faahi lagomatai matematekelea ia ke fuafua e hagahaga kelea he tuaga ti kumi e lagomatai. Ka lata, to hea e lautolu ne gahua he faahi lagomatai matematekelea e numera 111.
◼ Nakai Logona Mitaki: To fakapuloa e fakaholoaga ke he takaiaga ia ni he fale ke he letio FM. Ke fakaaoga e foakiaga nei, lata ia koe ke tamai e tama letio FM mo e tau mena fanogonogo teliga.
◼ Tapakiaga: Ko e tau mena tapaki kua nakai lata ke tuku ke he fakatokaaga hila po ke fakatokaaga leo he fale fono ti lata ni ke fakaaoga ke he puhala ka nakai faguna e falu.
◼ Tau Lolo Poki: Kua loga e tau fonoaga kua ha ha i loto he fale ti kua fai matini fakahauhau. Ko e mena ia, kua lata ia tautolu ke fakakaupā e fakaaoga he tau lolo poki mo e fakamanogi neke auhia ai falu ne lauia he gagao uka ke fafagu po ke falu lekua pihia.—1 Kori. 10:24.
◼ Tau Laupepa Aahi Atu: Ko e laupepa Please Follow Up (S-43) kua lata ke fakaaoga ke foaki e tau talahauaga hagaao ke he ha tagata ne fakakite e fiafia ha ko e fakamatala ha tautolu he tau magaaho noa he magahala he fonoaga. Kua lata he tau tagata fakailoa ke tamai taha po ke ua e laupepa aahi atu ia ke he fonoaga. To moua foki e tau laupepa he Faahi Poko Toka Tohi. Kia age mogoia e tau laupepa kua fitā e fakapuke ke he Poko Toka Tohi ke taute po ke tohikupu ka liu a koe ke he fakapotopotoaga.—Kikite Ha Tautolu a Fekafekauaga he Kautu, Fepuari 2005 lau 6.
◼ Tau Motela: (1)Fakamolemole ua loga e poko ka fakamau ke he mena kua manako ki ai, ti ua loga e tagata ka nonofo he poko ke he mena kua fakaatā ai. (2) Kaeke ke lata ke liuaki e poko haau ne fakamau, fakailoa fakamafiti ke he hotela. (3) Uta ni e peleo uta koloa ka mau a koe ke fakaaoga, ti liuaki fakaave ke fakaaoga he falu. (4) Ua kaitunu he tau poko ne nakai fakaatā ke kaitunu. (5) Ko e tau Kerisiano, to nakai fakaaoga fakahehē e tautolu e tau kai pogipogi, kofe, mo e tau aisa ke fakaaoga he tau tagata nonofo he hotela he mogo ka nonofo ai a lautolu. (6) Fakatātā e tau fua he agaaga he fehagai mo e tau tagata gahua he hotela he tau magaaho oti. (7) Kaeke ke tupu e lekua he poko motela haau, kia fakamooli ke talahau ke he Rooming Department he fonoaga.