Fakamanatu he Lalolagi Katoa e Mate he Keriso
1 Kua afuafu aki e Iehova e tau mena fakaalofa loga a tautolu. Ko e katoatoa he mitaki mo e fakaalofa totonu hana kua fakamaama fakalahi tuga e “mena kua foaki noa nakai maeke ke fakamatala.” E, ko e “fakaalofa noa he Atua” kua mahomo ue atu ke fakamaama ai kua maeke he tau maamaaga ha tautolu.—2 Kori. 9:14, 15.
2 Ko e Mena Fakaalofa Ue Atu Hana: Ko Iesu Keriso, ko e Lukutoto he tagata, ko e mena fakaalofa ne mua ue atu he tau mena oti. He fakakite e fakaalofa lahi hana ma e lalolagi he tau tagata, ne foaki e Iehova hana Tama fuataha mo e fakahele. (Ioane 3:16) Ko e monuina foaki noa pihia mai he Atua kua lata ni ke fakamanatu he lalolagi katoa. A fe mo e fefe? He afiafi Tuloto, ia Aperila 1, 1999, ko e tau Kerisiano he lalolagi oti to fakamanatu e Kaiaga Afiafi he Iki, he fakalataha atu ke he Fakamanatuaga kua mua ue atu he tau poa oti kana.—1 Kori. 11:20, 23-26.
3 Ne mate e Keriso ma tautolu pete ni “ko e tau tagata hala agaia a tautolu,” ti fakakite e tautolu e fakaaue fakatagata ha tautolu he fakalataha atu ke he Fakamanatuaga he hana mate mo e uiina foki falu ke fakalataha mai mo tautolu he magaaho aoga lahi ia.—Roma 5:8.
4 Ko e Fakahokoaga Aoga Lahi: Kua matapatu e fakamaamaaga he fakamanatu he mate he Keriso kua taofi mau e ia e pule katoatoa tututonu he Atua. Kua fakamanatu foki ki a tautolu kua maeke ke olioli e tautolu e tuaga mea ki mua a Iehova he fakagahuahua e tua he poa a Iesu, ne kua fakamoli e fakamouiaga. (Gahua 4:12) Moli, ko e fakahokoaga aoga lahi anei he tau!
5 Ko e fakaalofa ha tautolu ke he tau katofia kua fakakite ai he uiina a lautolu ke fakamanatu e Kaiaga Afiafi he Iki mo tautolu. Ko e aoga he lukutoto kua fakaata agaia ke he tau miliona kua ako e uho mua ue atu. (Filipi 3:8) Ko lautolu kua fakagahua e tua ke he poa a Keriso kua moua mai e amaamanakiaga mauokafua he moui tukulagi.—Ioane 17:3.
6 Ko e magahala Fakamanatu kua foaki e tau magaaho pauaki ma tautolu ke fakakite e loto fakaaue ma e fakaalofa noa mua ue atu he Atua. Ko e magaaho mua atu anei ke folafola fakamakai he fakamatala e tala mitaki he Kautu he Atua. Ko e tau lagomataiaga lalahi hane tatali mai mua ma lautolu oti kua fakaata he liogi ke he mena fakaalofa nakai maeke ke fakamatala a Iehova mo e fakatoka ke fakalataha ke he tau nei he fakamanatuaga he Kaiaga Afiafi he Iki!