Loto Fakaaue he Manatu e Lukutoto
1, 2. Ko e heigoa e tau kakano ne ha ha ia tautolu ke loto fakaaue he manatu e lukutoto?
1 He omaoma ke he poakiaga a Iesu, ko e tau Kerisiano he lalolagi katoa to feleveia he mole e toaga laā he Aho Faiumu, Mati 22, 2008, ke fakamanatu e mate ha Iesu Keriso. (Luka 22:19; 1 Kori. 11:23-26) Kua fakalagalaga pihia he loto fakaaue hokulo a tautolu ma e tau mena oti ne fakakatoatoa ke he 1,975 e tau i tuai. He fakatumau e mahani fakamooli katoatoa puhala he mate mamahi he akau fakakikiveka, ne fakatokoluga e Iesu e higoa he Matua haana, he foaki e tali mitaki ue atu ke he tau fakafiu a Satani.—Iopu 1:11; Fakatai 27:11.
2 Ne fakamaligi e Iesu e toto ne aoga ai ke he maveheaga foou, he fakamalolō e tau tagata nakai mitaki katoatoa ke hiki ko e tau tama he Atua, ne ha ha i ai e amaamanakiaga ke pule mo Keriso he Kautu he lagi. (Iere. 31:31-34; Mare. 14:24) Mua atu, ko e hokulo he fakaalofa he Atua ma e tau tagata kua kitia maali he foaki e Tama fakahele haana mo poa, ti tuga ni ne fakamaama e Iesu ki a Nikotemo.—Ioane 3:16.
3. To aoga fēfē ki a lautolu kua o atu ke he Fakamanatuaga?
3 Uiina e Falu: Ko e fufuta ia Ianuari he Ha Tautolu a Fekafekauaga he Kautu ne talahau ke fakamau hifo e tau tagata mahani mo e age ki ai e tau uiina. Kua kamata nakai a koe ke uiina a lautolu ne fakamau hifo e koe? Hane taute nakai e koe e tau fakatokaaga ke fakalataha katoatoa ke he matagahua ka kamata ia Mati 1 ke uiina e tau tagata ke he Fakamanatuaga? Ko lautolu kua o atu to logona e vala tala Tohiaga Tapu ka atihake e tua ke he lukutoto, nukua takitaki ai ke he moui tukulagi.—Roma 10:17.
4. Ko e ha kua lata ia tautolu ke hohoko atu tuai ke he Fakamanatuaga?
4 Ko lautolu oti kua maeke ke pulega ke hohoko tuai atu ke fakafeleveia mafanatia mo lautolu kua talia e uiina pauaki. Ko e tokologa lahi mahaki he tau tagata ka o atu ke he Fakamanatuaga ti kua aoga lahi ma tautolu ke mataala pauaki ki a lautolu ne foou ti pihia mo e falu ne o atu he tau feleveiaaga he falu magaaho.
5. Liga tauteute fēfē e koe e loto haau ma e magaaho nei?
5 Tauteute e Loto Haau: Kua ha ha i loto he Kumikumi e Tau Tohiaga Tapu he Tau Aho Takitaha—2008 mo e 2008 Calendar e setulu ma e totouaga pauaki he Tohi Tapu he Fakamanatuaga, kamata ia Mati 17. He manamanatu ke he tau mena tutupu aoga lahi he tau aho fakahiku he moui a Iesu ke he lalolagi ka lagomatai a koe ke tauteute e loto haau ma e Fakamanatuaga. (Esera 7:10) Manamanatu he liogi ke he tau tala nei he Tohi Tapu ka fakahokulo e loto fakaaue haau ma e fakaalofa ki a Iehova mo e Tama haana he foaki e lukutoto.—Sala. 143:5.
6. Lauia fēfē e atihake he loto fakaaue ha tautolu ma e lukutoto?
6 Hane hoko mai e Fakamanatuaga, kia tauteute fakamitaki e tautolu a tautolu mo e falu ma e magaaho aoga lahi nei. He loto fakaaue he manatu e lukutoto ka fakamalolō e fakafetuiaga ha tautolu mo Iehova mo e haana Tama. (2 Kori. 5:14, 15) To omoi foki a tautolu ke fifitaki a laua he fakakite e fakaalofa foaki noa ma e falu.—1 Ioa. 4:11.