Foaki e Iehova e Lahi Ue Atu he Malolo
1 Ko e kotofaaga uho he fekafekauaga tapu—ko e fekafekauaga Kerisiano—ne kua foaki ke he tau tutaki oti a Iesu. (Mata. 24:14; 28:19, 20) Ka e fakatupu he nakai mitaki katoatoa he tagata mo e tau pehiaaga he fakatokatokaaga he tau mena nei a tautolu he falu magaaho ke onoono fakateaga ki a tautolu ni.
2 Ka tupu e mena nei maeke a tautolu ke mafanatia ha ko e tohi he aposetolo ko Paulo ke he tau Kerisiano fakauku i Korinito. Ne tohi e ia: “Ha ha ia mautolu e koloa nai ke he tau kapiniu kelekele.” (2 Kori. 4:7) Kua mauokafua a Paulo: “Kua nakai fakalolelole ai a mautolu ha ha ia mautolu e feua nai.” (2 Kori. 4:1) Moli, ko e kamatamata ma tautolu oti, ko e fakauku po ke “mamoe kehe,” ke tumau ke fakapuloa e tala mitaki mo e “nakai fakalolelole.” Kua lata a tautolu mo e malolo mai he Atua, kua foaki “e lahi ue atu he malolo.”—Ioane 10:16; 2 Kori. 4:7e.
3 Fakamalolo ai, tokologa e Tau Fakamoli ko e tau uta fekau fakamakamaka pete ni e taufetului mo e totokoaga vale, tau malolo tino matematekelea, po ke ku fakafahi tupe. Kua lata oti ia tautolu ke mailoga ko e kotofaaga ha tautolu ke fakamatala kua ha ha ai e lagomataiaga a Iehova. He manatu fakalolelole po ke onoonoaga nakai fahia ke he foliaga ha tautolu ke fakamatala, kia “fakamalolo [a tautolu] ke he Iki ke he malolo he hana mana.”—Efeso 6:10; Fakatai 24:10.
4 Moua Fefe e Malolo he Atua: Fakauka ke he liogi, he ole ma e lagomatai mo e malolo he Atua. (Roma 12:12; Filipi 4:6, 7) Ti, he loto katoa hau, falanaki ki a Iehova ke foaki e lahi ue atu he malolo. (Fakatai 3:5) Totou e tau tala he tau moui he tau tagata he vaha fou nei he tau mekasini ha tautolu, ha kua foaki mai ai e fakamoliaga kua lagomatai e Iehova hana tau fekafekau he vaha nei ke fakauka ke he tau kamatamata. Feoaki mau mo e tau matakainaga he fakapotopotoaga, ti nakai tiaki e tau feleveiaaga he fakapotopotoaga.—Roma 1:11, 12; Hepe. 10:24, 25.
5 Kia taute e tautolu e tau mena oti ke lautatai ai ke moua e malolo a Iehova—ko e malolo lahi ue atu mo e to lagomatai a tautolu ke nakai fakalolelole ke he gahua aoga lahi mahaki he fakamatala e Kautu.