Ko e Matagahua ke Fakailoa e Fakamanatuaga ka Kamata ia Mati 17
1. Ko e heigoa e matagahua ka kamata ia Mati 17?
1 Ko e fakamanatu he Fakamanatuaga he tau tau takitaha kua taute ke fakapuloa e mate ha Iesu. (1 Kori. 11:26) Ko e mena ia, kua manako a tautolu ke he falu ke fakalataha mo tautolu ke logona e mena fakaalofa ue atu he lukutoto ha Iehova. (Ioane 3:16) He tau nei ko e matagahua ha tautolu ke uiina e tau tagata ke o mai ke he Fakamanatuaga to kamata he Aho Faiumu ia Mati 17. Amanaki nakai a koe ke fakalataha katoatoa ki ai?
2. Ko e heigoa ka talahau e tautolu ke foaki e uiina?
2 Mena ke Talahau e Tautolu: Kua mitaki lahi mahaki ke taute e fakataitai kū. Maeke a tautolu ke pehē: “Fakaalofa atu. O mai a maua ke atu he uiina nei ke he magafaoa haau ke he fakamanatuaga uho lahi he tau tau takitaha ka fakahoko ke he lalolagi katoa ia Aperila 5. Ko e lauga Tohi Tapu nakai totogi ka foaki ti fakamaama e mena kua taute he mate a Iesu mo e mena hane taute e ia mogonei. Ko e uiina nei kua fakakite e matakavi mo e magaaho he feleveiaaga ka fakahoko ke he matakavi ha tautolu.” Ka fakalataha ke he tufaaga nei he tau matahiku vahā tapu, kua lata foki ia tautolu ke foaki e tau mekasini ka latatonu.
3. Maeke fēfē a tautolu ke uiina e tokologa he tau tagata?
3 Uiina e Tokologa ke Fakalataha Mai: Ko e foliaga ha tautolu ke maeke ke uiina e tokologa. Ti eketaha ke uiina e tau tagata fakaako Tohi Tapu haau, tau liu aahi atu, tau magafaoa, tau kapitiga gahua, tau kapitiga aoga, tau katofia, mo e falu ne mahani. Ko e tau motua he fakapotopotoaga to foaki e takitakiaga ke he puhala ke taute e fonua ha mutolu. Kua fua mitaki e matagahua ha tautolu he tau tau takitaha ke uiina e tau tagata tokologa ke he Fakamanatuaga. He tau kua mole, taha e fifine ne hū atu ke he fale fono, ne lagomatai he fekafekau a ia ke kumi e tagata fakailoa ne uiina a ia. Ka e pehē e fifine nakai iloa e ia ha tagata ti moua e ia e uiina haana mai he taha tagata ne fano he taha fale ke he taha fale he aho ia.
4. Ko e heigoa e tau kakano kua fakalataha fakamakutu ke he matagahua?
4 Liga fai tagata kua hoko atu ke he Fakamanatuaga ha ko e uiina ne toka hifo e koe. He talia po ke nakai talia he tagata, ko e tau laliaga makai haau ko e fakamatala agaia na ia. Ko e tau uiina kua tufa e koe to fakapuloa ko Iesu e Patuiki malolō mogonei. Ko e fakalataha fai vala fakamakutu haau to fakakite ke he tau tagata kitekite oti—lautolu he fonua, tau matakainaga fakailoa, mo e mua atu ko Iehova—kua loto fakaaue hokulo a koe ke he mena fakaalofa he lukutoto.—Kolo. 3:15.