Fakakite e Fakaaue ke he Mena Fakaalofa Mua Ue Atu he Atua
1. Ko e ha kua fakaaue lahi pauaki a tautolu ki a Iehova?
1 He ‘tau mena fakaalofa mitaki’ loga a Iehova, ne mua ue atu e lukutoto ne foaki e ia he puhala he Tama fakahele haana. (Iako. 1:17) Maeke ai ke moua e tau monuina loga, putoia e fakamagalo he tau agahala ha tautolu. (Efeso 1:7) Kua fakaaue lahi tumau a tautolu ma e mena nei. He magahala Fakamanatuaga kua fai magaaho pauaki a tautolu ke manamanatu fakahokulo ke he mena fakaalofa uho nei.
2. Maeke fēfē ia tautolu ke atihake e loto fakaaue ma e lukutoto he ha tautolu a magafaoa mo e ha tautolu takitokotaha?
2 Atihake e Loto Fakaaue: Ke atihake e loto fakaaue he magafaoa haau, he tau faahi tapu ato hoko e Fakamanatuaga ia Mati 30, ko e ha he nakai fakaaoga ha mutolu a magaaho he afiafi he Tapuakiaga Magafaoa ke liu fakatutala ke he vala tala he lukutoto? Kia fakatutala auloa ko e magafaoa foki ke he totouaga pauaki he tau aho takitaha ke he Tohi Tapu he Fakamanatuaga. Manamanatu fakatagata ke he puhala he lukutoto ne aoga ki a koe mo e lauia e onoonoaga haau ki a Iehova, ki a koe, he falu, mo e vahā anoiha. To moua foki e koe e aoga ke fakaako ke uhu e tau lologo ka fakaaoga he Fakamanatuaga ko e numera 26 mo e 29.—Sala. 77:12.
3. Fakakite fēfē e tautolu e fakaaue ha tautolu?
3 Tau Fakakiteaga he Fakaaue: Ko e loto fakaaue ke he lukutoto kua omoomoi a tautolu ke tala age ke he falu hagaao ki a Iehova mo e fakaalofa lahi haana he fakafano mai e Tama haana. (Sala. 145:2-7) Ia Mati, Aperila, mo Me, kua fakakite he falu magafaoa e fakaaue ha lautolu he fakatoka ke taha e tagata he magafaoa ke paionia fakakū. Ka nakai maeke ai, maeke nakai a koe ke [“fakatau e tau magaaho,” NW] ke fakalahi e gahua haau ke he fonua? (Efeso 5:16) To fakalagalaga foki he fakaaue a tautolu ke lagomatai e falu ke fakapotopoto mo tautolu ke he Fakamanatuaga. (Fakakite. 22:17) Kamata he tohi hifo ke uiina e tau liu aahi atu, tau tagata fakaako Tohi Tapu, tau magafaoa, tau kapitiga gahua, mo e tau katofia, ti fakalataha katoatoa ke he gahua uiina pauaki he Fakamanatuaga.
4. He tau puhala fe ka fakaaoga fakamitaki e tautolu e magahala Fakamanatuaga?
4 Kua foaki he magahala Fakamanatuaga e tau magaaho foou ke fakatātā ki a Iehova kua loto fakaaue lahi mahaki a tautolu ke he mena fakaalofa haana ke he tau tagata oti kana. Kia fakaaoga e tautolu e magaaho nei ke atihake mo e fakakite e fakaaue ma e lukutoto mo e “[tau] koloa lahi a Keriso kua nakai maeke ke totou.”—Efeso 3:8.