Hane Fakamahani e Iehova a Tautolu ma e Gahua Nei
1. Ka tuku age e Iehova e kotofaaga ke he tau tagata, ko e heigoa foki ne taute e ia?
1 Magaaho ne tuku age e Iehova e kotofaaga ke he tau tagata, ne tuku age foki e ia e lagomatai kua lata ki a lautolu ke taute aki. Ma e fakatai, he mogo ne tala age a Iehova ki a Noa ke ta e vaka, ko e mena ne nakaila taute e Noa fakamua, ne tala age foki e Ia e puhala. (Kene. 6:14-16) He mogo ne kotofa a Mose ko e leveki mamoe mahani molu ke tū atu ki mua he tau tagata taane momotua ha Isaraela mo Farao, ne fakamafana e Iehova a ia: “Ko au foki to fakalataha au mo e gutu hau, to fakaako foki e au a koe ke he tau kupu ke vagahau ai a koe.” (Esoto 4:12) Ka taute e tautolu e kotofaaga ke fakamatala e tala mitaki, ne nakai toka noa e Iehova a tautolu hoko tautolu. Kua fakamahani e ia a tautolu ma e matagahua nei puhala he Aoga Fekafekau Fakateokarasi mo e Feleveiaaga Fekafekau. Maeke fēfē a tautolu ke aoga mai he fakamahaniaga nei?
2. Maeke fēfē a tautolu ke lagomatai he Aoga Fekafekau Fakateokarasi?
2 Ko e Aoga Fekafekau Fakateokarasi: Kumikumi e tau tohi ne fakatoka ke fakaaoga ato o atu ke he tau feleveiaaga takitaha. Ti ka kitia e koe e puhala kua fakaaoga he tau tagata fakaako he aoga e vala tala ke he tau lauga ha lautolu, to fakamatila e maamaaga haau ke he puhala fakaako atu. (Fakatai 27:17) Tamai haau a tohi Ministry School ke he feleveiaaga mo e fakaaoga ai ko e tohi fakamau manatu. Ka hagaao e leveki aoga ki ai ka oti e lauga he tau tagata fakaako takitaha, vavate e tau matapatu manatu ka manako a koe ke fakagahua, ti fakaaoga e tau faahi he tohi ke fakamau e tau manatu. Ka ko e puhala mitaki lahi mahaki ke lagomatai mai he aoga nei, ko e fai vala i ai. Kua hū nakai a koe i ai? Ka moua e koe e kotofaaga lauga, tauteute fakamitaki ti fakagahua e fakatonuaga kua moua e koe. Ka fakalataha ke he gahua fakamatala, fakaaoga e mena ne fakaako e koe.
3. Ko e heigoa ka lagomatai a tautolu ke aoga mai he Feleveiaaga Fekafekau?
3 Ko e Feleveiaaga Fekafekau: To mitaki ke manatu e tautolu e tau lagomataiaga ne taute he tau feleveiaaga nei he totou tuai e vala tala mo e mautauteute ke tali. Ka fakakū e tau tali ha tautolu, to tokologa ka maeke ke fai vala. Onoono fakamakutu ke he tau fakatātāaga, mo e fakaaoga e tau lagomataiaga ka logona hifo e koe to lauia mitaki lahi ke he gahua fakamatala haau. Toka e lagaki he tau vala tala pauaki mai he Ha Tautolu a Fekafekauaga he Kautu ke fakaaoga he tau mogo i mua.
4. Kua lata he ha ke fakaaoga fakamitaki e tautolu e fakamahaniaga fakateokarasi?
4 Tuga e tau kotofaaga ne age ki a Noa mo Mose, ko e poakiaga ki a tautolu ke fakamatala e tala mitaki ke he lalolagi oti ko e gahua uka. (Mata. 24:14) Maeke a tautolu ke kautū ka falanaki a tautolu ki a Iehova ko e Faiaoga Homo Ue Atu ha tautolu, ti fakaaoga fakamitaki e fakamahaniaga ne foaki e ia.—Isaia 30:20.