Tauteute mo e Loto Fiafia ma e Fakamanatuaga
1. He magahala he Fakamanatuaga, ko e magaaho pauaki a ia ke taute e heigoa?
1 Ko e Fakamanatuaga he Aho Ua ia Mati 26, kua foaki mai e magaaho mitaki lahi mahaki ke olioli ke he puhala ne tamai he Atua e fakamouiaga. (Isaia 61:10) Ato hoko e fakamanatu, ko e aga fiafia ka lagomatai a tautolu ke tauteute fakamitaki. Ke he puhala fe?
2. Ko e heigoa ne omoi a tautolu ke tauteute ke fakamanatu e Fakamanatuaga?
2 Tauteute ma e Fakamanatu: Ko e Kaiaga Afiafi he Iki kua uho lahi ka kua mukamuka foki. Ka e aoga agaia ke taute tuai e tau fakatokaaga neke fai mena aoga ka nimo. (Fakatai 21:5) Kua lata ke fifili e tulā mo e matakavi hagahaga mitaki. Lata ke moua e tau mena fakatai kua lilifu. Lata e fale ka feleveia ki ai ke fakameā mo e mautauteute ke fakaaoga. Kua lata e tagata lauga ke mautauteute mitaki, ti ko e tau fekafekau leveki mo e tau lagomatai kua lata ke mautali. Mooli kua fitā e taute e laulahi he tau mena nei. Ko e fakaaue ke he malolō he lukutoto ke fakamoui ka omoi a tautolu ke mautauteute fakamitaki ke lata mo e magaaho tapu nei.—1 Pete. 1:8, 9.
3. Tauteute fēfē e tautolu e tau loto ha tautolu ma e Kaiaga Afiafi he Iki?
3 Tauteute e Loto: Kua latatonu foki ke tauteute e loto ke maama e aoga katoatoa he Fakamanatuaga. (Esera 7:10) Ti lata ia tautolu ke fakatoka taha magaaho ke manamanatu ke he totouaga pauaki he Tohi Tapu he Fakamanatuaga ti manamanatu ke he tau aho fakahiku he moui ha Iesu he lalolagi. Ko e manamanatu fakahokulo ke he aga foaki noa ha Iesu ka omoi a tautolu ke fifitaki ki a ia.—Kala. 2:20.
4. Ha e fe e mena aoga he lukutoto kua foaki ki a koe e fiafia lahi mahaki?
4 Ne fakatokoluga he mate ha Iesu e pule katoatoa ha Iehova. Ti fakatoka mai he agahala mo e mate. (1 Ioa. 2:2) Hafagi ai e puhala ma e tau fakafetuiaga mafola mo e Atua, mo e puhala ke he moui tukulagi. (Kolo. 1:21, 22) Lagomatai foki a tautolu ke fakamalolō e mauokafua ha tautolu ke fakamooli e tukuleleaga ha tautolu ki a Iehova mo e eketaha ke fakatumau ko e tau tutaki he Keriso. (Mata. 16:24) He tauteute a koe mo e fina atu ke he Fakamanatuaga kua tata mai, kia fakalahi atu e fiafia haau!