Matagahua Pauaki ke Fakatātā e Fakamanatuaga!
1. Ko e heigoa ka putoia e tau tagata fakailoa he Kautu ke he lalolagi katoa ka kamata ia Mati 21, 2009, ti ko e ha?
1 He Aho Tuloto, Aperila 2009, to fakapotopoto e tau tagata tapuaki ha Iehova ko e Atua ke he lalolagi katoa ke manatu e fakaalofa mua ue atu haana ma e tau tagata. (Roma 5:6-8) Kua amanaki lahi a tautolu ke ha ha i ai mo tautolu e toko miliona ne fiafia ka fakamanatu ai e mate ha Iesu. Ko e uiina pauaki ke he Fakamanatuaga to tufa ke he lalolagi oti, kamata ia Mati 21.
2. Ko e heigoa e tau manatu kua lata ke tokaloto e koe ka foaki e uiina?
2 Tau Manatu ke Tokaloto: Fakaaoga katoa e tau fakataiaga, tau hūhū, mo e kupu tohi ne tū he uiina. Ma e fakatai, liga fakakite e koe e fakatino he kili i mua, ti pehē: “Manako au ke uiina a koe ke fakamanatu mo mautolu e mate ha Iesu ka taute he Aho Tuloto, Aperila 9, 2009.” Ti fakakite e mataulu he uiina mo e tau hūhū i lalo. Kia tala age ke he tagata he fale ke uiina e magafaoa haana mo e falu ka fifili e ia ke tamai.
3. Puhala fe ka liga liu atu a koe ke he uiina ne taute he kamata e matagahua?
3 Ka lahi e fonua he fakapotopotoaga ha mutolu, to liga tala atu e tau motua ki a mutolu ke toka e tau uiina he tau kaina ne nakai fai tagata. He tau matahiku vahātapu, foaki e tau mekasini mo e tau uiina. Taute mo foliaga haau ke uiina e tau liu aahi atu haau, tau tagata fakaako Tohi Tapu, tau magafaoa, tau kapitiga aoga, tau kapitiga gahua, tau katofia, mo e falu tagata mahani. He tau kua mole, taha e matakainaga fifine ne uiina 30 e magafaoa haana ti fakamanatu tumau a ia ki a lautolu ke he aoga he magaaho ia. Kua fiafia lahi a ia he 25 ne fakalataha mai, ti toko 4 ia lautolu ne talia e fakaako Tohi Tapu he magaaho fakamui!
4. Ko e heigoa e tau fakatokaaga kua lata ke taute e tautolu mogonei, ti ko e ha?
4 Fakatoka Mogonei: Tokologa e tagata fakailoa ka liga fakalahi e gahua ha lautolu ia Mati mo Aperila. Ka fai tama po ke tau tagata fakaako Tohi Tapu a koe kua holo mitaki ki mua, liga ko e magaaho mitaki lahi anei ma lautolu ke eke mo tau tagata fakailoa nakaila papatiso. Ko e mogo anei ke kamata taute e tau fakatokaaga ke fai vala katoa he matagahua nei ne fakatātā e fakamanatuaga ke he ua e fakakiteaga mua ue atu he fakaalofa.—Ioane 3:16; 15:13.