Ko e Uiina Pauaki
1. Magaaho fe ka kamata e matagahua ke uiina ke he tau fonoaga he 2014?
1 Kaeke kua fakatokatoka a koe he kai pauaki ma e tau kapitiga po ke magafaoa, ko e kai ne lahi e gahua mo e tupe ke tauteute aki, to liga makaukau a koe ka uiina a lautolu. Pihia foki, kua lahi e gahua ke tauteute e galue fakaagaaga ka fakatoka mai he ha tautolu a tau fonoaga faahimotu mo e tau fonoaga he lalolagi katoa he 2014. He tolu e faahi tapu to hoko e fonoaga, to moua e tautolu e lilifu ke uiina falu ke fakalataha mai. Ko e heigoa ka lagomatai a tautolu ke fakamakaukau ka foaki e uiina?
2. Ko e heigoa ka omoomoi a tautolu ke fakalataha katoa ke he matagahua?
2 To omoomoi a tautolu ke fakalataha katoa ke he matagahua nei ka manamanatu a tautolu ke he tau mena kua aoga lahi ki a tautolu mai he galue fakaagaaga ka foaki mai e Iehova he tau fonoaga ha tautolu. (Isaia 65:13, 14) Lata ia tautolu ke manatu foki, ko e tau matagahua ha tautolu ne taute lagataha he tau kua fai fua mitaki. Falu tagata ne uiina e tautolu to fakalataha mai mo tautolu ke he fonoaga. Pete ni ko e tokofiha ka o mai, ko e fakamakutu ha tautolu he taute e matagahua ka fakaheke a Iehova mo e fakakite e fakamokoi haana.—Sala. 145:3, 7; Fakakite. 22:17.
3. Tufa fēfē e tau uiina?
3 Igatia e kau he tau motua mo e fifili e puhala ka tufa fakalaulahi he fakapotopotoaga e tau uiina, putoia e lata nakai ke toka he tau kaina ne nakai fai tagata po ke foaki ai ka fakamatala ke he toloaga tagata he matakavi. He tau matahiku faahi tapu kua lata ke foaki e tau mekasini fakalataha mo e uiina ka hagahaga mitaki. Kaeke kua putoia e Aho Faiumu fakamua he mahina mo e tau aho he matagahua, lata ke hagaaki ke he tufa he tau uiina ka e nakai ke kamata e tau fakaako Tohi Tapu. Ka oti e matagahua, ko e fiafia ha ia ha tautolu ke iloa kua makaukau a tautolu he taute ai mo e kua tokologa e tagata ne uiina e tautolu ke fakalataha mo tautolu he galue fakaagaaga ne foaki mai e Iehova!