Fakaheke a Iehova ke he Fakapotopotoaga Lahi
1, 2. Ko e heigoa e fifiliaga ne foaki mai he fonoaga he fahimotu ki a tautolu, mo e moua fefe e tautolu e mena nei?
1 Ko e ha tautolu a tau fonoaga he fahimotu he tau tau takitaha kua foaki ki a tautolu e magaaho mitaki ue atu ke fakaheke a Iehova. Kua tatai e tau logonaaga ha tautolu mo e ha Tavita, ne lologo: “To fakaheke atu au kia koe ke he fakapotopotoaga lahi, mo e lologo atu kia koe ki mua he motu ne tokologa.” (Sala. 35:18) He Fonoaga he Fahimotu “Omaoma Mahani Atua,” maeke fefe ia tautolu ke taute moli ko e tau tagata kaufakalataha, kua lata ia tautolu ke fakaheke ki a Iehova?
2 Taha puhala ke taute e tautolu e mena nei kakano he tau mahani ha tautolu. Ne pehe e taha takitaki he fale he fonoaga: “Fakave ke he tau fonoaga ha mutolu, ne tala age e mautolu ke he falu matakau lotu ne manako ke fakaaoga e fale ke o mai ke kitia e puhala ne fakatokatoka he Tau Fakamoli a Iehova e fonoaga, kakano kua mitaki lahi e tau fakaholoaga ha mutolu.” Ha ko e ha tautolu a tau foliga, kaufakalataha, mo e tau mahani, kua igatia a tautolu he lafi ke he fakakiteaga fulufuluola pihia he fakahekeaga, ne kua tonuhia he Atua ke moua.—1 Pete. 2:12.
3, 4. To maeke fefe e maimaina ke lagomatai a tautolu ke tapulu he puhala ne lata mo e tau fekafekau Kerisiano, he fonoaga mo e ka oti ai?
3 Foliga Fakatagata: Ke tapulu mo e tauteute a tautolu ke he puhala kua tamai e fakaheke ki a Iehova kua lata ke mahani maimaina. (1 Timo. 2:9) Ne talahau he tohi Ministry School, lau 132: “Ko e tagata ne maimaina kua manamanatu ke nakai fakahukia noa e falu mo e nakai tauteute ke hagaaki ki a ia ni.” He tau motu loga, kua mahuiga e tau tapulu nakai gali. Pete ia, kua loto fakaaue a Iehova ke he laliaga ha tautolu ke hukui fakamitaki a ia. (Gahua 15:14) Pete kua fakahoko e fonoaga ha tautolu ke he tau fale sipote po ke tau fale fakafiafia, kua eke e fakalatahaaga ha tautolu ko e “fakapotopotoaga lahi” he tau aho tolu he fonoaga. Ko e mena ia, he fakapotopoto ki mua a Iehova, kua lata ia tautolu ke tauteute fakalilifu ne kua lata mo e Peresona tokoluga ue atu he lagi mo e lalolagi katoatoa.—1 Nofo. 29:11.
4 Kua lata foki ia tautolu ke mailoga e tau foliga ha tautolu ka oti e tau aho takitaha. Pete kua manako a tautolu ke tui e tau mena tui hagahaga mitaki he magaaho okioki po ke ka kai he fale kai, kua lata e tau tapulu mo e tauteuteaga ha tautolu ke ‘talahaua ke fakaheke e Atua.’ (1 Timo. 2:10) Ko e tapulu gali kua nakai fifili he tau mena ne fiafia e lalolagi ki ai. (1 Ioa. 2:16, 17) Ko e tau tohi faka-Kerisiano ha tautolu kua foaki e tau fakataiaga lagomatai ke he tapulu kua fakalatalata mo e gali he tau tane mo e tau fifine he tau tutuaga kehekehe. He tui e tau pine ha tautolu he maaga he fonoaga ka eke mo fakamanatuaga ko e tau fekafekau Kerisiano a tautolu he tau magaaho oti.—2 Kori. 6:3, 4.
5, 6. Maeke fefe ia tautolu ke fakakite e fakalilifu ma e laulau fakaagaga a Iehova?
5 Fakalilifu e Laulau a Iehova: Ko e Iki Pule Katoatoa he lagi mo e lalolagi kua fofola i mua ha tautolu e kaiaga lahi. (Isaia 25:6; 1 Kori. 10:21) Kaeke tokiofa fakatokoluga e tautolu e tuaga ha tautolu he laulau fakaagaga a Iehova, to foli a tautolu ke ha ha i ai ke he tau aho tolu oti he fonoaga. Kua taute nakai e koe ha fakaholoaga ma e mena ke nofo ai, puhala ke fenoga ai, mo e fai aho mai he gahuaaga? Kua fakatoka nakai e koe e magaaho ke tauteute mo e ke fenoga atu ke hoko tuai ke he fonoaga ke moua e tau nofoa, ke lafi mo e tau matakainaga, mo e ke fakalataha mo lautolu he fakaheke a Iehova ke he lologo mo e liogi hafagi?—Sala. 147:1.
6 He fakalilifu ke he laulau a Iehova ka omoi a tautolu ke fanogonogo fakamitaki ke he polokalama mo e kalo mai he tutala noa ke he falu, kai, po ke o fano he tau avaloa. Puhala he vahega he fekafekau fakamoli mo e loto matala, hane foaki e Iehova e tau kai fakaagaga kua lata mo tautolu he mogo tonu nei. (Mata. 24:45) Kua nakai lata ia taha ha tautolu ke fakato ha fakaholoaga. Lata e tau matua ke nonofo mo e fanau ha lautolu mo e lagomatai a lautolu ke aoga katoatoa mai ai.—Teu. 31:12.
7. Ko e heigoa kua ole ki a tautolu ke taute he kaiaga he pale la, mo e ko e ha?
7 Kua ole atu ke tamai e kai la ka e ua o kehe mai he fonoaga ke kumi mena kai he okioki pale la. Kua mitaki lahi mogoia kaeke taute pihia e tau tagata oti he tau nei! (Hepe. 13:17) Kua foaki mai he fakaholoaga nei e magaaho mitaki ke olioli e feoakiaga atihake mo e tau matakainaga mo e lafi atu ke he takatakaiaga kaufakalataha mo e mafola ne tamai e lilifu ki a Iehova.—Sala. 133:1.
8, 9. Ko e heigoa foki falu magaaho ne foaki he fonoaga ki a tautolu ke fakaheke a Iehova?
8 Fakamatala he Ha Magaaho: He fenoga atu mo e fenoga mai he kavi he fonoaga, kua lahi e magaaho ka fakaheke e tautolu a Iehova aki e tau laugutu ha tautolu. (Hepe. 13:15) Po kua kai a tautolu he fale kai po ke tutala mo e kau gahua he motela, kia kumi e tautolu e tau puhala ke fakamatala. Ko e tau manamanatuaga mo e tau loto ha tautolu to puke he tau koloa uho fakaagaga mai he fonoaga. Kia tufatufa e tautolu e tau mena mitaki nei mo lautolu ka feleveia mo tautolu he ha magaaho ni.—1 Pete. 3:15.
9 Kua amaamanaki mo e fiafia lahi a mautolu ke he magaaho nei ke fakamonu a Iehova “ki mua he fakapotopotoaga.” (Sala. 26:12) Kia fakaheke fakalataha e tautolu a Iehova he Fonoaga he Fahimotu “Omaoma Mahani Atua.”
[Puha he lau 4]
Tau Fakamanatu he Fonoaga he Fahimotu
◼ Tau Magaaho he Polokalama: To kamata e polokalama he 9:30 a.m. he tau aho tolu oti. To hafagi e tau gutuhala he 8:00 a.m. He fai minuti ato kamata e fakaholoaga, to nofo e tagata nofoa i mua ka ta ai e leo kofe ke kamata. Lata mogoia ia tautolu oti ke kumi e tau nofoa ke kamata e polokalama he puhala lilifu. To fakahiku e polokalama he 5:05 p.m. he Aho Faraile mo e Aho Faiumu mo e he 4:10 p.m. he Aho Tapu.
◼ Paaka Motoka: He tau matakavi fonoaga oti ne leveki e tautolu e tau paaka motoka, to ha ha ai e tau paaka tokanoa ka e nakai totogi kaeke o mai mua. Ko e tau pine he fonoaga to eke mo fakamailoga ke paaka e motoka. Ko lautolu ni ne fai fakaataaga mai he tufono he maaga ma e tau tagata fai matematekelea ka paaka he tau paakaaga pauaki ma lautolu ia ni. Ha kua nakai mahani ke loga e tau paakaaga motoka, kua lata ke heke auloa e tau motoka ka maeke ka e nakai taha po ke ua ni e tagata ka heke i loto.
◼ Fakamau e Tau Nofoa: Kua lata ke fakamau e tau nofoa ma lautolu ni ne heke he motoka hau po ke nonofo mo koe i kaina.
◼ Tau Mena Fakaalofa: Kua lahi mahaki e tupe ke fakatoka e fakaholoaga he fonoaga he fahimotu. Maeke ia tautolu ke fakakite e loto fakaaue he foaki e tau mena fakaalofa ke he gahua he lalolagi katoa he Fale he Kautu ha tautolu po ke he fonoaga. Ko e tau tieke ne foaki ke he fonoaga kua lata ke tohi ke totogi ke he “Watch Tower Society.”
◼ Nakai Logona Mitaki: Ke he tau fonoaga lalahi to fakapuloa e polokalama ke he takaiaga ia ni he fale ke he letio FM. To taute e fakailoaaga ke he mena nei he kamataaga he fakaholoaga fakamua. Ke fakaaoga e foakiaga nei, lata ia koe ke tamai e tama letio FM mo e tau mena fanogonogo teliga.
◼ Kai Pale La: Fakamolemole tamai e kai la ka e ua o kehe mai he matakavi fonoaga ke kumi mena kai he okioki pale la. Ti fakaaoga ni e puha tuku kai tote ne hao i kelekele he tau nofoa. Ko e tau puha tuku kai lalahi, tau lupo hio, mo e tau kava kua nakai fakaata ke he matakavi fonoaga.
◼ Tapakiaga: Ko e tau mena tapaki kua nakai lata ke tuku ke he fakatokaaga hila po ke fakatokaaga leo he fale fono ti lata ni ke fakaaoga ke he puhala ka nakai faguna e falu.
◼ Poki Ata: Kaeke poki ata a koe, kia nakai fakaaoga e fakalupa ke he magahala he tau fakaholoaga.
◼ Tau Fakahoko Fekau mo e Tau Telefoni Utafano: Lata e tau koloa nei ke fakatoka pauaki ke nakai fakatauhele.
◼ Tau Pakia mo e Tau Mena Fakalutukia: Kaeke tupu taha mena fakalutukia fakaekekafo he fonoaga, fakamolemole tala age ke he fekafekau ne tata mai, ko ia ka fakailoa fakamafiti ke he Fahi Lagomatai Matematekelea ke maeke he tagata gahua pauaki he feua ia ke fuafua e kelea he tuaga ti kumi e lagomatai. Ka lata, to hea e lautolu e fahi gahua fakalutukia.
◼ Tau Motela: (1) Ua loga e poko ka fakamau ke he mena kua manako ki ai, ti ua loga e tagata ka nonofo he poko ke he mena kua fakaata ai. (2) Kaeke lata ke liuaki e poko hau ne fakamau, fakailoa fakamafiti ke he hotela. (3) Ua kaitunu he tau poko nakai kaitunu. (4) Ua fakaaoga fakahehe e tau kai pogipogi, kofe, mo e tau aisa ne tuku ke fakaaoga e tau tagata nonofo he hotela he mogo ka nonofo a lautolu he hotela. (5) Fakatata e tau fua he agaga he fehagai mo e tau tagata gahua he hotela, mua atu he magaaho lavelave he hohoko atu laia mo e o kehe mai ai.