Ko e Tagata Fakamatala Tumau Nakai a Koe he Kautu?
1 Fiafia oti a tautolu he logona ia Aokuso 1998 kua hokotia ke he tapunu ko e 13,487 he tau tagata fakamatala i Niu Silani. Moli ni kua kautu ha kua kaufakalataha mo e gahua fakamahao tonu ki ai! Ka e hoko he tau mahina ne mui mai, kua uka he falu tagata fakamatala nei ke gahua tumau ko e tau tagata fakamatala he Kautu, ti he avelesi he ono mahina ne mole atu kua kavi ke he 12,388. Fakakite mai he mena nei kua 1 e tagata fakamatala mai he 12 ne nakai hokotaki e fakalatahaaga ke he gahua he fekafekauaga he tau mahina oti. Kua talitonu a mautolu ko e fakamafana ne mui mai kua maeke ke lagomatai ke fakahako e tuaga ia.
2 Fakaaue ke he Kotofaaga: Ko e fakaaue ma e kotofaaga ha tautolu ke fakamatala e tala mitaki he Kautu mo e falu kua lata mo mena uho lahi. Kua fakafiafia he gahua nei e loto a Iehova mo e lagomatai a lautolu ne loto fakamoli ke ako e puhala ke he moui. (Fakatai 27:11; 1 Timo. 4:16) Ko e fakamatalaaga tumau ka fakamakutu a tautolu he gahua he fekafekauaga ti fua mai e loto olioli mo e makaka.
3 Hokotaki e Gahua: Ko e falu ne fakalataha he gahua he fekafekauaga kua fakateaga ke hokotaki e gahua ha lautolu he mogo ne lata. Nakai lata ke manatu kua teao e laliaga ha tautolu ke hokotaki. (Fakatatai Mareko 12:41-44.) Moli ni, kua lata ia tautolu ke hokotaki e gahua ha tautolu ne taute! Ke fakatoka e setulu he kaina, tuga e kalena, ke fakamau hifo e tau magaaho ne fakaaoga he gahua he fekafekauaga to lagomatai ke fakamanatu tumau ke tuku fakamafiti e hokotaki he tau matahiku mahina takitaha.
4 Fakaolo e Lagomatai ne Lata: Liga fa lata ke liu fakatoka fakamitaki e tau fakatokaaga ne fa mahani ke lagomatai a lautolu ne manako ki ai ke holo mau e fakalatahaaga he gahua he fekafekauaga. Kua lata he tohikupu he fakapotopotoaga mo e tau takitaki he fakaakoaga tohi ke fakaaoga e tau tagata fakamatala kua lotomatala he fakamatalaaga ke foaki e lagomatai. Ka fai fanau a koe po ke tagata fakaako Tohi Tapu foki ne aila papatiso ka e fakamatala, fakaako a lautolu ke hokotaki e tau gahua ha lautolu he tau matahiku mahina takitaha.
5 Liu fatiaki mai e tala he moui, “Fakaaue he Moui Fakatuleva he Fekafekauaga a Iehova,” he Oketopa 1, 1997, Watchtower. Na kamata e Matakainaga Ottilie Mydland i Noue e gahua fakamatala tumau he tala mitaki ato papatiso a ia he 1921. Ati 76 e tau he mole, he 99 hana a tau tau he moui, ne pehe a ia: “Kua fiafia a au ha ne maeke agaia a au ke fakamatala tumau.” Ko e aga fulufuluola ha ia ma e tau fekafekau katoatoa a Iehova ke fifitaki!