Tufa e Tau Uiina he Fakamanatuaga ka Kamata ia Aperila 2

1. To tufa e tautolu a fe e tau uiina ke he Fakamanatuaga he tau nei, ti ko e heigoa e aoga he matagahua nei ne taute lagataha he tau?

¹ Kamata ia Aperila 2 ke he Aperila 17, to tufa e tautolu e tau uiina ke he matagahua kua uho lahi he tau​—ko e Fakamanatuaga he mate he Keriso. He tau magaaho kua mole, tokologa a lautolu ne fiafia kua talia e matagahua lagataha nei he tau. Ma e fakatai, he aho he Fakamanatuaga, taha e fifine ne vilo atu ke he la ofisa mo e pehē: “Ko e hoko mai laia au ki kaina, ti taha e uiina i lalo he gutuhala haaku. Fia manako au ke fano, ka e nakai iloa tonu e tulā.” Ne fakamaama he matakainaga taane e mena ke moua ai e vala tala nei he uiina. Ne fakahiku he fifine e fakatutalaaga haana mo e mavehe, “To fano au ke he matagahua ha mutolu he po a magaaho!”

2. Ko e heigoa ha tautolu ka talahau ka foaki e uiina?

² To Taute Fēfē e Tautolu: Ha kua fakakaupa e tau magaaho ke gahua e fonua, kua mitaki lahi ke fakakūkū. Liga pehē a tautolu: “Fakaalofa atu. Manako a mautolu ke atu ke he magafaoa haau e uiina nei ke he fakamanatuaga uho ne taute lagataha he tau ka fakahoko ke he lalolagi katoa he Aho Tapu, Aperila 17. [Age e uiina ke he tagata he kaina.] Ko e aho ia ko e fakamanatuaga he mate a Iesu. To ha i ai e lauga faka-Tohi Tapu nakai fai totogi ka taute ke fakamaama e puhala kua aoga ki a tautolu e lukutoto he Keriso. Fakakite he uiina nei e matakavi mo e tulā ka taute e feleveiaaga he matakavi ha tautolu.”

3. Uiina fakalaulahi atu fēfē e tautolu e tokologa he tau tagata?

³ Ka lahi e fonua he fakapotopotoaga, to liga fakaatā he tau motua ke toka e uiina he tau kaina ne ai fai tagata, ka ke tuku fakagalo ai. Eketaha ke uiina e tau liu aahi, tau magafaoa, tau kapitiga gahua, tau kapitiga aoga, mo e falu ne fa mahani. Ka fakalataha ke he tufatufaaga nei he tau matahiku faahi tapu, foaki e tau mekasini ka latatonu. Maeke nakai a koe ke paionia fakakū ia Aperila mo e fakalataha fakalahi ke he matagahua fiafia nei?

4. Ko e ha kua manako a tautolu ke o mai a lautolu ne fiafia ke he Fakamanatuaga?

⁴ Ko lautolu kua fiafia ka fakalataha mai, to moua e lautolu e fakamatalaaga malolō lahi! To logona e lautolu e fakaalofa lahi ha Iehova he foaki e lukutoto. (Ioane 3:16) To iloa e lautolu e puhala ka aoga e Kautu he Atua ke he tau tagata. (Isaia 65:21-23) To uiina foki a lautolu ke tutala ke he tau fekafekau mo e ole ma e fakaako Tohi Tapu ke fakaako atu foki. Ko e liogi ha tautolu ke tokologa a lautolu kua loto fiafia ka talia e matagahua nei mo e fakalataha mai mo tautolu he Fakamanatuaga!