“Kia Eke e Mutolu e Mena Nai mo Fakamanatuaga kia Au”
Ke Fakamanatu e Mate a Iesu ia Aperila 2
1. Ko e ha e Aperila 2, 2007 ko e aho uho lahi?
1 Ia Aperila 2, 2007, totou miliona e tagata he lalolagi katoa ka fakapotopoto ke fakamanatu e mate poa ha Iesu. Ne mate a Iesu ko e lalago he pule katoatoa he haana Matua he lagi, he fakakite e fakamooliaga na tukumale pikopiko e Satani ko e Tiapolo kua fekafekau e tau tagata ke he Atua ha ko e tau manatu lotokai hokoia. (Iopu 2:1-5) Ko e Kaiaga Afiafi he Iki kua fakamanatu foki ki a tautolu he puhala he mate haana ko e tagata mitaki katoatoa nakai hala, ko Iesu, ne ‘foaki atu hana moui mo lukutoto ke hukui aki e tau tagata tokologa.’ (Mata. 20:28) Ko e mena ia, ne poaki e Iesu ke he tau tutaki haana: “Kia eke e mutolu e mena nai mo fakamanatuaga kia au.” (Luka 22:19) Kua omoi kia he loto fakaaue ma e mena fakaalofa uho nei a koe ke kamata ke taute e tau fakatokaaga ke fakamanatu e aga mitaki ue atu nei he fakaalofa?—Ioane 3:16.
2. Taute fēfē e tautolu e tau loto ha tautolu ma e Fakamanatuaga?
2 Taute e Loto Haau: He manamanatu ke he mena ne tupu he tau aho fakahiku takitaha he moui tagata ha Iesu, maeke ia tautolu ke taute e tau loto ha tautolu ma e Fakamanatuaga nei. (Esera 7:10) Ke lagomatai a tautolu ke he mena nei, kua moua e setulu he totouaga pauaki he Tohi Tapu he Kumikumi e Tau Tohiaga Tapu he Tau Aho Takitaha—2007 mo e 2007 Calendar. Ko e setulu he totouaga nei ne felauaki lahi mo e tau aho he tau mena tutupu ne takatakai ke he mate a Iesu kua fakatatau ke he kalena ne fakaaoga e tautolu he vahā nei. Ko e tau aho ne hagaao ki ai ke he tau tala he Tohi Tapu kua fakavē ke he kalena faka-Iutaia, ne totou e tau aho mai he toaga laā ke he toaga laā. Ko e kehekeheaga nei ne manamanatu ki ai mo e kitia he setulu he totouaga he Tohi Tapu he Fakamanatuaga. He liu fakamanatu ke he vala tala pihia mo e manamanatu fakalahi ke he liogi e hokulo he fakaalofa he Atua ka lagomatai a tautolu ke aoga katoatoa mai he Fakamanatuaga.
3. Lagomatai fēfē e tautolu a lautolu ne fiafia mo lautolu ne lolelole ke aoga mai he Fakamanatuaga?
3 Uiina e Falu ke Fakalataha: Ne fakailoa he uho he Ha Tautolu a Fekafekauaga he Kautu ia Fepuari e matagahua pauaki ke uiina e tau tagata ke he fakalatahaaga aoga nei. Kua taute nakai e tau fakatokaaga haau ke fakalataha katoatoa ke he matagahua nai? Kua fakamau hifo nakai e koe e tau tagata ne mahani ke uiina, ti kua kamata nakai a koe ke matutaki ki a lautolu? Kia pulega ke hohoko tuai atu he afiafi ia he Fakamanatuaga ke fakafeleveia a lautolu kua uiina e koe ti pihia mo e falu ne fiafia. Liga manako a koe ke nonofo mo lautolu, mo e kikite ki ai kua fai Tohi Tapu mo e tohi lologo a lautolu. Fakafeleveia atu a lautolu ke he falu he fakapotopotoaga. Ka oti e fakaholoaga kia fakaatā a koe ke tali e tau hūhū ha lautolu. Uiina a lautolu ke fakalataha ke he lauga pauaki ke he tau tagata ka fakahoko ia Aperila 15. To fiafia pauaki e tau motua ke kitia mooli ko lautolu ne feoaki mo e fakapotopotoaga ka kua fai magaaho he lolelole kua moua e uiina ke he Fakamanatuaga mo e ke he lauga pauaki.
4. Maeke fēfē ia tautolu ke lagomatai e tau tagata ke fakatumau ke holo ki mua fakaagaaga he mole e Fakamanatuaga?
4 Lagomatai a Lautolu ne Fiafia Foou mo e ne Lolelole ke Holo ki Mua: To fakamaama fakakū he tagata lauga he Fakamanatuaga e fakatokaaga he fakaakoaga Tohi Tapu ha tautolu mo e fakamalolō a lautolu ne fiafia foou ke fakatumau e fakaako hagaao ki a Iehova. Maeke ia koe ke fakaaoga e talahauaga he tagata lauga ke eke mo fakavēaga ke fakalaulahi atu e lagomatai fakaagaaga ki a lautolu ne uiina e koe. Ka nakai la fakaako a lautolu mogonei ke he Tohi Tapu, kia mailoga ke aahi a lautolu he nakai leva e mole e Fakamanatuaga mo e fakatātā e fakaholoaga he fakaakoaga Tohi Tapu nakai totogi. Ke maeke ke holo ki mua fakaagaaga, to lata foki a lautolu ke o atu ke he tau feleveiaaga he fakapotopotoaga. (Hepe. 10:24, 25) He tokaloto e mena nei, fakamalolō a lautolu ke kamata fakalataha tumau mai. To manako e tau motua ke aahi atu e tau Kerisiano ne lolelole nukua o mai ke he Fakamanatuaga mo e ke atihake he tau manatu ne talahau he lauga. To liga fakamalolō he mena nei a lautolu ke liliu ke he matagahua ha lautolu he fakapotopotoaga.
5. Aoga fēfē a tautolu he lauiaaga he Fakamanatuaga?
5 Kua foaki he Fakamanatuaga e magaaho ke fakaata fakahokulo e mena ne taute e Iehova mo Iesu ke lata mo tautolu. Ko e manamanatu fakalahi pihia kua fakahokulo e fakaalofa ha tautolu ma lautolu ti lauia foki e tau mahani ha tautolu. (2 Kori. 5:14, 15; 1 Ioa. 4:11) Ko e mogo anei ke kamata ke tauteute a tautolu mo lautolu ne fiafia ma e magaaho uho nei he ‘fakailoa e tautolu e matulei he Iki.’—1 Kori. 11:26.