Matagahua ke Fakailoa e Fakamanatuaga ka Kamata ia Mati 1

1. Kamata a fe a tautolu ke fakailoa e Fakamanatuaga, ti ko e ha kua loa fakatote e matagahua he tau nei?

¹ He Aho Faraile ia Mati 1, to kamata e matagahua lagataha he tau ha tautolu ke uiina e falu ke fakalataha mai he Fakamanatuaga mo tautolu. To fakahoko e Fakamanatuaga ia Mati 26, to loa fakatote e matagahua ka fakatatai mo e tau tau kua mole. To tuku age he mena nei ke he tau tagata tokologa ke maeke ke moua e uiina, ti mua atu kaeke kua nonofo a lautolu he matakavi he fakapotopotoaga ne lahi e fonua.

2. Ko e heigoa e tau fakatokatokaaga ke moua e tau lagaki he uiina mo e ke gahua e fonua?

² Ke Tauteute mo e Fakatokatoka: To foaki he tau motua e fakatokaaga ke lata mo e gahua he fonua, putoia e fifiliaga ko e toka nakai e tau uiina he tau kaina ne ai fai tagata. Ka fai uiina ne toe ka oti e gahua he fonua he taha fale ke he taha fale, to maeke ke tufatufa ke he tau toloaga tagata. Ko e leveki fekafekau ka kikite kua loga e uiina kua fita he fakapuke ai e tau fakailoaaga kua toka he fata tohi po ke tau mekasini ma e tau tagata fakailoa ke uta, ka e to nakai tuku mai oti e tau uiina he taha e mogo. Kua lata ni ia tautolu ke uta fakalata e tau uiina ke fakaaoga he taha e faahi tapu.

3. Ko e heigoa kua lata ia tautolu ke tokaloto ka foaki e uiina?

³ Ko e Heigoa ha Tautolu ka Talahau? Mitaki lahi ke fakakū, ti maeke mogoia ia tautolu ke tokologa e tau tagata ka moua. Haia he lau 4 e fakafeleveiaaga fakataitai kua maeke ia tautolu ke hikihiki ke felauaki mo e fonua ha tautolu. Ka e mooli, ua fakatepetepe ke ō ka fiafia po ke fai hūhū e tagata he kaina. Ka taute e matagahua tufatufa he tau matahiku faahi tapu, lata ia tautolu ke foaki e tau mekasini ka hagahaga mitaki. Ia Mati 2, to hagaaki na tautolu ke tufatufa e tau uiina ka e nakai ke kamata e tau fakaako Tohi Tapu.

4. Ko e ha kua lata ia tautolu ke fakamakamaka ke taute e matagahua ia?

⁴ Kua amanaki a tautolu ke tokologa ka fakalataha mo tautolu he Fakamanatuaga. To fakamaama he lauga ko hai mooli a Iesu. (1 Kori. 11:26) To fakamaama e puhala ne lagomatai he mate haana a tautolu. (Roma 6:23) Mo e to fakamaama e kakano ne aoga lahi ai ke manatu e tautolu a ia. (Ioane 17:3) Kia fakamakamaka a tautolu he taute e matagahua ia!