Puhala kua Lagomatai e Aoga Fekafekau Fakateokarasi ki a Tautolu
1 Haia hokoia he tau tagata ha Iehova e monuina ke moua e fakaakoaga fakateokarasi. (Isaia 54:13; Ioane 6:45) Pete ia, ke moua e lagomatai lahi mai i ai kua falanaki ni ke he laliaga ha tautolu. Kua kitia nakai e koe e lauiaaga mitaki mai he Aoga Fekafekau Fakateokarasi ke he hau a tuaga fakaagaga?
2 Tau Tali Atihake: Tokologa e tau leveki aoga ne kitia ko e kumikumi fakahokulo e tau alito he vagahau kua fakatolomaki e lauia mitaki he fakapotopotoaga ha lautolu he fekafekauaga he fonua. Lafi ki ai, taha e leveki aoga ne mailoga ha ko e fua he fakaholoaga ke tali auloa e toloaga he tau fakamaamaaga he Tohi Tapu, kua tokologa ne muitua ke he setulu he totouaga he Tohi Tapu. Hagaao ke he Kotofaaga Nu. 2, tokologa e tau matakainaga tane ne nava ke he tau puhala he tauteute ni e mena ka totou ka e nakai tauteute ke fai kamataaga mo e fakaotiaga. Ko lautolu ne kotofa ki ai e vala nei kua makutu lahi he mogonei ke fakatolomaki e makaka he totouaga ha lautolu.—1 Timo. 4:13.
3 Aoga e Tau Tagata Oti: Ko e mena fiafia ke tali he tau feleveiaaga. (Fakatai 15:23) He moua tuai e tau huhu liu fakamanatu he fakatutalaaga ka taute a tautolu ke mau amaamanaki ke tali. Lafi foki, he fufuta he Ko e Kolo Toko, Ianuari 1, 2004, kua ha ha i loto e tau fakamaamaaga he tau tohi he Tohiaga Tapu ne tatai mo e totouaga kotofa ha tautolu he Aoga Fekafekau Fakateokarasi. Lagomatai he tau vala tala nei e tokologa ke taute e tau tali atihake ka hoko e tau fakamaamaaga he Tohi Tapu.
4 Ko e tau tagata oti ne putoia he aoga kua moua e kotofaaga uho he tauteute mo e foaki e tau kotofaaga. Kua lagomatai oti a tautolu mai he tomatomaaga atihake he leveki aoga mai i mua. Ti aoga lahi foki e tau tagata fakaako takitokotaha mai he tau fakatonutonuaga ne foaki he leveki aoga ki a ia ka oti e feleveiaaga. Ko e tau mena ke fakagahuahua ne fakatutala ke he tau alito he vagahau he matahiku he tau veveheaga takitaha he tohi Benefit From Theocratic Ministry School Education kua foaki foki e lagomatai.
5 Ka mailoga e koe e tau manatu aoga mo e tau manatu he Tohi Tapu he magaaho ka taute mo e ka mole e aoga, lata ke fakamau hifo he lagaki he tohi Ministry School hau. Liu manamanatu ke he tau mena ne ako e koe, mo e kikite e puhala kua fakamalikiti ai he vala nei he fakaakoaga faka-Atua e hau a tuaga fakaagaga.