“Kia Eke e Mutolu e Mena Nai”
Fakamanatuaga ke Fakahoko ia Aperila 5
1. Ko e ha kua aoga ke taute e Fakamanatuaga?
1 “Kia eke . . . e mena nai mo fakamanatuaga kia au.” (Luka 22:19) He tau kupu ia, ne poaki e Iesu e tau tutaki haana ke fakamanatu e poa he mate haana. He tau mena oti ne fakakatoatoa he lukutoto, kua nakai fai aho ne mua e aoga po ke uho ma e tau Kerisiano ka ko e taute he Fakamanatuaga he tau tau takitaha. Hane hoko mai e fakamanatu he tau nei ia Aperila 5, maeke fēfē ke fakakite e tautolu e fakaaue lahi ki a Iehova?—Kolo. 3:15.
2. Maeke fēfē a tautolu ke fakatātā e loto fakaaue ma e Fakamanatuaga he puhala he fakaako mo e manamanatu fakahokulo?
2 Mautauteute: Fa mahani a tautolu ke mautauteute ma e tau mena ne onoono a tautolu ki ai kua aoga. Maeke ia tautolu ke mautauteute e tau loto ha tautolu ma e Fakamanatuaga he fakatutala mo e magafaoa e tau mena tutupu ka hoko ke he tau aho fakahiku ha Iesu he lalolagi mo e manamanatu fakahokulo ki ai. (Esera 7:10) Ko e vala he tau kupu tohi kua moua he kalena mo e he Kumikumi e Tau Tohiaga Tapu he Tau Aho Takitaha, ka ko e tohi katoa fakalataha mo e tau veveheaga ne tatai mai he tohi Tagata Mua Ue Atu ne haia he fufuta he The Watchtower, ia Fepuari 1, 2011, lau 23-24.
3. Maeke fēfē a tautolu ke fakatātā e loto fakaaue ma e Fakamanatuaga he fakalahi e gahua ha tautolu ke he fonua?
3 Fakamatala: Maeke foki a tautolu ke fakatātā e loto fakaaue he fakalataha katoatoa ke he gahua he fonua. (Luka 6:45) Ko e matagahua he lalolagi katoa ke uiina e falu ke he Fakamanatuaga to kamata he Aho Faiumu, Mati 17. Maeke nakai a koe ke hikihiki e fakaholoaga haau ke lahi e magaaho he gahua he fonua, liga he paionia fakakū? He ha he fakatutala auloa ai mo e magafaoa he Tapuakiaga Magafaoa he afiafi ka hau?
4. Ko e heigoa e tau aoga ka moua e tautolu mai he fakahoko e Fakamanatuaga?
4 Aoga fēfē a tautolu he fakalataha atu ke he Fakamanatuaga he tau tau takitaha! Ko e olioli mo e fakaalofa ha tautolu ma e Atua kua holo ki mua he fakaata e tautolu e loto fakamokoi ha Iehova he foaki e Tama fuataha haana ko e lukutoto. (Ioane 3:16; 1 Ioa. 4:9, 10) Kua omoomoi he mena nei a tautolu ke momoui nakai ni ma tautolu. (2 Kori. 5:14, 15) Kua fakaohooho foki ai e manako ha tautolu ke fakaheke a Iehova ke he tau tagata. (Sala. 102:19-21) Mooli, ko e tau fekafekau loto fakaaue a Iehova kua amaamanaki atu ke he mogo ka fakahoko e tautolu e Fakamanatuaga ia Aperila 5 ke ‘fakailoa atu e matulei he Iki.’—1 Kori. 11:26.