‘Fakaalofa ki a Iehova, ko Mutolu Oti Kana e Tau Tagata Fakamoli’

Ke Fakamanatu e Mate a Iesu ia Aperila 4

¹ He tau tau kua mole, he magaaho ne ha ha a Ukaraine i lalo he pule Komunisi, ne takahao fakamakuikui he tau pule e tau matakainaga​—mua atu he tata ke he aho he Kaiaga Afiafi he Iki​—ha kua amanaki a lautolu ke moua e matakavi ne feleveia ai a lautolu. Ko e lekua tumau anei, ha kua iloa he tau pule e aho ne liga fakatoka ki ai e fakamanatuaga. Ko e heigoa kua maeke he tau matakainaga ke taute? Ha ha he kaina he taha matakainaga fifine e poko i kelekele ne puke he vai. Ha kua nakai amanaki e tau pule ke fakapotopoto e tau tagata i ai, ne talaga he tau matakainaga e laupapa ne molea hake he matatuli e hokulo he vai. Pete kua nonofo fakatoga a lautolu he fuga laupapa i lalo he alofale tokolalo, nakai fai tagata ne fakatauhele a lautolu ko e fakapotopotoaga fiafia ne taute e Fakamanatuaga.

² Ko e fifiliaga he tau matakainaga Ukaraine ha tautolu ke omaoma e poakiaga ke fakamanatu e mate ha Iesu ko e fakatataaga homo ue atu he fakaalofa ha lautolu ma e Atua. (Luka 22:19; 1 Ioane 5:3) Ha magaaho ni ka fehagai a tautolu mo e tau mena uka he tau momoui ha tautolu, kia moua e tautolu e fakamaloloaga mai he tau fakafifitakiaga pihia mo e ke fifili ke fakalataha ke taute e Kaiaga Afiafi he Iki ia Aperila 4. He taute pihia, kua fakakite e tautolu hane fakalataha a tautolu ke he tau manatu he salamo ne lologo: ‘Fakaalofa ki a Iehova, ko mutolu oti kana e tau tagata fakamoli hana.’​—Sala. 31:23.

³ Lagomatai Falu ke Tupu e Fakaalofa ma e Atua: Ko e fakaalofa ma e Atua kua omoi a tautolu ke uiina e falu ke taute e fakamanatuaga mo tautolu. Ko e uho he Ha Tautolu a Fekafekauaga he Kautu ia Fepuari ne fakamalolo a tautolu takitokotaha ke tohi hifo a lautolu kua fakatoka e tautolu ke uiina ke he Fakamanatuaga. Kua makai kia a koe ke muitua he ta atu e uiina ke he tau tagata oti ne tohi hifo e koe? Kia fai magaaho ke fakamaama e aoga he fakamanatuaga ki a lautolu. Ko e fakamanatu age totonu e aho mo e magaaho he Fakamanatuaaga, ti ka latatonu, ke tala age ke fakatauo a koe mo lautolu kua liga fakamalolo ki a lautolu ke hohoko atu.

⁴ He fakamanatuaga, kia lali pauaki ke feleveia ki a lautolu ne talia e uiina ha tautolu, ti fakafeleveia fakamitaki a lautolu. Maeke fefe a koe ke lagomatai a lautolu ke tupu e fakaalofa ha lautolu ma Iehova? Kia fakaata a koe ke tali e tau huhu ha lautolu. Kia mataala ke foaki e fakaakoaga Tohi Tapu ka latatonu. Uiina a lautolu ke hohoko mai ke he ha tautolu a tau feleveiaaga fakafahi tapu he fakapotopotoaga. Mua atu ke he tau motua ke matakite ke he tau Kerisiano lolelole ne kua hohoko atu. Maeke ia lautolu ke aahi atu ki a lautolu ia mo e fakamalolo ki a lautolu ke liu fakamalolo ke he matagahua ha lautolu, liga ke fakamalolo atu he tau manatu ne fakakite mai he lauga he Fakamanatuaga.​—Roma 5:6-8.

⁵ Fakahokulo e Fakaalofa Ni ha Tautolu ma Iehova: He fakaata e mena fakaalofa he lukutoto kua maeke ke fakahokulo e fakaalofa ha tautolu ma Iehova mo e hana Tama. (2 Kori. 5:14, 15) Taha e tagata ne kua leva e fina atu ke he Fakamanatuaga ne pehe: “Amaamanaki atu a mautolu ke he Fakamanatuaga. Kua uho pauaki fakahaga he tau tau takitaha. Manatu e au he tu he fale mate 20 e tau kua mole, he onoono atu ke he matua tane fakahele haku kua mate mo e hokotia ke he loto fakaaue moli ma e lukutoto. Na ko e matakupu iloilo ulu noa ni fakamua. Oi, ne iloa e au e tau kupu tohi oti ti iloa ke fakamaama ai! Ka e ko e magaaho ni ne logona hifo e au e malolo moli he mate ne hopohopo lahi e fiafia he loto haku he olioli ke he mena ka taute ma tautolu ha ko e kakano he lukutoto uho ia.”​—Ioane 5:28, 29.

⁶ He hane hoko mai e aho he fakamanatuaga he tau nei, kia fai magaaho ke tauteute e loto hau ma e magaaho ia. (2 Nofo. 19:3) He manamanatu hokulo ke he totouaga pauaki he Tohi Tapu he Fakamanatuaga, ne kua fakatoka ai he Examining the Scriptures Daily​—2004 mo e he 2004 Calendar. Olioli e falu he liu fakamanatu e veveheaga 112-16 he tohi Greatest Man he magaaho fakaako fakamagafaoa ha lautolu. Kua taute he falu e kumikumiaga lafi ki luga he fakaaoga e falu tohi lagomatai ne foaki mai he vahega fekafekau fakamoli mo e loto matala. (Mata. 24:45-47) Igatia a tautolu oti mo e taute e mena fakaalofa he lukutoto mo mena ke liogi mai he loto. (Sala. 50:14, 23) E, he magahala Fakamanatuaga, kia fakaata fakatumau e tautolu e fakaalofa ha Iehova ma tautolu mo e kumi puhala ke fakatata e fakaalofa ha tautolu ki a ia.​—Mare. 12:30; 1 Ioane 4:10.