Kia Fakalilifu e Tapuakiaga ha Iehova
1 Ka ha ha ai a tautolu he fale he taha tagata, kua fakakite e tautolu e fakalilifu ma e kaina he tagata ia, he nakai fakamalona ha mena i ai, mo e nakai faguna e tautolu e fakaholoaga pauaki he kaina. Kia pihia foki ka eke a tautolu mo tau tagata he fale ha Iehova! Kua lata ia tautolu ke fai mahani he hana a fale. (Sala. 15:1; 1 Timo. 3:15) Ti pete ni kua taute e feleveiaaga ha tautolu he Fale he Kautu, he kaina tagata, po ke taha toloaga he tau tagata, kua fakakite tumau he tokologa ia tautolu e fakalilifu ma e tapuakiaga ha tautolu ke tuga ko e fale ha Iehova a ia, ne kua ‘homo hana fakahekeaga ke he lalolagi katoa mo e lagi.’—Sala. 148:13.
2 Kua nakai fakakite he falu matakainaga e fakalilifu he tau feleveiaaga, ha kua fakahoha po ke tuga kua nakai fai aoga e tau fakailoaaga ne lauga mai. Fai tagata lalahi ne fetutalaaki he kaupa, he tau faletote, po ke i fafo he Fale he Kautu ka e holo agaia e feleveiaaga. Ka toka e tama lahilahi hake ke leveki e patu tote, he falu mogo ne fefeua a laua ti tote ni e mena ka logona he polokalama. Kua kitia ai e falu fuata i fafo he Fale he Kautu he oti e tau feleveiaaga, hane fefeua, lahi e fakahoha, mo e fakaneinei karate ke he taha mo e taha. He falu magaaho, kua faguna a lautolu ke he tau tuuta kaina po ke tauhele e tau motoka he paaka motoka po ke puhala tu.
3 Puhala ke Kalo Mai he Nakai Fakalilifu: He mailoga e lilifu mo e tapu he ha tautolu a tapuakiaga, to manako a tautolu ke aua neke fakalavelave e falu he fanafana, kai, gau pililole, fakakali e tau lau pepa, o tumau ke he faletote, po ke mule tumau ke he tau feleveiaaga. Kua nakai toka he tau matua fakalilifu mo e loto fakaaue ha lautolu a fanau ke takiva e kapete, tau nofoa, po ke tau kaupa he Fale he Kautu po ke loto kaina ne taute ai e fakaakoaga tohi. Mo e nakai taumaleku kua talia e tautolu oti, kua nakai lata ke taute e tau mahani fakama, tala fakagoagoa, po ke taufeki ke he tau mena fakalialia he tau feleveiaaga ha tautolu.—Efeso 5:4.
4 Kaeke ke mauloto e tautolu e kakano he tau feleveiaaga ha tautolu, to muamua a tautolu mo e ha tautolu a fanau ke fakakite e lilifu kua lata ma e tapuakiaga a Iehova he mena ne ‘manako a tautolu ke tutu ai.’—Sala. 84:10.