Kia Fakakite ha Tautolu a Loto Fakaaue To Taute e Fakamanatuaga ia Aperila 17
1. Ko e heigoa e loto manamanatu he salamo ne kua felauaki tonu mo e magahala he Fakamanatuaga?
1 Omoi ha ko e loga he tau gahua fakaalofa hofihofi mo e tau fakahaoaga ha Iehova, ne pehē e tau salamo: “Ko heigoa taha mena ke taui aki e au a Iehova he hana mahani mitaki mai oti kana kia au.” (Sala. 116:12) He vahā nei, loga atu e kakano ke loto fakaaue e tau fekafekau he Atua. Loga e tau senetenari kua mole he tohi e tau kupu nei, ne foaki e Iehova e mena fakaalofa mua ue atu haana ke he tagata—ko e lukutoto. He amaamanaki a tautolu ke fakamanatu e mate he Keriso ia Aperila 17, ha ha ia tautolu e kakano uho ke fakakite ha tautolu a fakaaue lahi.—Kolo. 3:15.
2. Ko e heigoa e falu a kakano ne kua loto fakaaue a tautolu ke he lukutoto?
2 Tau Monuina ha ko e Lukutoto: Ha ko e lukutoto kua maeke ia tautolu ke moua e “fakamagaloaga he tau hala.” (Kolo. 1:13, 14) Maeke he mena nei ke fakaatā a tautolu ke tapuaki ki a Iehova mo e loto manamanatu meā. (Hepe. 9:13, 14) Moua e tautolu e fiafia he atāina ke tutala ki a Iehova ka liogi a tautolu ki a ia. (Hepe. 4:14-16) Ko lautolu ne fakagahuahua e tua ke he lukutoto to moua e amaamanakiaga homo ue atu he moui tukulagi!—Ioane 3:16.
3. Liga fakakite fēfē e tautolu ha tautolu a loto fakaaue ki a Iehova ke lata mo e lukutoto?
3 Fakakite e Loto Fakaaue: Taha puhala ke fakakite e hokulo he ha tautolu a loto fakaaue lahi ko e manamanatu ke he totouaga Tohi Tapu he Fakamanatuaga he tau aho takitaha mo e manamanatu fakahokulo ki ai. Ko e vala tala he Watchtower ia Fepuari 1, 2011, ne mataulu “Kua Mautali Nakai a Koe ke he Aho ne Mua Atu e Aoga he Tau?” kua talaga ke lagomatai a tautolu ke taute e mena nei. Maeke foki ia tautolu ke tala age ki a Iehova puhala he liogi mai he tau loto e uho he lukutoto ki a tautolu. (1 Tesa. 5:17, 18) Ko e ha tautolu a fakalataha ke he Fakamanatuaga ha ko e omaoma ke he poakiaga a Iesu ko e fakakiteaga he loto fakaaue. (1 Kori. 11:24, 25) Ke lafi ki ai, maeke ia tautolu ke fifitaki e fakaalofa nakai fakakaupa ha Iehova, mo e uiina e tokologa ke fakalataha mo tautolu.—Isaia 55:1-3.
4. Ko e heigoa e fifiliaga ha tautolu?
4 Ko e loto fakaaue he tau fekafekau a Iehova to nakai onoono ke he Fakamanatuaga ko e taha feleveiaaga tuga fa mahani. Ko e feleveiaaga kua mua atu e aoga he tau! He tata mai e Fakamanatuaga, kia tatai ha tautolu a fifiliaga tuga mo e salamo ne tohia: “Haku agaga na e, kia fakamonu atu kia Iehova, aua foki neke nimo ia koe ha mena taha he hana tau mena fakaalofa.”—Sala. 103:2.