Lagomatai e Falu ke Aoga Mai he Lukutoto
Fakamanatuaga he Mate he Keriso ke Fakahoko ia Aperila 12
1. Ko e heigoa e taha puhala kua fakakite he tau tagata he Atua e loto fakaaue ha lautolu ma e lukutoto?
1 “Fakaaue ke he Atua he hana mena kua foaki noa nakai maeke ke fakamatala.” (2 Kori. 9:15) Kua talahau fakamitaki he tau kupu ia e puhala kua logona hifo e tautolu e mahani mitaki mo e fakaalofa-totonu ne fakakite he Atua ke he tau tagata haana he puhala he haana a Tama, ko Iesu Keriso. Ko e loto fakaaue pihia ka kitia pauaki he fakapotopoto auloa a tautolu ia Aperila 12 ke fakahoko e Fakamanatuaga he mate he Keriso.
2. Ko hai ne fakalataha mo e tau fekafekau a Iehova ke he Fakamanatuaga, ti ko e heigoa kua lata ia lautolu ke taute ke maeke ke aoga mai he lukutoto?
2 Fakalataha mo e tau fekafekau ha Iehova, ne kavi ke he hogofulu e miliona ne hohoko atu ke he Fakamanatuaga he tau tau takitaha. He taute pihia, ne fakatātā e lautolu e lahi he loto fakaaue ke he poa he Keriso. Pete ia, ke aoga mai he lukutoto, kua lata ia lautolu ke fakagahuahua e tua ki ai. (Ioane 3:16, 36) Maeke fēfē ia tautolu ke lagomatai a lautolu ke feaki e tua pihia? Ke he magahala Fakamanatuaga nei, maeke ia tautolu ke fakamalolō a lautolu ke taute e fakaakoaga fakatagata he Tohi Tapu ti fakalataha ke he tau feleveiaaga he fakapotopotoaga fakafaahi tapu. Manamanatu ke he tau lagomatai nā.
3. Liga kamata fēfē e tautolu e fakaakoaga Tohi Tapu ka foaki e uiina ke he Fakamanatuaga?
3 Tau Fakaakoaga Tohi Tapu: Ka uiina e koe e tau tagata fiafia ke he Fakamanatuaga, ko e ha he lali ke kamata e fakaakoaga Tohi Tapu mo lautolu ke he tohi Fakaako he Tohi Tapu? Lali ke fakamaama e kakano he Fakamanatuaga ke he tagata he hafagi ke he lau 206-8 ti fakatutala e mataulu “Kaiaga Afiafi he Iki—Ko e Fakamanatuaga ne Fakaheke e Atua.” Liga maeke ia koe ke fakatutala e vala tala ia he lagataha po ke lagaua e aahi atu, liga he taute e fakaakoaga Tohi Tapu ke he gutuhala. Ka oti e vala tala he taute e koe, liga makai e tagata ke fakatutala e veveheaga 5, “Ko e Lukutoto—Mena Fakaalofa Mua Ue Atu he Atua.” Ka fakatu e fakaako tumau he Tohi Tapu, ti liu ki tua mo e fakatutala e tau veveheaga fā fakamua he tohi.
4. Ko hai ka kamata e tautolu e fakaakoaga Tohi Tapu he magahala nei he Fakamanatuaga?
4 Ko hai ka kamata e tautolu e fakaakoaga Tohi Tapu he fakaaoga e puhala nei? Liga ke he falu he haau a tau kapitiga gahua, tau kapitiga aoga, po ke tau katofia ka talia e tau fakatutalaaga pihia. Liga hohoko atu e tau matakainaga taane ke he tau taane nakai talitonu he tau matakainaga fifine he fakapotopotoaga. Ti lali ke fakaako mo e tau magafaoa nakai Fakamoli haau. Lafi ki ai, to manako a tautolu ke lali pauaki ke foaki e uiina Fakamanatuaga ki a lautolu kua liu gahuahua fakalataha mo e fakapotopotoaga. (Luka 15:3-7) Kia tutuli a tautolu ke lagomatai a lautolu oti pihia ke aoga mai he lukutoto.
5. Maeke fēfē a tautolu ke fakamalolō e tau tagata fakaako Tohi Tapu mo e falu ia lautolu ne fiafia ke hohoko atu ke he tau feleveiaaga he fakapotopotoaga fakafaahi tapu?
5 Tau Feleveiaaga he Fakapotopotoaga: Ko e Fakamanatuaga e feleveiaaga kua hohoko fakamua atu ki ai e tokologa he tau tagata fakaako Tohi Tapu mo e falu ne fiafia. Ka e maeke fēfē ia tautolu ke fakamalolō a lautolu ke aoga mai he falu feleveiaaga he fakapotopotoaga? Ko e Ha Tautolu a Fekafekauaga he Kautu ia Me 2005, lau 8, ne foaki e tau manatu lagomatai nā: “Talahau e mataulu he lauga ma e tau tagata he tapu ia. Fakakite ki a lautolu e tohi ka fakatutala ki ai he Fakaakoaga Kolo Toko mo e he Fakaakoaga Tohi he Fakapotopotoaga. Fakamaama e Aoga Fekafekau Fakateokarasi mo e Feleveiaaga Fekafekau. Ka fai kotofaaga a koe he aoga, liga maeke ia koe ke fakataitai mo lautolu. Tutala ke he tau manatu mitaki lahi ne talahau he tau feleveiaaga. Fakaaoga e tau ata he tau tohi ha tautolu ke lagomatai a lautolu ke fakatino e tau mena fa taute i ai. Mai he fakaakoaga fakamua, uiina a lautolu ke fakalataha.”
6. Ko e heigoa e tau puhala ua ne maeke ke lagomatai e tautolu a lautolu ne loto fakamooli ke aoga mai he lukutoto?
6 Ka tumau a lautolu ne loto fakamooli ke fakaako Tohi Tapu mo e o tumau ke he tau feleveiaaga he fakapotopotoaga, kua mafiti lahi e tupu ki mua fakaagaaga ha lautolu. Ko e mena ia, kua lata ia tautolu ke fakamalolō e falu ke fakaaoga e tau foakiaga fakaagaaga nei mo e ke aoga mai he mena fakaalofa ue atu he Atua—ko e lukutoto.