Tau Uiina Fakamanatuaga ke Tufa ke he Lalolagi Katoa!
1. Ko e heigoa e matagahua pauaki he lalolagi katoa kua fakatoka ke taute ato hoko e Fakamanatuaga?
1 “Kia eke e mutolu e mena nai mo fakamanatuaga kia au.” (Luka 22:19) He omaoma ke he poakiaga nei mai ia Iesu, to fakapotopoto e tau tagata tapuaki ha Iehova mo lautolu ne fiafia ia Mati 30, 2010, ke fakamanatu e mate a Iesu. Ko e uiina pauaki ke he Fakamanatuaga to tufa ai ke he lalolagi katoa kamata ia Mati 13 ki a Mati 30.
2. Maeke fēfē a tautolu ke foaki e uiina?
2 Puhala ke Taute Aki: Maeke ia koe ke age ke he lima he tagata he kaina ke kitia e ia e fakatino i mua, ti pehē: “He afiafi ia Mati 30, to totou miliona he lalolagi katoa ka feleveia auloa ke fakamanatu e mate a Iesu. Hoko mai au ke atu he uiina nei ki a koe mo e magafaoa haau ke ō mai. Uiina foki ke he tau kapitiga haau. Fakamolemole mailoga e magaaho mo e matakavi ke taute e fakamanatuaga nei.” Uta ni ke he tuaga, liga fifili e koe ke totou e Luka 22:19 mai he Tohi Tapu ke fakakite age e poakiaga faka-Tohi Tapu. Kia tokaloto, ha kua fakakaupā e magaaho ke taute e fonua ke oti, ti mitaki lahi mahaki ke fakakū.
3. Ko hai ka uiina e tautolu?
3 Ka lahi mahaki e fonua he fakapotopotoaga ha mutolu, maeke he tau motua ke tala atu ki a mutolu ke toka e tau uiina he tau kaina ne nakai moua e tau tagata i ai he magaaho fakamua ka aahi atu a mutolu. Ka latatonu ai, foaki e tau mekasini fakalataha mo e uiina. Mailoga ke uiina haau a tau liu aahi atu, tau tagata fakaako Tohi Tapu, tau kapitiga gahua, tau kapitiga aoga, tau magafaoa, tau katofia, mo e tau tagata mahani.
4. He loto fakaaue ke he fakaalofa a Iehova he foaki e lukutoto ka fakalagalaga a tautolu ke taute e heigoa?
4 Mautauteute ke Fakalataha Katoatoa: Ko e magaaho mitaki lahi mahaki e magahala Fakamanatuaga ke fakalahi e gahua ha tautolu. Maeke nakai a koe ke hikihiki e fakaholoaga haau ke paionia fakakū? Fai fanau po ke tau tagata fakaako Tohi Tapu nakai a koe kua holo fakaagaaga ki mua? Ka pihia, fina atu ke he tau motua ke kitia kua lata nakai a lautolu ne foou ke fakalataha ke he matagahua pauaki nei ko e tau tagata fakailoa nakaila papatiso. He loto fakaaue ke he fakaalofa a Iehova he foaki e lukutoto to fakalagalaga a tautolu ke fakalataha ke he Fakamanatuaga, pihia mo e uiina e tokologa ke fakalataha mai mo tautolu.—Ioane 3:16.